Tirana ka siguruar shërbimet e sulmuesit kosovar Drilon Hazrollaj, i cili vjen nga Rapid Bukureshti në formë huazimi deri në fund të sezonit.

Eksperienca rumune nuk rezultoi ashtu siç pritej për lojtarin 22-vjeçar, i cili u përball me dëmtime të vazhdueshme. Tani ai synon të shkëlqejë sërish me fanellën e kampionëve shqiptarë, duke rizbuluar formën bindëse që shfaqi dikur te Malisheva.

Negociatat mes palëve kanë përfunduar me sukses dhe bardheblutë kanë arritur të përfshijnë në marrëveshje edhe një klauzolë që u lejon ta blejnë kartonin e futbollistit në mënyrë të përhershme pas përfundimit të huazimit.

“KF Tirana ka kënaqësinë të njoftojë arritjen e marrëveshjes me Drilon Hazrollaj, i cili i bashkohet klubit në formë huazimi nga FC Rapid 1923, me të drejtë blerjeje përfundimtare të kartonit të lojtarit”, bëri të ditur klubi bardheblu përmes një njoftimi për shtyp.

Talenti ofensiv kosovar, i dalë nga radhët e Malishevës përpara se të transferohej te Rapid Bukureshti, i shton trajnerit një opsion më shumë në repartin e avancuar për sfidat e ardhshme. Në komunikatën zyrtare specifikohet se të dy klubet kanë rënë dakord për kushtet që do t’i mundësonin Tiranës finalizimin e transferimit në përfundim të periudhës së huazimit.

The post Drilon Hazrollaj vishet bardheblu, Tirana zyrtarizon huazimin me të drejtë blerjeje appeared first on Albeu.com.

Tirana dhe Rapid Bukureshti kanë arritur marrëveshje për huazimin e sulmuesit Drilon Hazrollaj, por transferimi nuk është përmbyllur ende pasi futbollisti kosovar po shqyrton edhe mundësi të tjera, ka deklaruar menaxheri i tij, Kastriot Telaku, për Telegrafin.

Interesimi i klubit kryeqytetas për 22-vjeçarin ishte raportuar prej disa javësh. Të martën, “ProSport” shkroi se pengesa kryesore lidhej me kërkesat financiare të lojtarit, i cili pretendohej se kërkonte rreth 9 mijë euro në muaj, shumë që Tirana nuk mund ta përballojë.

Megjithatë, Telaku ka sqaruar se vendimi për të ardhmen e Hazrollajt ende nuk është marrë dhe se bisedimet vazhdojnë.

“Jo, marrëveshja ende nuk ka dështuar. Jemi në negociata. Klubet faktikisht janë pajtuar, por ne kemi edhe disa alternativa tjera që po i shohim”, konfirmoi ai.

Pas transferimit në kampionatin rumun, Hazrollaj është përballur me disa dëmtime të njëpasnjëshme, të cilat e kanë kufizuar ndjeshëm në paraqitje dhe minuta të zhvilluara.

Tashmë anësori i ka lënë pas problemet fizike dhe është i gatshëm të tregojë vlerat e tij, qoftë me fanellën e Rapidit apo të një skuadre tjetër.

Hazrollaj e nisi nga stoli ndeshjen e parë të Rapidit në Ligën e Rumanisë, ndaj Sepsit, takim që përfundoi me rezultatin 1-0.

The post Hazrollaj ende pa vendosur për transferimin te Tirana appeared first on Albeu.com.