Pas shpërthimit të epidemisë së shkaktuar nga uji i kontaminuar, në spitalin dhe qendrën shëndetësore të Gostivarit është regjistruar një rritje e re e qytetarëve që kanë kërkuar ndihmë mjekësore.

Të dhënat e Ministrisë së Shëndetësisë tregojnë se më 24 korrik numri i pacientëve ra ndjeshëm në vetëm 80, ndërsa një ditë më vonë, më 25 korrik, u rrit në 125.

Ministria i ka bërë publike këto shifra, por nuk ka dhënë shpjegime për arsyet që mund të kenë ndikuar në rikthimin e trendit rritës.

Fluksi më i madh është shënuar më 18 korrik, kur ndihmë mjekësore kërkuan gjithsej 649 pacientë. Nga 14 korriku deri më 25 korrik, numri i përgjithshëm i personave të paraqitur për trajtim ka arritur në 4070.

Uji në Gostivar vazhdon të jetë i papijshëm, ndërsa pritet që nesër të mund të përdoret për nevoja teknike.

The post Epidemia nga uji i kontaminuar në Gostivar, rritet sërish numri i pacientëve appeared first on Albeu.com.

Në harkun e dhjetë ditëve, 3850 banorë të Gostivarit kanë kërkuar ndihmë në institucionet shëndetësore për shkak të shqetësimeve gastrointestinale.

Megjithëse numri i vizitave mjekësore ka nisur të ulet, vijojnë të ketë pacientë që paraqiten në spital dhe qendra shëndetësore me simptoma të diarresë dhe të vjellave. Autoritetet në vendngjarje po angazhohen dhe sigurojnë se uji i rubinetit do të jetë fillimisht teknikisht i sigurt e më pas plotësisht i pastër në një afat sa më të shkurtër. Në të njëjtën kohë, situata vëzhgohet nga Komisioni për Sëmundjet Infektive, organ këshillimor i Ministrit të Shëndetësisë.

Dr. Zhaklina Shopova, kryetare e këtij komisioni, deklaroi: “Standardi i artë për identifikim bakterial mbetet koprokultura. Siç jeni njoftuar nga Ministri dhe institucionet e tjera relevante, e dini se analizat e koprokulturës aktualisht kanë rezultuar negative për të gjithë pacientët. Kjo nënkupton se, megjithëse kemi praninë e baktereve dhe viruseve, shkaktari kryesor mbetet i paidentifikuar. Askush në botë nuk e ka përcaktuar këtë në epidemi të ngjashme me origjinë ujore, prandaj mos prisni një përgjigje të menjëhershme.”

Specialistja e sëmundjeve infektive theksoi se nuk duhet të ketë vetëkënaqësi as te qytetarët e Gostivarit, as te sistemi shëndetësor, sepse në këto lloj epidemish, më vonë mund të shfaqen infeksione të tjera gastrointestinale dhe sëmundje ngjitëse.

“Si komision, ne e dhamë alarmin me kohë që sistemi të mos qetësohej, pasi është e mundur që krahas këtyre problemeve të zorrëve, të kemi edhe shpërthime të hepatitit A dhe hepatitit E, pra verdhëzës, për të cilat Ministria e Shëndetësisë dhe autoritetet e tjera shëndetësore vendase njoftohen në kohë reale,” shtoi Dr. Shopova.

Sipas informatave të dhëna dje nga Ministri i Shëndetësisë, astrovirusi dhe bakteri shigella janë më të përhapurit ndër banorët e prekur të Gostivarit, por këto agjentë nuk janë identikë në të gjithë pacientët dhe për këtë arsye nuk mund të formulohet një konkluzion përfundimtar.

Ka kaluar dita e pestë që prej shpalljes së epidemisë në Gostivar dhe qytetarëve u ndalohet rreptësisht përdorimi i ujit të çezmës për çfarëdo qëllimi derisa të marrin një njoftim zyrtar nga autoritetet kompetente.

The post Kriza shëndetësore në Gostivar, ekspertët: Pacientët rrezikojnë edhe verdhëzën appeared first on Albeu.com.