Në fakt, një objektiv mund të jetë de fakto i paarritshëm që në fillim. Për shembull, si do të humbasim dhjetë kilogramë ose do të ushtrohemi tre herë në javë në vitin e ri nëse nuk kemi ushtruar fare vitin e kaluar? Ndoshta kjo është arsyeja pse, sipas studimeve të vjetra, 80% e rezolucioneve të “Vitit të Ri” janë braktisur deri në shkurt.

Me pak fjalë, gjithçka është çështje ekuilibri dhe realizmi. Që të mos devijoni nga rutina dhe të arrini qëllimet tuaja, ne ju ofrojmë një guidë realiste, në mënyrë që të vazhdoni të “lulëzoni” këtë vit.

Vendosni qëllime specifike dhe realiste 

Qëllimet abstrakte mund të na bëjnë më të prirur për zvarritje. Pra, në vend të “Unë do të vrapoj sa më shpesh të mundem” vendosni një objektiv “Unë do të vrapoj 15 minuta tre herë në javë”. Është gjithashtu e rëndësishme të vendosni standarde të matshme për të matur përparimin tuaj, të tilla si vrapimi 5 km dy herë në javë deri në prill nga vrapimi dy herë në javë.

Përmirësoni atë që po bëni tashmë 

Përpara se të hidheni në procesin e fillimit të diçkaje krejtësisht të re, reflektoni për atë që shkoi mirë vitin e kaluar dhe vendosni se si dëshironi ta përmirësoni më tej. Duke formuar vendimet tuaja bazuar në përvojat tuaja të së kaluarës, do të keni një ndjenjë më të mirë të standardeve dhe qëllimeve tuaja përfundimtare.

Festoni fitoret e vogla

Duke festuar fitoret tuaja të vogla, do të keni motivimin e rëndësishëm që ju nevojitet për t’iu përmbajtur vendimeve tuaja në planin afatgjatë. Truri ynë është i programuar për t’iu përgjigjur pozitivisht shpërblimeve. Pra, sa herë që shpërblehemi për kryerjen e një sjelljeje të caktuar, truri aktivizon dopaminën. Prandaj, do të ndiheni menjëherë më mirë edhe me një fitore më të vogël!

Jini të durueshëm

Formimi i një zakoni kërkon kohë, nga 3 ditë në 3 javë në 66 ditë, dhe ndonjëherë edhe më gjatë. Çelësi për ta arritur këtë është qëndrueshmëria, domethënë gjetja e një kohe dhe vendi për të krijuar një rutinë rreth vendimit tonë. Por edhe nëse ecim në rrugë të gabuar, është e rëndësishme ta kuptojmë, ta lëmë pas dhe të ecim përpara. Në fund të fundit, rëndësi ka udhëtimi, jo destinacioni.

Ji i sjellshem me veten 

Në fund të fundit, një mënyrë e shkëlqyer për të qëndruar në rrugën e duhur është të shikojmë brenda dhe t’i tregojmë vetes mbështetjen e sjellshme dhe falëse që do t’i tregonim një miku. Dhembshuria për veten është thjesht ta trajtojmë veten me mirësi dhe të kujtojmë se të gjithë jemi njerëz dhe se të gjithë bëjmë gabime.

The post Pesë mënyra për të arritur qëllimet tuaja të Vitit të Ri appeared first on Albeu.com.

Disa studiues të Bankës së Shqipërisë kanë përgatitur një material kërkimor lidhur me ndikimin e monedhave dixhitale në ciklin dhe stabilitetin financiar. Materiali është përgatitur nga zëvendësguvernatorja e dytë, Natasha Ahmetaj dhe specialistët Bledar Hoda, Livia Nikolla dhe Arisa Saqe.

Në studimin e tyre autorët kanë krahasuar monedhat dixhitale të tre kategorive të ndryshme: kriptomonedhat dixhitale me çmim të luhatshëm, kriptomonedhat me çmim fiks ose stablecoins dhe paranë elektronike të bankave qendrore. Krahasimi i tyre është bërë në bazë të kritereve bazike, si lehtësia e kryerjes së transaksioneve, luhatshmëria e çmimit, mundësia e dështimit të tyre dhe lehtësia e aksesit të secilës forme të parasë, për të gjetur atë me përhapje të gjerë në publik.

Mes dy alternativave të monedhave dixhitale private, studimi vlerëson se stablecoins kanë një perspektivë për të gjetur përdorim më të gjerë në publik. Stablecoins janë një klasë e veçantë e kriptomonedhave që garantohen me asete fizike. Në thelb, ato janë një përpjekje për të shkrirë avantazhet e dy llojeve të monedhave: privatësinë dhe lehtësinë e transaksionit të kriptomonedhave dhe qëndrueshmërinë e sigurinë e monedhave tradicionale.

Stablecoins mund të lidhen me vlerën e tregut të një monedhe zyrtare, si për shembull dollari, ose të një aseti, si ari o metale të tjera të çmuara. Një ndër stablecoin më të njohura aktualisht është Tether, që është e garantuar me rezerva dollari amerikan dhe që ka një vlerë tregu që i përgjigjet afërsisht vlerës së një njësie të dollarit amerikan.

Kjo iu jep stablecoins stabilitetin për të cilin ka nevojë një valutë për të shërbyer si mjet këmbimi në afatin e gjatë. Nëse vlera e një monedha ka luhatje shumë të mëdha, (siç është rasti i bitcoin apo kriptovalutave të tjera), kjo e bën atë pak të preferueshme si mjet pagese, sepse subjektet që kryejnë apo pranonjnë pagesa me të do të kishin një pasiguri të lartë për vlerën e saj në kohë.

Stablecoins tentojnë ta shmangin këtë dizavantazh të kriptomonedhave të tjera, por, ana tjetër e medaljes është se lidhja me një valutë tradicionale e bën vlerën e tyre të ndikueshme nga bankat qendrore, duke e përafruar me tiparet e një monedhe tradicionale.

Megjithë avantazhet që kanë kundrejt kriptomonedhave të tjera, të lidhura kryesisht me qëndrueshmërinë e tyre, studimi i Bankës së Shqipërisë konkludon se edhe stablecoins mbartin rreziqe të ngjashme me ato të një tregu financiar tradicional të parregulluar dhe një sfidë për autoritetet kombëtare. Në veçanti, nënvizohet se përhapja e një ekosistemi të stablecoins mund të sfidojë ndërmjetësimin bankar e financiar në tregjet tradicionale financiare, të rritë mundësinë e panikut bankar dhe fenomenit të tërheqjes së menjëhershme të fondeve nga bankat, si dhe të përshkallëzojë transmetimin e goditjeve dhe cikleve financiare midis ekonomive të ndryshme. Në përgjithësi, rreziqet që vijnë nga përdorimi më i gjerë i produkteve dhe shërbimeve të teknologjisë financiare (fintech) janë gjithashtu një burim paqëndrueshmërie për sistemin financiar, sidomos kur institucionet financiare ekspozojnë bilancet e tyre ndaj këtyre produkteve. /Monitor

The post BSH, studim për kriptomonedhat që mund të kenë më shumë mundësi përdorimi appeared first on Albeu.com.