Bashkimi i Sindikatave të Pavarura të Kosovës (BSPK) ka reaguar pas humbjes së jetës së katër punëtorëve të Korporatës Energjetike të Kosovës (KEK), duke u shprehur ngushëllime familjarëve, bashkëpunëtorëve dhe të gjithë punëtorëve të kësaj korporate.

Përmes një komunikate për media, BSPK-ja ka kërkuar që tragjedia të mos shndërrohet në mjet për konflikte mes organizatave sindikale dhe as për sulme ndaj personave të caktuar.

Sindikata ka kundërshtuar deklaratat e zyrtarëve të Sindikatës së Re të KEK-ut, të cilët, sipas BSPK-së, janë përpjekur ta portretizojnë atë dhe kryetarin e saj si indiferentë ndaj sigurisë dhe të drejtave të punëtorëve.

BSPK-ja vlerëson se ndarja dhe fragmentarizimi i sindikatave e zbehin fuqinë përfaqësuese të punëtorëve. Sipas saj, angazhimi sindikal duhet të dëshmohet përmes identifikimit të vazhdueshëm të rreziqeve, avancimit të kushteve të punës dhe marrjes së masave për parandalimin e aksidenteve.

Në reagimin e saj, BSPK ka bërë të ditur se organizata sindikale prej së cilës kanë ardhur deklaratat e fundit nuk është pjesë e saj prej më shumë se dy vjetësh. Për këtë arsye, përfaqësuesit e saj, sipas BSPK-së, nuk kanë autorizim të flasin në emër të Bashkimit të Sindikatave të Pavarura të Kosovës.

Gjithashtu, BSPK-ja ka hedhur poshtë përkufizimin e kryetarit të saj si “i vetëquajtur”, duke theksuar se ai është zgjedhur përmes votës unanime të delegatëve të Kongresit IX të BSPK-së.

Bashkimi i Sindikatave të Pavarura të Kosovës ka njoftuar se do ta vijojë bashkëpunimin me Sindikatën e Pavarur të KEK-ut, Bordin Drejtues dhe menaxhmentin e korporatës, me qëllim përmirësimin e sigurisë dhe kushteve të punës, si dhe përmbushjen e kërkesave të punëtorëve.

“Punëtori nuk mbrohet duke e luftuar sindikalisti sindikalistin. Punëtori mbrohet kur fuqia e organizuar sindikale drejtohet kundër rrezikut, padrejtësisë dhe çdo kushti që cenon të drejtën për punë të sigurt, dinjitet dhe jetë”, thuhet në reagimin e BSPK-së.

The post BSPK apel për unitet pas tragjedisë në KEK: Dhimbja e familjeve të mos shfrytëzohet për përplasje appeared first on Albeu.com.

Bordi i Drejtorëve dhe menaxhmenti i KEK-ut kanë njoftuar se do të ndërmarrin masa të menjëhershme për rritjen e sigurisë industriale dhe mbrojtjen e shëndetit të punëtorëve.

Pas humbjes së jetëve të punonjësve, drejtuesit e Korporatës kanë shprehur dhimbjen e tyre dhe u kanë përcjellë ngushëllime familjarëve, të afërmve, miqve dhe kolegëve të viktimave.

Vendimi është marrë në një mbledhje të jashtëzakonshme të Bordit të Drejtorëve dhe Menaxhmentit të KEK Sh.A., ku menaxhmenti ka raportuar për rrethanat e përgjithshme të ngjarjes. Ndërkohë, në vendin e incidentit po zhvillohen hetime nga organet kompetente dhe ekspertët e forenzikës, ndërsa shkaqet dhe rrethanat e plota pritet të përcaktohen përmes procesit hetimor.

Si pjesë e reagimit institucional, Bordi ka kërkuar që të përcaktohen qartë rolet, përgjegjësitë dhe llogaridhënia e çdo niveli të përfshirë në proceset e sigurisë në punë. Për këtë qëllim, KEK Sh.A. do të krijojë Task Forcën për Sigurinë Industriale dhe Shëndetin në Punë, ku do të angazhohen edhe ekspertë të jashtëm të kësaj fushe.

Task Forca do të shqyrtojë në mënyrë të plotë protokollet, procedurat, standardet dhe mekanizmat ekzistues të sigurisë dhe shëndetit në punë. Synimi është evidentimi i mangësive të mundshme dhe përcaktimi i masave konkrete për përmirësimin e tyre.

KEK-u ka bërë të ditur gjithashtu se vlerësimi i rrezikshmërisë në vendet e punës është kontraktuar gjatë këtij viti dhe aktualisht ndodhet në fazën e zbatimit. Përfundimet e këtij procesi do të përdoren si një nga bazat për hapat e mëtejshëm që synojnë eliminimin dhe uljen e rreziqeve në ambientet e punës.

Bordi dhe menaxhmenti kanë ritheksuar se siguria dhe shëndeti i punëtorëve përbëjnë prioritetin absolut të Korporatës. Sipas tyre, asnjë objektiv operacional apo prodhues nuk mund të vendoset mbi sigurinë dhe jetën e punonjësve.

KEK-u ka njoftuar se në ditët në vijim do të publikojë informacionet për hapat dhe masat konkrete që do të ndërmerren për forcimin e sigurisë industriale dhe shëndetit në punë.

The post Pas humbjes së punëtorëve, KEK krijon Task Forcë për sigurinë industriale dhe shëndetin në punë appeared first on Albeu.com.

Një aksident tragjik në një kantier ndërtimi në Prishtinë, ku një vinç u rrëzua duke i marrë jetën një punëtori të ri dhe duke plagosur një tjetër, ka rikthyer në qendër të vëmendjes shqetësimet për sigurinë në punë në Kosovë.

Kryetari i Sindikatës së Punëtorëve të Sektorit Privat, Jusuf Azemi, në një lidhje të drejtpërdrejtë për RTK-në, e cilësoi humbjen e jetës së të riut si një tragjedi të rëndë për familjen, komunitetin e punëtorëve dhe mbarë shoqërinë kosovare. “Është e tmerrshme kur familja e pret të kthehet në shtëpi dhe përballet me këtë lloj tragjedie”, u shpreh ai.

Azemi ngriti shqetësim edhe për faktin që në vendin e ngjarjes ndodhej një 18-vjeçar, duke theksuar se rasti duhet të hetohet thellë nga institucionet kompetente.

Sipas tij, të dhënat paraprake sugjerojnë se faktori njerëzor ka qenë shkaktari kryesor i aksidentit, ndërsa shtoi se po pret konkluzionet zyrtare nga Inspektorati i Punës, Policia dhe Prokuroria. “Brenda dy a tri ditësh besoj se do të zbardhen të gjitha detajet. Tani për tani mund të themi se shkaku është faktori njerëzor”, deklaroi ai.

Në një kontekst më të gjerë, Azemi theksoi se Kosova “e ka humbur luftën” në raport me vdekjet e punëtorëve në sektorin privat. Ai përmendi se viti 2025 ishte më fatkeqi për punëtorët që nga përfundimi i luftës, ndërsa edhe ky vit ka nisur me një situatë të rëndë.

I pyetur lidhur me deklaratën e Inspektoratit Qendror të Punës se kantieri nuk ishte inspektuar më parë për shkak se ndodhej në fazën fillestare të punimeve, Azemi u përgjigj se edhe pse inspektorët nuk mund të jenë kudo, problemi kryesor mbetet mungesa e sanksioneve të mjaftueshme ndaj kompanive që nuk respektojnë standardet e sigurisë dhe shëndetit në punë.

The post Azemi: Beteja kundër vdekjeve të punëtorëve në Kosovë është e humbur appeared first on Albeu.com.