Punëtorët që humbin vendin e punës pritet të marrin mbështetje financiare përmes Fondit të Sigurimeve Shoqërore.

Krijimi i këtij fondi është premtuar nga kryeministri Albin Kurti gjatë prezantimit të planit qeverisës.

Sipas Kurtit, fondi do të shërbejë për të ndihmuar të papunët, por edhe për të mbuluar pushimin e lehonisë dhe atë prindëror.

“Fondi i Sigurimeve Shoqërore, për ta mbështetur punëtorin pas humbjes së vendit të punës, si dhe për mbulimin e pushimit të lehonisë dhe pushimit prindëror”, tha Kurti.

Kërkesa për themelimin e një fondi të tillë është ngritur prej kohësh nga Sindikata e Sektorit Privat.

Përfaqësuesi i kësaj sindikate, Jusuf Azemi, tha se një fond i sigurimeve sociale është kërkuar prej dekadash, veçanërisht për mbështetjen e punëtorëve që humbin jetën në vendin e punës.

“Ne ka me dekada që kërkojmë që në Kosovë të jetë një fond i sigurimeve sociale. Në rënd të parë një fond do t kishte mjete për puntorët të cilët humbin jetën në vendet e tyre të punës e që nuk është numër i vogël. Realisht ky fond është shumë i nevojshëm, i mjaftueshëm në çdo protestë që e kemi bërë dhe grevë e kemi kërkuar”, deklaroi Azemi.

Megjithatë, në Sindikatën e Sektorit Privat shprehen dyshime se ky premtim do të zbatohet.

Azemi tha se sindikata ka dorëzuar disa herë kërkesa të protokolluara për krijimin e fondit, por deri tani ai nuk është formuar.

“Unë fare nuk besoj që do ta bëjë këtë, kjo është sa për të dalë me një program qeverisës, sepse kemi kërkuar më disa herë më kërkesa të protokolluara që të ndodhë ky fond dhe ky nuk po ndodhë”, theksoi Azemi.

Edhe profesori i ekonomisë, Fidan Qerimi, është skeptik për realizimin e kësaj nisme.

Qerimi kujtoi se Kosova ka një fond të krijuar për sigurimet shëndetësore, i cili, sipas tij, nuk është zbatuar prej gati një dekade.

“Unë uroj që të bëhet ky fond, ne e kemi një fond që është krijuar për sigurime shëndetësore e që nuk po implementohet gati që një dekadë. Uroj që ky fond të bëhet dhe të dilet në ndihmë personave që mbesin pa punë. Më tepër do të duhej që ne si ekonomi të orientohemi ka zhvillimi ka potenciali jonë ekonomik e të shohim një model ekonomik me të cilin ne do ta zhvillonim vendin”, vlerësoi Qerimi.

Gjatë prezantimit të planit, Kurti premtoi gjithashtu pagën e 14-të për punëtorët e sektorit publik dhe pagën e 13-të për punëtorët e sektorit privat.

The post Fondi i sigurimeve shoqërore, premtimi për mbështetjen e punëtorëve pas papunësisë appeared first on Albeu.com.

Një punëtor 49-vjeçar ka vdekur në Veternik të Prishtinës, pasi ka rënë nga lartësia gjatë kohës që po kryente punën e tij.

Rasti është denoncuar rreth orës 10:00, ka bërë të ditur zëdhënësja e Policisë për Rajonin e Prishtinës, Flora Ahmeti.

Sipas Ahmetit, 49-vjeçari nuk ka mundur t’u rezistojë lëndimeve të pësuara dhe ka ndërruar jetë në vendngjarje.

“Viktima mashkull, 49 vjeç, nuk ka arritë të përballojë plagët dhe i njëjti në vendin e ngjarjes ka ndërruar jetë. Vdekjen e viktimës e ka konstatuar ekipi mjekësor në vendngjarje”, ka thënë Ahmeti.

Ekipi mjekësor ka konstatuar vdekjen e viktimës në vendin ku ndodhi ngjarja.

Për zbardhjen e rrethanave të rastit, Policia ka filluar hetimet në bashkëpunim me Prokurorinë dhe Inspektoratin e Punës.

The post 49-vjeçari humb jetën pas rënies në vendin e punës në Veternik appeared first on Albeu.com.

Sindikata e Re e Korporatës Energjetike të Kosovës ka zhvilluar një mbledhje të jashtëzakonshme të kryesisë, ku në fokus ishin aksidentet dhe humbjet e jetëve të punëtorëve në vendet e punës.

Kryetari i kësaj sindikate, Xhelal Jashari, i cilësoi të papranueshme rastet e fundit dhe njoftoi se punëtorët do të protestojnë për të shprehur pakënaqësinë e tyre dhe për të nderuar kolegët që kanë humbur jetën.

“Gjatë ditës së sotme u shqyrtuan kushtet e punës dhe niveli i sigurisë për punëtorët. U vlerësua se gjendja është jashtëzakonisht e rëndë, ndërsa në Korporatën Energjetike të Kosovës mungojnë në masë të madhe pajisjet mbrojtëse dhe masat e sigurisë. Kryesia vendosi të organizojë protesta. Nesër do të zhvillojmë një protestë simbolike, ndërsa të mërkurën tubimet do të mbahen në të tri divizionet, duke nisur nga ora 8:00 e mëngjesit. Përmes tyre do të shprehim kundërshtimin ndaj mungesës së pajisjeve mbrojtëse dhe do të solidarizohemi me familjet e punëtorëve që kanë humbur jetën”, deklaroi Jashari.

Ai shprehu shqetësim për incidentet e fundit, në të cilat jetën e humbën kolegët e tyre.

“Ata erdhën në punë për të dhënë kontributin, djersën dhe maksimumin e tyre, që Kosova të ketë dritë”, u shpreh ai.

Protestat do të zhvillohen në Divizionin e Prodhimit të Qymyrit, si dhe në divizionet e Termocentralit “Kosova A” dhe “Kosova B”.

The post Sindikata e KEK-ut paralajmëron protesta pas vdekjeve të punëtorëve appeared first on Albeu.com.

Vdekjet e fundit të punëtorëve gjatë punës në Korporatën Energjetike të Kosovës kanë nxitur reagimin e përfaqësuesve sindikalë.

Sindikata e Re e KEK-ut ka bërë të ditur se të hënën, më 24 gusht, do të zhvillojë një mbledhje të jashtëzakonshme të kryesisë. Ky takim vjen pas shqetësimeve të vazhdueshme për aksidentet dhe rastet fatale në vendet e punës.

Gjatë mbledhjes pritet të analizohet gjendja e sigurisë në punë, arsyet që çojnë në aksidente, si edhe rastet ku punëtorët kanë pësuar lëndime ose kanë humbur jetën.

Pjesë e diskutimeve do të jetë edhe përcaktimi i qëndrimeve dhe masave për shtimin e presionit ndaj punëdhënësit, me synimin për të rritur nivelin e sigurisë në vendet e punës.

Takimi do të fillojë në orën 08:00 dhe do të mbahet në zyrën e Sindikatës së Re të KEK-ut.

The post Sindikata e Re e KEK-ut thërret mbledhje urgjente pas vdekjeve në punë appeared first on Albeu.com.

Një punëtor ka humbur jetën dhe një koleg i tij është plagosur pas shembjes së një vinçi në një punishte përgjatë rrugës “A” në kryeqytet. Inspektorati Qendror i Punës ka dalë me informacione zyrtare për ngjarjen e rëndë.

Sipas këtij institucioni, tragjedia ndodhi teksa po instalohej një vinç në kantierin e kompanisë “Vëllezërit Asllani”.

Në njoftimin e tyre thuhet se punimet në atë subjekt ishin ende në fazën e hapjes së themeleve, prandaj inspektorati nuk kishte kryer më herët ndonjë vizitë kontrolli. Lidhur me shkakun e aksidentit, autoritetet theksojnë se është ende shpejt për të dalë me një vlerësim përfundimtar. Rrethanat dhe natyra e rastit kërkojnë hetime të thelluara dhe ekspertiza shtesë për të identifikuar arsyet e sakta të rrëzimit, si dhe për të përcaktuar nëse u respektuan rregullat e sigurisë në punë.

Inspektorati bën të ditur se ekipet e tij shkuan pa vonesë në vendin e ngjarjes dhe po vijojnë procedurat inspektuese në bashkëpunim me organet e tjera përgjegjëse.

Në reagimin e tij, Inspektorati Qendror i Punës i shprehu ngushëllimet më të thella familjes së viktimës, të afërmve dhe bashkëpunëtorëve të tij, teksa i uroi shërim sa më të shpejtë punëtorit që mbeti i lënduar gjatë këtij incidenti fatal.

The post Inspektorati Qendror i Punës zbardh detaje mbi aksidentin fatal në Prishtinë, ku ra një vinç appeared first on Albeu.com.

Inspektorati Qendror i Punës ka dhënë sqarime për rastin në Prizren, ku një person humbi jetën pasi ra nga kulmi i një shtëpie.

Sipas informacionit të publikuar, të dhënat e para tregojnë se viktima nuk kishte statusin e punëtorit.

“Sqarim lidhur me rastin e ndodhur në Prizren. Mbrëmë, rreth orës 19:00, pas njoftimit nga Policia e Kosovës, Inspektorati Qendror i Punës (IQP) ka dalë në vendin e ngjarjes së bashku me Policinë e Kosovës. Nga të dhënat fillestare rezulton se viktima nuk ka qenë punëtor”, thuhet në njoftim.

Ngjarja ka ndodhur në një pronë private, ku po zhvilloheshin punime për renovimin e kulmit. Sipas Inspektoratit, viktima nuk ishte pjesë e procesit të punës, por vëllai i pronarit të shtëpisë.

IQP ka bërë të ditur gjithashtu se nuk është konstatuar asnjë marrëdhënie kontraktuale ndërmjet investitorit dhe punëkryesit, si dhe nuk ka pasur marrëdhënie pune sipas përcaktimeve ligjore.

The post Inspektorati jep detaje për vdekjen në Prizren: Personi që ra nga kulmi nuk ishte punëtor appeared first on Albeu.com.

Për këtë arsye, Bashkimi i Sindikatave të Pavarura ka kërkuar që të vihet sërish në zbatim vendimi i Ministrisë së Shëndetësisë, i cili mes tjerash parashihte kufizim të orarit të punës dhe lirim nga puna për disa kategori të caktuara.

Eksperti i sigurisë në punë, Arian Ibishi, i cilëson temperaturat ekstreme si rrezik serioz për shëndetin dhe sigurinë e punëtorëve, ndërsa nënvizon edhe detyrimet që kanë punëdhënësit ndaj tyre.

“Sigurimi i ujit të pijës në sasi të mjaftueshme duhet të jetë kyç, pushime të rregullta në vendet e punës ku mundet me pas edhe hije të freskëta, shmangien e punëve të rënda gjatë procesit të punës”, ka thënë Ibishi.

Për pasojat që mund të sjellë vapa flet edhe mjeku familjar Rushit Ismajli, i cili përmend edhe profesione të tjera që mund të preken nga temperaturat e larta.

‘Ata të cilët punojnë në ndërtimtari, në bujqësi apo edhe në ambiente të mbyllura, në kuzhina edhe kjo mund të shkaktoj që të ngulfaten për shkak të mungesës së avullimit të tyre, mumgesës së largimit të temperaturës, mund të shkaktoj marramendje mund të shkaktoj mundim apo në raste ekstreme edhe humbje të vetëdijes”, ka thënë Ismajli.

Sipas Ismajlit, përveç punëtorëve që ekspozohen drejtpërdrejt ndaj diellit, edhe kategori të tjera mund të përballen me probleme shëndetësore.

‘Ne zakonisht flasim për grupmoshat që janë më të rrezikuara, si fëmijët, gratë shtatëzënat personat me sëmundje kronike sidomos me hipertension por të rrezikuar më shumë janë punonjësit e ndërtimtartisë sepse ata qëndrojnë në temperatura të larta”, ka shtuar Ismajli.

Në dy vitet e fundit, Ministria e Shëndetësisë, kryesisht gjatë muajit korrik, kishte marrë masa kufizuese, duke ndaluar punën nga ora 11:00 deri në orën 17:00.

Me vendim të këtij institucioni, gratë shtatzëna liroheshin nga puna, ndërsa për qytetarët me sëmundje kronike shkurtohej orari i punës.

Nga Ministria e Shëndetësisë kanë thënë për Dukagjinin se deri tani nuk kanë marrë rekomandime nga Instituti Kombëtarë i Shëndetësisë Publike për ndërmarrjen e masave.

Ndërkohë, temperaturat e larta kanë përfshirë tashmë disa vende të Evropës, ku janë raportuar edhe viktima.

The post Rritja e vapës rikthen kërkesat për kufizimin e orarit të punës appeared first on Albeu.com.