Sfidat e sistemit shëndetësor prej vitesh janë thelluar edhe për shkak të mungesës së theksuar të anesteziologëve.

Tani, kjo situatë ka filluar të ndryshojë, pasi Qendra Klinike Universitare e Kosovës dhe spitalet rajonale kanë mirëpritur 25 specialistë të rinj të anestezisë, të cilët pritet të fuqizojnë ndjeshëm kapacitetet profesionale dhe të përmirësojnë drejtpërdrejt cilësinë e shërbimeve ndaj pacientëve.

Drejtori i Klinikës së Anesteziologjisë dhe Mjekimit Intensiv, Ismet Jusufi, tha se ky fluks i ri kuadrosh ka lehtësuar presionin e punës, megjithëse shifrat totale vijojnë të jenë poshtë nevojave optimale për të gjitha repartet kirurgjike.

“Kjo e ka përmirësuar relativisht situatën sa i përket numrit. Nuk është numri që u nevojitet klinikave, duke pasur parasysh kapacitetet e mëdha që kanë, por megjithatë jemi të kënaqur me pranimin e anesteziologëve të rinj. Ata tashmë janë sistemuar nëpër klinika dhe efektet e para të përmirësimit po shihen, pasi është ulur presioni”, u shpreh Jusufi.

Krahas rritjes së numrit të ndërhyrjeve kirurgjike që mund të kryhen, ky plotësim i stafit do të bëjë të mundur edhe administrimin e pushimeve të rregullta vjetore për ekipin aktual, i cili ka funksionuar nën një mbingarkesë të pandërprerë.

“Ajo që është e rëndësishme është se pjesa më e madhe e tyre nuk ka arritur t’i kryejë as pushimet vjetore të vitit 2025. Ngarkesa e madhe në punë ka shkaktuar lodhje të stafit. Tani, me shtimin e tyre, synojmë që të paktën ata që kanë punuar pa pushim të mund t’i shfrytëzojnë pushimet e tyre”, shtoi ai.

Me ardhjen e anesteziologëve të rinj, numri i përgjithshëm i këtyre profesionistëve në QKUK ka shkuar në rreth 60, duke përbërë një hallkë kyçe në çdo procedurë kirurgjike, terapinë intesive, menaxhimin e urgjencave dhe shërbimeve të tjera të anestezisë.

The post Shtohen 25 anesteziologë në sistemin publik, lehtësohet presioni mbi stafet ekzistuese appeared first on Albeu.com.

Në Pogradec një prej subjekteve që operon në ndërtimin e rrugëve, ka angazhuar shtetas indianë në rolet nga inxhinierë e deri në punëtorë të thjeshtë.

Anuj Upadhyay- Civil Engineer: “Kam 2 muaj që punoj këtu, jam inxhinier civil. Njerëzit këtu janë fantastikë, janë të sjellshëm me ne, na ndihmojnë dhe janë shumë bashkëpunues në punë.

Shqipëria është vend fantastik edhe njerëzit po ashtu. Kam dëshirë të qëndroj, nëse kompania më lejon, mund të punoj 8-10 vjet këtu, më pëlqen këtu, vendi është shumë i bukur. Paguajnë edhe shumë mirë”.

Vinay Challapalli – QA/QC Engineer: “Kam gati 5 vite eksperiencë pune si inxhinier. Pse zgjodha Shqipërinë? Së pari krahasuar me shumë vende të tjera të Europës, Shqipëria na jep mundësinë të punojmë me teknologjitë e reja, në Europë nuk është e lehtë të gjesh një punë, ndërsa këtu të mbështesin për të bërë punën.

Këtu janë shumë bashkëpunues dhe kjo më shërben shumë për eksperiencën time. Në Indi ne ndjekim të tjera standarde dhe këtu ka të tjera, por kjo lloj eksperience na shërben shumë”.

Edhe shqiptarët shprehen të surprizuar me përshtatjen e tyre, por dhe angazhimin në detyrat e marra.

Vetëm në këtë kantier pune punojnë 21 indianë, të cilëve krahas kontratave të punës u është siguruar edhe akomodimi.

The post Indianët punësohen në Pogradec, nga inxhinierë e deri në punëtorë të thjeshtë, ja kush po i shtron rrugët e qytetit appeared first on Albeu.com.