punesim Archives - Albeu.com

Agjencia i zhvat 700 euro qytetarit duke i premtuar vend pune në Gjermani

Tau Lanti — Fri, 09 Jun 2023 19:41:50 +0000

Disa herë emisioni “Stop” ka trajtuar problematika, që lidhen me Agjencitë e Punësimit, të cilat pasi u marrin paratë qytetarëve, pa u ofruar shërbimin e premtuar.

E tillë është edhe “Viza Travel Agjensi” me administrator, Hamëz Bytyqi. Anselmo Karaj, tregoi se në vitin 2019 pa një njoftim në Facebook në këtë agjenci, që atëherë quhej “Punësohu.Eu”.

Agjencia ndodhej në Kosovë, pastaj u mbyll atje dhe operon në Shqipëri, Rinas dhe Durrës.

Fillimisht Anselmo pagoi 200 Euro, pastaj 500 euro të tjera për punësim të rregullt në Gjermani. Ndërsa priste takimin në ambasadë, agjencia vetëm i shtynte afatet.

Por kanë kaluar 3 vjet dhe agjencia nuk ka siguruar as dërgimin e qytetarit në Gjermani dhe as i kthen paratë.

“Stop” foli me administratorin Hamëz Bytyqi, i cili pasi u njoh me problematikën, premtoi t’i kthente qytetarit paratë në llogari brenda pak ditësh.

“Javën që vjen e kam autorizuar kontabilistin tonë me aktivizu. Po pra i njëjti pronar jam e nderuar. Përsa i përket rastit të këtij, ky llogaritet rast i mbyllur. Të hënën merr lekët. Ideja është që ne kemi pas disa mosmarrëveshje me atë që ka pas administrator, që ka bashkëpunuar. Tani të dy kanë shkuar në Gjermani dhe më ka mbetur barra mua. Këtij i kthehen 500 Euro, shuma e fundit e paguar. Në marrëveshje shkruhet nëse nuk sigurohet se ka qenë problemi tek datat për takimin e nderume. Nëse ambasada nuk ia cakton ditën për takim do t’i kthehet shuma e fundit e paguar”, tha Bytyqi.

“Stop” kontakton me qytetarin dhe këmbëngul deri në kalimin e shumës së premtuar.

“Falë emisionit “Stop” kjo gjë më në fund u zgjidh”, tha denoncuesi.

The post Agjencia i zhvat 700 euro qytetarit duke i premtuar vend pune në Gjermani appeared first on Albeu.com.

Tkurret forca e punës në Shqipëri, mungojnë zgjidhjet, oferta dhe kërkesa e zhbalancuar

E S — Sat, 10 Dec 2022 06:30:36 +0000

Bizneset në të gjithë sektorët pohojnë se mungesa e punonjësve është problem serioz, për zgjidhjen e të cilit nuk kanë përvojë dhe as mjete. Ekonomia shqiptare, kurrë më parë, nuk është përballur me këtë fenomen.

Qeveria e konsideron emigrimin si një fenomen normal dhe, nga ana tjetër, nuk i ka bërë më të lehta procedurat për sjelljen e punonjësve të huaj në mënyrë të organizuar. Disa biznese e kishin konsideruar si një mjet zëvendësimin e punonjësve shqiptarë me të huaj, por procesi është i vështirë dhe me kosto dhe aktualisht nuk i plotësojnë emergjencat e momentit.

Një rrugë emigrimi me gomone drejt Britanisë këtë vit ka zbrazur vendin me shpejtësi.

Në dhjetëvjeçarin e fundit, popullsia në moshë pune ka përfshirë rreth dy të tretat e së gjithë popullsisë së vendit. Në forcën e punës janë përfshirë 63.6% të popullsisë në moshë pune, rreth 1.3 milionë individë, ndërsa pjesa e mbetur përbën popullsinë ekonomikisht joaktive.

Në vitin 2015, për herë të parë që nga përfshirja e vendit tonë në ekonominë e tregut të lirë, popullsia në moshë pune kapi shifrën 2 milionë. Viti 2018 shënoi frenimin e trendit rritës prej mesatarisht 0.4% në vit, që e karakterizoi këtë tregues nga viti 2009.

Rënia e popullsisë nën 34 vjeç po shënon edhe rënien totale të forcës së punës në vend. Sipas projeksioneve të reja të popullsisë 2019 – 2031, për tre nënndarje të grupmoshës së të rinjve, për vitet 2018-2021, sipas të dhënave të mbledhura dhe projeksioneve të INSTAT, shihet qartë që prurjet e moshave 15-19 dhe 20-24 vjeç paraqesin rënie të dukshme në vijim.

Në fillim të vitit 2022, të dhënat zyrtare mbi popullsinë tregojnë se në grupmoshën 15-29 vjeç pati tkurrje me 27,707 persona vetëm në një vit.

Vitin e kaluar, vendi ynë për herë të parë shënoi shtesë natyre negative, ku vdekjet ishin më të shumta se lindjet, duke e bërë të parikuperueshme humbjen e popullsisë.

Oferta dhe kërkesa për punë e zhbalancuar

Sipas të dhënave të AKPA, në fund të vitit 2021, në Zyrat e Punës rezultojnë të regjistruara 46,544 biznese, prej tyre 2,635 subjekte ose 6% janë regjistruar për herë të parë gjatë vitit 2021. Nga të dhënat e regjistrit të subjekteve të regjistruar si punëdhënës, rezulton se rreth 73% e punëdhënësve janë subjekte me 1 – 5 të punësuar dhe 22% me 6 – 50 të punësuar.

Sipas të dhënave të burimeve administrative, në fund të vitit 2021 rezultonin të regjistruar pranë Zyrave të Punësimit 70,646 Punëkërkues të Papunë nga 92,326 në fund të vitit 2020.

Ndërsa gjatë vitit 2021, janë shpallur 24,965 vende të lira pune në zyrat e punësimit, prej tyre 63% janë siguruar nga vizitat e specialistëve në subjekte, 22% nga vetë raportimet e subjekteve dhe 15% e vendeve të lira janë siguruar në mënyra të tjera. Gjithashtu, prej totalit të vendeve të lira shpallura, 19,244 vende të lira ose 77% e totalit janë poste të reja dhe 5,721, ose 23% e totalit, janë zëvendësime.

Mospërputhja e ofertës dhe kërkesës për punë është e gjithanshme sipas të dhënave nga AKPA. Numri i ofertave për punë mbulon vetëm 29% të numrit të punëkërkuesve të papunë të regjistruar në të gjitha ZP, por nëse në qarqet Tiranë dhe Durrës, kjo shifër shkon përkatësisht 48% dhe 51%, në qarqet Kukës dhe Dibër varion nga 6-12% të totalit të punëkërkuesve të papunë të regjistruar.

Krahasuar me fundin e vitit 2020, numri i vendeve të lira të punës sipas kategorive profesionale ka pësuar rënie në kategoritë e menaxherëve, specialistëve me arsim të lartë, nëpunësve dhe punonjësve të shitjeve dhe shërbimeve, dhe ka shënuar rritje në kategoritë e zejtarëve dhe zanatçinjve dhe profesioneve elementare.

Sipas aktiviteteve ekonomike kanë pësuar rënie informacioni dhe komunikacioni, shërbimet administrative dhe mbështetëse, dhe aktivitete të tjera shërbimi, kanë shënuar rritje industria përpunuese, ndërtimi, transporti, furnizimi me ujë dhe energji elektrike.

60% e të punësuarve në Shqipëri të pakënaqur, 53% mendojnë të emigrojnë

Në vitin 2022 rreth 60% e punonjësve në Shqipëri ishin të pakënaqur me vendin e punës dhe për këtë shkak rreth 53% e tyre planifikojnë të largohen në emigrim. Rezultatet dolën nga sondazh që zhvilloi kompania Ep & Partners Consultancy (EPPC) me 1434 të punësuar në Shqipëri dhe në Kosovë.

Rezultatet treguan se në Shqipëri, niveli i pakënaqësisë së punonjësve ishte shumë më i lartë se në Kosovë dhe kjo gjendje kishte mbetur e pandryshuar që nga viti 2019. Ndërsa në Kosovë shihet një rënie e konsiderueshme e nivelit të pakënaqësisë në punë më 2022 me 43% nga rreth 60% që ishte ky tregues në vitin 2019. Gjithashtu pësoi rënie edhe numri i personave që ishin shumë të kënaqur me vendin punës në 5% më 2022 nga 7% që ishin më 2019.

Në Shqipëri, nga totali i të anketuarve 8% e tyre ishin të pakënaqur me punën që bënin dhe në anën tjetër vetëm 7% e pjesëmarrëse në sondazh ishin shumë të kënaqur. Ekspertët që prezantuan sondazhin vunë në dukje se pakënaqësia në punë mbizotëron te punonjësit shqiptarë dhe kjo ka qenë edhe më theksuar në shkuarën.

Erald Pashaj, administrator dhe themelues i EPPC, tha: “Kënaqësia dhe angazhimi në punë lidhen drejtpërdrejt me rezultatet dhe cilësinë e punës së punonjësit. Me 60% forcë pune të pakënaqur dhe të paangazhuar, largimet janë të shumta, kosto e ripunësimeve dhe zhvillimit është shumë e lartë dhe cilësia e shërbimit të ofruar është mediokër”.

Ndër dhjetë arsyet kryesore të pakënaqësisë në punë në Shqipëri mbizotëron pamundësia për karrierë, mungesa e mundësive për trajnim dhe e treta ishte paga, më tej dominuan vlerësimi, atmosfera dhe respekti.

Në Kosovë, kënaqësia në vendin e punës është përmirësuar ndjeshëm, pasi shumica e punonjësve ndihen mirë me punën që bëjnë. P.sh., nga viti 2019 deri në vitin 2022 pati rënie të konsiderueshme të punonjësve shumë të pakënaqur me punën nga 12% në 4%. Në të njëjtën periudhë, përqindja e punonjësve që ishin shumë të kënaqur në punë arriti në 14% në vitin 2022 nga 9 % në vitin 2019

Niveli i pakënaqësisë është më i lartë në grupmoshat e reja. Nga punonjësit 18-29 vjeç, 63% e tyre ishin të pakënaqur, ndërsa te punonjësit mbi 55 vjeç ishin 57% të pakënaqur. Punonjësit e moshës 30-55 vjeç ishin 58% të pakënaqur.

Në Shqipëri, pakënaqësia është mjaft e përhapur në mesin e administratës publike. Niveli i pakënaqësisë përfshin rreth 70% e punonjësve të administratës dhe 58% të punonjësve në sektorin privat.

88% e punonjësve në Shqipëri janë me kontratë pune përkundrejt 84% që ishin në 2019. Ende 12% e forcës së punës janë të pambrojtur sipas Kodit të Punës në fuqi. Industritë me mungesë kontrate pune janë Shitje me shumicë dhe shpërndarje, Hoteleri, bare dhe restorante dhe Ndërtimi./Monitor

The post Tkurret forca e punës në Shqipëri, mungojnë zgjidhjet, oferta dhe kërkesa e zhbalancuar appeared first on Albeu.com.

74% e kompanive shqiptare planifikojnë të punësojnë të huaj, niveli më i lartë në rajon

E B — Fri, 01 Jul 2022 05:04:32 +0000

Bizneset shqiptare kanë më shumë prirje të punësojnë njerëz nga jashtë vendit në krahasim me vendet e tjera të rajonit (Serbi, Mali i Zi, Kosovë, Maqedoni e Veriut dhe Bosnje).

Barometri i Ballkanit 2022 në anketën me bizneset e rajonit gjeti se, kompanitë shqiptare kishin përqindjen më të lartë të përgjigjeve pozitive për të punësuar punonjës të huaj.

Pyetje se, “Sa gjasa keni të punësoni persona nga jashtë vendit”, 74% e kompanive shqiptare u përgjigjen ‘po’, ndërsa mesatarisht në të gjithë rajonin, 47% e kompanive pohuan se ka gjasa të punësojnë të huaj.

Ballkani por sidomos Shqipëria, po përjeton mungesë të fuqisë punëtore prej mungesave që po krijon emigracioni i të rinjve. Anketa e Këshillit të Bashkëpunimit Rajonal për llogari të Barometrit 2022 ka evidentuar se, kompanitë shqiptare kanë më shumë prirje për të punësuar të huaj.

Tendenca për të punësuar të huaj në Shqipëri dhe shënoi rritje të fortë në barometrin e vitit 2022, pasi një vit më parë vetëm 32% e kompanive shqiptare kishin gjasa ose shumë gjasa për të punësuar të huaj.

Kjo prirje po rritet, për faktin se, Shqipëria ka normat më të larta të emigrimit në raport me popullsinë. Të dhënat zyrtare të INSTAT tregojnë se në vitin 2021 emigracioni neto shënoi 32 mijë persona. Të dhëna më të detajuara tregojnë se shumica (80%) janë nën moshën 34 vjeç.

Nga ana tjetër kërkesa për punonjës në disa sektorë, të tillë si turizmi, ndërtimi dhe industria tekstile po rritet me shpejtësi, për shkak të zgjerimit të aktivitetit.

Kompanitë në të gjitha aktivitetet po vuajnë mungesën e fuqisë punëtore. Për shumicën e tyre, gjetja e punonjësve është kthyer në shqetësim kryesor, ndryshe nga një dekadë kur fuqia punëtore nuk ishte shqetësim i kësaj natyre.

Nga ana tjetër vendet e Rajonit vuajnë nga niveli i lartë i papunësisë. Në vitin 2021 papunësia shënoi mesatarisht 16%. Papunësia në njërën anë dhe kërkesa për punonjës në anën tjetër tregojnë për një mungesë vizioni për të integruar nevojat e tregut të punës me arsimin.

Kërkesat për punësim nga bizneset janë zakonisht për pozicione pa kualifikimin, sidomos në Shqipëri ndërkohë që të papunët e regjistruar në një masë të madhe janë të kualifikuar.

Banka Botërore i ka rekomanduar Shqipërisë të ndryshojë modelin ekonomik nga krahu intensiv i punë në teknologji dhe në punë me vlerë të shtuar./monitor

The post 74% e kompanive shqiptare planifikojnë të punësojnë të huaj, niveli më i lartë në rajon appeared first on Albeu.com.

Vende vakante për punësim, Zvicra dhe Gjermania kërkojnë punëtorë për aeroportet

E S — Wed, 29 Jun 2022 11:48:57 +0000

Kaosi po ndodh tashmë në aeroportet e Zvicrës, veçmas në atë të Cyrihut dhe po thuajse në të gjitha aeroportet e Gjermanisë.

Arsyeja kryesore është numri i vogël i punëtorëve në aeroporte dhe numri i madh i pasagjerëve.

Më së shumti mungesë të personelit në aeroporte ka në shtetin zviceran dhe atë gjerman.

Gjermania njëjtë sikurse Zvicra po synon të sjellë punëtorë të huaj sa më shpejt që të jetë e mundur për të lehtësuar aeroportet e mbingarkuara nga mungesat e stafit gjatë sezonit të verës, sipas një deklarate të zëdhënësit të Ministrisë së Brendshme.

Punëtorët e përkohshëm, të cilëve do t’u ofrohet akomodim dhe një pagë standarde, do të duhet të kryejnë të njëjtat kontrolle sigurie dhe besueshmërie si pjesa tjetër e personelit, si p.sh. mbajtësit e bagazheve. Këto kontrolle në përgjithësi zgjasin rreth dy javë.

Udhëtarët në të gjithë Europën po përballen me radhë të gjata këtë verë, pasi kërkesa për udhëtime është rikthyer plotësisht pas izolimeve të COVID-19. Aeroportet dhe linjat ajrore po hasin probleme me mbajtjen e një numri të mjaftueshëm të punonjësve të për të përballuar krizën.

Sipas shoqatës së aeroportit ADV, rreth një në pesë vende pune në fushën e sigurisë, të check-in dhe në mirëmbajtjen e avionëve është vakant. /Express/

The post Vende vakante për punësim, Zvicra dhe Gjermania kërkojnë punëtorë për aeroportet appeared first on Albeu.com.

“Do të marrë një rritje në detyrë”, 3 shenjat e “preferuara” të qershorit që do t’ ju buzëqeshë fati

E S — Wed, 01 Jun 2022 16:27:49 +0000

Maji ka përfunduar dhe të gjithë mezi presim qershorin, muajin e parë zyrtar të verës. Me solsticin e verës pak “hapa” larg, hyjmë në periudhën më të ngarkuar dhe më aventureske të vitit. Na presin fundjavë në det, pushime, dy ditë me miq në ishuj, festa, akullore dhe shkujdesje. Me heqjen e maskave dhe masave kufizuese, muaji i 6-të i vitit 2022 do të jetë më i miri për disa shenja të zodiakut. Pranvera mund të ketë qenë mjaft e vështirë, por qershori premton t’i shpërblejë.

Binjakët

Mërkuri retrogradë më në fund është kthyer në rrugën e duhur dhe ju filloni të ndjeni veten përsëri. Sidomos nga fillimi i muajit deri rreth mesit të qershorit, do të filloni të qartësoni mendimet tuaja, por edhe mënyrën se si i ndani ato me të tjerët. Pasi të keni arritur të rregulloni mendimet tuaja dhe të riorganizoni veten, tani është koha për të vënë në jetë planet tuaja.

Virgjëresha

Kreativiteti dhe produktiviteti juaj goditi të kuqe. Me Mërkurin retrograd që prek ju, jeni ndjerë të çorganizuar dhe të “humbur”. Me hyrjen e Mërkurit në shtëpinë tuaj të 10-të, atë të karrierës, tashmë do të mund të shihni më qartë disa gjëra dhe të “përqafoni” planet tuaja profesionale. Bashkëpunëtorët tuaj e kuptojnë se kanë nevojë për ju dhe ju tani ndiheni në gjendje t’i drejtoni siç duhet. Ka ardhur koha për të shfaqur talentin dhe njohuritë tuaja. Kjo është një kohë për ta shfrytëzuar ashtu siç do të dëshironit. Nisni një trajnim ose ndonjë kurs nga i cili do të përfitonit në të ardhmen. Sa i përket aspektit profesional, gjasat janë të merrni një rritje në detyrë.

Shigjetari

Në të kaluarën i kushtonit shumë rëndësi marrëdhënieve me të tjerët, por nga 14 qershori filloni ta vendosni veten në kornizë. Ndjenja e lirisë është vendimtare për ju dhe ndërsa flisni me të tjerët, kuptoni se është koha për të rishqyrtuar. A e keni neglizhuar kohët e fundit udhëtimin tuaj personal drejt mençurisë dhe të vërtetës, për hir të marrëdhënieve? Tani është koha për të ripërcaktuar nevojat tuaja në lidhje me partnerin, familjen, miqtë dhe kolegët tuaj./albeu.com

The post “Do të marrë një rritje në detyrë”, 3 shenjat e “preferuara” të qershorit që do t’ ju buzëqeshë fati appeared first on Albeu.com.

Lajm i mirë për shqiptarët, BE do të ofrojë kontrata pune për emigrantët e vendeve jo anëtare

E S — Tue, 03 May 2022 18:31:58 +0000

Si pjesë e paketës, Komisioni ka propozuar gjithashtu rishikimin e direktivës për “lejen e vetme’’, e cila kombinon lejet e punës dhe të qëndrimit për shtetasit që nuk janë pjesë e vendeve të BE-së që lëvizin në BE për punë në një aplikim të vetëm.

Rregullat e reja gjithashtu do t’i lejojnë mbajtësit e lejeve të ndryshojnë punëdhënësin, gjë që do të ”ulte cenueshmërinë ndaj shfrytëzimit të punës”, thotë Komisioni.

Një projekt pilot që fillon me ukrainasit

Nisma të tjera të shpallura javën e kaluar synojnë të trajtojnë mungesat e aftësive dhe të lehtësojnë integrimin në tregun e punës të BE të njerëzve që ikin nga Ukraina.

Deri në verë, Komisioni do të ngrejë një platformë online në mbarë BE-në, për të përshtatur aftësitë dhe kualifikimet e ukrainasve që përfitojnë mbrojtje të përkohshme me punëdhënësit e mundshëm në të gjithë BE-në.

Ky projekt pilot duhet të shtrihet më pas për të gjithë shtetasit që nuk janë pjesë e BE që synojnë të punojnë në Bashkimin Evropian.

Komisioni do të negociojë gjithashtu “partneritete talentesh” me vendet anëtare të BE-së dhe vendet e treta, duke përfshirë skemat e lëvizshmërisë për punë dhe trajnim.

E para prej tyre, me Marokun, Tunizinë dhe Egjiptin, duhet të nënshkruhet deri në fund të vitit, shkruan Dutch News.

Për më tepër, Komisioni planifikon të bjerë dakord për “skemat e lëvizshmërisë së të rinjve” reciproke që lejojnë të rinjtë nga vendet jo anëtare të BE-së të punojnë në BE për një periudhë të caktuar dhe të rinjtë evropianë të bëjnë të njëjtën gjë jashtë BE-së.

Masa të tjera në konsideratë janë skemat e pranimit në mbarë BE-në për themeluesit e bizneseve fillestare dhe sipërmarrësit e teknologjisë, si dhe për punonjësit e kujdesit afatgjatë, një fushë në të cilën shumë shtete anëtare luftojnë për të gjetur personel./abcnews.al.

*KryesoreAktualitetBeKrah PuneLeje Qendrimi AfatgjatePunetore
Të ngjashme

Shefi i BE-së: U bëj thirrje institucioneve të Kosovës të përmirësojnë reagimet ndaj sulmeve që u bëhen mediave

BE pritet të miratojë sanksione shtesë kundër Rusisë, përfshirë embargon ndaj naftës

KE-ja: Platformën europiane e energjisë e hapur për Ballkanin. Vendet e rajonit të ftuara në 5 maj./albeu.com

The post Lajm i mirë për shqiptarët, BE do të ofrojë kontrata pune për emigrantët e vendeve jo anëtare appeared first on Albeu.com.

Punësim në agroindustri, Krifca: Mundësi e mirë për të rinjtë

E S — Sun, 01 May 2022 13:17:07 +0000

Ministria e Bujqësisë dhe Zhvillimit Rural bashkë me Universitetin Bujqësor të Tiranës kanë nënshkruar një marrëveshje tripalëshe me synim integrimin e studentëve më shpejt në tregun e punës gjatë studimeve dhe pas diplomimit të tyre. Të pranishëm në takimin e mbajtur me rastin e nënshkrimit të kësaj marrëveshjeje ishin Ministrja e Bujqësisë dhe Zhvllimit Rural, Frida Krifca, rektori i UBT-së, Fatbardh Sallaku si dhe përfaqëses të agrobizneseve, pedagogë e studentë.

Ministrja bëri me dije se nga takimet e saj të përditshme konstatohet se kompanitë agroushqimore, kompanitë e peshkimit, fermat, njësitë e agroturizmit, kompanitë grumbulluese dhe eksportuese janë të gjitha në kërkim të punonjësve jo vetëm të rinj por edhe profesionistë. Të dhënat tregojnë se nga UBT punësohen, që në vitin e parë pas përfundimit të studimeve, 80% e studentëve, por vetëm 30% e tyre punësohen në profesionin për të cilin kanë studiuar dhe janë diplomuar.

“Sot jemi këtu, në takimin tonë të përmuajshëm, për të ndërtuar zgjidhjen e këtij problemi që dëmton jo vetëm studentët por dhe nuk na lejon të shfrytëzojmë maksimalisht potencialin e bujqësisë. Unë dua që universiteti dhe sektori bujqësor prodhues të punojnë së bashku për të plotësuar kërkesat e njeri tjetrit. Në një anë kemi studentët që duan të punësohen, në anën tjetër kemi kompani që kërkojnë punonjës të specializuar. Ne jemi këtu për të bërë të mundur këtë bashkëpunim i cili jam e sigurt ekziston midis biznesit dhe Universitetit, por që me ndihmën e ministrisë do të jetë edhe më efikas dhe e aplikueshëm. Marrëveshjet që nisim të realizojmë sot janë trepalëshe dhe përmbajnë detyra specifike për secilën palë në mënyrë që përgjegjësitë të jenë të qarta dhe objektivat të matshme”, theksoi ministrja Krifca.

Sipas ministres, për sa i përket Ministrisë së Bujqësisë, do të lehtësohet aksesi për studentët e Universitetit Bujqësor të Tiranës për të gjitha shërbimet për punësim dhe praktika profesionale. Në takim u nënshkruan marrëveshje me disa nga kompanitë lider në tregun e agrobiznesit në Shqipëri./albeu.com

The post Punësim në agroindustri, Krifca: Mundësi e mirë për të rinjtë appeared first on Albeu.com.

Vizitoi laboratorin me unik në Shqipëri madje dhe në rajon, Rama: Ky laborator duhet të gjeneroj të ardhura

A M — Wed, 06 Apr 2022 14:36:28 +0000

Kryeministri Edi Rama vizitoi sot Laboratorin e Ri së bashku me Ministren e Arsimit dhe Sportit Evis Kushi, e cila theksoi se falë këtij investimi është ngritur njëVizitoi laborator unik në Shqipëri, madje edhe në rajon.

“Në këtë fakultet me buxhet të qeverisë shqiptare është financuar një laborator i kërkimit shkencor për inxhinierinë kimike me vlerë 380 mijë euro. Është laborator unik në Shqipëri, madje dhe në rajon. Në kuadër të ndërkombëtarizimit ky laborator mund t’ju shërbejë shumë… Nuk duhet të harrojmë se sapo kemi miratuar tre programe doktorature për Fakultetin e Shkencave të Natyrës dhe ky laborator është kyç për punën e doktorantëve. Avantazhi këtu është që punojnë në këtë laborator 25-30 studentë njëherësh ndërkohë që më parë punonin 4-5.” , u shpreh Ministrja Kushi.

Kryeministri theksoi se laboratori duhet të vihet në funksion të gjenerimit të të ardhurave për universitetin për t’i shërbyer institucioneve të tjera.

“Ky laborator duhet të vihet edhe në shërbim të gjenerimit të të ardhurave për fakultetin për t’i shërbyer institucioneve të tjera, domethënë dhe ne, gjeja që ne kemi parashikuar të paktën për universitetet dhe na takon nga ana jonë ta bëjmë, është në gamën e shërbimeve që ofroni, duhet të bëni një manual për shërbimet që Fakulteti i Shkencave i jep sektorit publik apo sektorit privat.” – u shpreh kryeministri.

Ky laburator do të bëjë të mundur që 25 studentë mund të punojnë për formimin profesional të tyre në degët e kimisë industriale, ushqimore, bioteknologjike dhe inxhinierisë së proceseve kimike.

Rektori i Universitetit të Tiranës zoti Artan Hoxha u shpreh se në këtë fakultet japin kontributin e tyre edhe 15 profesorë nga vendet e Europës Perëndimore.

Kjo infrastrukturë e kërkimit shkencor mund të shërbejë si një laborator rajonal, ku kërkues shkencorë, studentë e pedagoge nga vendet e rajonit do të punojnë së bashku dhe do të shkëmbejnë eksperiencat, njohuritë dhe praktikat në këtë fushë./albeu.com

The post Vizitoi laboratorin me unik në Shqipëri madje dhe në rajon, Rama: Ky laborator duhet të gjeneroj të ardhura appeared first on Albeu.com.

Omicron shkakton mungesë rekord të fuqisë punëtore

E S — Sun, 20 Feb 2022 08:34:24 +0000

Në gjysmën e parë të janarit, rreth 8.8 milionë punëtorë amerikanë duhej të qëndronin në shtëpi, për shkak të infektimit me COVID-19, ose përkujdesjes për dikë që u infektua.

Kjo nuk është vetëm një rritje me mbi dy milionë njerëz nga viti në vit, por edhe mungesa më e madhe e fuqisë punëtore që nga fillimi i pandemisë, siç tregojnë shifrat. Ndërsa dimri i parë e goditi fort fuqinë punëtore në SHBA, me rreth 6.6 milionë punonjës që u detyruan të braktisin punën për shkak të virusit në janar.

Fushata e vaksinimit masiv filloi më 14 dhjetor 2020 dhe deri në fund të janarit, vetëm rreth 37 milionë amerikanë kishin marrë një vaksinë sipas Worldindata. Ardhja e variantit Delta në prill të vitit 2021 u kundërshtua nga një nxitje e përhapur në atë kohë e vaksinimit; më 1 prill, ishin lëshuar afërsisht 180 milionë doza dhe në kulmin e prevalencës së Delta, duke filluar nga gushti 2021, ishin administruar gjithsej 350 milionë vaksina.

Kjo reflektohet edhe në numrin e njerëzve që telefonojnë të sëmurë, me numrat që u rritën në vetëm 4.7 milionë në shtator, pavarësisht variantit shumë më agresiv që dominon infeksionet e reja. Tani, varianti Omicron e ka larguar Delta-n gjatë një muaji, duke përbërë 97 për qind të të gjitha rasteve të reja që nga 19 janari.

Ndërsa Omicron dyshohet se është më pak vdekjeprurës, simptomat e tij relativisht më të buta ende po detyrojnë një numër në rritje njerëzish të qëndrojnë në shtëpi. Kur zbatohet për punonjës thelbësorë gjatë kësaj situate, si profesionistët mjekësorë dhe punëtorët në sektorët e logjistikës, shitjes me pakicë dhe prodhimit, ky zhvillim mund të shkaktojë një numër në rritje të ndërprerjeve në ekonomi në të ardhmen e afërt, duke përkeqësuar më tej ndërprerjet e zinxhirit të furnizimit, mungesë të burimeve dhe valët e dorëheqjes tashmë në vend./ Statista

Politikat botërore, të aplikueshme kudo

– Mungesa për shkak të sëmundjes së lidhur me COVID-19 (përfshirë COVID-in e gjatë) do të regjistrohet si mungesë sëmundjeje nëse punonjësi nuk është në gjendje të punojë nga shtëpia, por nuk do të llogaritet në asnjë procedurë të menaxhimit të mungesës

– Nëse punonjësi është ende në gjendje të punojë nga shtëpia, kjo nuk do të regjistrohet si leje mjekësore dhe pagesa nuk do të regjistrohet si pagesë sëmundjeje

– Nëse punonjësi është shumë i sëmurë për të punuar nga shtëpia, do të llogaritet si mungesë sëmundjeje me pagesë të plotë

– Mungesa e sëmundjes për shkak të COVID-19 nuk do të llogaritet në të drejtën e ndonjë punonjësi për sëmundje

– Punonjësit me simptoma të COVID-19 nuk do të pritet të kryejnë punë në shtëpi

-COVID-i i gjatë përshkruhet si shenja dhe simptoma që zhvillohen gjatë ose pas një infeksioni në përputhje me COVID-19, që vazhdojnë për më shumë se 12 javë. Stafi inkurajohet të informojë punëdhënësin e tyre për simptomat e tyre sa më shpejt që të jetë e mundur dhe me shkrim.

-Individët që kanë një reagim ekstrem ndaj vaksinës COVID-19 dhe zhvillojnë kushte ose përjetojnë përkeqësim të kushteve themelore si rezultat, duhet të marrin të njëjtën mbështetje si anëtarët me COVID të dyshuar ose të konfirmuar me COVID të gjatë

-Kërkesat për punë fleksibël pas infektimit, do të miratohen aty ku është e nevojshme

– Mësuesit që sëmuren nga një sëmundje ngjitëse ose infektive gjatë punës së tyre mund të mungojnë me pagesë të plotë, për aq kohë sa një mjek vërteton infektimin.

– Stafi që duhet të marrë leje për t’u kujdesur për një fëmijë, ose një person tjetër në varësi të familjes, i cili ka simptoma të COVID ose ka rezultuar pozitiv, duhet të marrë pagë të plotë./OBSH

The post Omicron shkakton mungesë rekord të fuqisë punëtore appeared first on Albeu.com.

Suedia po punëson sorrat, ky është misioni i tyre

E S — Mon, 07 Feb 2022 08:50:48 +0000

Sorrat po angazhohen për t’i mbledhur cigaret e hedhura nga rrugët dhe sheshet e një qyteti suedez si pjesë e një nisme për uljen e kostos për këtë punë.

Ato e kryejnë detyrën duke marrë pak ushqim për secilën cigare që e vendosin në një makinë të dizajnuar nga një kompanie e re në Södertälje, afër Stokholmit, shkruan The Guardian.

“Ata janë zogj të egër që po marrin pjesë vullnetarisht”, tha Christian Gunther-Hanssen, themelues i kompanisë “Corvid Cleaning”, e cila qëndron prapa kësaj metode kreative.

Fondacioni “Mbaje Suedinë të Pastër” thotë se më shumë se një miliard cigare të harxhuara lihen në rrugët e Suedisë çdo vit, duke përbërë 62 për qind të të gjitha mbeturinave. Qyteti ku po realizohet projekti shpenzon 20 milionë krona suedeze ose rreth 1.9 milion euro për pastrimin e rrugëve.

Gunther-Hanssen vlerëson se metoda e tij do të mund të kursente të paktën 75 për qind të kostos që ka të bëjë me mbledhjen e cigareve të harxhuara në qytet.

Autoritetet lokale janë duke zhvilluar fillimisht një pilot-projekt para se ta marrin vendimin potencial për zbatimin e kësaj metode në tërë qytetin.

The post Suedia po punëson sorrat, ky është misioni i tyre appeared first on Albeu.com.