Aktivistët e nismës “Jo në emrin tim” janë paraqitur pranë banesave të kryetarëve të grupeve parlamentare të LVV-së, PDK-së dhe AAK-së, përkatësisht Arbërie Nagavcit, Arian Tahirit dhe Besnik Tahirit. Ata kanë kërkuar përgjegjësi për zvarritjen e votimit të ndryshimeve në Ligjin për Dhomat e Specializuara.

Protestuesit u kanë bërë thirrje drejtuesve të grupeve parlamentare që të ndërmarrin hapa konkretë, duke siguruar votat e deputetëve për shqyrtimin dhe miratimin e projektligjit pa vonesa.

Sipas tyre, Kuvendi duhet ta zhvillojë sa më shpejt seancën përkatëse dhe ta votojë këtë projektligj, të cilin e shohin si të domosdoshëm për mbrojtjen e UÇK-së dhe çlirimtarëve.

Protesta është zhvilluar në një moment kur kanë mbetur më pak se 72 orë nga përfundimi i afatit për zgjedhjen e presidentit. Nisma vlerëson se, në rast se presidenti nuk zgjidhet dhe vendi shkon në zgjedhje, ekziston rreziku që projektligji të mos miratohet nga përbërja aktuale e Kuvendit.

Kërkesa e “Jo në emrin tim” mbetet që seanca të thirret dhe të votohet ligji, për të cilin iniciativa thotë se synon mbrojtjen e UÇK-së.

The post Nisma “Jo në emrin tim” kërkon nga Nagavci dhe Tahirët: Thirreni seancën dhe miratojeni ligjin për UÇK-në appeared first on Albeu.com.