Larg nga fushëbetejat e Ukrainës, një front tjetër i luftës së Rusisë po shpaloset në Ballkan, ku Moska ka qenë duke u përpjekur që t’i shfrytëzojë tensionet nacionaliste kundër aspiratave të vendeve të këtij rajoni për të hyrë në Bashkimin Evropian. Zëdhënësja diplomatike e Rusisë, Maria Zakharova, rishtazi i krahasoi protestat në Serbi, me të cilat po denoncohej mashtrimi i pretenduar në zgjedhjet e 17 dhjetorit, me ato në Sheshin “Maidan” në Kiev më 2014 – të cilat çuan në ardhjen në pushtet të udhëheqësve pro-perëndimorë në Ukrainë.

Që nga shpallja e rezultateve të këtyre zgjedhjeve të parakohshme parlamentare, qindra protestues çdo ditë i kanë sfiduar forcat e sigurisë për të protestuar kundër parregullsive të vërejtura zgjedhore. Përderisa rezultatet zyrtare tregojnë një fitore prej 46,72 për qind për nacionalistët e Partisë Progresiste Serbe të Aleksandar Vuçiqit, vetëm 23,58 për qind shkuan për koalicionin pro-evropian, Serbia Kundër Dhunës, shtatë prej udhëheqësve të së cilit janë në grevë urie.

Vëzhgues nga Organizata për Siguri dhe Bashkëpunim në Evropë (OSBE), Parlamenti Evropian e Këshilli i Evropës kanë denoncuar parregullsi serioze, përfshirë “blerjen e votave” dhe “mbushjen e kutive të votimit”. Presidenti serb, megjithatë, ka këmbëngulur se zgjedhjet “ishin më të sinqertat […] në historinë e re të Serbisë” dhe ka akuzuar “shtete të huaja të fuqishme” se janë munduar “ta destabilizojnë vendin”.

Operacioni Komando në Kosovë

Ky kontekst helmues e pasqyron strategjinë e Vuçiqit për tension, duke i vërtetuar dyshimet në rritje për orientimin Evropian të Serbisë. Duke qenë në pushtet për gati dhjetë vjet, presidenti e ka shfaqur admirimin e tij për ish-diktatorin Sllobodan Millosheviq, i cili vdiq para përfundimit të gjykimit për krime kundër njerëzimit e gjenocid.

Vuçiqi nuk e ka braktisur ambicien e tij për ta rimarrë kontrollin e Kosovës – pavarësinë e të cilës ai nuk e ka pranuar kurrë që nga shpallja e saj më 2008 – siç do të dukej se tregonte operacioni i ndërprerë serb i komandove në shtator. Përfundimisht, edhe pse ai është president i një shteti që është kandidat për anëtarësim në BE (nga e cila ai ka marrë fonde), ai ka refuzuar që të rreshtohet me sanksionet evropiane kundër Rusisë dhe e ka ndërprerë zbatimin e reformave që kërkohen nga blloku.

Evropianët kishin besuar për kohë të gjatë se lidhjet tregtare të Serbisë me BE-në, si dhe zhvillimi ekonomik i vendit, do të ngadhënjenin në fund para retorikës nacionaliste të Vuçiqit. Ata tani kanë çdo arsye për ta shikuar lojën e tij të dyfishtë me kujdes. Franca, në veçanti, është e lidhur me ambicien për ta ankoruar Ballkanin – dhe rrjedhimisht Serbinë – në BE. Kjo dilemë është gjithçka tjetër pos e lehtë, sepse sa më larg që duket të jetë distancuar hyrja e Serbisë në BE, aq më shumë Rusia dhe Kina e kanë shfrytëzuar situatën për t’i çuar përpara interesat e tyre.

Prapëseprapë, shembulli i vendosur nga Hungaria e Viktor Orbanit, e cila ka synuar që të veprojë si “kalë i Trojës” i Rusisë brenda BE-së, duhet t’i nxisë shtetet anëtare që të kërkojnë pëlqim drastik e të pakthyeshëm me sundimin e ligjit, për ta parandaluar Beogradin që një ditë ta përsërisë të njëjtën taktikë. Evropianët e dinë nga historia e vet që rreziqet e një krize në Ballkan mund të kenë pasoja katastrofale, shumë përtej vetë këtij rajoni. Në sfondin e tensionit të përkeqësuar nga agresioni i Rusisë në Ukrainë, ata duhet të jenë vigjilentë për ekceset e presidentit serb.

The post Mediat franceze: Serbia, lojë të rrezikshme të dyfishtë! Vuçiç nuk heq dorë nga ambicia për të rimarrë Kosovën appeared first on Albeu.com.

Grupi opozitar ‘Serbia Kundër Dhunës’ ka organizuar protesta që nga zgjedhjet e 17 dhjetorit, duke thënë se ka pasur mashtrime zgjedhore, veçanërisht në kryeqytetin, Beograd.

Populistët qeverisës u shpallën fitues të zgjedhjeve parlamentare dhe të këshillave vendore.

Disa politikanë të opozitës reaguan duke hyrë në grevë urie.

Të dielën në mbrëmje, protestuesit u përpoqën të hynin në Kuvendin e Beogradit, duke thyer xhamat, përpara se policia t’i kthente duke përdorur gaz lotsjellës, sprej piper dhe shkopinj.

Më shumë protesta u mbajtën mbrëmjen e së hënës. Qindra u mblodhën jashtë selisë së komisionit shtetëror zgjedhor në Beogradin qendror përpara se të ecnin drejt selisë së policisë së qytetit, ku besohet se mbahen mbështetësit e opozitës të ndaluar.

Përfaqësuesit e Serbisë kundër dhunës kanë thënë se nuk do t’i njohin rezultatet e zgjedhjeve, duke kërkuar në vend të kësaj që votimi të anulohet dhe të mbahet sërish në zgjedhje të lira dhe të ndershme. Aleanca javën e kaluar i kërkoi BE-së të hetojë rezultatet pasi vëzhguesit ndërkombëtarë thanë se votimi u mbajt në “kushte të padrejta”.

Ambasadori amerikan, Christopher Hill, i cili është kritikuar nga opozita për deklaratat e tij të supozuara pro-qeveritare, denoncoi të hënën “dhunën dhe vandalizmin” gjatë protestës së së dielës.

Në X, Hill shtoi se “legjitimiteti i proceseve demokratike varet nga transparenca dhe nga gatishmëria e të gjitha palëve, fituese apo humbëse, për të respektuar vullnetin e popullit të shprehur në kutinë e votimit”.

Zyrtari i lartë i policisë Ivica Ivkoviç u tha gazetarëve se të arrestuarit po përballeshin me akuza për nxitje të ndryshimit të dhunshëm të rendit kushtetues, në lidhje me përpjekjen për të përmbysur qeverinë, dhe sjellje të dhunshme. Ai shtoi se tetë oficerë u plagosën, duke përfshirë disa në gjendje të rëndë

Opozita tha se policia përdori forcë të tepruar dhe rrahu disa nga mbështetësit e saj.

Gjithashtu të hënën, disa qindra studentë universiteti dhe qytetarë të tjerë bllokuan trafikun në një rrugë kyçe të Beogradit që pret selinë e qeverisë, duke kundërshtuar një paralajmërim të policisë kundër bllokadave në kryeqytet. Nuk u raportuan incidente.

Policia “është e gatshme dhe e aftë të kundërshtojë çdo akt dhune me vendosmëri”, tha Ivkoviç.

Partia Progresive Serbe, e cila fitoi zgjedhjet, ka mohuar manipulimin e votave dhe këmbëngul se fletëvotimet ishin të drejta pavarësisht kritikave nga vëzhguesit ndërkombëtarë dhe vëzhguesit e zgjedhjeve lokale.

Presidenti serb, Aleksandar Vuçiç, i përshkroi protestat e së dielës si një përpjekje për të rrëzuar qeverinë me ndihmën e jashtme, pa specifikuar se çfarë do të thoshte. Kryeministrja e Serbisë, Ana Brnabiq, falënderoi Rusinë vonë të dielën për informimin e Serbisë përpara protestave të dhunshme kundër rezultateve.

Vuçiç ka “prova të pakundërshtueshme” se perëndimi po inkurajon protestat e opozitës, tha ambasadori rus, Aleksandr Botsan-Kharchenko për mediat ruse pas takimit me Vuçiçin të hënën.

Përfaqësuesit e disa organeve ndërkombëtare mbikëqyrëse të të drejtave që vëzhguan zgjedhjet raportuan parregullsi të shumta gjatë votimit, duke përfshirë raste të votave të blera dhe mbushje të kutive të votimit. Ata gjithashtu vunë në dukje kushte të padrejta për kandidatët e opozitës për shkak të paragjykimeve mediatike, abuzimit të burimeve publike nga partia në pushtet dhe Vuçiçit që dominonte fushatën e partisë në pushtet dhe kohën e medias të ndarë për kandidatët, pavarësisht se nuk mori pjesë vetë në zgjedhje.

The post Protesta për kundërshtimin e rezultateve të zgjedhjeve, policia serbe arreston 38 persona appeared first on Albeu.com.