Aleksandar Jakshiq nga Zubin Potoku dhe Branimir Mihajlloviq, me origjinë nga Vushtrria e me banim aktual në Mitrovicën e Veriut, thonë se brenda pak orësh humbën objektet pranë liqenit të Ujmanit, në të cilat kishin investuar për vite. Të dy janë të bindur se pronat u përkisnin atyre.

Ata deklarojnë se ndërtimet i kishin realizuar duke u mbështetur në dokumentacionin që posedojnë në sistemin juridik të Serbisë. Institucionet e Kosovës, ndërkaq, i trajtojnë objektet si ndërtime pa leje mbi tokën që menaxhohet nga ndërmarrja publike “Ibër-Lepenci”.

Pas rrënimeve, Jakshiqi dhe Mihajlloviqi kërkuan drejtësi edhe pranë institucioneve të Kosovës. Sipas tyre, nuk u është sqaruar se mbi cilën bazë ligjore kishte filluar largimi i objekteve. Ata thonë gjithashtu se nuk kishte vendim gjyqësor, ndonëse tashmë kishin nisur procedurën për përcaktimin e pronësisë.

Për Jakshiqin, shembja e hotelit “Jezero” në Ujman përfaqëson shumë më tepër sesa humbjen e një ndërtese. Ai thotë se, për vetëm disa orë, u shkatërrua ajo që familja e tij kishte krijuar gjatë pothuajse 20 vjetëve.

Në një deklaratë për Radion Evropa e Lirë, ai tha se së bashku me motrën dhe pjesëtarët e tjerë të familjes kishin hequr dorë nga shumë gjëra për ta ngritur hotelin. Sipas tij, familja kishte investuar gjithçka aty, ndërsa prindërit kishin vënë në atë objekt gjithë kursimet dhe mundin e tyre.

Kritikat e bashkësisë ndërkombëtare

Rrënimi i ndërtimeve në afërsi të liqenit të Ujmanit nxiti reagime kritike nga bashkësia ndërkombëtare, e cila u kërkoi autoriteteve kosovare ta ndalnin menjëherë aksionin. Kritika kryesore lidhej me faktin se pronarët, pasi ishin njoftuar të largoheshin nga pronat, kishin hapur procese gjyqësore. Për këtë arsye, u vlerësua se duhej pritur përfundimi i procedurave në gjykatë.

Drejtori i ndërmarrjes “Ibër-Lepenci”, Faruk Mujka, ka paraqitur një qëndrim tjetër. Ai tha se institucioni që drejton është i detyruar me ligj ta ruajë pronën nën administrimin e tij. Sipas Mujkës, informacionet e grumbulluara tregojnë se pjesa më e madhe e objekteve ishte ndërtuar gjatë viteve 2019 dhe 2020.

Ai argumentoi se këto ndërtime nuk mund të legalizoheshin nëpërmjet Ligjit për trajtimin e ndërtimeve pa leje, pasi ky ligj kishte hyrë në fuqi në shtator të vitit 2018.

Pronarët e kundërshtojnë këtë version, duke këmbëngulur se objektet e tyre ishin ngritur afro 20 vjet më parë dhe, rrjedhimisht, përpara hyrjes në fuqi të ligjit.

Humbja e tretë për Branimir Mihajlloviqin

Branimir Mihajlloviqi e përshkruan rrënimin si herën e tretë që mbetet pa gjithçka që kishte krijuar përgjatë viteve.

Ai ka lindur në Vushtrri, por u largua prej andej pas luftës së vitit 1999. Më pas u vendos në fshatin Frashër, afër Mitrovicës, ku kishte shtëpinë e familjes. Sipas tij, ajo shtëpi u dogj gjatë trazirave të marsit 2004.

Aktualisht, Mihajlloviqi banon në një apartament që i është dhënë për shfrytëzim nga Komuna e Mitrovicës së Veriut. Për këtë arsye, vikendica në afërsi të Ujmanit kishte për të një vlerë që shkonte përtej funksionit të një vendi për pushime.

Ai thotë se për 19 vjet kishte investuar gradualisht në të, duke kursyer edhe nga ushqimi për ta përfunduar ndërtimin.

Përplasja rreth pronësisë së tokës

Aleksandar Jakshiq këmbëngul se parcela ku ndodhej hoteli “Jezero” i takon familjes së tij dhe se objekti ishte ngritur në fillim të viteve 2000.

Ai pretendon se dokumentet që vërtetojnë pronësinë gjenden në sistemin juridik serb. Duke u bazuar në to, Jakshiqi ka hapur një kontest gjyqësor pranë institucioneve të Kosovës, ndërsa seanca e parë është planifikuar të mbahet më 12 gusht.

Sipas tij, vetëm gjatë ditëve të fundit kishte kuptuar se autoritetet e Kosovës ia kishin ndryshuar destinimin tokës ku ishte hoteli që në vitin 2018. Jakshiqi thotë se ky ndryshim tani e pengon të pajiset me dokumentet përkatëse në sistemin kosovar.

Ai kundërshton pretendimin se familja e tij e kishte uzurpuar pronën, duke pyetur se përse autoritetet nuk kishin vepruar gjatë gjithë këtyre viteve. Jakshiqi thotë se nuk do ta kishin nisur ndërtimin nëse toka nuk do të ishte e tyre dhe nëse nuk do të kishin pasur dokumentacion.

Sipas tij, familja nuk kishte marrë asnjëherë njoftim për ndryshimin e destinimit të parcelës. Ata pretendojnë se për këtë vendim mësuan vetëm pasi nisën të merrnin aktvendimet për rrënimin e objekteve përreth liqenit.

Branimir Mihajlloviqi, nga ana tjetër, deklaron se tokën e kishte marrë në shfrytëzim për 99 vjet në vitin 2006 nga ndërmarrja publike serbe “Srbijashume”, përkatësisht Ndërmarrja Publike e Serbisë për Menaxhimin e Pyjeve Shtetërore. Ai thotë se qiranë ia kishte paguar rregullisht kësaj ndërmarrjeje.

Gjatë vitit 2024, kur Kosova nisi mbylljen e institucioneve që vepronin brenda sistemit të Serbisë, me arsyetimin se ishin struktura paralele dhe të paligjshme, Mihajlloviqi u përpoq ta rregullonte statusin e pronës në sistemin juridik të Kosovës.

Vitin e kaluar ai dorëzoi kërkesë për legalizimin e objektit. Sipas Mihajlloviqit, ishte i gatshëm që në të ardhmen pagesën e qirasë t’ua bënte institucioneve kosovare.

Pavarësisht kësaj, vikendica iu rrënua më 21 korrik. Ndërkohë, ai mori edhe një gjobë prej 2.000 eurosh për ndërtim pa leje.

Mihajlloviqi kërkon të dijë përse institucionet e Kosovës zgjodhën që aksionin kundër ndërtimeve pa leje ta nisnin pikërisht në veri të vendit, zonë ku shumicën e popullsisë e përbëjnë serbët.

Pas reagimeve ndërkombëtare për rrënimet në Ujman, Ministria e Mjedisit, Planifikimit Hapësinor dhe Infrastrukturës deklaroi se ndërhyrja bën pjesë në një plan më të gjerë për mbrojtjen e burimeve ujore. Ministria paralajmëroi se largimi i ndërtimeve pa leje do të vazhdojë në të gjithë Kosovën.

Ministrja në detyrë, Fitore Pacolli, bëri të ditur se deri tani në zonën pranë liqenit të Ujmanit janë hequr 17 objekte.

Çfarë përcakton ligji për rrënimin?

Eksperti i çështjeve pronësore, Korab Dibra, kishte shpjeguar më herët për Radion Evropa e Lirë se neni 23 i Ligjit për Pronën Publike e përcakton qartë pamundësinë e përfitimit të pronësisë publike përmes posedimit afatgjatë ose ndërtimit të një objekti në kundërshtim me rregullat për të drejtën e ndërtimit.

Sipas Dibrës, kjo dispozitë e përjashton fitimin e pronësisë mbi një pronë publike kur ndërtimi është kryer pa leje, edhe nëse është dorëzuar një kërkesë për legalizimin e tij.

Ai ka shtuar se ligji i njeh ndërmarrjes “Ibër-Lepenci” si të drejtën, ashtu edhe detyrimin për ta mbrojtur pronën që menaxhon nga çdo ndërhyrje e paautorizuar e palëve të treta.

Megjithatë, Dibra ka theksuar se organi përgjegjës nuk mund ta zbatojë vendimin për rrënim për aq kohë sa një ankesë ose kërkesë për legalizim vazhdon të jetë në shqyrtim.

Ai ka sqaruar gjithashtu se ligji nuk i jep “Ibër-Lepencit”, apo ndonjë ndërmarrjeje tjetër publike, kompetencën për t’i shembur vetë objektet. Sipas tij, këtë përgjegjësi e kanë institucionet përkatëse: komuna për ndërtimet e kategorisë së parë dhe të dytë, kurse ministria kompetente për ato të kategorisë së tretë.

Meqë shtëpitë dhe vilat klasifikohen si objekte të kategorisë së parë, Dibra thotë se vetëm komuna mund të lëshojë leje ndërtimore dhe të marrë vendime për rrënimin e tyre.

Kryetari i Komunës së Zubin Potokut, Millosh Peroviq, kishte thënë më herët se organet komunale nuk kishin dhënë miratim për shembjen e shtëpive dhe vikendicave në Ujman. Ai kishte kërkuar që çështja të zgjidhej përmes një kompromisi.

Megjithëse pranon se nuk ka shumë shpresë për rezultatin e procesit gjyqësor mbi përcaktimin e pronësisë, Aleksandar Jakshiq thotë se do ta vazhdojë betejën. Ai paralajmëron se objekti do të ndërtohet sërish, madje më i bukur dhe më i mirë se më parë.

Të njëjtin vendim shpreh edhe Branimir Mihajlloviqi. Ai thotë se nuk ka ndër mend të largohet nga Kosova. / REL

The post Pas rrënimeve në Ujman, pronarët: Investimet e gati dy dekadave u zhdukën për disa orë appeared first on Albeu.com.

Sipas uniformave blu, shkaku i përplasjes ka qenë një mosmarrëveshje pronësie.

Nga ana e Komisariatit të Policisë Pukë, specialistët e Hetimit të Krimeve vunë në pranga në flagrancë shtetasit I. Sh., 67- vjeç, F. Sh., 36-vjeç (i biri i 67-vjeçarit) dhe G. I., 34-vjeç. Gjithashtu, materialet i kaluan Prokurorisë për të proceduar në gjendje të lirë P. I., 60-vjeç dhe bashkëshorten e tij, F. I., 43 vjeçe, e cila rezulton motra e G. I. Të gjithë personat e përfshirë janë banorë të fshatit Dedaj.

Hetimet paraprake tregojnë se konflikti shpërtheu mbrëmjen e së mërkurës, ku palët u përleshën duke përdorur objekte të forta dhe mjete prerëse.

Si pasojë, I. Sh. dhe G. I. morën plagë dhe po trajtohen në Spitalin Rajonal Shkodër, por fatmirësisht ndodhen jashtë rrezikut për jetën.

Efektivët kanë sekuestruar disa sende dhe vegla që dyshohet se shërbyen gjatë sherrit, të cilat do të shërbejnë si prova materiale. Dosja hetimore i është referuar Prokurorisë pranë Gjykatës së Shkallës së Parë Shkodër për vijimin e veprimeve procedurale.

The post Konflikti për pronën në Pukë, 3 të arrestuar dhe 2 nën hetim appeared first on Albeu.com.

Një shqetësim të thellë ka shprehur përfaqësia diplomatike gjermane në Prishtinë lidhur me shembjen e banesave në afërsi të liqenit të Ujmanit. Kjo përfaqësi i është bashkuar kështu shqetësimeve të shfaqura më parë nga Bashkimi Evropian për këtë situatë.

Në apelin e saj publik, ambasada e Berlinit në Kosovë kërkon ndërprerjen e menjëhershme të këtyre operacioneve dhe kërkon gjetjen e zgjidhjeve transparente e në përputhje me kuadrin ligjor.

Autoritetet kosovare kanë filluar prishjen e ndërtesave të ngritura në territoret e ndërmarrjes “Ibër-Lepenc” në zonën e këtij liqeni. Kjo lëvizje është kundërshtuar ashpër si nga pronarët aktualë të atyre shtëpive, të cilët janë të komunitetit serb, ashtu edhe nga përfaqësuesit politikë të Zubin Potokut. Këta të fundit kanë deklaruar se nuk kanë dhënë asnjëherë pëlqimin për këto prishje.

Në notën diplomatike vërehet se zbatimi i parimeve të shtetit ligjor dhe ndjekja me përpikëri e procedurave ligjore, siç garantohet nga Kushtetuta e Kosovës, janë shtyllat themelore për procesin e integrimit evropian të vendit.

The post Ujman, ambasada gjermane shpreh alarm për prishjet: Thirrje për ndalim të menjëhershëm appeared first on Albeu.com.

Një përpjekje për tjetërsimin e paligjshëm të 21 pronave të paluajtshme është parandaluar në Mitrovicë, pas një operacioni të përbashkët hetimor dhe operacional të Prokurorisë Themelore në Mitrovicë dhe Policisë së Kosovës.

Sipas njoftimit, të dyshuarit kishin synuar të përfundonin procedurat për pajisje me dokumentacion noterial, përmes të cilit do të mundësohej shitblerja e pronave të regjistruara në emër të një personi tjetër.

Të dhënat e deritanishme të hetimit tregojnë dyshimin e bazuar se personat e përfshirë kanë përdorur një dokument identifikimi të falsifikuar, si edhe dokumente të tjera përcjellëse, me qëllim që të përpilohej dhe vërtetohej një autorizim noterial. Pronari legjitim i 21 pronave dyshohet se nuk kishte dijeni dhe nuk kishte dhënë pëlqim për këtë veprim.

Prokuroria ka bërë të ditur se në dokumentin e falsifikuar figuronin të dhënat personale të pronarit të pronave, por fotografia i përkiste një personi tjetër. Ky person dyshohet se ishte përgatitur të paraqitej te noteri nën një identitet të rremë dhe të firmoste autorizimin.

Procedura është ndalur para se të përfundohej akti noterial, pasi gjatë kontrollit të dokumenteve janë konstatuar mospërputhje në të dhënat identifikuese. Këto dallime kanë ngritur dyshime mbi vërtetësinë e dokumentacionit të dorëzuar para noterit.

Në lidhje me rastin, tre persona janë arrestuar dhe janë intervistuar. Me vendim të Prokurorit të Shtetit, atyre u është caktuar masa e ndalimit prej dyzet e tetë (48) orësh.

Gjatë bastisjes në pronën e njërit prej të dyshuarve, autoritetet kanë gjetur dhe sekuestruar një numër të madh dokumentesh pronësore, dokumente të gjendjes civile, kopje të dokumenteve të identifikimit, kontrata dhe materiale të tjera të lëshuara në emër të personave të ndryshëm.

The post Tre të arrestuar në Mitrovicë, dyshohet se tentuan të shesin 21 prona me dokumente të falsifikuara appeared first on Albeu.com.

Sipas të dhënave të bëra publike, viktima është therur më shumë se pesë herë në shpinë. Po ashtu, është bërë e ditur se në vendngjarje ka qenë edhe mjeku kujdestar, i cili vjen nga i njëjti fshat, ndërsa nga QKMF nuk është nisur asnjë ekip. Këtë e ka pohuar edhe drejtori i kësaj qendre, duke sqaruar se mjeku, si bashkëfshatar i viktimës, ka dalë në vendin e ngjarjes dhe ka konstatuar vdekjen.

Sipas informacioneve të raportuara, dyshohet se përplasja ka ndodhur për çështje prone, më saktësisht për prerjen e barit (kositjen), që i takonte dorasit Hamza, por që dyshohet se ishte kositur nga imami, pasi më herët ishte paralajmëruar që të mos e bënte më.

Më herët, gazetarja Zogaj kishte njoftuar se viktima ndërroi jetë si pasojë e plagëve të marra nga goditjet me thikë, ndërsa i dyshuari, që ndodhej në arrati, u arrestua nga Policia e Kosovës pas një operacioni të gjerë kërkimi. Ndërkohë, thika ende nuk është gjetur.

Lidhur me këtë rast kanë reaguar edhe nga Këshilli i Bashkësisë Islame, duke theksuar se, bazuar në informacionet që kanë, ngjarja nuk ka të bëjë me aktivitetin apo detyrën e viktimës si imam.

The post Dyshimet për një mosmarrëveshje pronësie pas vrasjes së imamit në Dragash: u godit mbi pesë herë me thikë në shpinë appeared first on Albeu.com.

Të dhënat janë bërë publike në vendimin e Këshillit të Ministrave “Për miratimin e dokumentit të programit buxhetor afatmesëm 2026-2028, të rishikuar”, i botuar në Fletoren Zyrtare.

Kostoja për regjistrimin e pasurive të paluajtshme për vitin 2026 llogaritet në vlerën e 25,7 mln lekëve apo 10.2 lekë për çdo pasuri të paluajtshme të regjistruar.

Numri i pronave të regjistruara, parashikohet të mbetet i njëjtë edhe për vitet 2027 dhe 2028 sipas të dhënave të publikuara në strategjinë afatmesme.

Teksa për vijimin e realizimit të projektit “ProTax Albania-Implementimi i taksës së pasurisë të bazuar në vlerën tregut”, sipas të dhënave të strategjisë, për vitin 2026 parashikohen të shpenzohen 8,7 mln lekë.

Taksa e re e pasurive të paluajtshme e llogaritur mbi vlerën e tregut të pasurive sipas draftit të publikuar në vitin 2023, parashikohej të niste zbatimin nga 1 janari 2026.

Por nga Ministria e Financave, zbatimi u shty edhe me 2 vite të tjera për në vitin 2028.

Nga Ministria e Financave, u sqarua për Monitor se shkak i shtyrjes së zbatimit të taksës së re është hartimi i një projektligj tërësisht i ri, i cili do të miratohet në vitin 2026, ndërsa do të nisë të zbatohet bashkë me Kadastrën Fiskale nga 2028.

Shtyrja vjen pas konsultimeve dhe përgatitjeve të nevojshme për të ndërtuar një sistem të ri taksimi, i cili do të bazohet në vlerën e tregut të pasurive të paluajtshme.

Në projektligjin e mëparshëm, i publikuar për konsultim publik në vitin 2023, parashikoj që për ndërtesat rezidenciale niveli i taksës të luhatej në vlerat nga 0,1% në 0,2% nga 0,05 që aktualisht zbatohet.

Për ndërtesat tregtare u propozua nivel takse nga 0,15% në 0,25% nga 0.2% që është aktualisht dhe për ndërtesat bujqësore dhe industriale, u propozua një nivel takse 0,15% në 0,25%.

Mësohet se drafti i ri që po hartohet, nuk parashikohet të ndryshojë koeficientet e taksës së ndërtesë, për truallin dhe tokën bujqësore të propozuara në 2023, që përafronin shkallën e taksës me vendet e rajonit.

Gjithashtu, edhe në përfundim të konsultimeve për artikullin IV drejtuesja e misionit të Fondit Monetar Ndërkombëtar Anke Weber rekomandoi rritjen e të ardhurave përmes çuarjes përpara të reformës së taksës së pronës. / Monitor

The post Taksa e re e pronës, në 2026 parashikohet regjistrimi i 2.5 mln pasuri të paluajtshme appeared first on Albeu.com.

Gjykata ka vendosur lënien në fuqi të vendimit të Gjykatës së Posaçme, me ndryshimin që ka urdhëruar konfiskimin e pronës.

Njoftimi:

Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Daniela Shirka (kryesuese), Dhimitër Lara (anëtar) dhe Miliana Muça (anëtare), më datë 22.07.2025, shpalli vendimin lidhur me çështjen e regjistruar me nr. 44 akti, datë 03.06.2025 regjistrimi, mbi ankimin e paraqitur nga Prokuroria e Posaçme kundër Korrupsionit dhe Krimit të Organizuar, dhe ankimet e paraqitura nga të pandehurit J.G., V.Gj. dhe J.B, ndaj vendimit nr. 25, datë 13.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:

1 – Lënien në fuqi të vendimit nr. 25, datë 13.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, me këtë ndryshim:
Urdhërohet konfiskimi i pasurisë së mëposhtme:
– Apartament i regjistruar me nr. pasurie ***, volumi ***, faqe ***, zona kadastrale ***, me sipërfaqe 81,41 (tetëdhjetë e një presje dyzet e një) m2, ndodhur në ***, së bashku me sendin sekuestruar shtetasit E.V. me procesverbalin e sekuestrimit datë 03.07.2024, çelës me ngjyrë të zezë, me mbishkrimin “***”, me kod “***”.

2 – Mospranimin e ankimit të ankuesit Shoqëria “***” shpk, kundër vendimit nr. 25, datë 13.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar.

3 – Shpenzimet e gjykimit në apel i ngarkohen solidarisht të pandehurve.
U shpall në Tiranë, sot me datë 22.07.2025.

The post Kërkoi heqjen e sekuestros mbi apartamentin, Apeli i GJKKO “rrëzon” Jorgo Goron, urdhëron konfiskimin e apartamentit appeared first on Albeu.com.

Përmes një bisede telefonike me gazetaren Klodiana Lala, Petrit Çela, ka deklaruar se ka filluar biznesin 34 vite me parë dhe se pasuria e tij është e ligjshme.

Ai deklaron se pasuria në Itali është hetuar dhe se zotëron 3 vendime gjykatash.

Çela ka reaguar ashpër dhe ndaj medias që sipas tij, po “I nxin jetën”.

Ai thotë se betejën me SPAK do ta vijojë dhe do të bëjë dokumentat publike.

Prokuroria e Posaçme kundër Korrupsionit dhe Krimit të Organizuar (SPAK) dhe Prokuroria e Veronës, kanë zhvilluar një operacion të përbashkët kundër një organizate kriminale me origjinë nga Elbasani, e përfshirë në trafikun ndërkombëtar të kokainës nga Amerika e Jugut drejt tregut europian.

Në qendër të hetimeve kanë qenë Suel Çela dhe Mario Çela, të dyshuar si drejtues të grupit që operonte në Verona, Itali.

Sipas autoriteteve, organizata kriminale ishte përgjegjëse për transportin dhe shpërndarjen e sasive të mëdha të kokainës në disa vende europiane.

Si rezultat i hetimeve të thelluara nga SPAK, Byroja Kombëtare e Hetimit dhe Guardia di Finanza e Veronës, u arrit në sekuestrimin preventiv të një sërë pasurish të paluajtshme dhe të luajtshme, llogarive bankare dhe aksioneve në një shoqëri tregtare, që kapnin një vlerë mbi 4 milionë euro.

Sekuestrimi u ekzekutua sot, më 3 korrik 2025, pas vendimit të Gjykatës së Veronës, si pjesë e masave parandaluese në kuadër të hetimeve që janë ende në zhvillim.

Autoritetet theksojnë se operacioni është një hap i rëndësishëm në çmontimin e rrjeteve të trafikimit të drogës me origjinë shqiptare në Europë.

“Për Prokurorinë e Veronës ky është rasti i parë i një organizate kriminale shqiptare, e cila investon në pasuri të paluajtshme në territorin e një shteti të Bashkimit Europian, në këtë rast, Italisë”, thuhet në njoftimin e SPAK.

Pasuritë e sekuestruara janë:

Një ndërtesë, pasuri e paluajtshme në Nogarole Rocca (Verona)

Një ndërtesë, në vlerë rreth 3 milionë euro, e përbërë nga 30 njësi (zyra dhe dyqane) (Verona)

Një llogari bankare ku depozitoheshin qiratë e zyrave dhe dyqaneve (rreth 400 mijë euro në vit)

Një shoqëri tregtare që operonte në fushën e ndërtimit, me kuota 100% në Itali.

Hetimet konstatuan se këto pasuri janë krijuar dhe financuar me përfitimet nga trafiku ndërkombëtar i lëndëve narkotike nga Amerika e Jugut në tregjet europiane. Vëmendja u përqëndrua tek një shoqëri e pasurive të paluajtshme në Itali, të cilës i dërgoheshin shifra të mëdha parash, përmes sistemit bankar. Ka rezultuar se paratë vinin nga Shqipëria, pasi organizata kriminale i transferonte të ardhurat nga një shoqëri tregtare në Shqipëri, në pronësi të dy vëllëzerve shqiptarë dhe këto shuma investoheshin në Itali në ndërtim, rikonstruksionin e ndërtesave, të cilat, më pas jepeshin me qira.

Njëri prej dy vëllezëve është shpallur në kërkim ndërkombëtar, ndërsa tjetri ndodhet në një burg në Belgjikë. Ky i fundit u arrestua në Verona, në qershor të vitit 2024, pas ekzekutimit të një urdhër-arresti, të lëshuar nga autoritetet belge, mbi dyshimet për përfshirje në një vrasje mafioze në Antëerp, si pasojë e konflikteve mes grupeve rivale të trafikut të drogës.

Për këtë të fundit ka gjithashtu një vendim të lëshuar nga Gjykata e Shkallës së Parë për Korrupsionin dhe Krimin e Organizuar, pas hetimeve të kryera nga SPAK, për veprat penale: “Vrasje me paramendim”, “Mbajtje dhe prodhim pa leje të armëve”, “Trafik ndërkombëtar të lëndëve narkotike” dhe “Pastrim të produkteve të veprës penale apo veprimtarisë kriminale”.

Falë skuadrës së përbashkët hetimore mes Prokurorisë së Veronës dhe SPAK u konstatua se përdorimi i burimeve të mëdha financiare që derdheshin nga Shqipëria në ekonominë italiane, përfaqësonte edhe hallkën përfundimtare të pastrimit të parave, të kryera nga jashtë vendit përmes një shoqërie tregtare në Shqipëri, në pronësi të organizatës kriminale. Në Shqipëri, janë kryer transaksione të dyshimta të pasurive të paluajtshme, me qëllim pengimin e gjurmueshmërisë së origjinës së paligjshme të parave dhe në këtë mënyrë organizata përfitonte shërbime të “pastruara”, me fitimin e përftuar nga transaksionet e dyshuara, të cilat mund të ripërdoreshin në investime në prona të paluajtshme, në territorin italian.

Gjithashtu janë sekuestruar pasuritë e paluajtshme dhe burimet financiare që i përkasin administratorit të një shoqërie të pasurive të paluajtshme në Verona, në pronësi të një çifti shqiptarësh, të përfshirë në të kaluarën në trafikun e lëndëve narkotike. Ata konsideroheshin si njerëzit e besuar të dy vëllezërve dhe rezultuan të figuronin në listën e pagesave të organizatës kriminale. Kontrolle janë kryer edhe ndaj subjekteve kryesore dhe ndihmësve të tyre italianë, me qëllim gjetjen e provave të mëtejshme.

Procedimi penal ndodhet në fazën e hetimeve paraprake. Për Prokurorinë e Veronës ky është rasti i parë i një organizate kriminale shqiptare, e cila investon në pasuri të paluajtshme në territorin e një shteti të Bashkimit Europian, në këtë rast, Italisë. Operacioni i kryer konfirmon rëndësinë e bashkëpunimit ndërkombëtar mes SPAK dhe autoriteteve italiane, në luftën kundër krimit të organizuar dhe pastrimit të parave.

The post SPAK sekuestroi prona me vlerë 4 mln euro në Verona, reagon babai i Suel Çelës: Pasuria e ligjshme, kam 3 vendime gjykatash në Itali appeared first on Albeu.com.

Prokuroria e Posaçme regjistroi procedimin e mësipërm, për hetimin pasuror të shtetasit Elvin Merlika, i dyshuar për veprën penale të: “Sigurimi i kushteve dhe i mjeteve materiale për të kryer vrasje”, në dëm të shtetasit Indrit Dokle, kryer në bashkëpunimin e posaçëm të grupit të strukturuar kriminal, “Grupi i strukturuar kriminal”, “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a/1, 334 të Kodit Penal si dhe personave të lidhur me të.

Mbi bazën e dispozitave të ligjit nr. 10192 datë 03.12.2009, “Për Parandalimin dhe Goditjen e Krimit të Organizuar, Trafikimit, Korrupsionit dhe Krimeve të tjera nëpërmjet Masave Parandaluese kundër Pasurisë”, ndryshuar me ligjin nr.70/2017, janë identifikuar dhe sekuestruar* pasuritë e luajtshme dhe të paluajtshme të personave nën hetim pasuror dhe personave të lidhur me ta.

Në përfundim të hetimit pasuror rezulton se pasuritë e sekuestruara janë të pajustifikuara nga burime të ligjshme dhe për pasojë prezumohet se janë rezultat i veprimtarisë kriminale të personave të hetuar dhe të personave të lidhur me ta.

Pasuritë e sekuestruara për të cilat kërkohet konfiskimi janë:

100% të kuotave të shoqërisë “Zeus Garden” sh.p.k.

49% të kuotave të shoqërisë “M.S.G Security” sh.p.k.

100% të kuotave të shoqërisë “London Eye” sh.p.k.

Pasuri e paluajtshme e llojit arë, me sipërfaqe 3250 m2, me adresë Fushë-Kuqe Kurbin.

Pasuri e paluajtshme e llojit apartament 14/5, kati i 6, me sipërfaqe 108 m2, në zonën e Kasharit.

Pasuri e paluajtshme e llojit truall me sip. 6026 m2, ZK.3051, me adresë Priskë Tiranë.

Pasuri e paluajtshme e llojit apartament, me sip. 105 m2, me adresë Yzberisht.

Pasuri e paluajtshme e llojit arë më numër, me sipërfaqe 3250 m2, me adresë Fushë-Kuqe Kurbin.

Pasuri e paluajtshme e llojit apartament më numër, me sipërfaqe 38.85 m2, me adresë Yzberisht Tiranë.

Pasuri e paluajtshme e llojit apartament, me sip. 81.24 m2, në posedim nga shoqëria “………..” sh.p.k.

Pasuri e paluajtshme e llojit garazh, me sip. 50.82 m2, në posedim nga shoqëria “………..”,.

Pasuri e paluajtshme e llojit apartament, me sip. 89 m2, me adresë Tiranë.

Pasuri e paluajtshme e llojit apartament, me sip. 35.09 m2, me adresë Tiranë.

Pasuri e paluajtshme e llojit bodrum, me sip. 9 m2, me adresë Bulevardi “Bajram Curri” Tiranë.

Pasuri e paluajtshme e llojit apartament, me sip.30.2 m2, me adresë Rruga “Karl Gega.

Pasuri e paluajtshme e llojit garazh, kati i parë nëntokë në objektin e shoqërisë “Xh……” sh.p.k.

Pasuri e paluajtshme e llojit apartament, me sip. 105 m2, me adresë Yzberisht.

Pasuri e paluajtshme e llojit arë, me sipërfaqe 3250 m2, me adresë Fushë-Kuqe Kurbin.

Pasuri e paluajtshme e llojit pyll me sip. 6026 m2, me adresë Priskë e Madhe, Tiranë, në vendin e quajtur (Fusha e Bukur).

9 (nëntë) automjete të markave të ndryshme.

The post Apartamente dhe prona, SPAK sekuestrohen pasuritë e Elvin Merlikës appeared first on Albeu.com.

Emri i tij ka dalë edhe në masakrën me tre të vrarë në Fushë-Krujë.

Murati ka qenë një nga personazhet që është kërkuar nga Prokuroria e Kurbinit për t’u marrë në pyetje.

Prokuroria e Krujës, kërkoi marrjen në pyetje të disa personave në lidhje me atentatin te mbikalimi i Fushë Krujës me 2022, ku mbetën të vrarë tre të rinjtë Brilant Martinaj, (nipi i Ervis Martinajt) Besmir Hoxha dhe Dikler Vata.

Organi i akuzës kërkoi marrjen në pyetje, në lidhje me atentatin me tre viktima dhe të shtetasve Alesio Dobrozi, Rohan Brahimi dhe Fatjon Murati, i cili eshte kapur disa kohë më parë nën shoqërinë e Endrit Dokles.

Ndërkohë Fatjon Murati, ka qenë edhe objektivi i atentatit të 12 marsit 2023 ku mbeti e vdekur një grua dhe u plagosën 5 persona të tjerë.

Ai ka ushtruar aktivitetin e tij në sportin profesionist para 11 viteve dhe është i njohur në botën e sportit.

Murati ka garuar për titullin kampion bote në Federatën IBF Junior kundër Francesco Versaçit. Në atë periudhë, ai jetonte në Gjermani dhe në përballjen për titullin kampion, ai nuk regjistronte asnjë humbje.

Karrierën në Boks Murati e kishte nisur në Shqipëri, ku edhe ishte spikatur për talentin e tij dhe në vitin 2008 ai hyri në boksin profesionist në Mynih të Gjermanisë.

Por kush është Fatjon Murati? Ai një vit më parë u kap me armë zjarri dhe dyshohet se ka qenë shënjestër atentati në Don Bosko nga njerëzit e Ervis Martinajt. Emisioni “Në shënjestër” ka ndërtuar një profil të Muratit.

Profili i Fatjon Muratit

Por cila është armiqësia e Fatjon Muratit me grupin e Ervis Martinaj dhe pse këta të fundit, kërkojnë me çdo kusht eliminimin e tij?

Pse Murati, dikur një boksier me një të ardhme të ndritur, që aspironte të ishte kampion bote në peshat e boksit profesionist, u kthye në një eksponentë të krimit?

Cila është lidhja e tij me masakrën e Fushë-Krujës ndaj Brilant Martinaj dhe miqve të tij? Dhe pse ai mbahej pranë vetes nga Endrit Dokle, një tjetër armik i deklaruar i Ervis Martinaj për të cilin ky i fundit sipas dëshmive të Nuredin Dumanit, kishte paguar shuma të mëdha parash për ta eliminuar Doklen?

A janë vetë rrëfimet e Dumanit, ato që po rihapin hesapet e pambyllura ndërmjet bandave?

Si u arrestua Fatjon Murati në makinën e Endrit Dokles dhe si mundi t’i shpëtojë qelisë falë vendimeve kontroverse të gjykatës, duke kaluar në arrest shtëpiak, arrest që e theu më 19 janar 2023, duke u larguar nga Shqipëria, nëpërmjet pikave kufitare?

Sipas informacioneve të siguruara nga emisioni ‘Në Shënjestër’, Fatjon Murati, në lokalin e të cilit ndodhi masakra me 1 të vrarë dhe 6 të plagosur, midis të cilëve edhe një vajzë 10 vjeçare, nuk ishte një emër i papërfolur për skedarët e Policisë së Shtetit.

Ai ishte në verën e vitit 2022, një nga personat më të shumëkërkuar për ekzekutimin e trefishtë të ndodhur në Mbikalimin e Fushë-Krujës, ku në mesditën e 17 korrikut të këtij viti, humbën jetën në pritë Brilant Martinaj dhe dy shokët e tij, Dikler Vata dhe Besmir Hoxha.

Listë në të cilën Murati nuk ishte i vetmi i dyshuar në kërkim, pasi bashkë me të, policia e Krujës, kërkoi të marrë në pyetje edhe miqtë e tij, Endrit Dokle, Ramazan Rraja, Gentian Reçi, Rohan Brahimi dhe Alesio Dobrozi.

Të gjithë persona të njohur për rrezikshmërinë e tyre të lartë, për të cilët policia kërkonte jo vetëm dëshminë e tyre, por edhe kishte shpallur njoftim në pikat e kalimit kufitar që nëse ata paraqiteshin në dalje apo në hyrje të shoqëroheshin për t’u pyetur në lidhje me masakrën e Fushë-Krujës.

Por ndërsa policia kishte shpallur një njoftim të tillë, duket se Fatjon Murati ishte në Shqipëri.

Kjo, pasi ai u arrestua pikërisht në makinën e Endrit Dokles, ish-kreut të njërit prej fraksioneve të Bandës së Durrësit, të liruar me kusht. Dokle po udhëtonte me familjen e tij, kur u ndalua nga policia dhe në makinën e tij u gjet Fatjon Murati, 33-vjecari cili u arrestua pasi dyshohej si posedues i armëve të zjarrit të gjetura në një kompleks rezidencial në kryeqytet, bazë armatimi për të cilën më herët ishte arrestuar edhe 25-vjeçari nga Laçi, Kristian Gjini.

Por ajo që e fundosi Fatjon Muratin, ishte një gjurmë papilare e gjetur në një nga armët e fshehura në banesën që Kristian Gjini, kishte marrë me qira. Avokatja e Fation Muratit tha se ky i fundit thjesht e ka prekur armën në një ambient kafeneje, duke e larguar nga tavolina, ndërkohë që prokuroria tha se gjurma e gishtave të Muratit u gjend edhe jashtë valixhes që mbante këtë armë.

“Arma është mbajtur, transportuar dhe më pas është gjetur në një valixhe të vogël, të posaçme për mbajtjen e armës pistoletë. Gjurma papilare e cila ka rezultuar shkencërisht se i përket personit nën hetim, është gjetur pikërisht mbi sipërfaqen e jashtme të kësaj valixheje.

Egziston dyshimi i arsyeshëm se personi nën hetim ka konsumuar veprën penale për të cilën dyshohet. Ndaj është e nevojshme vendosja e një mase sigurimi pasi ka rrezik që i dyshuari të largohet për t’ju shmangur hetimit. Po kështu qëndron dhe rreziku që personi nën hetim të kryejë një krim të të njëjtit lloj me atë për të cilin po procedohet, pasi ka rrezikshmëri të lartë s”oqërore”, deklaronte prokuroria.

Por ndërsa Murati u vu në pranga për këtë vepër penale, ashtu si shumë të tjerë të ngjashëm, edhe ai do të luante lojën e tij me drejtësinë, në këtë rast me drejtësinë e re, të dalë nga Vettingu. Gjyqtarja Migena Laska caktoi ndaj Muratit masën e arrestit me burg, pasi e cilësoi si një person me rrezikshmëri.

Ndërsa me bujë prokuroria sekuestroi pasurinë e tij me vlere 5 mln euro. Pasuri e cila dyshohej se rridhte nga aktiviteti kriminal ku 33-vjeçari ishte përfshire në Itali, fillimisht duke kryer vjedhje ne kuadër të grupit kriminal e më pas duke trafikuar drogëra të forta. Masa e arrestit për të u konfirmua nga Gjykata e Apelit në tetor të 2022, tri muaj me vonë, po gjyqtarja Migena Laska ndryshoi qendrim.

E njëjta gjyqtare e dërgoi nën arrest shtëpie të dyshuarin me pretendimin se ai nuk ishte i rrezikshëm. I dyshimtë mbetet qëndrimi i prokurorisë, që gjatë seancës për zbutjen e së masës së sigurisë se Murati nuk ka precendentë të mëparshëm, ndërsa injoron faktin se ndaj tij autoritetet italiane kishin firmosur disa masa sigurie për akuza të rënda

Gjykata teksa anashkalon këto fakte, duket se iu jep shumë vlere pretendimeve të të dyshuarit që nuk ka precedentë të mëparshëm penale, ndërsa ka rrethana lehtësuese në familje. Ai pretendon përmes Avokatit se prej disa kohësh është në një marrëdhënie bashkëjetese me partneren e tij, marrëdhënie nga e cila ai ka edhe një fëmijë të mitur.

Ai i paraqiti si provë gjykatës një “Raport Vlerësimi Psikologjik”, bazuar në të cilin rezulton se bashkëjetuesja e Muratit, në kushtet konkrete, duke u ndjerë e vetme në rritjen dhe edukimin e fëmijës së tyre, dhe duke qenë në rrethana të vështira e të rënduara psiko-emocionale, aktualisht ndodhet në situatë shumë delikate jo vetëm në kuadër të shëndetit të saj mendor apo psikologjik.

Ky fakt e vendos atë në kushte tepër të vështira dhe problematike sa i përket aftësisë së saj për të mbajtur, për të rritur, edukuar dhe për t’iu përgjigjur fëmijës së tyre të mitur në të përditshmen për çdo nevojë, kërkesë, në kushtet në të cilat ajo ndodhet. Më tej Fatjon Murati thotë se ka humbur babanë e tij prej disa vitesh dhe ai rezulton se është i vetmi person i cili mundet të kujdeset dhe mund t’i qëndrojë pranë e t’i përgjigjet nënës së tij tashmë në një moshë të thyer, për çdo nevojë, dhe shqetësim.

Por, Fatjon Murati, nuk ishte kaq i parëndësishëm në botën e krimit. Madje ai e kishte nisur punën e tij që herët, duke krijuar një pasuri për tu pasur lakmi, gjë që dokumentohet edhe nga CV-ja e tij e pasur që pasqyrohet në kërkesat e gjykatave italiane, ndaj personit të tij.

Pasuri të cilat ai dyshohet se i kishte vënë gjatë punës së tij në trafikimin e lëndëve narkotike në Itali, ccka rezulton edhe në skedimin e tij nga autoritetet e këtij vendi, nga ku del se ndër tjera. organizata kriminale ku bënte pjesë Fation Murati më herët kishte kryer edhe vjedhje në Itali. Fation Murati rezulton i kërkuar në nivel kombëtar pasi më datë 31 Tetor 2015 për evazion nga masa alternative në burg, nëpërmjet masës së vendosur nga Gjykatësi për Hetimet Paraprake të Gjykatës së Trevizos;

Pasi më datë 7 Nëntor 2015 Gjykata e Trevizos ka urdhëruar arrestimin dhe paraburgimin në burg për veprën penale të ‘Pranimit të mallrave të vjedhura’, ‘Posedim abuziv të armëve’, ‘Trafikim të lëndëve narkotike’. Më datë 26 Prill 2016 Gjykata e Venecias ka urdhëruar arrestimin dhe paraburgimin në burg për veprën penale të ‘Pjesëmarrjes në krime’ dhe më datë 26 Korrik 2017 në përfundim të aktivitetit të quajtur ‘Cosmopolis’ në kuadër të procedimit penal pranë autoriteteve gjyqësore të Padovas, është raportuar për veprën penale të ‘Trafikimit të kokainës’.

Nga analiza në tërësi e provave dhe akteve të administruara nga hetimi paraprak rezulton se këto pasuri të luajtshme/të paluajtshme janë në zotërim të drejtpërdrejtë të subjektit hetimor Fation Murati si dhe familjarëve të tij.

Pasuria marramendëse e vënë nga Fation Murati, u evidentua edhe në momentin e parë të arrestimit, ku prokuroria i sekuestroi prona të patundshme në vlerën 5 milionë euro Por Fation Murati, ndoshta duke nuhatur se mund të ishte objekt i një sulmi të afërt të mundshëm, mesa duket zgjodhi të largohet nga Shqipëria edhe pse ai ishte ende në një proces gjykimi për armëmbajtje pa leje.

Ai u kërkua të merrej në pyetje menjëherë pas masakrës që ndodhi në lokalin e tij, por nuk ndodhej në vilën e tij luksoze.

Kjo rriti dyshimet te policia se ai është arratisur jashtë vendit.

Ai dyshohet se u largua pak orë para masakrës drejt Prishtinës, por ndërkohë që grupi hetues po vazhdon hetimet intensive në lidhje me masakrën e mbrëmjes së 12 marsit në Don Bosko, burime pranë emisionit ‘Në shënjestër’, bëjnë me dije se në përgjim janë vënë edhe personazhe që bëjnë pjesë në grupin e Ervis Martinaj.

Ata besohet se fshihen pas atentatit të fundit, që mund të jetë kryer si një formë hakmarrje ndaj vrasjeve të ndodhura në disa qytete, ku në shënjestër kohë pas kohe kanë qenë viktima njerëzit e Ervis Martinaj, të cilët u eliminuan më së shumti përgjatë dy viteve të fundit. Ndërkohë që policia po heton disa nga njerëzit që kanë patur miqësi dhe lidhje me mbretin e lojërave të fatit, të cilët rezultojnë që prej zhdukjes pa gjurmë të tij se ishin tërhequr dhe nuk shfaqeshin më në publik.

Ka dyshime të forta që ata janë riorganizuar gjatë këtyre muajve për të goditur në shenjë hakmarrje kundërshtarët e tyre.

The post Prokuroria i sekuestroi pronat, kush është Fatjon Murati që synonte të bëhej kampion boksi appeared first on Albeu.com.