Pas përfundimit të seancës për vrasjen në Gllogjan, prokurorja Sahide Gashi nuk dha hollësi për çështjen në deklarimin e saj për media.

Para gazetarëve, ajo u shpreh shkurt se gjithçka që ka për të thënë do ta paraqesë në gjykatë.

“Krejt çka ka me thonë, e them në gjykatë”, tha Gashi.

E pyetur lidhur me arsyen pse prokurorja e re e rastit ishte përmendur vetëm gjatë fjalës përfundimtare, Gashi kundërshtoi këtë vlerësim.

“Nuk pajtohem me atë”, deklaroi ajo.

Ndërkohë, Gjykata Themelore në Pejë vendosi sot që të rihapë shqyrtimin gjyqësor për rastin e vrasjes së trefishtë në Gllogjan, ku të akuzuar janë Halil, Kreshnik dhe Kastriot Mehmetaj.

Ky vendim erdhi pasi Prokuroria, vetëm në fjalën përfundimtare, iu referua një videoincizimi të Kreshnik Mehmetajt duke gjuajtur me armë dhe provave balistike, të cilat më herët nuk ishin paraqitur dhe administruar gjatë procesit gjyqësor, duke ia pamundësuar mbrojtjes kundërshtimin e tyre.

Halil, Kastriot dhe Kreshnik Mehmetaj akuzohen se më 26 nëntor 2021, me motiv hakmarrjeje, kanë shtënë me kallashnikov në drejtim të një autobusi në Gllogjan, ku u vranë dy nxënës 17-vjeçarë dhe shoferi i autobusit.

Në seancën fillestare të mbajtur më 21 qershor 2023, të tre të akuzuarit ishin deklaruar të pafajshëm.

The post Pas seancës për rastin e Gllogjanit, prokurorja Sahide Gashi rezervon komentet për gjykatën appeared first on Albeu.com.