Drejtori i Shërbimit Korrektues të Kosovës (SHKK), Ismail Dibrani, ka bërë të ditur se grupi i parë i të burgosurve nga Danimarka pritet të arrijë në Kosovë në prill të vitit 2027.

Sipas tij, të burgosurit do të vendosen në burgun e Gjilanit, ku do të zbatohet rendi shtëpiak danez.

Në shpjegimin e tij për mënyrën e funksionimit të këtij institucioni, Dibrani tha se burgu do të administrohet përmes një forme bashkëqeverisjeje. Ai sqaroi se drejtimi do të bëhet nga një guvernator danez dhe një drejtor kosovar, ndërsa për sigurinë do të kujdeset stafi kosovar, përkatësisht oficerët që punojnë aty.

Ai theksoi se këta oficerë po kalojnë trajnime bazike në Danimarkë. Sipas tij, grupi i parë tashmë e ka përfunduar këtë trajnim, ndërsa aktualisht grupi i dytë i oficerëve korrektues nga Gjilani ndodhet atje duke vijuar përgatitjet, të cilat mbështeten në rregullat e sistemit danez.

Lidhur me përfitimet e marrëveshjes, Dibrani u shpreh se, përveç aspektit financiar prej afër 210 milionë euro, Kosova do të përfitojë edhe nga përvoja dhe praktikat më të mira të sistemit korrektues të Danimarkës, të cilin e cilësoi ndër më të avancuarit në botë.

Danimarka e kishte nënshkruar këtë marrëveshje me Kosovën në prill të vitit 2022, me synimin që të transferojë 300 të burgosur në Kosovë, si pjesë e përpjekjeve për të ulur mbipopullimin në burgjet daneze.

Në një intervistë për Ekonomia Online, Dibrani foli edhe për prioritetet e SHKK-së për këtë vit, duke veçuar si synim kryesor forcimin e njësisë ekonomike, të cilën e konsideron shtyllë për zhvillimin ekonomik të institucionit.

Ai nënvizoi gjithashtu se vëmendje e veçantë do t’u kushtohet personave me nevoja të veçanta, me theks të posaçëm te shëndeti mendor.

Dibrani deklaroi se Shërbimi Korrektues i Kosovës tashmë vlerësohet si model jo vetëm në rajon, por edhe në Evropë dhe më gjerë. Sipas tij, vetëm gjatë vitit të fundit ky institucion është nderuar me dy çmime ndërkombëtare të ekselencës.

Ai kujtoi se vitin e kaluar SHKK-ja u shpërblye nga Organizata Ndërkombëtare e Burgjeve për reformën në programet rehabilituese dhe trajtimin e kujdesit shëndetësor, ndërsa këtë vit u vlerësua nga Rrjeti Evropian i Burgjeve për reformë në programet rehabilituese, duke u renditur në mesin e pesë shteteve më të mira.

Sipas tij, në kuadër të fokusit te personat me nevoja të veçanta, tashmë është themeluar institucioni për trajtimin e tyre dhe ka nisur edhe zgjerimi i kapaciteteve në Institutin e Psikiatrisë Forenzike.

Sa u përket pretendimeve për keqtrajtim në institucionet korrektuese, Dibrani tha se, ndonëse ka pasur ankesa të vogla dhe raste të izoluara, nuk është konfirmuar asnjë rast i faktuar.

Ai shtoi se as organizatat vendore dhe as ato ndërkombëtare nuk kanë evidentuar raste të tilla, ndërsa përmendi se edhe raporti i progresit i vitit të kaluar nuk ka shënuar asnjë rast keqtrajtimi të personave që mbahen në institucionet korrektuese të Kosovës.

Dibrani bëri të ditur gjithashtu se aktualisht në institucionet korrektuese ndodhen 1744 persona.

Nga ky numër, ai sqaroi se 1100 janë të dënuar, ndërsa 500 e diçka janë të paraburgosur. Sipas tij, këto shifra kanë mbetur të përafërta ndër vite, me 1000 deri 1100 të dënuar dhe 600-500 të paraburgosur.

Ai tha po ashtu se numri i të miturve, duke përfshirë qendrën e paraburgimit për të mitur, qendrën me masa edukative dhe qendrën korrektuese, mbetet rreth 50-60 persona.

The post Grupi i parë i të burgosurve nga Danimarka pritet të mbërrijë në prill 2027 appeared first on Albeu.com.

Sot java ka nisur me mot të kthjellët, por nuk do të vazhdojë kështu, pasi sot pasdite reshjet do të jenë prezente, kryesisht në zonat lindore dhe më pak në qendër.

Temperaturat kanë shënuar një tjetër rënie mëngjesin e sotëm, krahasuar me fundjavën. Termometri ka zbritur minimumi në -1 gradë dhe maksimumi nuk ngjitet më shumë se 14 gradë.

Era nuk është se do të jetë problematike, do të jetë të paktën gjatë ditës së sotme, por edhe deri nga mesi i javës mesatare dhe jo e fortë ashu sikundër kemi përjetuar javën e shkuar.

Edhe dita e martë mbetet kryesisht me kthjellime dhe vranësira kalimtare. Nuk përjashtohet mundësia e reshjeve të pakta të dëborës të izoluara kryesisht në verilindje të vendit.

E mërkura sjell kthjellime dhe na kujton se jemi në pranverë, më së shumti në territor ku ngrihen edhe temperaturat deri në 19 gradë celcius. Por dita e enjte rikthen prezencën e reshjeve thuajse në të gjithë Shqipërinë, por kryesisht në veri dhe në zonat qendrore.

Përsa i përket temperaturave, edhe ditën e nesërme mëngjesi do të mbetet i freskët, megjithëse kemi një rritje të lehtë të vlerave termike, por nga mesdita dhe në vijim kemi rritje të ndjeshme të temperaturave, njofton meteorologia Tanja Porja.

Pra rriten edhe gjatë orëve të mëngjesit, por kryesisht në mesditë. Përjashtuar mesditën e së enjtes e cila do të sjellë vranësira shumë herë gjatë 24 orësisht dhe prezencë të reshjeve të shiut, ku zbret sërish maksimumi në 16 nga 19, që do të jetë ditën e mërkurë./albeu.com/

The post Reshje shiu dhe dëbore në gjithë vendin, meteorologia zbulon cila ditë e javës rikthen pranverën appeared first on Albeu.com.

Tani është koha kur ata kujtohen për ekzistencën tonë. Është koha e telefonatave, e mesazheve, e sondazheve dhe projeksioneve në përllogaritjen e votuesve me bindjet politike majtas, jo djathtas ose djathtas, jo majtas. Është koha e premtimeve elektorale ku gënjeshtrat e bukura rrallë herë i gjen, përgjithësisht ndeshesh me të shëmtuarën e fjalëve dhe keqardhjeve për situatën e papunësisë tënde, për ëndrrat e tua të vrara, e për shpresën e munguar. Është koha e riciklimit të programeve politike ku një herë në kater vite thuhen të njëjta ide dhe thuren të njëjta plane strategjike.

Urrehen ata që deri dje duheshin, e më pas rifillojnë flirte politike për një qëllim të përbashkët makiavelist. Është koha e trokitjeve në dyert e shqiptarëve duke fjalosur për hallet e tyre, një pikë loti atje, një nënqeshje këtu. Të them diçka o Sovran? Mos i fshi gjurmët e këpucëve të tyre në pragun e shtëpisë tënde. Ruaji me fanatizëm se do të të duhen që t’ua tregosh kur pas 4 vitesh ata të trokasin sërish.

Prandaj, 61.2% e shqiptarëve në studimin e realizuar në bashkëpunim me Konrad Adenauer Stiftung, rezultojnë se i njohin fare pak deputetët e Parlamentit Shqiptar, pikërisht se gjurmët e këpucëve të tyre lihen vetëm 1 herë në 1461 ditë (llogaritur këtu edhe viti i brishtë).

Prandaj 46.3% e shqiptarëve nuk ndihen të përfaqësuar nga ligjvënësit, se “kërpëratat” janë dominanca e atij parlamenti. Nuk ndihen të përfaqësuar nga disa trupa pa kokë, fytyrë e dinjitet, pa personalitet juridik e moral, pa përgjithësuar. Prandaj të rinjtë na janë renditur në rradhët e fundit të listave zgjedhore, jo se ata nuk janë subjekte të afta potencialisht për t’u shndërruar në veprues politik, jo sepse ata nuk janë reformist, por sepse ata sfidohen nga fakti se nuk kanë famën e emrit për të grumbulluar sasi numrash.

Nga këtu nis konkurrenca e pandershme dhe tregtia e votave, sepse fokusi është kalkulimi i numrave pas të cilave fshihen manipulime, shantazhe dhe kompromise. Kështu të rinjtë zgjedhin të rriten nën ombrellën e të vjetërve në politikë. Ju mësojnë teknikat e mbledhjes së votave. Ju marrin në fillim si asete dhe ju trajtojnë në fund si instrumente.

Atëhere, më thoni, në ç’drejtim politik gjëndet ai reformisti i ndershëm që nuk thith gjakun e shqiptarëve, Ai luftëtari i rezistencës në këtë “Prill të thyer”?

*Shkrim i bazuar në raportin e autores të publikuar nga Konrad Adenauer Stiftung, “Qëndrime dhe perceptime të zgjedhësve shqiptarë mbi cilësinë e punimeve në Kuvendin e RSH”

The post “Prilli i thyer” i zgjedhjeve parlamentare appeared first on Albeu.com.