Sipas tij, nëse partitë bien dakord për një kandidat konsensual, do të shmangeshin zgjedhjet e jashtëzakonshme, do të ruhej stabiliteti institucional dhe Kuvendi do të mund të përqendrohej te reformat dhe çështjet që prekin qytetarët.

Burjani nënvizon se kompromisi përbën tregues të pjekurisë politike dhe ngre dilemën nëse forcat politike do ta vendosin interesin e shtetit mbi atë partiak, apo do ta lënë vendin të mbetet në krizë të pandërprerë.

Shkrimi i plotë:

Marrëveshje vetëm për Presidentin – A do të mbushen mend partitë politike?

A u bëmë përrallë?

Përsëritja e krizave politike, sipas tij, ka krijuar bindjen se Kosova po futet në një rreth të pafund bllokadash institucionale. Çdo proces me peshë për shtetin, thekson ai, po kthehet në përballje politike, ndërsa interesat e qytetarëve po mbesin anash. Në këto rrethana, shtrohet pyetja nëse partitë politike do të reflektojnë apo nëse vendi do të vazhdojë të kalojë nga një krizë në tjetrën.

Burjani vlerëson se një nga zgjidhjet më të arsyeshme do të ishte një marrëveshje politike e fokusuar vetëm te zgjedhja e Presidentit të Republikës. Sipas tij, edhe pa u futur në një koalicion qeverisës, partitë mund të gjejnë gjuhë të përbashkët për një kandidat që gëzon mbështetjen e shumicës së deputetëve. Një dakordim i tillë, shton ai, nuk do t’i ndryshonte raportet politike mes partive, por do të siguronte funksionimin normal të institucioneve kushtetuese.

Ai thekson se një president i zgjedhur me konsensus do ta eliminonte rrezikun e zgjedhjeve të jashtëzakonshme, të cilat jo vetëm sjellin kosto të larta financiare, por edhe e zgjasin paqartësinë politike dhe pengojnë zhvillimin ekonomik. Njëkohësisht, qeveria do të vazhdonte të funksiononte mbi shumicën ekzistuese parlamentare, ndërsa Kuvendi do të kishte hapësirë të merrej me ligjet dhe reformat që presin qytetarët.

Në demokracitë parlamentare, kompromisi nuk duhet parë si dobësi, por si dëshmi e pjekurisë politike, shprehet Burjani. Presidenti, sipas tij, duhet të përfaqësojë unitetin e shtetit dhe jo të trajtohet si trofe i përplasjeve partiake. Pikërisht për këtë, zgjedhja e tij kërkon dialog, mirëkuptim dhe përgjegjësi.

Ai shton se Kosovës i nevojitet më shumë stabilitet institucional sesa fushata të vazhdueshme zgjedhore. Qytetarët, sipas tij, presin zgjidhje konkrete për ekonominë, arsimin, shëndetësinë dhe integrimin evropian, e jo përplasje politike pa fund.

Në fund, pyetja mbetet e njëjtë: a do të mbushen mend partitë politike dhe ta vendosin interesin shtetëror mbi interesin partiak, apo do të vazhdojnë ta mbajnë vendin peng të krizave të njëpasnjëshme?

The post Burjani: Një dakordim vetëm për Presidentin do ta nxirrte Kosovën nga ngërçi politik appeared first on Albeu.com.

Nënkryetari i LDK-së, Lutfi Haziri, ka bërë të ditur se 18 deputetët e kësaj partie mund të votojnë si një trup i vetëm vetëm në rast se kandidati për president vjen nga radhët e LDK-së.

Ky qëndrim shënon një ndryshim në raport me deklarimet e mëhershme të partisë. Muaj më parë, LDK-ja kishte këmbëngulur se posti i presidentit duhej t’i besohej një personaliteti jopartiak dhe bashkues, ndërsa tani mbështetjen për krijimin e institucioneve po e lidh me zgjedhjen e një kandidati të saj në këtë pozitë.

Në zgjedhjet e 7 qershorit, Lidhja Demokratike e Kosovës kishte garuar me Vjosa Osmanin për presidente, duke e prezantuar atë si figurë që mund të bashkonte spektrin politik.

Blerim Sinani, anëtar i LDK-së dhe kandidat për deputet nga kjo parti, vlerëson se bisedat për ndarjen e përgjegjësive institucionale nuk duhet të interpretohen si vendosje e interesave partiake mbi ato të shtetit.

Ai thotë se marrëveshjet politike janë praktikë e zakonshme në një sistem demokratik, sidomos kur asnjë subjekt nuk ka numrat për të qeverisur i vetëm. Sipas tij, qëllimi nuk duhet të jetë vetëm dalja nga bllokada politike, por ngritja e institucioneve të qëndrueshme dhe funksionale.

“Mendoj se pyetja është e ndërtuar mbi një supozim me të cilin nuk pajtohem. Nuk besoj se diskutimi për përgjegjësitë institucionale do të thotë se po vihet interesi partiak para atij shtetëror.

Kur asnjë parti nuk i ka votat për të qeverisur e vetme, marrëveshjet janë pjesë normale e demokracisë. Natyrisht që në ato bisedime diskutohen edhe përgjegjësitë që do t’i marrë secila palë.

Për mua, interesi shtetëror nuk është thjesht të krijohen institucione sa për ta kaluar situatën. Interesi shtetëror është të krijohen institucione që zgjasin, që funksionojnë dhe që kanë një marrëveshje serioze pas vetes. Nëse një marrëveshje i shërben këtij qëllimi, atëherë ajo i shërben edhe shtetit”, deklaroi Sinani për “Bota sot”.

The post A po e lidh LDK-ja formimin e institucioneve me postin e presidentit? Sqaron Blerim Sinani appeared first on Albeu.com.