Presidentja e Komisionit Evropian, Ursula von der Leyen, nuk do të ndalet në Serbi dhe Bosnje e Hercegovinë gjatë vizitës së saj të radhës në Ballkanin Perëndimor, bëri të ditur të premten Komisioni Evropian (KE).

Sipas zëdhënëses së KE-së, Arianna Podesta, turneu do të zhvillohet nga 30 shtatori deri më 2 tetor dhe do të përfshijë Tiranën, Prishtinën, Podgoricën dhe Shkupin.

Gjatë qëndrimit në këto katër vende, von der Leyen pritet të takohet me presidentët dhe kryeministrat, ndërsa në agjendë do të ketë edhe vizita në projekte të financuara nga Bashkimi Evropian.

Podesta tha se presidentja e Komisionit Evropian do t’i vizitojë Serbinë dhe Bosnje e Hercegovinën në një moment tjetër, pasi turneu aktual zhvillohet në prag të zgjedhjeve parlamentare dhe të përgjithshme në këto dy shtete.

Ky do të jetë udhëtimi i gjashtë i von der Leyenit në rajon. Vizita të tilla janë kthyer në një praktikë të zakonshme përpara publikimit të paketës vjetore të raporteve të progresit për vendet që synojnë anëtarësimin në BE.

Prej vitesh, presidentja e Komisionit Evropian ka mbajtur marrëdhënie të afërta me presidentin serb, Aleksandar Vuçiq, të cilit në disa raste i është drejtuar si “i dashur Aleksandar”. Kjo sjellje është kundërshtuar nga ekspertë të Ballkanit Perëndimor.

Më herët ishte raportuar se von der Leyen do ta linte jashtë Serbinë nga vizita për shkak të situatës së tensionuar politike dhe shoqërore atje. Reagime të forta në Bashkimin Evropian kishte shkaktuar edhe varrimi i Ratko Mlladiqit, i dënuar për krime lufte dhe gjenocid.

Disa anëtarë të Parlamentit Evropian i kishin kërkuar gjithashtu von der Leyenit të mos udhëtonte drejt Beogradit.

“Siç theksoi presidentja në samitin e qershorit, Bashkimi ynë nuk do të jetë i plotë pa Ballkanin Perëndimor”, deklaroi Podesta.

Ajo shtoi se gjatë takimeve me partnerët, von der Leyen do të diskutojë për masat që duhen ndërmarrë në rrugëtimin e vendeve të rajonit drejt Bashkimit Evropian, si dhe për integrimin gradual të mbështetur nga Plani i Rritjes për Ballkanin Perëndimor./REL

The post Von der Leyen nis turneun ballkanik, viziton Kosovën, Shqipërinë, Malin e Zi dhe Maqedoninë e Veriut appeared first on Albeu.com.

Ajo i ka bërë këto deklarata gjatë një vizite në kryeqytetin ukrainas, Kiev.

Sipas saj, Ukraina ka shënuar përparim në shumë drejtime, pavarësisht luftës së Rusisë në tokën e saj, dhe theksin e ka vënë në reformat në gjyqësor.

“Më duhet ta them se keni bërë përparim të shkëlqyeshëm”, ka thënë von der Leyen.

”E di që jeni në proces të përfundimit të reformave të rëndësishme. Nëse kjo ndodh, jam e bindur se Ukraina mund ta përmbushë synimin ambicioz të kalimit në fazën tjetër të procesit të anëtarësimit”.

Në vlerësimin që pritet ta publikojë BE-ja javën e ardhshme, do të shihet sa ka ecur përpara Ukraina në përmbushjen e kritereve të ndryshme, teksa e synon anëtarësimin në bllokun evropian.

Kievi ka aplikuar për t’u bërë pjesë e BE-së vetëm disa ditë pas nisjes së luftës së Rusisë në Ukrainë, në shkurt të vitit 2022.

Zelensky ka thënë se Qeveria e Ukrainës i ka zbatuar të gjithë hapat e kërkuar, dhe është zotuar se do t’i çojë përpara reformat.

Ai ka thënë se është i gatshëm ta luftojë korrupsionin, ta përmirësojë transparencën, dhe ta zvogëlojë ndikimin e oligarkëve në ekonomi.

Të 27 vendet anëtarë të BE-së do ta mbajnë një samit në dhjetor, në të cilin do të vendosin nëse do t’ia mundësojnë Kievit nisjen e negociatave për anëtarësim.

Ky vendim kërkon mbështetje unanime.

Bisedimet për anëtarësim zakonisht zgjasin me vite dhe në atë proces duhet të kryhen shumë reforma ligjore, politike dhe ekonomike.

Lufta në Ukrainë ka nisur më 24 shkurt 2022.

Presidenti rus, Vladimir Putin e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

The post Shefja e BE-së përgëzon Ukrainën për “përparim të shkëlqyer” në rrugën drejt bllokut appeared first on Albeu.com.