Fehim Sali, shtetas i Kosovës, është arrestuar nga Policia e Kosovës nën dyshimin se ka kryer veprën penale të spiunazhit. Ai kishte shërbyer si anëtar i një këshilli që funksionon pranë Presidencës, por autoritetet thonë se ishte shkarkuar dy vjet më parë.

Sistemi Prokurorial i Kosovës njoftoi se arrestimi u realizua në pikën kufitare të Merdarit, në Podujevë, në bazë të urdhrit të lëshuar nga Prokuroria Speciale e Republikës së Kosovës.

Identiteti i të dyshuarit u konfirmua nga burimet e Radios Evropa e Lirë. Sali është nga Komuna e Dragashit dhe punon në sistemin arsimor serb që vepron brenda Kosovës.

Të dhënat zyrtare tregojnë se ai ka qenë gjithashtu pjesë e Këshillit Konsultativ për Komunitete (KKK), i cili vepron nën autoritetin e Presidentit të Kosovës. Presidenca ka bërë të ditur se Sali u shkarkua nga ky këshill në vitin 2024.

Vlora Konushevci, Këshilltare për Media e u.d Presidentes, Albulena Haxhiu, i tha Radios Evropa e Lirë se Fehim Sali e kishte përfaqësuar komunitetin goran në KKK gjatë dy mandateve, përkatësisht 2020-2022 dhe 2022-2024.

Konushevci sqaroi për REL-in se, pas raportit me informacione të sigurisë dhe propozimit të sekretarit të Këshillit, Sali u shkarkua më 3 maj 2024 dhe që prej asaj kohe nuk është më anëtar i Këshillit Konsultativ për Komunitete. Ajo shtoi se Presidenca nuk mund të japë hollësi të tjera rreth raportit.

Pas arrestimit, i dyshuari është ndaluar për 48 orë, siç bëri të ditur Prokuroria Speciale në një njoftim të mëvonshëm.

Hetuesit policorë të Drejtorisë për Hetimin e Krimit të Organizuar dhe Krimeve të Rënda kanë ekzekutuar edhe një urdhërkontroll në vendbanimin e të dyshuarit në Dragash.

Sipas njoftimit, gjatë kontrollit u gjetën dhe u sekuestruan 39.500 euro para të gatshme, 500 dinarë serbë dhe katër telefona celularë.

Policia dhe Prokuroria Speciale nuk kanë treguar konkretisht se për cilat veprimtari dyshohet Sali. Po ashtu, nuk është bërë e ditur nëse çështja ka lidhje me ndonjë shërbim të huaj të inteligjencës.

Prokuroria Speciale deklaroi se do t’i vazhdojë veprimet hetimore së bashku me Policinë e Kosovës, me synimin që të sqarohen plotësisht rrethanat e këtij rasti.

Veprimtaritë e fshehta që synojnë mbledhjen, transmetimin ose shpërndarjen e informacioneve të ndjeshme te një shtet, organizatë apo grup tjetër përkufizohen si spiunazh në Kosovë.

Kodi Penal i Kosovës e kategorizon spiunazhin si vepër të rëndë penale. Nëse shpallet fajtor, personi mund të dënohet me së paku pesë vjet burgim.

Arrestimi është kryer në një kohë kur institucionet e Kosovës kanë zhvilluar disa hetime dhe kanë arrestuar persona të dyshuar për spiunazh në favor të inteligjencës serbe.

Në rastet e mëhershme, të arrestuarit u përkisnin komuniteteve të ndryshme në Kosovë dhe dyshoheshin se kishin mbledhur ose përcjellë informacione për shërbimet serbe të inteligjencës.

Sipas vlerësimeve të ekspertëve të sigurisë, spiunazhi përbën një rrezik serioz për sigurinë e Kosovës. Ata vlerësojnë se veprimtari të këtij lloji mund të cenojnë sigurinë e brendshme, të shkaktojnë destabilizim të institucioneve dhe ta dëmtojnë pozitën ndërkombëtare të Kosovës.

Autoritetet nuk kanë sqaruar nëse rasti i F.S. lidhet me ndonjërën prej çështjeve të mëparshme të spiunazhit.

The post Fehim Sali, i arrestuar për dyshime për spiunazh, ishte larguar nga një këshill i Presidencës më 2024 appeared first on Albeu.com.