Një rezolutë parlamentare për këtë u miratua me 442 vota pro, 144 deputetë kundër dhe 33 abstenime. Ajo nuk është e detyrueshme, kështu që nuk ka gjasa që Hungarisë t’i hiqet presidenca e BE e planifikuar për në korrik 2024.

Situata është përkeqësuar dukshëm

Krahas “mosrespektimit të ligjit dhe vlerave” të BE-së, rezoluta përmend ndër të tjera edhe “korrupsionin sistemik” në Hungari. Situata e shtetit të së drejtës është përkeqësuar dukshëm vitet e fundit. Gjithashtu, denoncohet qeverisja me dekrete, si dhe kërcënimi i të drejtave të mësuesve apo personave LGBTQ. Shkurtesa anglisht LGBTQ do të thotë lezbike, homoseksual, biseksual, transgjinor dhe identitete të tjera gjinore.

BE aktualisht po bllokon rreth 30 miliardë euro nga fondet evropiane të planifikuara për Hungarinë – duke përfshirë 12 miliardë në ndihmë dhe kredi të privilegjuara nga fondi i rindërtimit Corona. Ajo e arsyeton këtë vendim me faktin se sistemi i drejtësisë dhe organet e kontrollit të vendit të kryeministrit Orban nuk janë mjaftueshëm të pavarura për të garantuar përdorimin korrekt të fondeve evropiane.

Kritika të forta nga Hungaria dhe Polonia

Përballë këtyre problemeve, Parlamenti Evropian u kërkon shteteve anëtare që “të gjejnë një zgjidhje të përshtatshme sa më shpejt të jetë e mundur”. Nëse jo, Parlamenti gjithashtu mund të “marrë masat e duhura”. Sekretarja gjermane e shtetit Anna Lührmann (të Gjelbërit) e kishte përshkruar më herët Hungarinë si “aktualisht të izoluar brenda BE-së”, “për shkak të problemeve të sundimit të ligjit që janë vërtet serioze”. Për më tepër, Hungaria vazhdon të tregojë mungesë mbështetjeje për Ukrainën në luftën e agresionit rus.

Ministrja hungareze e Drejtësisë Judit Varga e quajti rezolutën punën e një “shumicë të majtë pro luftës në Parlamentin Evropian”, e cila është gjithashtu “krejtësisht e tepërt”. Puna përgatitore për Presidencën hungareze është me të vërtetë duke u zhvilluar.

Kryeministri polak Mateusz Morawiecki gjithashtu e kritikoi rezolutën, duke e quajtur atë “një shkelje të qartë të rregullave evropiane në formën e tyre më të rëndësishme, përkatësisht rregullat e traktatit”. “Shkatërrimi i të gjithë mënyrës se si drejtohet BE-ja në këtë mënyrë nuk është thjesht një rrugë drejt askund-it, por një rrugë drejt humnerës,” tha ai në një konferencë në Republikën e Moldavisë. Polonia kritikohet kryesisht për reformën e saj në drejtësi, e cila, nga pikëpamja e Brukselit, minon ndarjen e pushteteve.

“A mundet një vend i tillë të marrë udhëheqjen politike?”

Nga ana tjetër, eurodeputetja konservatore gjermane Monika Hohlmeier foli për një qeveri të Orbanit, e cila ka marrë peng muajt e fundit pothuajse pa dallim projektligje të rëndësishme të nivelit të BE për të zhvatur koncesione për vete. “A mundet një vend që ecën në këtë mënyrë të marrë udhëheqjen politike në Evropë?” pyeti politikania e CSU-së. Megjithatë, ajo kujtoi gjithashtu se ky vendim u përket shteteve anëtare të BE-së dhe jo Parlamentit Evropian.

Në BE, çdo gjashtë muaj një vend tjetër merr presidencën e Këshillit të Ministrave. Deri tani, nuk ka ndodhur kurrë që një nga 27 shtetet anëtare të jetë përjashtuar. Vetëm Britania hoqi dorë nga presidenca në vitin 2017 për shkak të vendimit të saj për t’u larguar nga BE. /DW

The post Shkelje e të drejtave themelore dhe mosrespektim i ligjeve evropiane, a është e aftë Hungaria për Presidencën e BE? appeared first on Albeu.com.

Kryeministri suedez Ulf Kristersson tha në një deklaratë të qeverisë në dhjetor se lufta do të përcaktojë në masë të madhe edhe veprimin e Presidencës suedeze. Nga njëra anë, ne e dimë saktësisht se çfarë duhet të bëjmë: të ruajmë unitetin evropian në mbështetjen e Ukrainës, të shfrytëzojmë burimet për rindërtim, të zbatojmë ligjin ndërkombëtar dhe të përgatisim rrugën që vendi kandidat Ukraina të anëtarësohet në BE. Nga ana tjetër, ne nuk e kemi idenë se çfarë do të ndodhë. Çfarë do të ndodhë një vit pas pushtimit? Në pranverë? Në verë? Suedia do të jetë e përgatitur të veprojë shpejt dhe me vendosmëri”, tha konservatori Kristersson.
Qeverisja e vështirë me tolerancën e demokratëve të ekstremit të djathtë

Çështje të tjera si mbrojtja e klimës, politika e imigracionit por edhe zgjerimi dhe përfshirja e vendeve të Ballkanit Perëndimor në BE do të jenë në rend të dytë, krahasuar me pasojat e luftës. Kreu i ri i qeverisë, i cili mori detyrën në tetor pas zgjedhjeve parlamentare, nuk mundi të krijojë koalicionin e dëshiruar dhe tani varet nga demokratët e ekstremit të djathtë suedez. Lideri i demokratëve suedezë, Jimmie Åkesson, i cili fitoi 20 për qind të votave, por nuk u pranua në një koalicion qeverisës, konsiderohet mohues i ndryshimeve klimatike, ndjek një politikë të ashpër kundër emigracionit dhe kritikon Bashkimin Evropian si burimin e të gjitha të këqijave. Kjo i bën demokratët suedezë aleatët natyrorë të qeverive të tjera të krahut të djathtë në BE, veçanërisht në Hungari dhe Itali.

Kryeministri suedez njoftoi se Suedia do të vazhdojë të mbështesë sundimin e ligjit në të gjitha vendet anëtare të BE-së. Procedurat përkatëse kundër Hungarisë dhe Polonisë do të shtyhen përpara “në mënyrë të moderuar”. Megjithatë, demokratët suedezë refuzojnë rreptësisht masat ndëshkuese kundër Hungarisë, siç është ndalimi i subvencioneve të BE-së, i cili është praktikuar për herë të parë. Eurodeputeti ekologjist Jacob Dalunde, partia e të cilit është në opozitë në Suedi, ka dyshime për rrjedhën e Presidencës së ardhshme të Këshillit Suedez. “Që Kristersson vazhdon të pretendojë se ai dhe qeveria e tij do të jenë në gjendje të mbrojnë shtetin e së drejtës duke u mbështetur tek demokratët suedezë është naive dhe e rrezikshme”, tha Dalunde për portalin e lajmeve “Euractiv”.
Më shumë pavarësi për Evropën

Qeveria suedeze të paktën dëshiron të bëjë përparim në çështjet ekonomike. Konkretisht, kryeministri Ulf Kristersson bëri të ditur se industria evropiane e makinave duhet të mbështetet tek makineria elektrike. Në të njëjtën kohë, varësia nga furnizuesit dhe produktet primare nga Azia duhet të reduktohet.

Kristersson nuk dëshiron të pranojë subvencione të padrejta nga SHBA për industrinë e saj. “Gjatë presidencës së saj, Suedia do të avancojë punën në një mjedis evropian të prodhimit për gjysmëpërçuesit. Kjo tingëllon teknike dhe është teknike. Por është absolutisht e nevojshme nëse duam të elektrizojmë plotësisht flotën tonë të automjeteve,” tha kreu i qeverisë në parlamenti suedez në Stokholm.

Kriminaliteti i organizuar hedhë hije mbi Presidencën

Suedia nuk është veçanërisht optimiste për këtë mandat, sepse ajo ka në fakt shumë probleme edhe në shtëpinë e vet. Në fjalimin e tij për Krishtlindje, Ulf Kristersson paraqiti një pamje të zymtë të atdheut të tij, i cili po vuan mbi të gjitha nga kriminaliteti në rritje midis klaneve të huaja. “Jashtë vendit, Suedia përgjithësisht perceptohet si paqësore dhe harmonike”, tha kryeministri. Por pamja nuk është e saktë. Deri nga mesi i dhjetorit, policia suedeze ka regjistruar 378 të shtëna me armë zjarri në të cilat mbetën të vrarë 60 persona. Në vendet fqinje, shifrat janë shumë më të vogla. Danimarka ka katër të vdekur ndërsa Finlanda vetëm dy gjatë kësaj periudhe.
Sipas kryeministrit, në Södertälje afër Stokholmit këtë vit janë vrarë me armë zjarri aq njerëz sa në të gjithë Londrën. Të rinjtë me prejardhje migrimi qëllojnë njëri-tjetrin kryesisht si pasojë e përfshirjes në krimin e organizuar. Pikërisht për shkak të këtij problemi të sigurisë dhe vrasjeve të shumta, demokratët suedezë ekstremistë të krahut të djathtë ishin kaq të popullarizuar në zgjedhje.

Paralelisht me punën për BE-në, Suedia duhet të punojë shumë edhe për sigurinë e saj të jashtme gjatë këtij viti. Turqia ende po bllokon pranimin e Suedisë dhe Finlandës në NATO, gjoja sepse terroristët kurdë mbrohen në dy vendet nordike. Suedia ka bërë lëshime dhe dëshiron t’i ekstradojë të akuzuarit në Turqi më shpejt. Megjithatë, kjo nuk mjafton për presidentin turk Rexhep Tajip Erdogan, siç kishte deklaruar në dhjetor. Sekretari i Përgjithshëm i NATO-s, Jens Stoltenberg megjithtatë pret që Suedia të pranohet në NATO në vitin 2023. Por as ai nuk mund të thotë se kur do të ndodhë kjo.

The post Suedia merr Presidencën e BE-së në kohë lufte e krizash appeared first on Albeu.com.