Presidenti serb, Aleksandar Vuçiq, qëndroi ditë më parë pa paralajmërim në Luginën e Preshevës, ku zhvilloi takime me qytetarët serbë që jetojnë në këtë zonë.

Gjatë qëndrimit atje, Vuçiq i garantoi një qytetari se Agjencia e Informacionit dhe Sigurisë së Serbisë (BIA) do ta kontaktonte atë ose djalin e tij brenda 48 orësh, lidhur me mundësinë e punësimit.

Kjo vizitë u realizua vetëm një ditë pasi një delegacion politikanësh shqiptarë kishte qëndruar në Tiranë. Në këtë takim ishte diskutuar hapja e Konsullatës së Shqipërisë në Bujanoc, si masë reciprociteti ndaj hapjes së Konsullatës së Serbisë në Shkodër.

Koha dhe rrethanat e vizitës së presidentit serb kanë nxitur reagime dhe pikëpyetje për mesazhin e saj politik, sidomos në raport me pozitën e shqiptarëve të Luginës së Preshevës.

Opinionisti Nehat Hyseni, duke folur për “Bota sot”, tha se premtimi i Vuçiqit nuk mund të trajtohet thjesht si një rast individual. Sipas tij, ai ngre shqetësime më të gjera për funksionimin e institucioneve të sigurisë dhe për mënyrën se si trajtohen shqiptarët në këtë rajon.

Hyseni vlerësoi se deklarata e Aleksandar Vuçiqit, sipas së cilës një qytetar ose djali i tij do të kontaktohej nga BIA brenda 48 orësh për një mundësi pune, kërkon vëmendje dhe analizë serioze përtej interesit personal të individit.

Ai theksoi se nuk vihet në diskutim e drejta e askujt për të kërkuar punë dhe për të siguruar një jetë me dinjitet në vendin e vet. Përkundrazi, sipas tij, punësimi është një e drejtë themelore dhe shteti ka detyrimin të ofrojë mundësi të njëjta për të gjithë. Problemi, siç tha ai, qëndron te fakti se kreu i shtetit premton publikisht dhe drejtpërdrejt ndërhyrjen e një agjencie sigurie për punësim brenda 48 orësh, duke i dhënë çështjes një karakter të dukshëm politik, institucional dhe qartësisht antishqiptar.

Sipas Hysenit, BIA nuk funksionon as si kompani private dhe as si zyrë komunale ku vendet e punës mund të premtohen gjatë takimeve me qytetarët, por është institucion shtetëror i sigurisë. Vetë agjencia, siç rikujtoi ai, deklaron se angazhimi në të kërkon aftësi dhe tipare të posaçme profesionale, ndërsa rekrutimi kryhet përmes procedurave specifike. Për këtë arsye, ai pyeti nëse kriteri kryesor duhet të jetë meritokracia apo afërsia personale me pushtetin dhe përkatësia kombëtare domosdoshmërisht serbe, në një mjedis ku 95% e popullsisë janë shqiptarë.

Hyseni tha se ndjeshmëria e kësaj teme rritet veçanërisht në Luginën e Preshevës, pasi shqiptarët prej dekadash ankohen për diskriminim dhe përfaqësim të pamjaftueshëm në institucionet shtetërore, sidomos në strukturat e sigurisë, administratë dhe institucionet publike.

Në këto rrethana, sipas tij, premtimi i drejtpërdrejtë për punësim në BIA mund të kuptohet si mjet ndikimi politik dhe si një sinjal i pacipë për shqiptarët se në Serbi dhe në këtë agjenci ka hapësirë vetëm për serbët.

Ai e cilësoi paradoksale gjendjen në Luginën e Preshevës, ku shqiptarët përballen me papunësi, varfëri, mungesë investimesh dhe largim të vazhdueshëm të të rinjve. Hyseni tha se shqiptarët nuk ikin sepse nuk i duan Preshevën, Bujanocin ose Medvegjën, por sepse nuk gjejnë perspektivë ekonomike dhe profesionale. Sipas tij, Serbia, si shtet diskriminues dhe fashist, i detyron qytetarët joserbë të zgjedhin mes emigrimit dhe mbijetesës.

Hyseni pyeti se ku ndodhet shteti kur duhet të sigurohet punësimi i të rinjve shqiptarë dhe cili është reagimi institucional kur një shqiptar i ri konkurron për punë në polici, ushtri, administratë, gjyqësi, ndërmarrje publike ose institucione sigurie.

Nëse një ndërhyrje telefonike e presidentit mund t’ia përshpejtojë një qytetari mundësinë e punësimit, atëherë, sipas tij, shqiptarët kanë të drejtë të kërkojnë që i njëjti shtet t’i sigurojë secilit mundësi të barabarta, pavarësisht përkatësisë etnike.

Ai sqaroi se shqiptarët nuk kërkojnë privilegje, por barazi; nuk duan që vendet e punës t’u falen si shpërblim politik, por kërkojnë konkurrim të drejtë dhe meritokraci. Gjithashtu, siç u shpreh ai, nuk presin që Beogradi t’i “shpëtojë”, por që institucionet e Republikës së Serbisë të mos i diskriminojnë.

Hyseni nënvizoi se trajtimi i shqiptarëve në Luginën e Preshevës nuk lidhet vetëm me të drejtat e tyre, por ka rëndësi edhe për qëndrueshmërinë e vetë Serbisë.

Sipas tij, stabiliteti në Luginën e Preshevës nuk mund të mbështetet te patronazhi politik, favoret individuale dhe raportet klienteliste të drejtpërdrejta. Një politikë e qëndrueshme duhet të bazohet në institucione funksionale, përfaqësim proporcional, zhvillim ekonomik dhe mundësi të barabarta si për shqiptarët, ashtu edhe për serbët.

Ai tha se deklarata e Vuçiqit jep një sinjal shqetësues, sepse tregon se presidenti mund të ndërhyjë personalisht për të hapur një derë institucionale që për qytetarët e zakonshëm duhet të jetë e arritshme përmes procedurave të rregullta.

Kjo, sipas Hysenit, krijon bindjen se shteti u shërben vetëm serbëve, të cilët kanë qasje të jashtëzakonshme te pushteti, ndërsa shqiptarët vazhdojnë të shpërfillen dhe diskriminohen. Ai përmendi mosnjohjen e diplomave të fituara në Kosovë, fshirjen e adresave dhe spastrimin etnik të Luginës përmes masave administrative e policore, duke theksuar se shqiptarët e këtij rajoni nuk duhet ta pranojnë këtë gjendje si normale.

Hyseni sqaroi se nuk kundërshton punësimin e asnjë qytetari serb. Sipas tij, çdo i ri serb që siguron një punë dhe qëndron në vendlindje është një person më pak i detyruar të largohet. Megjithatë, e njëjta e drejtë duhet t’i garantohet edhe të riut shqiptar. Ai kërkoi që shteti të frenojë emigrimin dhe ta ruajë popullsinë shqiptare përmes politikave të barabarta e jodiskriminuese, jo nëpërmjet përzgjedhjes etnike ose patronazhit politik.

Duke folur për rrugëzgjidhjen, Hyseni vlerësoi se Lugina e Preshevës nuk ka nevojë për mëshirën politike të Beogradit, por për zhvillim ekonomik dhe drejtësi institucionale, dy çështje që, sipas tij, përbëjnë një dallim thelbësor.

Ai theksoi se një vend pune nuk mund të shërbejë si shpërblim për besnikëri politike, ndërsa punësimi në një institucion sigurie nuk duhet të ofrohet si favor personal. Një pozitë e tillë, sipas tij, duhet të fitohet përmes njohurive, profesionalizmit, integritetit dhe një procesi transparent.

Nëse Serbia synon të dëshmojë se është një shtet demokratik dhe evropian, prova kryesore, sipas Hysenit, nuk gjendet te deklaratat që bëhen në Beograd, por te realiteti në Preshevë, Bujanoc dhe Medvegjë. Ai përsëriti se shqiptarët e Luginës nuk kërkojnë trajtim të privilegjuar, por fundin e diskriminimit, duke e cilësuar këtë si kërkesë qytetare, demokratike dhe evropiane.

Në përfundim, Hyseni e lidhi këtë temë edhe me dinjitetin kombëtar. Si shqiptar nga Lugina e Preshevës, ai tha se asnjë i ri shqiptar nuk duhet të detyrohet të emigrojë vetëm për shkak se shteti nuk i ka siguruar kushte të barabarta për të punuar dhe jetuar në vendlindjen e vet.

Ai shtroi pyetjen se përse, nëse një qytetari mund t’i gjendet punë në BIA brenda 48 orësh, nuk mund të krijohen vende dhe mundësi punësimi për mijëra të rinj shqiptarë përmes një sistemi të barabartë, transparent dhe meritokratik. Sipas tij, pikërisht nga kjo pikë duhet të nisë diskutimi serioz për pozitën e shqiptarëve në Luginën e Preshevës.

Hyseni përfundoi duke thënë se vizita e papritur e Aleksandar Vuçiqit nuk ndodhi rastësisht menjëherë pas kthimit të udhëheqësve politikë shqiptarë nga Shqipëria, ku ishte trajtuar hapja e Konsullatës së Shqipërisë në Bujanoc si reciprocitet ndaj Konsullatës së Serbisë në Shkodër.

Sipas tij, kjo konsullatë mund të sjellë më shumë dëm sesa dobi, po të merret parasysh se në Luginë jetojnë mbi 130.000 shqiptarë, ndërsa në Shkodër dhe rrethinë zyrtarisht banojnë 160 serbë dhe malazezë. Për këtë arsye, Hyseni e konsideroi vizitën e Vuçiqit edhe si një mesazh diplomatik të pasinqertë dhe të shëmtuar, përfundoi ai për “Bota sot”.

The post Hyseni: Vizita e Vuçiqit në Preshevë nuk ndodhi rastësisht appeared first on Albeu.com.

Kryetarja e Komunës së Preshevës, Ardita Sinani, ka reaguar pas qëndrimit të presidentit serb Aleksandar Vuçiq në këtë komunë, duke kërkuar që të gjithë banorët të trajtohen në mënyrë të barabartë.

Sipas Sinanit, Presheva nuk duhet të kujtohet vetëm në rastet kur institucionet qendrore kanë nevojë për të, ndërsa çdo investim që ndikon në përmirësimin e kushteve të jetesës së qytetarëve, ajo e konsideron të mirëpritur.

“Presheva nuk mund të ketë dy standarde”, ka deklaruar Sinani.

Ajo ka sjellë në vëmendje investimet e kryera nga Komuna e Preshevës në Mamincë, Strezoc, Svinjishtë dhe në vendbanime të tjera, duke nënvizuar se pushteti lokal nuk bën dallime mes qytetarëve në bazë të përkatësisë etnike.

Kryetarja e Preshevës ka thënë se të njëjtin parim barazie që, sipas saj, zbatohet nga komuna, qytetarët presin ta shohin edhe në veprimet e institucioneve qendrore të Serbisë.

“Kemi kërkuar zyrtarisht investime për Shkollën ‘Prof. Ibrahim Kelmendi’, për shkollën në Mamincë, për çerdhen ‘8 Marsi’ dhe për projekte të tjera që lidhen drejtpërdrejt me jetën e qytetarëve tanë”, ka shkruar ajo.

Duke iu referuar projekteve të bëra publike gjatë vizitës së Vuçiqit, Sinani ka pyetur përse qytetarët shqiptarë, sipas saj, duhet të presin me vite për përgjigje, investime dhe realizimin e projekteve nga institucionet qendrore.

“Nuk kërkojmë që të merret nga njëri për t’i dhënë tjetrit. Kërkojmë të mos merret nga shqiptarët për t’u dhënë të tjerëve”, ka deklaruar Sinani.

Ajo ka kujtuar se në Preshevë jetojnë shqiptarë, serbë, romë dhe pjesëtarë të komuniteteve të tjera, të cilët duhet të kenë të gjithë mundësinë për të ndërtuar një jetë më të mirë.

Megjithatë, Sinani ka vlerësuar se përparimi i një komuniteti nuk mund të shërbejë si justifikim për diskriminimin e një komuniteti tjetër.

Komuna e Preshevës, sipas saj, mbetet e gatshme të bashkëpunojë me institucionet e Serbisë, por nuk do të heshtë përballë pabarazive.

“Ne nuk kërkojmë privilegje. Kërkojmë barazi. Nuk kërkojmë më shumë se të tjerët. Kërkojmë të mos marrim më pak”, ka shkruar kryetarja.

Sinani ka bërë të ditur se këtë çështje do të vazhdojë ta ngrejë në Preshevë, Beograd, Prishtinë dhe Tiranë.

“Shqiptarët e Preshevës janë këtu. Janë qytetarë. Kanë nevoja. Kanë të drejta. Dhe nuk do të pranojmë të trajtohemi si qytetarë të dorës së dytë ose që nuk ekzistojnë fare”, ka përfunduar ajo.

The post Ardita Sinani pas vizitës së Vuçiqit në Preshevë: Nuk pranojmë të trajtohemi si qytetarë të dorës së dytë appeared first on Albeu.com.

Një nga organizatorët e marshit tha se “nga këtu dërguam porosinë se shqiptarët duan barazi, se barazia pa drejtësi nuk bëhet.
Kërkesat e shqiptarëve janë të kamotshme, e kamotshme është edhe heshtja e shtetit dhe padrejtësia që po ua bën shqiptarëve”.

Ajo theksoi se kërkesat janë kthimi i gjykatës, zbatimi i marrëveshejve të deritashme, kthimi i adresave të shqiptarëve në Preshevë, Bujanoc dhe Medvegjë, njohja e diplomave shkollore dhe integrimi i shqiptarëve në organet shtetërore.

Serbia e ka mohuar vazhdimisht se shqiptarët në këtë vend janë të diskriminuar.

Të veshur me fanella me mbishkrimin “Për identitet dhe dinjitet”, marshuesit kaluan nëpër qendrën e qytetit të Preshevës pranë institucioneve duke mbajtur pankarta me thirrjet si: “Stop pasivizmit selektiv”, “Duam libra shqip” dhe “Kthema adresën”.

Marshuesit, të cilëve u prinë përfaqësuesi i vetëm i shqiptarëve në Parlamentin e Serbisë, Shaip Kamberi dhe kryetarja e Preshevës, Ardita Siani, u ndalën pranë ndërtesës së Komunës së Preshevës, ku u këndua himni kombëtar shqiptar.

Kjo është protesta e dytë e shqiptarëve të Luginës në dy muajt e fundit, pas asaj në Bujanoc në gusht.

Sipas regjistrimit të fundit të popullsisë, shqiptarët janë pakica e katërt më e madhe në Serbi, përkatësisht në këtë shtet jetojnë 61.687 shqiptarë.

Përfaqësuesit e Preshevës, Medvegjës dhe Bujanocit – komuna që njihen edhe me termin Lugina e Preshevës – shpesh janë ankuar se diskriminohen nga autoritetet në Serbi.

Një problem me të cilin përballet shqiptarët e Luginës së Preshevës është edhe mosnjohja e diplomave universitare të fituara në Kosovë, pavarësisht se Kosova dhe Serbia kanë arritur marrëveshje për këtë në dialogun e ndërmjetësuar nga Bashkimi Evropian.

Më 2020 Kosova dhe Serbia e ritheksuan përkushtimin e tyre për njohjen e diplomave dhe certifikatave profesionale, por deri tani nuk janë bërë hapa për zbatimin e tyre.

Ndërkaq, në fund të vitit të kaluar, shqiptarët u Luginës u ankuan edhe për një rritje të numrit të çaktivizimit të adresave të tyre nga policia serbe, duke e akuzuar atë se i ka fshirë ato në mënyrë të paligjshme, për t’ua mohuar të drejtat elementare.

Problemi i çaktivizimit të adresave është përmendur në raportin e Komisionit Evropian për Serbinë më 2022, në pjesën që ka të bëjë me respektimin e të drejtave të pakicave.

Pas protestës së gushtit në Bujanoc, Qeveria e Serbisë, kishte thënë se ajo ishte përpjekje e Qeverisë së Kosovës, të udhëhequr nga Albin Kurti “për të destabilizuar rajonin”.

Qeveria serbe i kishte hedhur poshtë akuzat e deputetit Kamberi për diskriminimin e shqiptarëve dhe për përfaqësim të pamjaftueshëm në institucione duke thënë se nuk qëndrojnë.

Më 2001 ishte arritur një marrëveshje e njohur si Marrëveshja e Konçulit për çmilitarizim e Ushtrisë Çlirimtare të Preshevës, Medvegjës dhe Bujanocit (UÇPMB) dhe për integrimin e pakicës shqiptare nëpërmjet një procesi demokratik.

Në korrik të vitit 2013, Qeveria e presidentit Aleksandar Vuçiq e miratoi planin shtatëpikësh, i cili ishte pothuajse i njëjtë si marrëveshjet e mëparshme.

Qeveria serbe tha në gusht se ai plan u ndërpre nga deputeti i atëhershëm shqiptar në Kuvendin serb, Riza Halimi, në nëntor të vitit 2013./REL

The post Shqiptarët e Luginës marshojnë për “identitet dhe dinjitet” dhe kundër diskriminimit appeared first on Albeu.com.

Arifi u shpreh se ka disa kohë që Vuçiç kërcënon publikisht shqiptarët e Preshevës, ndërsa tha se pas këtij veprimi ai ka njoftuar partnerët ndërkombëtare SHBA dhe BE.

Postimi i Shqiprim Arifit:

Dje në mesnatë, pushteti autoritar i Beogradit, në mënyrë arbitrare dhe duke mos ndjekur asnjë procedurë ligjore, si dhe pa asnjë njoftim zyrtar, regjimi serb dhe antishqiptar duke vazhduar traditën e Millosheviqit të viteve të 90ta, në mënyrë të dhunshme më SHKARKUAN nga posti i Kryetarit të Komunës së Preshevës.

Njëkohësisht, ky regjim antishqiptar dhunshëm instaloi një organ të përkohshëm deri në zgjedhjet e ardhshme.

Ka disa kohë që Vuçiq kërcënon publikisht shqiptarët e Luginës së Preshevës. SHKARKIMI i dhunshëm i imi, mesnatën e mbrëmshme, pa asnjë procedur ligjore dhe asnjë njoftim, ndodh menjëherë pas kërcënimit të fundit publik të Vuçiqit në këtë javë dhe 24 orë pasi u dënova nga Gjykata serbe për vendosjen e flamurit kombëtar shqiptar më 28 Nëntor.

Me këto veprime raciste antishqiptare që janë trashëgimi e politikave të regjimit të Millosheviqit, Serbia e sotshme e Vuçiqit dëshmon tani më 3 dekada e më shumë, se shqiptarët nuk i konsideron si qenie njerëzore dhe asesi qyetatarë të barabartë në Serbi.

Diskriminimi ndaj shqiptarëve është agjend e pandërprerë e politikave të Vuçiqit dhe Serbisë së tij pro-ruse.

Pra, në boshtin shoqëror të Serbisë dhe në edukimin filozofiko-politik të Serbisë, ky shtet mbetet në thelb një regjim autokrat i cili nacionalizmin ekstrem serb e përdor kundrejt të gjithëve, në veçanti të shqiptarëve e sidomos ndaj shqiptarëve të Luginës së Preshevës.

SHKARKIMIN tim të dhunshëm, nuk kishte mundur ta realizoj pa ndihmën e pakursyer të shqipfolësve serbofil siç janë: Ragmi Mustafa, Shaip Kamberi, Ardita Sinani dhe Argjend Sherifi si dhe disa kompani lokale mafioze që bashkëpunojnë me qarqet e errëta në Serbi.

Kjo klasë politike bashkëpunuese besnik të regjimit serb me dekada, janë bërë vegël e lehtë për Vuçiqin dhe serbinë për të realizuar agjendën e tij antishqiptare në Luginë të Preshevës.

Prandaj edhe kryetari i organit të dhunshëm që u vendos në mesnatën e djeshme nga Vucic, është Ragmi Mustafa i cili para 1 dekade i ka dhuruar pikërisht Vucicit “ZAHVALLNICËN – Mirënjohje ” menjëherë pasi e hoqi Vucic lapidarin me emrat e dëshmorëve të UÇPMB-së.

Për SHKARKIMIN tim të dhunshëm dhe për gjithë akterët të lartcekur, që në vazhdimësi po ndihmojnë Serbinë për të dëmtuar shqiptarët, kam njoftuar partnerët tanë ndërkombëtar SHBA dhe BE.

Me këtë SHKARKIM të dhunshëm nga regjimi serb i jap FUND politikës aktive në Luginë të Preshevës, por në anën tjetër dhe njëherë më shumë më ka motivuar që luftën ndaj padrejtësisë, diskriminimit, pasivizimit dhe luftën për të drejta elementare dhe avokimin e të drejtave të popullit tim, për shqiptarët autokton të këtyre trojeve, ta ngriti në një nivel më të lartë!

The post Vijon hakmarrja e Serbisë, Vuçiç shkarkon kryetarin e komunës së Preshevës, Shqiprim Arifin appeared first on Albeu.com.

Blic.rs njofton se bëhet fjalë për një burrë 52 vjeç me shtetësi të Maqedonisë, por me kombësi shqiptare, ndërsa nuk zbulohet ideniteti i tij. Ndërsa gruaja raportohet se është një 30 vjeçare serbe.

Sipas versionit policor serb, ngjarja ndodhi në pikën e pagesës rrugore të Preshevës, me ç’rast pas një zënke, 30 vjeçarja ka dal nga makina duke ikur, por në atë moment ndaj saj është shtënë me armë zjarri nga 52 vjeçari, i cili më pas është vetëvrarë.

Policia më pas ka bllokur vendin e ngjarjes për të kryer ekspertizën.

Burri i vetëvrarë është gjetur pa shenja jete, ndërsa gruaja është dërguar në Spitalin e Vranjës, në gjendje të rëndë shëndetësore.

The post Shqiptari nga Tetova plagos rëndë një 30 vjeçare serbe, më pas vetëvritet në pikëpagesën rrugore në afërsi të Preshevës appeared first on Albeu.com.

Doganierët dhe punonjësit e policisë kufitare parandaluan kontrabandën e 600 mijë eurove, 125 mijë dollarëve cash dhe një guri të çmuar smerald në mjetin tip “BMW”, në të cilin gjendeshin, siç u njoftua asokohe, shtetasi gjerman A.A. dhe shtetasi ukrainas A.N., për të cilin mediat ukrainase pretendojnë se është Andriy Naumov.

Më 31 mars, Presidenti i Ukrainës, Volodymyr Zelensky, e largoi atë nga posti i kreut të Departamentit të Sigurisë së Brendshme, duke e akuzuar për tradhti të lartë. Shtetasi gjerman dyshohet se është shoferi i tij. Në një deklaratë të MPB-së së Serbisë tre ditë më parë thuhet se gjermani A. A. dhe ukrainasi A. N. janë arrestuar nën dyshimin për pastrim parash./albeu.com

The post Zelensky e shkarkoi, arrestohet në Preshevë ish-kreu i shërbimit të inteligjencës appeared first on Albeu.com.

Sinani madje kishte kërkuar që kjo seancë të shtyhej, për shkak të vizitës së saj zyrtare në Kosovë.

Megjithatë, Kuvendi u mbajt, por shkarkimi i Sinanit u kundërshtua.

Ajo zgjodhi Facebookun për të falendëruar përkrahësit.

“Faleminderit të gjithëve për përkrahjen. Në Luginë, në Kosovë, në Shqipëri, në Mergatë. Bashkërisht do ta përmirësojmë degradimin e politikës shqiptare në Luginën e Preshevës” ka shkruar ajo.

Kujtojmë se Kryeministri i Kosovës, Albin Kurti, nuk e ka përkrahur iniciativën për shkarkimin e Ardita Sinanit nga pozita e kryetares së Preshevës.

Gjatë një takimi të zhvilluar sot me përfaqësuesit e Luginës, ku e pranishme ishte edhe Sinani, Kurti bëri thirrje të mos mbështeten tentimet për acarim mes shqiptarëve, pjesë të së cilës e pa edhe synimin për ta rrëzuar nga pozita e kryetares së Preshevës Ardita Sinianin.

“Pas shtypjes e diskriminimit që po u bëhet shqiptarëve nuk duhet mbështetur tentimet për acarim të shqiptarëve me njëri-tjetrin, pjesë e së cilës është edhe synimi për ta rrëzuar kryetaren e Preshevës, znj.Ardita Sinani. Përçarja e ndarja janë gabim dhe bëhen dëm” u shpreh kryeministri Kurti në mëngjesin e sotëm.

The post Albin Kurtit s’i shkon fjala në Luginë, shkarkohet Kryetarja e Preshevës appeared first on Albeu.com.

Rreth 42 mijë qytetarë kanë të drejtë vote sot për të votuar për 38 këshilltarët për thirrjen e re të parlamentit lokal.

Për parlament ishin bërë bashkë, por shqiptarët e Preshevës në këto zgjedhje të jashtëzakonshme garojnë me gjashtë lista të ndryshme. Serbët janë në koalicion prej tetë partive serbe të bashkuara në partinë SNS.

Nga 7 lista zgjedhore, 4 janë parti politike, 2 janë grupe qytetarësh dhe njëra koalicion.

Kujtojmë se Kuvendi Komunal u shpërnda në mes të muajit dhjetor 2020 për arsye se nuk u mbajt asnjë seancë që nga 27 gushti 2020.

Ardita Sinani nga Partisë për Veprim Demokratik, është kandidatja e vetme femër që synon rikthimin në krye të komunës. Kurse, për të parin e komunës në garë është edhe Shqiprim Arifi nga Alternativa për Ndryshim, Ragmi Mustafa nga radhët e Partisë Demokratike Shqiptare, Naser Azizi nga radhët e Unionit Demokratik Shqiptar, Armend Aliu nga Alternativa Demokratike Shqiptare, si dhe Sami Salihu nga Lëvizja për Reforma.

Kuvendi komunal u shpërnda në mes të muajit dhjetor 2020, për arsye se nuk është mbajtur asnjë seancë që nga 27 gushti 2020.

Në Preshevë sot mbahen zgjedhjet e parakohshme lokale. Tashmë janë hapur dyert e qendrës së votimit numër 3 në objektin e Komunës së Preshevës.

The post Zgjedhjet e parakohshme në Preshevë, nis sot votimi appeared first on Albeu.com.