Deputeti i LDK-së, Armend Zemaj, ka reaguar në rrjetet sociale pas kundërshtimit të kandidaturës së Bekim Sejdiut për president të Kosovës. Ai është njëri nga gjashtë deputetët e kësaj partie që kanë dalë kundër këtij propozimi.

Në mesazhin e tij, Zemaj është ndalur te identiteti dhe trashëgimia e LDK-së, duke theksuar se anëtarët e saj dhe rugovistët nuk duhet të ndikohen nga zhvillimet apo interesat e përkohshme politike.

“Mirëmëngjesi, Kosovë! Sot e përgjithmonë, LDK!”, ka shkruar ai.

Zemaj ka bërë të ditur se, edhe pas zhvillimeve të fundit, bindja e tij ndaj vlerave të LDK-së nuk ka ndryshuar.

“Kam pritur, kam përcjellë, kam pritur përsëri. Por një gjë nuk ka ndryshuar: LDK-istët e Rugovistët mbeten aty ku kanë qenë gjithmonë, në rrënjët e tyre”, ka deklaruar deputeti.

Ai ka nënvizuar se këto themele nuk mund të lëkunden nga interesat politike të ditës.

“Rrënjët e thella nuk luhaten nga erërat e ditës dhe nuk shkulen nga interesat e momentit. Ato nuk janë krijuar nga lobime, financime apo pazare, as nga brenda e as nga jashtë vendit”, ka shkruar Zemaj.

Duke iu referuar së kaluarës së partisë, deputeti ka përmendur themelimin e LDK-së dhe angazhimin e saj politik për Kosovën.

“Janë rrënjë autoktone, të mbjella në vitin 1989, të ushqyera nga një shekull mbamendje, sakrifice dhe përkushtimi për Kosovën dhe shqiptarinë”, ka thënë ai.

Mesazhin e tij Zemaj e ka përmbyllur me theksin se LDK-ja nuk i përket një personi ose një grupi të caktuar.

“LDK-ja nuk është pronë e askujt. Është histori, vlerë dhe besim i gjeneratave”, ka shkruar ai.

Reagimi u bë publik pasi Armend Zemaj, Avdullah Hoti, Hykmete Bajrami, Arben Gashi, Kujtim Shala dhe Janina Ymeri kundërshtuan mbështetjen e LDK-së për Bekim Sejdiun si kandidat për president.

Kundërshtimi i gjashtë deputetëve ka vështirësuar marrëveshjen politike mes LDK-së dhe Lëvizjes Vetëvendosje për zgjedhjen e presidentit, pasi votat e tyre mund të përcaktojnë nëse Kuvendi do ta sigurojë shumicën e nevojshme.

The post Zemaj kundër kandidaturës së Sejdiut për president: LDK-ja nuk është pronë e askujt appeared first on Albeu.com.