Në prag të shpalljes së vendimit ndaj ish-krerëve të Ushtrisë Çlirimtare të Kosovës në Hagë, eksperti i sigurisë, Avni Islami, u ka kërkuar qytetarëve të tregojnë qetësi, maturi dhe vigjilencë.

Islami ka deklaruar në një postim në Facebook se, kur kanë mbetur më pak se 48 orë deri në publikimin e verdiktit, “makineria propagandistike dhe shërbimet inteligjente serbe (BIA) dhe të tjera” kanë nisur veprimtarinë e tyre.

Sipas tij, në media dhe në rrjetet sociale po qarkullojnë lajme të pavërteta dhe deklarata të bujshme për trazira të sajuara në Kosovë. Ai e ka ndërlidhur këtë skenar me stërvitjet e fundit të ushtrisë serbe pranë kufirit të Kosovës, duke e cilësuar si “një luftë të pastër hibride” që, siç ka thënë, do të dështojë përballë pjekurisë së popullit.

Eksperti i sigurisë u ka bërë apel qytetarëve të mos bien nën ndikimin e provokimeve dhe të informacioneve të rreme, të cilat, sipas tij, kanë për qëllim të shkaktojnë panik.

Islami ka theksuar se besimi dhe bashkëpunimi i qytetarëve me institucionet e vendit përbëjnë mbrojtjen më të fuqishme, ndërsa Agjencia Kosovare e Inteligjencës (AKI) dhe Policia e Kosovës, sipas tij, janë plotësisht të gatshme, të forta dhe të pathyeshme.

Ai ka paralajmëruar se çdo përpjekje e agjenturave të huaja ose e elementeve destabilizuese për të nxitur provokime dhe për të cenuar rendin kushtetues “do të neutralizohet në mënyrë të menjëhershme”. Islami ka vlerësuar gjithashtu se siguria e Kosovës mbetet e garantuar dhe e pacenueshme.

The post Islami apelon për qetësi: Mos u ndikoni nga provokimet dhe lajmet e rreme appeared first on Albeu.com.