Nikola Sanduloviq, politikan serb, ka reaguar me tone të ashpra pas deklaratës së ministres serbe të Administratës Shtetërore dhe Vetëqeverisjes Lokale, Snezhana Paunoviq. Ajo kishte thënë se, sikur të ndodhej në vendin e Sllobodan Millosheviqit, në vitin 1998 do të kishte kryer spastrim etnik në Kosovë.

Në reagimin e tij publik, Sanduloviq e akuzoi Paunoviqin se përfaqëson një ideologji naziste. Sipas tij, pas reagimeve të forta nga opinioni publik dhe kritikave të gjera ndërkombëtare, ministrja po përpiqet t’i zbusë fjalët e saj duke i përshkruar si një “shprehje të pafat”.

Ai deklaroi se qëndrimet e saj pasqyrojnë, sipas tij, profilin e elitës nacionaliste serbe të viteve ’90, të cilën e ngarkoi me përgjegjësi për krime ndaj civilëve, dëbime të popullsisë dhe fshehjen e viktimave në Bosnje e Hercegovinë, Kroaci dhe Kosovë.

Sanduloviq vlerësoi se ndryshimi i formulimit nga “spastrim etnik” në “deportim” të shqiptarëve të Kosovës nuk e ndryshon përmbajtjen e idesë së shprehur nga Paunoviq, pasi për të bëhet fjalë për të njëjtën logjikë.

Reagimi i plotë:

Kur një person me ideologji naziste përballet me dënim të gjerë ndërkombëtar, me kundërshtimin e pjesës së shëndoshë dhe intelektuale të shoqërisë serbe, dhe e kupton se as Ivica Daçiqi, as Aleksandar Vuçiqi nuk mund ta mbrojnë nga procedurat penale dhe përgjegjësia për atë që ka thënë, atëherë nis të shfaqet fytyra e saj frikacake. Ajo përpiqet të justifikohet duke pretenduar se gjithçka ishte vetëm një “shprehje e pafat”.

Kjo, sipas meje, është pamja e vërtetë e elitës hegjemoniste, nacionaliste dhe kriminale të viteve ’90. Dikur ajo vriste civilë e fëmijë të pafajshëm, dëbonte njerëzit dhe i varroste fshehurazi viktimat në Bosnje e Hercegovinë, Kroaci e Kosovë. Kur u përball më pas me forcën e drejtë dhe të justifikuar të SHBA-së, NATO-s, bashkësisë ndërkombëtare dhe Gjykatës së Hagës, filloi të qante dhe të paraqitej si viktimë e pafajshme.

Tashmë ajo po përpiqet ta ripaketojë planin për spastrimin etnik të shqiptarëve nga Kosova, duke e paraqitur ideologjinë e saj naziste si plan për deportimin e shqiptarëve drejt “shtetit të tyre amë”.

Le t’ia sqarojë dikush, qoftë edhe një njeri gjysmë i arsimuar nga strofka kriminale e radikalëve, SPS-së dhe SNS-së, kësaj nacionalisteje analfabete që në mënyrë të rreme paraqitet si e zhvendosur nga Kosova, se askush nuk ka mundur dhe as nuk ka pasur të drejtë t’i dëbojë qytetarët shqiptarë të Kosovës në një “shtet amë” të padukshëm e të paqenë. Vendi i tyre amë, ku kishin lindur dhe kishin jetuar për shekuj, ishte pikërisht Jugosllavia. Dhe nga ai shtet Snezhana Paunoviq synonte t’i largonte me forcë, pra t’i shpërngulte etnikisht me kamionë dhe trena nga vendi i tyre, sikurse bënin nazistët.

Në vend që pushteti aktual në Serbi ta largojë nga funksioni dhe të nisë menjëherë një procedurë penale të rregullt e të përshpejtuar ndaj saj, po i jep sërish hapësirë në media për të dëshmuar padijen, mungesën e kulturës dhe ideologjinë naziste që vazhdon ta shfaqë pa pendesë dhe pa një kërkimfalje të sinqertë.

The post Sanduloviq sulmon Paunoviqin: Nuk do t’i shpëtosh përgjegjësisë për deklaratat e tua appeared first on Albeu.com.