Tubimi pranë institucioneve shtetërore në Prishtinë ka vijuar edhe gjatë mbrëmjes. Policia e Kosovës u ka kërkuar protestuesve që të ruajnë qetësinë dhe të zhvillojnë protestën në mënyrë demokratike. Sipas autoriteteve, gjatë tubimit janë hedhur mjete piroteknike dhe janë ndezur fishekzjarre, ndërsa një person ka pasur përkeqësim të gjendjes shëndetësore.

Në nisje, protesta është zhvilluar pa incidente, ndërsa organizatorët dhe pjesëmarrësit kanë mbajtur fjalime, bëri të ditur Policia e Kosovës.

Rreth orës 15:00, protestuesit ngritën tenda në sheshin “Ibrahim Rugova”, pranë Kuvendit të Kosovës. Më vonë, gjatë orëve të mbrëmjes, turma u zhvendos në sheshin “Skënderbeu”, ku vijoi tubimin.

Policia njoftoi se disa persona kanë hedhur mjete piroteknike dhe kanë ndezur fishekzjarre gjatë protestës.

Një qytetari që ndodhej mes protestuesve iu rëndua gjendja shëndetësore. Zyrtarët policorë e nxorën atë nga turma dhe, me ndihmën e qytetarëve, e dërguan brenda kordonit të sigurisë. Aty, ekipi mjekësor i dha ndihmën e parë.

Autoritetet policore deklaruan se kanë respektuar të drejtën për tubim dhe shprehje të lirë. Njëkohësisht, sipas tyre, janë ndërmarrë masat e nevojshme për ruajtjen e rendit e sigurisë publike dhe për mbrojtjen e qytetarëve, si dhe të objekteve publike e private.

Policia u ka bërë thirrje protestuesve që ta vijojnë tubimin në mënyrë paqësore dhe demokratike, duke respektuar ligjet dhe udhëzimet e zyrtarëve policorë.

“Forma e protestimit të qetë ndihmon dhe kontribuon në mbarëvajtjen e protestës, rendit dhe qetësisë publike, duke mos rrezikuar jetën dhe pronën publike e private”, thuhet në njoftimin e Policisë së Kosovës.

The post Protesta në Prishtinë vijon gjatë mbrëmjes, Policia apelon për qetësi appeared first on Albeu.com.

Prokuroria Themelore në Prishtinë ka autorizuar Inspektoratin Policor të Kosovës (IPK) të zhvillojë hetime për veprimet e zyrtarëve policorë gjatë protestës së mbajtur më 5 tetor pranë objekteve të Qeverisë dhe Kuvendit të Kosovës.

Hetuesit e IPK-së do të mbledhin të dhëna dhe prova për të përcaktuar nëse zyrtarët policorë kanë tejkaluar kompetencat e tyre gjatë përdorimit të forcës për shpërndarjen e protestuesve, ka njoftuar Prokuroria.

Në koordinim me IPK-në, Prokuroria ka deklaruar se do të ndërmarrë çdo hap të nevojshëm ligjor për të sqaruar dyshimet mbi përdorimin e forcës përtej asaj që ishte e domosdoshme dhe e lejuar nga ligji.

“Prokuroria Themelore në Prishtinë mbetet e përkushtuar në ndërmarrjen e të gjitha veprimeve hetimore, me qëllim të sqarimit të plotë të të gjitha rrethanave të krijuara gjatë zhvillimit të protestës”, thuhet në njoftim.

The post Prokuroria e Prishtinës i jep IPK-së autorizim për hetimin e ndërhyrjes policore në protestën e 5 tetorit appeared first on Albeu.com.

Një nga personat e dyshuar për sulmin ndaj deputetit të Kuvendit të Kosovës, Fahrush Rexhepi, gjatë protestës së 5 tetorit në Prishtinë, është identifikuar nga autoritetet.

Sipas burimeve, i dyshuari është Fadil Zogaj, i cili është zbuluar pas shqyrtimit të pamjeve filmike të siguruara nga burime të hapura.

Në videot e sekuestruara për hetim, disa persona shfaqen duke e tërhequr deputetin Rexhepi zvarrë dhe më pas duke e hedhur mbi rrethojat në oborrin e Kuvendit.

Zogaj u gjet rreth orës 19:30 në sheshin “Nëna Terezë” në Prishtinë dhe u dërgua në zyrat e njësisë përkatëse hetimore për intervistim.

Marrja në pyetje u zhvillua në praninë e avokatit mbrojtës. Me urdhër të Prokurorit të Shtetit, ndaj tij është caktuar ndalimi prej 48 orësh.

Hetimi po zhvillohet për veprën penale “Sulm ndaj personit zyrtar”, ndërsa autoritetet vijojnë punën për të identifikuar edhe personat e tjerë që dyshohet se morën pjesë në ngjarje.

The post Identifikohet një nga të dyshuarit për sulmin ndaj deputetit Fahrush Rexhepi, ndalohet për 48 orë appeared first on Albeu.com.

Gjashtë zyrtarë të Policisë së Kosovës mbetën të lënduar, ndërsa 11 qytetarë kërkuan trajtim mjekësor gjatë protestës që u zhvillua mbrëmjen e 5 tetorit në afërsi të Kuvendit dhe Qeverisë. Këto të dhëna u bënë me dije nga vetë policia përmes një njoftimi.

Në të njëjtin njoftim, policia bëri të ditur se tre persona që po protestonin u dërguan në stacion policor, ndërsa veprimet e tjera ndaj tyre do të ndërmerren në bashkëpunim me organet e drejtësisë.

Policia po ashtu konfirmoi se gjatë ndërhyrjes përdori gaz lotsjellës dhe top uji. Sipas saj, këto mjete u përdorën ndaj protestuesve që qëlluan me mjete piroteknike dhe sende të forta drejt institucioneve dhe pjesëtarëve të policisë.

Njoftimi shton se protesta, në orët e vona, vijonte të zhvillohej në mënyrë të qetë.

The post Kosova: Lëndohen gjashtë pjesëtarë të policisë, tre protestues shoqërohen në stacion appeared first on Albeu.com.

Çlirim Haziri, organizator i protestës “Jo në emrin tim”, deklaroi se ministri i Punëve të Brendshme, Xhelal Sveçla, ka urdhëruar Policinë e Kosovës të ndërhyjë ndaj qytetarëve që kërkojnë ndryshime ligjore për Gjykatën Speciale.

Gjatë kohës kur Haziri po mbante fjalimin e tij, policia përdori gaz lotsjellës me qëllim shpërndarjen e protestuesve.

“Deri tani vetëm kanë heshtur, ndërsa sot kaluan në sulm dhe na goditën. Policia, e cila sot është më e madhe në numër se ne, dje ishte shumë më e vogël, ndërsa ne ishim shumë dhe megjithatë i mbrojtëm si sytë e ballit. Sot ata morën urdhër nga Xhelal Sveçla”, u shpreh Haziri.

The post Haziri akuzon Sveçlën: Policia urdhëroi sulmin ndaj protestuesve appeared first on Albeu.com.

Protesta pranë Qeverisë dhe Kuvendit të Kosovës ka vijuar edhe gjatë mbrëmjes. Policia njoftoi se, pas hedhjes së mjeteve piroteknike, fishekzjarreve dhe sendeve të ndryshme, zyrtarët përdorën gaz lotsjellës për të rikthyer kontrollin e situatës.

Sipas njoftimit zyrtar, një grup protestuesish, të pakënaqur për mosvotimin e ligjit për Specialen, hodhën në mënyrë të përsëritur sende të ndryshme, mjete piroteknike dhe fishekzjarre drejt objekteve shtetërore.

Policia tha se gjatë gjithë protestës u kishte kërkuar pjesëmarrësve që tubimi të zhvillohej në mënyrë paqësore, të mos dëmtohej prona publike, të mos pengohej lëvizja e lirë dhe të respektoheshin ligjet në fuqi.

Për shkak të hedhjeve të vazhdueshme, bllokimit të qarkullimit dhe përdorimit të mjeteve piroteknike e fishekzjarreve, autoritetet deklaruan se u detyruan të ndërmerrnin masat e nevojshme.

Policia e Kosovës bëri të ditur se përdori gazin lotsjellës, si mjet të ligjshëm policor, për të mundësuar largimin e personaliteteve nga Kuvendi dhe për të vënë situatën nën kontroll, pavarësisht thirrjeve të përsëritura për qetësi.

Hedhja e sendeve, mjeteve piroteknike dhe fishekzjarreve, së bashku me djegien e disa kontejnerëve të mbeturinave dhe ndezjen e zjarreve në rrugë, ka shkaktuar dëme materiale, sipas Policisë.

Autoritetet theksuan se, deri në atë moment, nuk ishte raportuar për persona me lëndime të rënda.

Policia e Kosovës ritheksoi se njeh të drejtën për protestë paqësore dhe demokratike, ndërsa u kërkoi protestuesve të ruajnë qetësinë, të mos dëmtojnë pronën publike dhe të respektojnë ligjet.

Me protestën ende në zhvillim, Policia deklaroi se do të vijojë të qëndrojë e pranishme për garantimin e rendit dhe sigurisë publike. Sipas saj, mbrojtja e qytetarëve dhe objekteve shtetërore, si dhe zhvillimi i rregullt i protestës, mbeten prioritet.

The post Policia përdor gaz lotsjellës pas përshkallëzimit të protestës appeared first on Albeu.com.

Ndaj Fetah Mataj është akuzuar për “kanosje për dhënien e pasurisë”. Para arrestimit, ai ishte përgjegjës i evadimit të mbetjeve në Bashkinë e Durrësit.

Autoritetet dyshojnë se Mataj kërcënonte punonjësit që t’ia japnin shuma të reja prej 25 mijë lekësh në muaj.

Funksioni i tij u ndërmbua pak pas skandalit të ngritur rreth ish-bashkëshortes së tij, e cila ishte akuzuar për marrjen e 700 mijë eurove nga Posta e Durrësit. Elisabeta Mataj aktualisht qëndron në “arrest shtëpie”.

Në një njoftim, policia tha se specialistët e Krimet e Rënda të DVP Durrës zbatuan një vendim të Gjykatës së Shkallës së Parë të Juridiksionit të Përgjithshëm Durrës.

Gjykata ka caktuar masën “Arrest në burg” për shtetasin F. M., 44 vjeç, banues në lagjen nr. 15 të Durrësit.

Sipas njoftimit, Masa e sigurimit personal u vendos ndaj tij për veprën penale “Shtrëngimi me anë të kanosjes ose dhunës për dhënien e pasurisë, kryer në bashkëpunim”.

Dosja procedurale u dërgua në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për kryerjen e veprimeve të mëtejshme.

The post Arrestohet Fetah Mataj, bashkëshorti i ish-drejtoreshës së Postës në Durrës, i dyshuar për 700 mijë euro appeared first on Albeu.com.

Një protestues që po qëndronte pranë Kuvendit të Kosovës është dërguar në stacion policor për intervistim dhe procedura të mëtejshme. Sipas Policisë së Kosovës, ai dyshohet se kishte në posedim dhe kishte hedhur mjete piroteknike në drejtim të objekteve shtetërore.

Protesta ka vijuar edhe sot rreth ndërtesës së Kuvendit të Republikës së Kosovës. Pjesëmarrësit po shprehin pakënaqësitë e tyre lidhur me aktgjykimin e Gjykatës Speciale në Hagë ndaj ish-krerëve të UÇK-së, ndërsa presin edhe votimin e plotësim-ndryshimit të ligjit për Dhomat e Specializuara.

Policia bëri të ditur se ka vazhduar zbatimin e masave dhe planeve të nevojshme për garantimin e sigurisë, ruajtjen e rendit e të qetësisë publike dhe zhvillimin normal të protestës. Sipas saj, gjatë tubimit, disa persona kanë tentuar herë pas here të kalojnë brenda rrethojave të Kuvendit, ndërsa në drejtim të objekteve shtetërore të Kosovës janë hedhur sende të ndryshme dhe mjete piroteknike.

Për të mbrojtur qytetarët dhe pronën publike, si dhe për të ruajtur rendin e sigurinë, zyrtarët policorë u kanë bërë vazhdimisht thirrje protestuesve që të qëndrojnë të qetë dhe të mos hedhin mjete piroteknike apo sende të tjera.

Megjithatë, pas këtyre thirrjeve, policia ndërmori masa ndaj një protestuesi, i cili dyshohet se kishte poseduar dhe hedhur mjete piroteknike drejt objekteve shtetërore. Personi u shoqërua në stacion policor për intervistim dhe procedura të mëtejshme.

Policia e Kosovës theksoi se e njeh të drejtën e qytetarëve për të protestuar dhe për të shprehur pakënaqësitë në mënyrë paqësore e demokratike. Njëkohësisht, institucioni u bëri thirrje të gjithë pjesëmarrësve që të ruajnë qetësinë, të mos dëmtojnë pronën publike dhe të respektojnë ligjet.

Zyrtarët policorë do të vijojnë të qëndrojnë në terren për të garantuar rendin dhe sigurinë publike. Sipas Policisë së Kosovës, siguria e qytetarëve dhe e objekteve shtetërore, si dhe mbarëvajtja e protestës, mbeten prioritet.

The post Policia shoqëron një protestues të dyshuar për hedhje mjetesh piroteknike drejt objekteve shtetërore appeared first on Albeu.com.

Gjatë një kontrolli në Pikën e Kalimit Kufitar në Merdare, zyrtarët e Sektorit Antikontrabandë të Doganës së Kosovës, së bashku me zyrtarët doganorë dhe policorë, kanë zbuluar 50 mijë euro të padeklaruara.

Paratë u gjetën në bagazhin personal të drejtuesit të një autobusi të linjës Itali–Kosovë, gjatë kontrollit të detajuar të mjetit. Shuma nuk ishte deklaruar pranë autoriteteve doganore.

Dogana e Kosovës ka rikujtuar se neni 33, paragrafi 1, i Ligjit Nr. 05/L-096 për Parandalimin e Pastrimit të Parave dhe Luftimin e Financimit të Terrorizmit i detyron personat që hyjnë ose dalin nga Kosova dhe mbajnë 10 mijë euro ose më shumë, apo shumën ekuivalente në valutë të huaj, ta deklarojnë atë me shkrim te zyrtarët doganorë.

Në deklarim duhet të shënohen si shuma e parave, ashtu edhe burimi i tyre i verifikueshëm.

Institucioni doganor ka theksuar se do të vijojë zbatimin e legjislacionit dhe masat për parandalimin e kalimit të mjeteve monetare të padeklaruara përtej kufirit.

The post Kapen 50 mijë euro të padeklaruara në Merdare, paratë ishin në bagazhin e shoferit të autobusit appeared first on Albeu.com.

Policia është njoftuar për të shtëna me armë në fshatin Zbarqe, në Ndroq, pas një telefonate të mbërritur në Sallën Operative të DVP Tiranë.

Shërbimet e Policisë dhe grupi hetimor shkuan menjëherë në vendin e ngjarjes. Gjatë kontrollit të zonës dhe veprimeve të para hetimore, u gjetën dhe u sekuestruan një armë gjahu, tip çifte, si dhe municion.

Për të sqaruar rrethanat e rastit dhe për kryerjen e verifikimeve, në Komisariat janë shoqëruar 4 shtetas.

Ndërkohë, vijon puna për dokumentimin e plotë të ngjarjes.

The post Të shtëna në fshatin Zbarqe të Ndroqit, policia shoqëron 4 shtetas appeared first on Albeu.com.