Rreth 1.1 milionë euro iu sekuestruan gjatë ditës së djeshme një personi juridik dhe dy personave fizikë nga Strumica, në një aksion të zhvilluar nga policia së bashku me institucionet kompetente shtetërore.

Nga shuma e përgjithshme, 597.500 euro u gjetën në para të gatshme, kurse pjesa tjetër ndodhej e depozituar në llogari transaksionale. Informacionet u publikuan sot në një konferencë të përbashkët për media nga drejtori i Byrosë për Siguri Publike (BJB), Aleksandar Janev, si dhe përfaqësues të SPB-së Strumicë, Drejtorisë së të Ardhurave Publike, Policisë Financiare dhe Prokurorisë Publike.

Janev bëri të ditur se hetimet lidhur me mjetet financiare të siguruara në mënyrë të paligjshme kishin filluar në prill të këtij viti. Te personi tek i cili u zbuluan paratë nuk u gjet dokumentacion financiar përkatës që të vërtetonte origjinën e tyre.

Gjatë hetimit u zbulua edhe një pistë tjetër. Autoritetet konstatuan se në vitin 2018, persona fizikë dhe juridikë kishin depozituar edhe 500 mijë euro në llogarinë bankare të një personi fizik.

Analizat dhe hetimi financiar nxorën në pah një dallim të konsiderueshëm ndërmjet të ardhurave vjetore të deklaruara si kursime dhe shumës së parave të depozituara. Sipas Janevit, mungonte dokumentacioni i nevojshëm për të arsyetuar si prejardhjen, ashtu edhe përdorimin e këtyre mjeteve nga e gjithë familja.

Në kuadër të hetimeve u evidentua gjithashtu një detyrim tatimor prej rreth 2 milionë denarësh, i cili nuk ishte derdhur në buxhet. Janev vlerësoi se koordinimi ndërinstitucional e bëri të mundur zbardhjen e çështjes, duke e cilësuar atë si hapjen e një kapitulli të ri në përballjen me mjetet financiare të fituara në mënyrë të paligjshme.

Ai deklaroi se, sa herë që paratë bëhen objekt hetimi, autoritetet do të kërkojnë përgjigje për burimin dhe prejardhjen e tyre. Sipas tij, qytetarët e ndershëm maqedonas që respektojnë ligjin nuk kanë arsye të shqetësohen, ndërsa duhet të frikësohen personat që nuk mund të dëshmojnë origjinën e mjeteve financiare ose bazën ligjore të pasurisë së krijuar.

Drejtori i BJB-së njoftoi se SPB Strumicë ka paraqitur në Prokurorinë Publike të Strumicës kallëzim penal kundër dy personave fizikë dhe një personi juridik, nën dyshimin për evazion fiskal, fajde dhe pastrim parash. Nuk u dhanë hollësi të tjera, pasi procedura, siç u sqarua, vazhdon të jetë në fazën e parahetimit.

The post Në Strumicë konfiskohen afro 1.1 milionë euro appeared first on Albeu.com.

Drejtoria e Policisë Financiare ka dorëzuar në Prokurorinë Themelore Publike në Strugë një kallëzim penal ndaj një individi dhe një subjekti juridik, të dyshuar për kryerjen e veprës penale “Fshehje të tatimit”, të parashikuar në nenin 279 të Kodit Penal.

Sipas njoftimit zyrtar, B.Z., si pronar dhe drejtues i personit juridik të kallëzuar, nuk ka deklaruar si të ardhura detyrimet e vjetra dhe të papaguara, në vlerë të përgjithshme prej 30.946.170 denarësh, të pasqyruara në bilancin bruto të vitit 2025. Kallëzimi thekson se këto detyrime kishin parashkruar në bazë të Ligjit për marrëdhëniet e detyrimeve dhe se për arkëtimin e tyre nuk ishte nisur asnjë proces gjyqësor.

Megjithëse ishte i detyruar ta bënte këtë, i kallëzuari nuk e ka përfshirë detyrimin tatimor në bilancin tatimor të vitit 2025. Për pasojë, ai nuk ka përllogaritur, deklaruar dhe paguar tatimin mbi të ardhurat në shumën prej 3.094.617 denarësh.

Kontrollet kanë evidentuar gjithashtu se huatë prej 14.254.665 denarësh, të dhëna personave fizikë dhe të pashlyera deri në përfundim të vitit, nuk janë regjistruar si shpenzime të papranuara për qëllime tatimore. Për këtë shumë, pretendohet se nuk është llogaritur, raportuar dhe paguar tatimi mbi të ardhurat prej 1.425.467 denarësh.

“Përmes këtyre veprimeve, personi fizik dhe personi juridik nuk kanë përllogaritur, deklaruar dhe paguar detyrimet tatimore të përcaktuara me ligj, duke i shkaktuar dëm Buxhetit të Republikës së Maqedonisë së Veriut në shumën totale prej 4.520.084 denarësh”, bëri të ditur Drejtoria e Policisë Financiare.

The post Kallëzim penal në Strugë për mosdeklarim tatimor, buxheti dëmtohet me mbi 4.5 milionë denarë appeared first on Albeu.com.

Drejtoria e Policisë Financiare ka dorëzuar në Prokurorinë Themelore Publike në Gjevgjeli kallëzim penal ndaj drejtuesit dhe pronarit të një personi juridik, si dhe ndaj vetë subjektit juridik, nën dyshimin për shmangie tatimore.

Rasti lidhet me periudhën 2024-2025, kur dyshohet se nuk është deklaruar dhe paguar kompensimi i përcaktuar me ligj për mbeturinat nga tekstilet e importuara. Shuma e papaguar arrin në 3.852.067 denarë, duke i shkaktuar dëm buxhetit të shtetit.

Sipas Drejtorisë, personi i parë i kallëzuar, T.D., duke vepruar si drejtues i personit juridik të kallëzuar të dytë, ka synuar me vetëdije dhe qëllim paraprak të siguronte përfitim pasuror të kundërligjshëm për veten dhe subjektin juridik. Gjatë viteve 2024–2025, në kundërshtim me nenet 23 dhe 54 të Ligjit për Menaxhimin e Rrjedhave Shtesë të Mbeturinave, ai nuk e ka deklaruar dhe as paguar në Ministrinë e Mjedisit dhe Planifikimit Hapësinor të Republikës së Maqedonisë së Veriut kompensimin për mbeturinat që lidhej me tekstilet e importuara nga personi juridik i kallëzuar i dytë, në vlerë të përgjithshme prej 3.852.067 denarësh.

Drejtoria bën të ditur se, për të mbuluar mosdeklarimin dhe mospagimin e këtij detyrimi ligjor, më 17.4.2026 i kallëzuari i parë ka nisur pranë Regjistrit Qendror të Republikës së Maqedonisë së Veriut procedurën për likuidimin e personit juridik të kallëzuar të dytë.

Nga institucioni shtojnë se veprimet e përshkruara u kanë shkaktuar Buxhetit të Republikës së Maqedonisë së Veriut një dëm të përgjithshëm prej 3.852.067 denarësh.

The post Policia Financiare e Maqedonisë kallëzon dy persona për dëm prej 3.85 milionë denarësh ndaj buxhetit shtetëror appeared first on Albeu.com.

Drejtoria e Policisë Financiare ka dorëzuar në Prokurorinë Themelore Publike në Strugë kallëzim penal ndaj një personi fizik, i cili është pronar dhe menaxher i një personi juridik, si dhe ndaj vetë subjektit juridik. Ata dyshohen për veprën penale “Shmangie nga Tatimi”, të parashikuar në nenin 279 të Kodit Penal të Republikës së Maqedonisë së Veriut.

S.Z., i kallëzuari i parë, dyshohet se në cilësinë e pronarit dhe drejtuesit të personit juridik të kallëzuar si palë e dytë, ka vepruar me vetëdije dhe me synim të paracaktuar për të siguruar përfitim të kundërligjshëm pasuror për veten dhe subjektin juridik. Më 31.12.2025, ai ka përvetësuar pa bazë mallra tregtare të blera, të evidentuara si inventar i personit juridik, me vlerë të përgjithshme prej 26.085.138 denarësh.

Për këto mallra nuk është bërë llogaritja, deklarimi dhe pagesa e tatimit mbi vlerën e shtuar. Bëhet fjalë për TVSH në shumën 4.231.907 denarë, sipas normës tatimore prej 18%, si dhe për 128.727 denarë TVSH me normë prej 5%. Gjithashtu, nuk është përllogaritur, raportuar dhe paguar tatimi mbi të ardhurat personale në vlerën 2.898.059 denarë, me normë tatimore prej 11.11%.

Sipas kallëzimit, S.Z. nuk i ka regjistruar si të ardhura as detyrimet e vjetruara dhe të pashlyera në vlerë të përgjithshme prej 8.120.980 denarësh, të pasqyruara në bilancin bruto për vitin 2025. Këto detyrime, bazuar në nenin 363 të Ligjit për Marrëdhëniet me Detyrime, parashkruhen brenda tre viteve, ndërsa për arkëtimin e tyre nuk është nisur asnjë procedurë gjyqësore.

Edhe pse kishte detyrim të dorëzonte bilancin tatimor për vitin 2025 dhe të paraqiste detyrimin përkatës, i kallëzuari i parë nuk e ka dorëzuar fare këtë dokument. Për pasojë, ai nuk ka llogaritur, deklaruar dhe paguar as tatimin mbi fitimin prej 812.098 denarësh, të përllogaritur me normën tatimore 10%.

Përmes këtyre veprimeve, të kallëzuarit dyshohet se kanë shmangur llogaritjen, deklarimin dhe pagesën e detyrimeve tatimore të përcaktuara me ligj, duke i shkaktuar Buxhetit të Republikës së Maqedonisë së Veriut dëm të përgjithshëm prej 8.070.791 denarësh./Telegrafi/

The post Strugani kallëzohet penalisht për dëm prej mbi 8 milionë denarësh ndaj buxhetit të shtetit appeared first on Albeu.com.

Prokuroria Themelore Publike në Tetovë ka pranuar një kallëzim penal nga Policia Financiare, në të cilin akuzohet një punonjës i Universitetit të Tetovës për shpërdorim të detyrës dhe falsifikim dokumentesh.

Sipas autoriteteve, i pandehuri A.Z., i punësuar si bashkëpunëtor i lartë për logjistikë dhe punë në terren, dyshohet se në periudhën nga marsi 2020 deri në shkurt 2023 ka përvetësuar paratë e studentëve që i ishin besuar për participim, bashkëfinancim dhe shpenzime të tjera studimore.

Në vend që t’i depozitonte këto mjete në llogarinë bankare të universitetit përmes platformës E-pay, ai akuzohet se i ka futur në xhepin e tij, duke përfituar në mënyrë të paligjshme rreth 3.362.272 denarë. Sipas kallëzimit, po kjo shumë i është shkaktuar si dëm financiar Universitetit të Tetovës.

Për të fshehur gjurmët e veprës, dyshohet se ai përgatiste dëshmi të falsifikuara pagese, të cilat ua dorëzonte studentëve si vërtetime se pagesa ishte kryer.

Hetimet kanë zbuluar se për të falsifikuar dokumentet, ai ka marrë të dhënat dhe kodin QR nga një dëshmi e vërtetë pagese përmes E-pay dhe pastaj ka ndryshuar emrin e paguesit, shumën dhe datën. Studentët, duke besuar në origjinalitetin e dokumenteve, i kanë ngarkuar ato në sistemin elektronik të universitetit dhe i kanë paraqitur në shërbimin studentor.

The post Kallëzim penal ndaj një punonjësi të Universitetit të Tetovës, i dyshuar për përvetësimin e mbi 3.3 milionë denarëve nga pagesat studentore appeared first on Albeu.com.

Sipas njoftimit, të kallëzuarit janë B.G. dhe G.F. në cilësinë e inxhinierëve mbikëqyrës, ndërsa E.N., M.G. dhe N.M. si pronarë dhe drejtues të dy subjekteve juridike, bashkë me vetë personat juridikë. Ata ngarkohen për veprat penale “Keqpërdorim i pozitës dhe autorizimit zyrtar” sipas nenit 353 të Kodit Penal të RMV-së, “Falsifikim ose shkatërrim i librave afaristë” sipas nenit 280, “Mashtrim në dëm të mjeteve të Bashkimit Evropian – në tentativë” sipas nenit 249-a dhe “Përdorim i dokumentit me përmbajtje të pavërtetë” sipas nenit 380 të Kodit Penal.

Policia Financiare thekson se personat e denoncuar, në rolin e inxhinierëve mbikëqyrës, kanë vepruar në kundërshtim me dispozitat ligjore, duke i tejkaluar autorizimet e tyre zyrtare. Ata kanë kryer kontroll teknik të objekteve dhe kanë hartuar raporte përfundimtare me përmbajtje të pavërtetë, në kundërshtim me nenin 33 dhe nenin 90 paragrafi 3 të Ligjit për Ndërtim.

Përmes këtyre veprimeve, personave juridikë u është mundësuar që objekte të papërfunduara t’i regjistrojnë në Agjencinë për Kadastër të Pasurive të Paluajtshme dhe të sigurojnë përfitim pasuror të kundërligjshëm.

Po ashtu, pronarët dhe drejtuesit e personave juridikë, ndonëse kanë qenë në dijeni se objektet nuk kishin përfunduar dhe nuk i plotësonin kushtet ligjore për vënie në përdorim, i kanë përdorur raportet përfundimtare me përmbajtje të pavërtetë si bazë për regjistrimin e tyre në librat publikë të Agjencisë për Kadastër të Pasurive të Paluajtshme.

Sipas kallëzimit, synimi ka qenë të krijohet një paraqitje e rreme se kushtet për përdorim ishin përmbushur, me qëllim që të mundësohej pagesa e mbështetjes financiare të miratuar nga Programi për Zhvillim Rural në kuadër të Instrumentit të Ndihmës së Para-Anëtarësimit të Bashkimit Evropian (IPA 3 – IPARD 2021–2027), duke tentuar të përfitojnë kundërligjshëm gjithsej 50.141.528 denarë.

The post Policia Financiare padit penalisht inxhinierë mbikëqyrës dhe kompani, dyshohen për përfitim të paligjshëm mbi 50 milionë denarë appeared first on Albeu.com.