Protesta u zhvillua pas incidentit të raportuar në zonën e Zvërnecit, ku punonjës të kompanisë private Major Security ushtruan dhunë ndaj qytetarëve që kundërshtonin ndërtimin e një resorti në atë zonë. Protestuesit kanë kërkuar ndërhyrje dhe mbështetje nga Policia e Shtetit, si dhe hetim të plotë të ngjarjes.

Në lidhje me zhvillimet reagoi edhe ministri i Brendshëm Besfort Lamallari, i cili kërkoi që rojet private të përfshira në dhunimin e protestuesve dhe kompania përkatëse të përballen me ndëshkimin ligjor sa më parë.

“Rojet private të pronës nuk kanë asnjë të drejtë të përdorin forcë ndaj askujt dhe jo vetëm ata si individë duhet të ndiqen penalisht, siç po ndiqen po edhe për kompaninë e tyre hetimi administrativ për paaftësi totale në ushtrimin e aktivitetit të autorizuar, duhet të mbyllet sa më parë të jetë e mundur”, shkruante Lamallari.

Në të njëjtën linjë ka reaguar edhe kryeministri Edi Rama, i cili ka dënuar ashpër çdo akt dhune të ushtruar ndaj protestuesve. Ai ka paralajmëruar gjithashtu se do të flasë më gjerësisht në lidhje me projektin e planifikuar në zonë, të cilin e cilëson si një investim të rëndësishëm për vendin, duke shtuar se rreth tij janë shpërndarë informacione të pavërteta dhe keqinterpretime.

“Nesër e kam radhën unë për të folur për një projekt të jashtëzakonshëm për Shqipërinë, për të cilin punohet prej disa vitesh tashmë dhe i cili nuk ka asnjë lidhje me disa të pavërteta të mëdha që janë hedhur në qarkullim ditët e fundit.

Ndërkohë, e përgëzoj lidershipin e Policisë së Shtetit për reagimin e shpejtë dhe të saktë, qoftë ndaj atij grushti muskujsh pa tru me statusin e rojeve private të sigurisë, qoftë ndaj drejtuesve vendorë të Policisë së Vlorës”, shkruante Rama.

The post Incidentet në Zvërnec, qytetarët mblidhen para Policisë së Shtetit dhe Ministrisë së Brendshme appeared first on Albeu.com.

Projektligji, i propozuar nga deputeti Bujar Rexha dhe i dorëzuar kryetarit të Kuvendit Niko Peleshi, synon riorganizimin e strukturave të Policisë së Shtetit dhe përcaktimin e ri të kompetencave administrative dhe operacionale.

Një nga ndryshimet kryesore është heqja e garës për shumicën e posteve drejtuese në polici, përveç gradës “drejtues madhor”, gradë kjo që mbahet vetëm nga Drejtori i Përgjithshëm i Policisë së Shtetit.

Sipas deputetit socialist, procedurat aktuale të konkurrimit janë të gjata, burokratike dhe pengojnë punën normale të strukturave policore.

Projektligji parashikon gjithashtu që një ish-drejtor i Përgjithshëm i Policisë, pas largimit nga detyra, të mos dalë automatikisht nga sistemi, por të vazhdojë karrierën pranë uniformave blu me gradën “drejtues i parë”, duke shërbyer në role të tjera si këshillues apo pedagog në Akademinë e Sigurisë.

Ndryshime propozohen edhe për sistemin e gradave. Afati për kalimin nga grada “komisar” në “kryekomisar” dhe nga “kryekomisar” në “drejtues” propozohet të ulet nga 5 në 4 vite, me argumentin se punonjësit që japin rezultate nuk duhet të presin gjatë vetëm për shkak të procedurave formale.

Po ashtu, drejtori i Përgjithshëm i Policisë do të ketë të drejtën të japë ngritje në gradë edhe para afatit, në raste të veçanta, për efektivë që dallohen për akte heroike apo rezultate të larta në luftën kundër krimit.

Ndërsa mandati i drejtuesit të një departamenti kërkohet të ulet nga 4 në 3 vjet dhe pas përfundimit të mandatit ka të drejtë rikandidimi për një mandat të dytë.

Propozimi për emërimin e Drejtorit të departamentit bëhet nga Drejtori i Përgjithshëm i Policisë së Shtetit dhe emërohet nga ministri i Brendshëm.

Ndërsa, për shefin e komisariatit në projektligj përcaktohet qartë se kushdo që zgjidhet në këtë post duhet të mbajë gradën “komisar” ose “kryekomisar”.

Ndryshimet pritet të diskutohen fillimisht në komisionet parlamentare dhe më pas të kalojnë për votim në Kuvend.

The post Drafti/ PS propozon ndryshime në ligjin për Policinë e Shtetit: Të hiqen konkurrimet për postet drejtuese! Drejtori i Përgjithshëm të kthehet sërish në detyrë pas përfundimit të mandatit appeared first on Albeu.com.

Drejtori i Departamentit për Rendin dhe Sigurinë Publike, Dhimitraq Ziu, tha në një konferencë për mediat se monitorimi i qarkullimit do të bazohet më shumë në teknologji dhe më pak në ndalime fizike të automjeteve, sidomos në akset nacionale.

Në këtë kuadër janë vënë në funksion 22 radarë të kalibruar për matjen e shpejtësisë, ndërsa strukturat janë pajisur me dronë, kamera, aparate fotografike, si dhe pajisje për testimin e alkoolit dhe drogës.

Sipas Policisë, në rrugët interurbane patrullat nuk do të ndalojnë automjetet pa arsye, por do të monitorojnë në distancë dhe çdo shkelje e konstatuar do të kthehet në masë administrative, e cila do të regjistrohet në kohë reale në e-Albania.

Ziu u shpreh se ndërhyrja e drejtpërdrejtë e policisë do të bëhet vetëm në rastet kur konstatohet rrezik i menjëhershëm, si shpejtësi shumë e lartë, parakalime të rrezikshme apo sjellje agresive në rrugë.

“Patrullat e Policisë Rrugore në akset nacionale do të ndërhyjnë kur konstatojnë sjellje agresive në rrugë, parakalime të njëpasnjëshme, manovra të gabuara apo shpejtësi dy deri në trefish, të cilat janë rrezik potencial për përfshirje në ngjarje rrugore. Njëkohësisht do të bashkëpunohet me Qendrën Kombëtare të Monitorimit të Trafikut, me qëllim që shkeljet e konstatuara t’i kalojnë Policisë Rrugore, për të plotësuar masat administrative”, u shpreh zyrtari i policisë.

Ndërkohë, në qytete do të vijojnë kontrollet e drejtpërdrejta. Ai tha se policia do të fokusohet te drejtimi i mjetit nën efektin e alkoolit, përdorimi i celularit gjatë drejtimit, mosvendosja e rripit të sigurimit, shkeljet e përparësisë ndaj këmbësorëve dhe përdorimi i kaskës nga drejtuesit e motomjeteve.

Ziu u shpreh se sipas një analize nga Policia, shkaku kryesor i aksidenteve mbetet shpejtësia, ndërsa një pjesë e konsiderueshme e viktimave janë këmbësorë, drejtues biçikletash dhe motomjetesh.

Deklarata:

Me qëllim parandalimin e aksidenteve rrugore, Departamenti për Rendin dhe Sigurinë Publike, nëpërmjet Drejtorisë së Policisë Rrugore, ka marrë një sërë masash shtesë në funksion të mënyrës së re të monitorimit të qarkullimit rrugor, për evidentimin dhe ndëshkimin e shkelësve të rregullave të qarkullimit rrugor.

Në këtë kuadër janë kalibruar 22 mjete shpejtësimatëse, janë pajisur të gjitha strukturat e Policisë Rrugore, me dronë, kamera, aparate fotografike, aparate alkooltestues dhe drogëtestues.

Shërbimet e Policisë në rrugët interurbane, në zbatim të telegramit të Drejtorit të Përgjithshëm, për të mos ndaluar pa shkak, automjetet në rrugët interurbane, pra në akset rrugore nacionale, do të vijojnë monitorimin e qarkullimit nëpërmjet pajisjeve logjistike dhe patrullave të lëvizshme dhe shkeljet e konstatuara nga mjetet logjistike do të verbalizohen në masa administrative, të cilat do të pasqyrohen në kohë reale në e-Albania.

Patrullat e Policisë Rrugore në akset nacionale do të ndërhyjnë kur konstatojnë sjellje agresive në rrugë, parakalime të njëpasnjëshme, manovra të gabuara apo shpejtësi dy deri në trefish, të cilat janë rrezik potencial për përfshirje në ngjarje rrugore.
Njëkohësisht do të bashkëpunohet me Qendrën Kombëtare të Monitorimit të Trafikut, me qëllim që shkeljet e konstatuara t’i kalojnë Policisë Rrugore, për të plotësuar masat administrative.

Për sa i përket qendrave urbane, shërbimet e Policisë do të vijojnë me grupe kontrolli për testet e alkoolit, kontrollet për shpejtësi, parakalimet e gabuara, mosdhënien e përparësisë këmbësorëve, përdorimin e celularit dhe të rripit të sigurimit.

Njëkohësisht, parkimet e gabuara do të jenë në qendër të vëmendjes, duke përdorur edhe mjetet ngritëse për parkimet në korsitë e dedikuara, ku bllokohet lëvizja e lirë e automjeteve apo e këmbësorëve.

Janë analizuar të gjithë treguesit e performancës për 4-mujorin e vitit 2026, krahasuar me 4-mujorin e vitit 2025. Pavarësisht se ka një përmirësim të lehtë, përsëri sjelljet agresive në rrugë duke shkaktuar aksident me pasojë humbjen e jetës apo plagosjen, janë shumë shqetësuese.

Nga analiza e bërë rezulton se dinamika dhe shkaqet e aksidenteve, janë pothuajse të njëjtat si për 4-mujorin e vitit të kaluar.

Përgjatë këtij 4-mujori, si rezultat i monitorimit të qarkullimit, janë arrestuar 1009 drejtues automjetesh, për drejtim mjeti në gjendje të dehur dhe/ose pa leje drejtimi.

82 100 drejtues automjetesh janë ndëshkuar për shpejtësi mbi normat e lejuara, që varojnë nga 20 km/orë mbi normën e lejuar deri në trefish të normës së lejuar.

815 drejtues automjetesh nuk kanë asnjë pikë në lejen e drejtimit dhe do t’i nënshtrohen testimit nga e para.

27 000 drejtues automjetesh janë ndëshkuar për parakalime të gabuara, rreth 60 000 drejtues mjetesh për drejtim mjeti pa rrip sigurimi, duke përdorur celularin apo për drejtim motomjeti pa kaskë mbrojtëse.

160 000 masa administrative janë vendosur për parkime të gabuara dhe 85 000 për shkelje të ndryshme.

Sipas statistikave, dallohet qartë se numri më i lartë i aksidenteve me pasojë ka si shkak shpejtësinë dhe më pas vjen sjellja e këmbësorëve, 33% e viktimave janë këmbësorë, drejtues motomjetesh dhe biçikletash.

Të gjithë treguesit e 4-mujorit të këtij viti tregojnë se ka rritje të evidentimit dhe ndëshkimit të drejtuesve të automjeteve që shkelin rregullat e qarkullimit rrugor.

Njëkohësisht janë evidentuar drejtuesit e automjeteve me shkelje të përsëritura dhe iu është kërkuar strukturave të Policisë Rrugore, që të marrin masa të menjëhershme për monitorimin dhe mbajtjen në kontroll të vazhdueshëm të këtyre drejtuesve, që janë shkelës të përsëritur të rregullave të qarkullimit, me pasojë për jetën dhe shëndetin.

Nisur nga perceptimi i gabuar në publik, se drejtuesit e mjeteve nuk do të ndalohen nga patrullat, sqarojmë opinionin publik dhe përdoruesit e rrugës se:

Detyrat e vendosura në Telegramin nr. 3707, datë 10.04.2026, të Drejtorit të Përgjithshëm të Policisë së Shtetit, “Mbi marrjen e masave për garantimin e qarkullimit të pandërprerë të mjeteve”, kanë të bëjnë me mosndalimin e automjeteve në akset rrugore nacionale, pa shkak, duke krijuar imazh të keq.

Në akset rrugore nacionale, Patrullat e Policisë Rrugore të monitorojnë qarkullimin dhe të evidentojnë kundërvajtësit rrugorë nëpërmjet pajisjeve teknologjike.
Punonjësit e Policisë, kur evidentojnë dhe dokumentojnë me mjete logjistike, sjellje agresive të drejtuesve të automjeteve, do të veprojnë në zbatim të Kodit Rrugor.

Gjithashtu, të organizojnë pika kontrolli në qendrat urbane, sipas kushteve të sigurisë, në drejtimin e shefave të seksioneve dhe shefave të sektorëve të Policisë Rrugore, sipas planeve të dedikuara me objekt konkret (kontrolle për pije alkoolike, përdorimin e celularëve, kaskave mbrojtëse për drejtuesit e motomjeteve, mjeteve debitore dhe “Alert”, etj.)

Policia Rrugore apelon për të gjithë përdoruesit e rrugës, që të zbatojnë me rigorozitet rregullat e qarkullimit rrugor. Çdo sjellje agresive në rrugë apo ndaj punonjësve të Policisë do të ndëshkohet maksimalisht, me të vetmin qëllim: rritjen e sigurisë së jetës në rrugë.

The post Aksidenti tragjik në Durrës/ Policia e Shtetit forcon masat, shtohen kontrollet në rrugë dhe ndëshkimet për shoferët që shkelin rregullat appeared first on Albeu.com.

Ndërkohë që dje u zbuluan emrat e 14 kandidatëve që kanë konrurruar, ndërkohë që sot janë shtuar edhe dy emra të tjerë, gjë e cila përbën edhe herën e parë që 2 gra aspirojnë të drejtojnë Policinë e Shtetit.

Lista e plotë e emrave:

Pellumb Seferi

Elidon Çela

Alfred Çepe

Rebani Jaupi

Saimir Boshnjaku

Lorenc Panganika

Afrim Tafa

Neritan Nallbati

Idejet Faskaj

Gentian Berberi

Tonin Vocaj

Skënder Hitaj

Arjanit Arapi

Gentjan Shehaj

Suela Sulkaj

Ejona Gurbardhi

Pas përfundimit të aplikimeve, Ministria e Brendshme do të publikojë në faqen zyrtare emrat e kandidatëve, ku brenda 10 ditëve, një Komision i Posaçëm i përbërë nga 3 persona, me kryetar një zëvendësministër i Brendshëm, dhe 2 anëtarët, sekretari i përgjithshëm i këtij dikasteri dhe kreu i Agjencisë së Mbikëqyrjes Policore, kryen vlerësim paraprak për verifikimin e kushteve ligjore.

Më pas emri i propozohet Ministrit të Brendshëm, i cili më pas ia delegon Kryeministrit për aprovim.

The post Gara për drejtorin e Përgjithshëm të Policisë së Shtetit/ Rritet numri i kandidatëve, për herë të parë konkurrojnë edhe 2 gra appeared first on Albeu.com.

Në njoftimin zyrtar të ndarë për mediat, janë përcaktuar edhe kriteret e personave që do të garojnë për këtë post.

Sipas njoftimit aplikantët duhet të kënë njërën nga gradat e rolit të mesëm drejtues, të ketë shtetësi shqiptare, të mos ketë qenë i dënuar për kryerjen e një vepre penale, me vendim gjyqësor të formës së prerë, të jetë në kushte shëndetësore që e lejojnë të kryejë detyrën përkatëse etj.

Kandidatët, brenda 7 ditëve nga shpallja e thirrjes për aplikim, duhet të dorëzojnë dokumentacionin e plotë. Afati i dorëzimit të aplikimit është deri në 11 mars 2026.

Kujtojmë se, Ilir Proda, u shkarkua nga detyra e Drejtorit të Përgjithshëm të Policisë së Shtetit më 1 mars 2026, me vendim të miratuar nga qeveria. Vendimi është botuar një ditë më parë edhe në Fletoren Zyrtare.

Ai u shkarkua me pretendimin se nuk arriti të garantonte siguri për qytetarët në protestën e organizuar nga Partia Demokratike më 28 shkurt.

Në vend të Prodës, është komanduar Sokol Bizhga, i cili deri atëherë mbante detyrën e zëvendësdrejtorit të Përgjithshëm të Policisë, derisa të përzgjidhet drejtori i ri.

The post Shkarkimi i Prodës/ Hapen aplikimet për drejtorin e ri të Policisë së Shtetit, procedurat dhe afatet appeared first on Albeu.com.

Konkretisht, Luan Sinanaj, nga shef i Komisariatit të Krujës, emërohet shef i Komisariatit të Pogradecit.

Shef i ri i Komisariatit të Krujës, emërohet Santiljano Ndreu, i cili më parë mbante postin e shefit të Krimeve në Komisariatin nr. 5 në Kamëz.

Ndërsa, Gentian Dedej, emërohet shef i Komisariatit të Bulqizës.

The post Policia e Shtetit bën ndryshime në disa komisariate (EMRAT) appeared first on Albeu.com.

Kërkohet Drejtor, në Drejtorinë Vendore të Policisë Durrës, për shkak të transferimit dhe emërimit Drejtor në një tjetër DVP të punonjësit të Policisë dhe Drejtor, në Drejtorinë Vendore të Policisë Lezhë, për shkak të shkarkimit nga detyra të punonjësit të Policisë. Faza e aplikimeve është deri më datë 22 janar.

Njoftimi i Policisë së Shtetit:

Me qëllim zhvillimin e një procesi vlerësimi objektiv, transparent dhe gjithëpërfshirës, nxitjen e konkurrencës profesionale dhe drejtuese në përzgjedhjen e kandidatëve që shfaqin aftësi, rezultate të larta, integritet moral dhe profesional, si dhe promovimin në detyrë të punonjësve të Policisë, në zbatim të urdhrave të Drejtorit të Përgjithshëm të Policisë së Shtetit, shpallen thirrjet për konkurrim për pozicionin “Drejtor Vendor i Policisë në Policinë e Shtetit” dhe për pozicionin “Shef Komisariati”, për plotësimin e funksioneve organike, si më poshtë vijon:

Drejtor, në Drejtorinë Vendore të Policisë Durrës, për shkak të transferimit dhe emërimit Drejtor në një tjetër DVP të punonjësit të Policisë, të përzgjedhur për këtë funksion me proces konkurrimi; Drejtor, në Drejtorinë Vendore të Policisë Lezhë, për shkak të shkarkimit nga detyra të punonjësit të Policisë, të përzgjedhur për këtë funksion me proces konkurrimi.

Faza e aplikimeve: deri më datë 22.01.2026.

Shef, në Komisariatin e Policisë Fier, në Drejtorinë Vendore të Policisë Fier, për shkak se shefi i komisariatit i përzgjedhur me konkurrim, me kërkesë të tij është transferuar në një detyrë tjetër;

Shef, në Komisariatin e Policisë Lushnjë, në Drejtorinë Vendore të Policisë Fier, për shkak se shefi i komisariatit i përzgjedhur me konkurrim, me kërkesë të tij është transferuar në një detyrë tjetër;

Shef, në Komisariatin e Policisë Kavajë, në Drejtorinë Vendore të Policisë Durrës, për shkak se shefi i komisariatit i përzgjedhur me konkurrim, me kërkesë të tij është transferuar në një detyrë tjetër;

Shef, në Komisariatin e Policisë Kolonjë, në Drejtorinë Vendore të Policisë Korçë, për shkak të ndërprerjes së marrëdhënieve të punës në Policinë e Shtetit dhe transferimit në struktura të tjera shtetërore;

Shef, në Komisariatin e Policisë Mat, në Drejtorinë Vendore të Policisë Dibër, për shkak se shefi i komisariatit i përzgjedhur me konkurrim, me kërkesë të tij është transferuar në një detyrë tjetër;

Shef, në Komisariatin e Policisë Bulqizë, në Drejtorinë Vendore të Policisë Dibër, për shkak se shefi i komisariatit i përzgjedhur me konkurrim, me kërkesë të tij është transferuar në një detyrë tjetër;

Faza e aplikimeve: deri më datë 23.01.2026.

Procesi i konkurrimit do të zhvillohet në përputhje të plotë me legjislacionin në fuqi, mbi parimet e transparencës, barazisë së mundësive dhe meritokracisë, duke garantuar një vlerësim objektiv dhe të paanshëm të të gjithë kandidatëve pjesëmarrës.

The post Policia e Shtetit hap aplikimet për shefa komisariatesh dhe drejtues vendorë në disa qytete, afati i fundit deri më 23 janar appeared first on Albeu.com.

Policia bën me dije se për shoqërimin e të paraburgosurit Altin Ndoci nga burgu i Durrësit në spital, nuk është kërkuar mbështetje me forca të rendit.

“Policia e Shtetit merr masa kur njoftohet nga burgjet, por për këtë rast nuk jemi njoftuar dhe nuk na është kërkuar ndihmë”, thuhet në reagimin e policisë për mediat.

Altin Ndoci ndodhej prej dy ditësh i shtruar në repartin e Infektivit të Spitalit të Durrësit, ku po merrte ndihmë mjekësore për disa probleme shëndetësore të shfaqura ditët e fundit, duket se ka shfrytëzuar rastin dhe është arratisur efektivë që e shoqëronin.

Me syze dielli mbi “hundë” dhe pistoletë në dorë, MOMENTI kur polici i Burgjeve ndjek me vrap të arratisurin (FOTO)

Ai ka kërkuar që të shkojë në tualet dhe më pas është larguar nga kati i tretë përmes shkallëve.

Një nga efektivët e policisë ka qëlluar në ajër, por Altin Ndoci dyshohet se ka hipur në një makinë “Audi A7” në parkim dhe më pas është arratisur.

The post Altin Ndoci u arratis në mënyrë spektakolare nga Spitali i Durrësit, reagon Policia e Shtetit: Nuk jemi njoftuar appeared first on Albeu.com.

Lidhur me këtë zhvillim të fundit, Newsbomb i është drejtuar Policisë së Shtetit e cila ka mohuar këtë lajm. Zëdhënësi i Policisë, Genti Mullai, ka hedhur poshtë duke theksuar se lajmi i shpërndarë është bërë me qëllim dezinformimin e qytetarëve.

“Lajmi është tërësisht i pavërtetë dhe dashakeqës.”-tha ai shkurtimisht.

The post U tha se SPAK i sekuestroi telefonin kryepolicit Proda, reagon Policia e Shtetit appeared first on Albeu.com.

Sipas vendimit, punonjësve të Policisë së Shtetit me kohëzgjatje 8 orë, u jepet një vakt drekë për shërbimet. Tri vakte ushqim parashikohen për efektivët e angazhuar në gatishmëri, ruajtje rendi, siguri zgjedhore, situata emergjente, fatkeqësi natyrore, aktivitete masive apo çdo rast kur orari i punës tejkalon 8 orë.

Të përfshirë në skemë janë edhe punonjësit e Qendrës së Edukimit Fizik dhe Sporteve Elitare, si edhe punonjës në Akademinë e Sigurisë, si studentët dhe kursantët e Policisë së Shtetit.

Prashikohet edhe një vakt drekë për trajnimet njëditore (8 orë) dhe tri vakte ushqimi për trajnimet shumëditore, me skemë të posaçme për ditën e parë dhe të fundit.

Kategori tjetër përfituese e tre vaketeve pa pagesë janë edhe shtetasit e huaj që hyjnë ilegalisht në territor deri në sqarimin e statusit, shtetas shqiptarë të kthyer nga vende të tjera, në proces verifikimi, të ndaluar ose të arrestuar deri në sqarimin e pozitës ose transferimin në institucionet përkatëse.

Sipas vendimit, shërbimi do të realizohet përmes mensave ose shërbimit të gatimit/shpërndarjes (catering), në përputhje me procedurat e prokurimit publik. Në rastet kur shërbimi me ushqim nuk mund të ofrohet, punonjësit e Policisë së Shtetit do të marrin kompensim financiar, i cili do t’u kalojë në llogaritë bankare.

Këshilli i ministrave ka caktuar se vlerat e kompensimit ushqimor do të jetë 500 lekë për normën “një vakt drekë” dhe 900 lekë për normën “tri vakte”.

Vendimi hyn në fuqi pas botimit në Fletoren Zyrtare, duke prodhuar efekte financiare nga 1 janari 2026.

VENDIM PËR PËRCAKTIMIN E KRITEREVE DHE TË PROCEDURAVE TË TRAJTIMIT ME USHQIM GJATË QËNDRIMIT NË PUNË TË PUNONJËSIT TË POLICISË SË SHTETIT

Në mbështetje të nenit 100 të Kushtetutës dhe të pikave 2, shkronja “c”, e 4, të nenit 104, të ligjit nr.82/2024, “Për Policinë e Shtetit”, me propozimin e ministrit të Punëve të Brendshme, Këshilli i Ministrave

V E N D O S I:

1. Të drejtën e trajtimit me ushqim, pa pagesë, e përfitojnë:

a) punonjësit e Policisë e Shtetit:

i. me normën e ushqimit “një vakt drekë”, kur kohëzgjatja e punës është 8 (tetë) orë;
ii. me normën e ushqimit “tri vakte”, kur punonjësi është i angazhuar në gatishmëri, në shërbime për ruajtjen e rendit, sigurimin dhe mbarëvajtjen e procesit zgjedhor, për përballimin e situatave emergjente dhe të fatkeqësive natyrore, aktivitete të ndryshme apo tubime, kur kohëzgjatja e punës është më shumë së koha normale e punës prej 8 (tetë) orësh.

b) punonjësit e Qendrës së Edukimit Fizik dhe Sporteve Elitare, në Akademinë e Sigurisë, që trajtohen me normën e ushqimit “tri vakte”;
c) studentët dhe kursantët, që kryejnë trajnim të detyrueshëm sipas programit mësimor në institucionet arsimore të Policisë së Shtetit:

i. me normën e ushqimit “një vakt drekë”, kur kohëzgjatja e trajnimit është 1 (një) ditë pune, 8 (tetë) orë;
ii. me normën e ushqimit “tri vakte”, kur kohëzgjatja e trajnimit është më shumë së një ditë pune. Për ditën e parë të trajnimit, trajtimi me ushqim bëhet për vaktet “drekë” dhe “darkë”, ndërsa për ditën e fundit të trajnimit bëhet për vaktet “mëngjes” dhe “drekë”.

ç) edhe kategoritë e mëposhtme, që trajtohen me normën e ushqimit “tri vakte”, pa pagesë:

i. shtetasit e huaj, të cilët hyjnë ilegalisht në territorin e Republikës së Shqipërisë, të cilët u nënshtrohen procedurave verifikuese deri në sqarimin e pozitës së tyre;
ii. shtetasit shqiptarë të kthyer nga vendet e tjera, deri në sqarimin e pozitës së tyre;
iii. shtetasit e ndaluar ose të arrestuar, të cilët u nënshtrohen procedurave verifikuese deri në sqarimin e pozitës së tyre, ose deri në transferimin e tyre në institucionet e ekzekutimit të vendimeve penale.

2. Shërbimi i ushqimit realizohet me ushqim të gatuar në mensa, si dhe nëpërmjet shërbimit të gatimit e të shpërndarjes së ushqimit (catering), i cili u nënshtrohet të gjitha procedurave të prokurimit publik, sipas legjislacionit në fuqi.

3. Kur trajtimi me ushqim, sipas shkronjave “a” dhe “b”, të pikës 1, të këtij vendimi, nuk është i mundur të realizohet me ushqim të gatuar apo nëpërmjet shërbimit të shpërndarjes së ushqimit (catering), bëhet trajtimi financiar për ditët efektive të punës, sipas përcaktimeve të pikës 5 të këtij vendimi. Vlera e trajtimit financiar (në lekë) të ushqimit i transferohet punonjësit të policisë në llogarinë e tij bankare.

4. Normat e ushqimit ditore të k/kalorive për të gjitha kategoritë përfituese, sipas këtij vendimi, përcaktohen në lidhjen nr.1, që i bashkëlidhet këtij vendimi dhe është pjesë përbërëse e tij.

5. Masa e kompensimit financiar për çdo normë të trajtimit me ushqim përcaktohet, si më poshtë vijon:

a) Normë ditore “një vakt drekë”, në vlerën 500 (pesëqind) lekë;
b) Normë ditore “tri vakte”, në vlerën 900 (nëntëqind) lekë.

6. Vlerat e kompensimit në lekë të normave ditore të ushqimit, të përcaktuara në shkronjat “a” dhe “b”, të pikës 5, të këtij vendimi, indeksohen çdo vit, sipas inflacionit të publikuar nga INSTAT-i.

7. Efektet financiare, që rrjedhin nga zbatimi i këtij vendimi, përballohen nga buxheti i miratuar për Ministrinë e Punëve të Brendshme, programi buxhetor “Policia e Shtetit”.

8. Vendimi nr.189, datë 15.3.2017, i Këshillit të Ministrave, “Për trajtimin me ushqim të punonjësve të Policisë së Shtetit, të studentëve dhe kursantëve në institucionet arsimore të Policisë së Shtetit, si dhe të shtetasve të ndaluar ose të arrestuar, deri në sqarimin e pozitës së tyre”, i ndryshuar, shfuqizohet.

9. Ngarkohen Ministria e Punëve të Brendshme dhe Drejtoria e Përgjithshme e Policisë së Shtetit për zbatimin e këtij vendimi.

Ky vendim hyn në fuqi pas botimit në “Fletoren zyrtare” dhe i shtrin efektet financiare shtesë nga 1 janari 2026.

The post Qeveria miraton vendimin e ri për trajtimin me ushqim të punonjësve të Policisë së Shtetit/ Vendoset kompensim 500 lekë për vakt appeared first on Albeu.com.