Policia e Kosovës ka hedhur poshtë raportimet se vendi po “blindohet” përpara vendimit që pritet të merret në Hagë. Në një njoftim zyrtar, ajo sqaroi se planet policore hartohen si pjesë e procedurave të zakonshme, veçanërisht kur parashikohen zhvillime, aktivitete ose grumbullime të mëdha qytetarësh.

Sipas institucionit policor, masat e sigurisë synojnë informimin e drejtë të qytetarëve të Republikës së Kosovës dhe parandalimin e keqinformimit që mund të përhapet përmes portaleve të ndryshme.

Policia bëri të ditur se planifikime të tilla zbatohen edhe për tubime të ndryshme, përfshirë marshin solidarizues paqësor të 12 shtatorit 2026. Qëllimi i tyre është menaxhimi i sigurt i pjesëmarrësve, ruajtja e rendit dhe sigurisë publike, organizimi i qarkullimit rrugor dhe garantimi i zhvillimit normal të aktiviteteve.

Gjatë vlerësimit të situatës, autoritetet marrin parasysh edhe mundësinë që persona ose grupe të caktuara, edhe nga jashtë Kosovës, të përpiqen të shfrytëzojnë grumbullimet e mëdha për të shkaktuar provokime, incidente apo veprime destabilizuese.

Institucioni thekson se bëhet fjalë për masa standarde dhe parandaluese, të përcaktuara në varësi të numrit të pritshëm të pjesëmarrësve dhe vlerësimit të përgjithshëm të rrethanave.

Policia e Kosovës u ka kërkuar qytetarëve dhe mediave të referohen vetëm te njoftimet zyrtare, si dhe të mos shpërndajnë pretendime të pakonfirmuara që mund të ndikojnë në perceptimin e sigurisë ose të shkaktojnë shqetësim të panevojshëm në opinion.

Reagimi erdhi pas raportimeve mediatike se Policia e Kosovës kishte përgatitur një plan të gjerë operacional për 16 shtatorin, datë kur në Hagë pritet të shpallet aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit.

The post Policia e Kosovës sqaron masat e planifikuara për 16 shtatorin appeared first on Albeu.com.

Policia e Kosovës ka reaguar pas raportimeve se vendi po “blindohen” në prag të vendimit të Hagës. Përmes një njoftimi, institucioni ka sqaruar se planet policore hartohen në kuadër të procedurave të zakonshme dhe nuk përbëjnë një masë të jashtëzakonshme.

“Për të informuar drejt qytetarët e Republikës së Kosovës, por edhe më gjerë, sqarojmë se planifikimi dhe zbatimi i masave të sigurisë në raste kur priten zhvillime, aktivitete apo pjesëmarrje e madhe e qytetarëve, si dhe hartimi i planeve policore, janë pjesë e procedurave të rregullta policore”, thuhet në njoftim.

Sipas Policisë, masa të tilla janë parashikuar edhe për marshin solidarizues paqësor të 12 shtatorit 2026, si dhe për tubime e aktivitete të tjera. Qëllimi i tyre është menaxhimi i sigurt i grumbullimeve, garantimi i rendit dhe sigurisë publike, rregullimi i qarkullimit rrugor dhe zhvillimi normal i aktiviteteve.

“Gjatë vlerësimeve dhe hartimit të planeve, merret në konsideratë edhe mundësia që individë ose elemente të caktuara, përfshirë persona nga jashtë vendit, të përpiqen t’i përdorin grumbullimet e mëdha për provokime, incidente apo veprime destabilizuese”, bëhet e ditur në njoftim.

Policia thekson se bëhet fjalë për masa parandaluese dhe standarde, të cilat përcaktohen në bazë të numrit të pritshëm të pjesëmarrësve dhe vlerësimit të situatës në tërësi.

Njëkohësisht, qytetarëve dhe mediave u është bërë thirrje që të marrin për bazë vetëm njoftimet zyrtare dhe “të shmangin përhapjen e pretendimeve të pakonfirmuara, veçanërisht kur ato mund të ndikojnë në perceptimin e sigurisë dhe të krijojnë shqetësim të panevojshëm në opinion”.

Reagimi erdhi pas raportimeve në media se Policia e Kosovës kishte përgatitur një plan të gjerë operacional për 16 shtatorin, datën kur në Hagë pritet të shpallet aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit.

The post Kosova blindohet” para vendimit të Hagës, Policia e Kosovës sqaron masat e planifikuara appeared first on Albeu.com.

Policia e Kosovës ka shënuar sot 27-vjetorin e krijimit të saj. Në një ceremoni solemne, të zhvilluar nën moton “Një rrugëtim i përbashkët një mision i përhershëm”, u vlerësua kontributi i zyrtarëve policorë ndër vite, ndërsa u përkujtuan edhe pjesëtarët që humbën jetën gjatë kryerjes së detyrës.

Ushtruesja e detyrës së presidentes, Albulena Haxhiu, deklaroi se gjatë këtyre 27 viteve Policia e Kosovës ka kaluar nëpër një proces të vazhdueshëm transformimi dhe profesionalizimi.

“Më 6 shtator 1999, 176 kadetë nisën trajnimin si gjenerata e parë e Policisë së Kosovës. Kosova e sapo çliruar kishte nevojë për një institucion që do ta vendoste zbatimin e ligjit në themel. Nga ata 176 kadetë të parë në më shumë se 9 mijë zyrtarë policorë që janë sot, Policia e Kosovës është rritur. Policia e Kosovës është një nga institucionet më të besueshme në vend. Çdo qytetar, pavarësisht se kush është, duhet ta ndjejë se përballë tij është një institucion që e mbron. Në 27 vjet Policia e Kosovës ka bërë rrugë të gjatë në aspekt profesional dhe operacional. Policia e Kosovës është një pjesë e bashkëpunimit më të gjerë me institucionet ndërkombëtare. Kjo është dëshmi se policia ka ndërtuar një nivel profesionalizmi. Andaj anëtarësimi i Kosovës në Interpol mbetet i rëndësishëm”, ka deklaruar ajo.

Kryeministri në detyrë, Albin Kurti, vuri në dukje shtrirjen e rendit dhe ligjit edhe në veri të Kosovës. Ai theksoi se mbështetja për Policinë e Kosovës do të vijojë përmes pajisjeve moderne dhe përmirësimit të kushteve të punës.

“Kosova është më e sigurt se asnjëherë më parë. Themelimi i Policisë së Kosovës 27 vjet më parë përkon me çlirimin tonë. Policia është angazhuar për shtet që funksionon e ku ngadhënjen rendi e ligji. Policia respekton dhe ruan qytetarët pa dallim duke zbatuar ligjin. Përgjatë 5 viteve të fundit krahas rritjes për 50 për qind të buxhetit të policisë, janë ngritur dhe forcuar mbi 20 stacione në gjithë veriun atje ku më parë nuk kishte asnjë institucion. Prania e institucioneve në veri ishte kyçe edhe për gjetjen e varrezave masive të luftës së fundit”, ka shtuar ai.

The post 27 vite nga themelimi i Policisë së Kosovës, Kurti: Vendi është më i sigurt se kurrë appeared first on Albeu.com.

Njëzet e një operatorë të rinj të Drejtorisë së Njësive për Ndërhyrje të Shpejtë janë certifikuar nga Policia e Kosovës.

ceremonia e certifikimit u zhvillua të premten në Qendrën e Njësive Speciale “Enver Zymeri”.

Pjesëtarët e rinj përfunduan me sukses të gjitha etapat e përzgjedhjes dhe përgatitjes, duke përfshirë edhe trajnimin bazik tetëjavor.

Gjatë kësaj periudhe intensive, ata morën përgatitje profesionale, fizike dhe taktike, ndërsa fituan shkathtësitë e domosdoshme për reagim të shpejtë dhe ndërhyrje efikase në situata të ndryshme operative.

Dokumentet e certifikimit iu dorëzuan operatorëve nga drejtori i Përgjithshëm i Policisë së Kosovës, kolonel Gazmend Hoxha.

Hoxha i uroi për arritjen, duke çmuar përkushtimin dhe angazhimin e treguar prej tyre përgjatë procesit të përzgjedhjes dhe trajnimit.

Ai vuri në dukje se disiplina, profesionalizmi dhe përgjegjësia janë thelbësore për ushtrimin e detyrave policore.

The post 21 operatorë të rinj certifikohen për Njësitë për Ndërhyrje të Shpejtë appeared first on Albeu.com.

Raportimet e publikuara nga disa media në Serbi, sipas të cilave zjarri në territorin serb, në zonën e Bënjakut, është shkaktuar nga Kosova, janë kundërshtuar nga Policia e Kosovës.

Në reagimin e saj zyrtar, Policia i ka quajtur këto pretendime të pavërteta dhe dezinformuese. Ajo ka mohuar se autoritetet e Republikës së Kosovës kanë përdorur ndonjë armë, ndërsa ka sqaruar se njësitë policore nuk kanë raportuar për ndonjë objekt apo mjet të hedhur nga territori i Kosovës në drejtim të Serbisë, përcjell “Bota sot”.

Sipas Policisë, në mediat serbe është spekuluar se për shkaktimin e zjarrit është përdorur një armë e veçantë, e cila shërben vetëm për hedhjen e topave të zjarrit. Institucioni i rendit i ka hedhur poshtë këto shkrime, duke deklaruar se reagimi synon informimin e saktë dhe pengimin e përhapjes së dezinformatave.

Policia ka theksuar se edhe më herët nga Serbia janë publikuar informacione të pavërteta të drejtuara kundër Kosovës. Sipas saj, raportime të tilla përdoren për qëllime të caktuara dhe synojnë ta paraqesin Republikën e Kosovës para faktorit ndërkombëtar si përgjegjëse për çdo dukuri negative që ndodh kryesisht përgjatë zonës kufitare.

Për të informuar drejt qytetarët e Republikës së Kosovës dhe opinionin më të gjerë, Policia ka bërë të ditur se autoritetet kosovare nuk kanë përdorur asnjë armë të llojit të paraqitur në media. Gjithashtu, nga njësitë e Policisë së Kosovës nuk ka ardhur asnjë njoftim se është vërejtur diçka e hedhur prej territorit të Republikës së Kosovës në territorin e Serbisë.

Policia Kufitare vijon patrullimin dhe mbikëqyrjen e situatës në zonën kufitare. Në raste të caktuara, këto patrullime zhvillohen edhe së bashku me njësitë e KFOR-it, ndërsa njësitë përkatëse do të ndërhyjnë sa herë që një veprim i tillë vlerësohet i nevojshëm për qytetarët dhe faktorët e tjerë relevantë në terren.

Njëkohësisht, institucionet e Republikës së Kosovës do të hetojnë çdo rast për të cilin mund të ekzistojnë të dhëna se rreziku është shkaktuar nga faktori njeri, pavarësisht zonës apo vendit ku ndodh.

Në fund, Policia e Kosovës u ka kërkuar qytetarëve dhe mediave që të orientohen vetëm nga informacionet zyrtare dhe të mos shpërndajnë pretendime të pakonfirmuara. Ajo ka paralajmëruar se raportime të tilla mund të ndikojnë në perceptimin për sigurinë dhe të shkaktojnë shqetësim të panevojshëm në opinion.

The post Policia e Kosovës hedh poshtë akuzat serbe për zjarrin në zonën e Bënjakut appeared first on Albeu.com.

Policia e Kosovës ka vijuar modernizimin e flotës së saj me automjete të reja, me synimin për të rritur efikasitetin në punë dhe për ta afruar më tej policinë e lagjes me qytetarët.

Të hënën, sipas njoftimit zyrtar, 14 vetura hibride iu ndanë sektorëve ku veprojnë policët e lagjes. Automjetet do të shërbejnë për mbulimin e zonave sektoriale në të gjitha drejtoritë rajonale.

Një automjet i veçantë iu dorëzua Drejtorisë së Trashëgimisë Kulturore.

Sipas Policisë, automjetet e reja do të ndihmojnë në përmirësimin e shpejtësisë dhe efikasitetit të shërbimeve në kuadër të Policimit në Bashkësi, duke u mundësuar zyrtarëve të jenë më pranë kërkesave dhe nevojave të qytetarëve.

Institucioni e konsideron këtë investim pjesë të përpjekjeve për forcimin e komunikimit dhe bashkëpunimit me komunitetin, si dhe për rritjen e transparencës dhe besimit te institucionet.

The post Policia e Kosovës pajis njësitë policore me 15 automjete të reja hibride appeared first on Albeu.com.

Katërmbëdhjetë (14) automjete të reja hibride u janë vënë në dispozicion policëve të lagjes nga Policia e Kosovës, me synimin që të përmirësohet efikasiteti i tyre në terren dhe të fuqizohet bashkëpunimi me komunitetin.

Në njoftimin e publikuar në Prishtinë, më 10 Gusht 2026, bëhet e ditur se menaxhmenti i Policisë së Kosovës po punon vazhdimisht për t’i afruar policët e lagjes me qytetarët dhe nevojat e tyre.

Pajisja me vetura zyrtare pritet ta bëjë më të lehtë dhe më të shpejtë realizimin e objektivave të Strategjisë së Policimit të Drejtuar nga Inteligjenca dhe Policimit në Bashkësi, si dhe forcimin e reagimit proaktiv ndaj kërkesave të qytetarëve.

Mbështetja i është dhënë Divizionit të Policisë në Bashkësi dhe Parandalim, konkretisht sektorëve ku angazhohen policët e lagjes. Vetura të reja hibride janë ndarë për mbulimin e zonave sektoriale në të gjitha drejtoritë rajonale, ndërsa një automjet është destinuar për Drejtorinë e Trashëgimisë Kulturore.

Policia e Kosovës deklaroi se do të vijojë angazhimin për thellimin e komunikimit dhe bashkëpunimit me qytetarët, krahas rritjes së mëtejshme të transparencës dhe besueshmërisë institucionale.

The post Policia e Kosovës u ndan policëve të lagjes 14 vetura të reja hibride appeared first on Albeu.com.

Pas 27 vitesh, Policia e Kosovës ka filluar të marrë në dorë përgjegjësinë për sigurinë në urën kryesore mbi lumin Ibër, në Mitrovicë.

Burime të televizionit bëjnë të ditur se, duke nisur nga sot, institucionet e Kosovës kanë nisur sigurimin e urës, e cila për një periudhë të gjatë ka qenë nën kujdesin e misioneve ndërkombëtare të sigurisë.

Kalimi i kësaj përgjegjësie përbën një tjetër etapë në procesin e transferimit të detyrave të sigurisë te institucionet e Kosovës.

Për vite me radhë, ura mbi lumin Ibër ka qenë një prej pikave më të ndjeshme të sigurisë në Mitrovicë, si dhe një simbol i ndarjes së qytetit.

The post Policia e Kosovës nis marrjen e sigurisë së urës së Ibrit pas 27 vitesh appeared first on Albeu.com.

Një hetim i zhvilluar për rreth dy vjet nga autoritetet e Kosovës nisi me ndalimin e dy personave të dyshuar për krime lufte dhe vijoi me gërmime në Zubin Potok, ku besohej se mund të ndodhej një varrezë masive. Brenda pak ditësh, në terren u gjetën mbetje mortore me origjinë njerëzore, u arrestua edhe një person tjetër i dyshuar për krime lufte dhe u evidentua një lokacion i dytë ku mund të ketë mbetje njerëzore. Ndërkohë, në Serbi u arrestua një shtetas i Kosovës, i dyshuar për spiunazh.

Gërmimet në Kalludër të Vogël, një fshat malor në komunën veriore të Zubin Potokut, nisën më 28 korrik, pas dyshimeve për ekzistencën e një varreze masive.

Sipas autoriteteve, operacioni në këtë zonë ishte rezultat i një hetimi rreth dyvjeçar të Prokurorisë Speciale të Kosovës.

Pak ditë përpara fillimit të punimeve, u arrestuan dy persona, të dyshuar për krime lufte kundër popullsisë civile. Prokuroria ka bërë të ditur se rasti i tyre lidhet me gërmimet e zhvilluara në Kalludër të Vogël.

Detajet mbi veprimet për të cilat dyshohen të arrestuarit nuk janë bërë publike. Megjithatë, Policia deklaroi se për njërin prej tyre kishte siguruar prova se ai ishte “i mobilizuar dhe pjesë aktive gjatë periudhës së luftës në ish-armatën jugosllave”.

M.J. dhe M.B. ndodhen aktualisht në paraburgim.

Më 2 gusht, Policia e Kosovës arrestoi edhe J.R., në kuadër të të njëjtit hetim.

Prokuroria Speciale sqaroi se ndalimi i tij erdhi pas veprimeve të mëtejshme hetimore, por nuk dha informacion mbi rolin që dyshohet se ka pasur.

Dejan Vasiq, avokati i M.B., i tha Radios Evropa e Lirë se në kërkesën për caktimin e paraburgimit klienti i tij akuzohet se ka qenë ndër personat që kanë varrosur viktimat e lidhura me ngjarjet në fjalë.

“Ai është i bindur se nuk ka asnjë lidhje me këtë ngjarje, pasi nuk ka qenë fare në vendin që përmend prokurori”, deklaroi Vasiq.

Millosh Deleviq, mbrojtësi i M.J., nuk pranoi të jepte hollësi mbi dyshimet konkrete ndaj klientit të tij. Ai tha vetëm se vepra penale është cilësuar si krim lufte kundër popullsisë civile.

Gjatë vijimit të kërkimeve, autoritetet konfirmuan se mbetjet e zbuluara në Kalludër të Vogël janë të origjinës njerëzore.

Që në ditët e para të gërmimeve u ngritën dyshime se ato mund t’u përkisnin një grupi shqiptarësh të zhdukur me forcë gjatë luftës së fundit. Lokacioni vazhdon të jetë nën gërmime.

Grupi civil, i njohur si “grupi i intelektualëve”, rezulton i zhdukur që nga 19 prilli i vitit 1999. Në përbërje të tij kishte mjekë, profesorë, avokatë dhe persona me profesione të tjera.

Më 29 korrik, kryeministri në detyrë i Kosovës, Albin Kurti, u tha gazetarëve se dyshimi fillestar ishte që mbetjet mund t’i përkisnin këtij grupi.

“Ne nuk mund të konfirmojmë se bëhet fjalë për ta, por ky ka qenë dyshimi ynë i menjëhershëm. Sidoqoftë, duhet t’i presim organet tona të na tregojnë se për çfarë bëhet fjalë atje”, tha Kurti.

Instituti i Mjekësisë Ligjore po merret me procesin e identifikimit. Autoritetet kanë theksuar se vetëm ekzaminimet forenzike dhe analizat e ADN-së mund të përcaktojnë identitetin e viktimave.

Prokuroria Speciale u ka kërkuar mediave, qytetarëve dhe zyrtarëve që të shmangin çdo spekulim lidhur me identitetin e mbetjeve.

“…Ende gjithçka është herët, dhe deklarimet në publik mund ta dëmtojnë procesin e hetimit, e natyrisht mund edhe ta devijojnë rezultatin final”, thuhet në reagimin e Prokurorisë.

Më 2 gusht, Prokuroria dhe Policia njoftuan për gjetjen e një lokacioni tjetër në fshatin Jabukë të Zubin Potokut, ku dyshohet se mund të ketë mbetje mortore.

Institucionet deklaruan se do t’i drejtohen Gjykatës Themelore në Prishtinë për të marrë autorizimin e nevojshëm për gërmime edhe në këtë zonë.

Një ditë përpara njoftimit për lokacionin e dytë, Kurti vizitoi vendin ku po kryheshin kërkimet në Kalludër të Vogël.

Sipas tij, puna në terren mund të vazhdojë për “shumë javë, ndoshta edhe shumë muaj”, pasi mbetjet mortore janë gjetur të shpërndara përgjatë një përroi.

Kurti përsëriti edhe kërkesën që Serbia të hapë arkivat shtetërore dhe ushtarake, duke argumentuar se ato mund të ndihmojnë në zbardhjen e fatit të personave të pagjetur.

Pas njoftimit për lokacionin e dytë reagoi edhe ushtruesja e detyrës së presidentit, Albulena Haxhiu, e cila e cilësoi atë “një rikujtim të rëndë të krimeve të kryera gjatë luftës”.

Ndërsa në Zubin Potok vijonin hetimet për varrezën e dyshuar masive, autoritetet serbe arrestuan një shtetas të Kosovës me dyshimin për “spiunazh”.

Ministria e Punëve të Brendshme e Serbisë bëri të ditur se R.T., nga Istogu, u arrestua më 30 korrik në Kralevë. Gjykata e Lartë në këtë qytet i caktoi atij 30 ditë paraburgim.

Autoritetet serbe nuk publikuan të dhëna mbi veprimet që i atribuohen R.T.-së, përveç faktit se ai dyshohet për veprën penale të spiunazhit.

Megjithatë, disa burime në Kosovë i thanë Radios Evropa e Lirë se arrestimi mund të lidhet me dyshimet se R.T. kishte dhënë informacione që çuan te lokacioni ku po zhvillohen gërmimet për mbetje mortore në Zubin Potok.

Andin Hoti, ministri në detyrë i Punës, Familjes, Mbrojtjes Sociale dhe Vlerave të Luftës Çlirimtare i Kosovës, e cilësoi arrestimin e personit që, sipas tij, kishte ndihmuar në zbulimin e një varreze të dyshuar masive në Kosovë si “tentim-vrasje ndaj së vërtetës”.

“Ky nuk është shtet që kërkon drejtësi. Ky është një aparat shtetëror që vazhdon të mbrojë kriminelët, të frikësojë dëshmitarët dhe të pengojë zbardhjen e fatit të personave të zhdukur. Çdo arrestim i tillë dërgon një mesazh të qartë: kush flet për varrezat masive, ndëshkohet”, shkroi Hoti në Facebook.

Hoti nuk ka sqaruar se mbi cilat informacione mbështetet pretendimi i tij se arrestimi lidhet me ndihmën e supozuar për zbulimin e varrezës masive. Ai nuk ka qenë i qasshëm për një koment të mëtejshëm.

Sipas të dhënave zyrtare, 1.579 persona vazhdojnë të jenë të regjistruar si të zhdukur nga lufta e viteve 1998-99.

The post Nga të arrestuarit te kërkimet për një varrezë të dyshuar masive në Zubin Potok: Të dhënat e deritanishme appeared first on Albeu.com.

Policia e Kosovës i ka kundërshtuar deklaratat e publikuara nga Eparkia Rashkë-Prizren, duke vlerësuar se ato janë pa bazë dhe nuk përkojnë me realitetin e punës së këtij institucioni.

Në reagimin e saj drejtuar opinionit publik, Policia ka deklaruar se nuk zbaton politika presioni, frikësimi apo diskriminimi ndaj komunitetit serb dhe Kishës Ortodokse Serbe.

“Pretendime të tilla nuk mbështeten në fakte, nuk pasqyrojnë realitetin e veprimtarisë së Policisë së Kosovës dhe krijojnë një perceptim të rremë mbi mandatin, përbërjen dhe mënyrën e funksionimit të institucionit”, thuhet në reagimin e PK-së.

Sipas Policisë, bëhet fjalë për një institucion kushtetues dhe profesional, i cili mbështetet në parimet e demokracisë dhe të sundimit të ligjit. Në përbërjen e saj shërbejnë pjesëtarë nga të gjitha komunitetet që jetojnë në Kosovë, përfshirë edhe atë serb.

Policia ka nënvizuar se veprimet e saj kryhen ekskluzivisht në pajtim me ligjin dhe mbi bazën e përgjegjësisë individuale. Sipas saj, karakteri shumetnik i institucionit, mbikëqyrja civile dhe bashkëpunimi me partnerët ndërkombëtarë e përjashtojnë mundësinë e veprimeve të motivuara etnikisht, fetarisht ose politikisht.

Mbrojtja e Kishës Ortodokse Serbe dhe ceremonive fetare

Për më shumë se një dekadë, Policia e Kosovës thotë se ka siguruar qindra ceremoni fetare, pelegrinazhe dhe veprimtari të Kishës Ortodokse Serbe në mbarë Kosovën.

PK-ja ka bërë të ditur se për çdo vit përgatiten plane të veçanta operative, në koordinim me përfaqësuesit e Kishës Ortodokse Serbe, KFOR-in dhe institucionet e tjera përkatëse.

Sa i përket ceremonisë së 28 qershorit 2026 në Gazimestan, Policia ka theksuar se aktiviteti është mbajtur pa ndërhyrje dhe pa pengesa nga ana e saj.

“Veprimet policore të ndërmarra pas përfundimit të ceremonisë nuk kanë qenë të drejtuara ndaj besimtarëve, identitetit serb apo riteve fetare. Masat policore janë ndërmarrë vetëm ndaj personave për të cilët kanë ekzistuar dyshime të arsyeshme për sjellje që përbënin elemente të nxitjes së urrejtjes, provokimit ose cenimit të rendit publik”, thuhet në komunikatë.

Policia ka sqaruar gjithashtu se vendimet për shqiptimin e gjobave, dëbimin apo ndalimin e hyrjes nuk i ka marrë ajo, por organet administrative dhe gjyqësore kompetente, mbi bazën e provave për secilin rast.

24 objekte fetare serbe sigurohen 24 orë nga Policia e Kosovës

Sipas Policisë, ruajtja e trashëgimisë kulturore dhe fetare përbën një prej detyrave kryesore të saj.

Pas kalimit të përgjegjësive nga KFOR-i, Policia e Kosovës mori përsipër sigurimin e objekteve të trashëgimisë kulturore dhe fetare dhe krijoi Drejtorinë për Sigurimin e Objekteve të Trashëgimisë Kulturore (DSOTK).

Të dhënat e Policisë tregojnë se DSOTK ka në përbërje pjesëtarë të të gjitha komuniteteve. Mbi 16 për qind e tyre i përkasin komunitetit serb, ndërsa drejtorinë e udhëheq një major nga ky komunitet.

Në këtë periudhë, 24 objekte të trashëgimisë kulturore dhe fetare serbe ruhen pandërprerë, 24 orë në ditë, nga pjesëtarët e Policisë së Kosovës.

Statistikat e rasteve në objektet fetare

PK-ja ka paraqitur edhe të dhëna statistikore lidhur me rastet e regjistruara në objektet e trashëgimisë kulturore dhe fetare.

Në vitin 2024 janë evidentuar 53 raste. Prej tyre, 34 raste ose 64 për qind janë shënuar në objekte myslimane, 16 raste ose 30 për qind në objekte ortodokse, ndërsa 3 raste ose 6 për qind në objekte katolike.

Gjatë vitit 2025 janë regjistruar 35 raste, me 22 raste ose 63 për qind në objekte myslimane, 10 raste ose 29 për qind në objekte ortodokse dhe 3 raste ose 8 për qind në objekte katolike.

Për periudhën janar-qershor 2026, Policia ka evidentuar 34 raste: 27 raste ose 79 për qind në objekte myslimane, 5 raste ose 15 për qind në objekte ortodokse dhe 2 raste ose 6 për qind në objekte katolike.

Sipas Policisë, pjesa më e madhe e këtyre rasteve lidhet me motive pasurore, përfshirë vjedhjet dhe vjedhjet e rënda.

Rastet me motive ndëretnike në rënie

Policia e Kosovës ka deklaruar se i trajton në mënyrë profesionale dhe të paanshme rastet që mund të kenë motive ndëretnike, duke shtuar se numri i tyre ka rënë nga viti në vit.

Sipas shifrave të publikuara, gjatë vitit 2023 janë regjistruar 31 raste të tilla, në vitin 2024 janë evidentuar 25 raste, ndërsa në vitin 2025 vetëm 5 raste.

Në përmbyllje të reagimit, Policia e Kosovës ka theksuar se do të vijojë të garantojë sigurinë për të gjitha komunitetet pa dallim dhe u ka bërë thirrje qytetarëve që të bashkëpunojnë me institucionin për ruajtjen e sigurisë së përgjithshme në vend.

The post Policia e Kosovës mohon pretendimet e Eparkisë Rashkë-Prizren për diskriminim të serbëve dhe Kishës Ortodokse Serbe appeared first on Albeu.com.