Tensionet pranë objektit të Kuvendit të Kosovës kanë vijuar edhe gjatë mbrëmjes, ku raportohet se ka mbetur i lënduar një tjetër pjesëtar i Policisë së Kosovës.

Polici është lënduar gjatë përshkallëzimit të situatës në protestën që po zhvillohet para ndërtesës së Kuvendit.

Gjatë protestës janë regjistruar edhe më herët incidente, mes tyre përplasje ndërmjet protestuesve dhe zyrtarëve policorë.

Gjendja është tensionuar pas zhvillimeve që lidhen me votimin e ndryshimeve në Ligjin për Dhomat e Specializuara.

The post Përshkallëzohet protesta para Kuvendit, raportohet për një polic të lënduar appeared first on Albeu.com.

Protesta para Kuvendit të Kosovës, e organizuar kundër ndryshimeve në Ligjin për Dhomat e Specializuara, është shoqëruar me tensione.

Gjatë tubimit, disa pjesëmarrës janë përplasur me pjesëtarë të Policisë së Kosovës. Ndërkohë, pranë hyrjes së Kuvendit është vendosur një kamion, me synim bllokimin e rrugës dhe kufizimin e qarkullimit.

Një qytetar pjesëmarrës në protestë deklaroi se përplasja me policinë ishte shkaktuar nga një keqkuptim. Ai sqaroi gjithashtu se kamioni ishte sjellë për të penguar deputetët të largoheshin në rast se nuk miratohej ligji për Specialen.

“Na jemi dalë punën tonë, policia të veten. Patëm keqkuptim me policinë. Arsyeja e vendosjes së kamionit është që mos t’i lejojë deputetët me dalë nëse nuk votohet ligji për Specialen”, tha ai.

Protestuesit u bëjnë thirrje deputetëve që të mbështesin ndryshimet e propozuara në Ligjin për Dhomat e Specializuara të Kosovës.

Si pasojë e protestës dhe situatës së krijuar, hyrja në objektin e Kuvendit dhe lëvizja në zonën përreth janë bërë më të vështira.

Tubimi po mbahet në një kohë kur Kuvendi pritet të shqyrtojë ndryshimet në kuadrin ligjor për Dhomat e Specializuara, çështje kjo që ka shkaktuar reagime dhe përplasje politike në vend.

The post Protestë e tensionuar para Kuvendit për Ligjin e Speciales, kamioni vendoset te hyrja appeared first on Albeu.com.

Deputeti i Lëvizjes Vetëvendosje, Fatos Geci, ka deklaruar se të dielën në mbrëmje është kërcënuar seriozisht, madje edhe me vrasje, për shkak të qëndrimit të tij politik mbi votimin e Gjykatës Speciale.

Pas incidentit, Geci iu drejtua Policisë së Kosovës, ku raportoi rastin dhe dorëzoi të dhënat që kishte për personin që dyshohet se e ka kërcënuar përmes telefonit, transmeton “Bota sot”.

Ai bëri të qartë se debatet dhe mospajtimet politike janë të pranueshme, por kërcënimet ndaj jetës nuk mund të justifikohen si pjesë e politikës.

Në reagimin e tij, Geci tha se, për shkak të bindjeve politike dhe qëndrimit për votimin e Gjykatës Speciale, rreth orës 20:00 ishte përballur me kërcënime për vrasje, si dhe me sharje e ofendime të vazhdueshme.

Deputeti njoftoi se pas daljes nga Policia e Kosovës, në departamentin për krime të rënda, kishte denoncuar ngjarjen dhe kishte dorëzuar çdo informacion në dispozicion lidhur me personin që e kishte kërcënuar.

Sipas tij, rasti tashmë ndodhet nën hetim, ndërsa ai pret që institucionet përgjegjëse të veprojnë në përputhje me ligjin.

Geci theksoi se njerëzit mund të kenë bindje të ndryshme, të debatojnë dhe të mos pajtohen, por kërcënimi për jetën nuk është pjesë e politikës.

Ai deklaroi se do të vijojë detyrën e deputetit dhe do t’u qëndrojë bindjeve të veta, pa u trembur nga kërcënimet. Në fund, shprehu keqardhje të thellë për vrasjen e djalit të dajës së tij dhe për të gjitha viktimat politike shqiptare gjatë dhe pas luftës.

The post Fatos Geci denoncon kërcënime për vrasje pas qëndrimit të tij për Gjykatën Speciale appeared first on Albeu.com.

Ajo nuk ka ngritur pretendime për Adrian Hilën.

“Nuk mendoj se videot i ka publikuar Adrian Hila. Nuk e dija që kishte kamera. Dua të denoncoj personin që i ka publikuar. Nuk isha në dijeni që po filmohesha”, ka thënë Fara.

Në rrjet u shpërndanë disa video, me protagonist kompozitorin Adrian Hila dhe disa këngëtare e artiste në momente intime.

Policia po merr në pyetje disa persona, për të kuptuar se çfarë ka ndodhur dhe për të gjetur personin, që ka shpërndarë pamjet.

The post Videot intime/ Eli Fara dëshmon në polici: Nuk e dija që po filmohesha, pamjet s’janë shpërndarë nga Adi Hila appeared first on Albeu.com.

Policia e Kosovës ka njoftuar se ka marrë masat e nevojshme të sigurisë për protestën që platforma qytetare “Liria ka Emër” do të zhvillojë sot në Prishtinë, në kundërshtim me aktgjykimin e Gjykatës Speciale ndaj ish-drejtuesve të Ushtrisë Çlirimtare të Kosovës.

Tubimi është planifikuar të nisë në orën 16:00 në sheshin “Skënderbeu”, ndërsa motoja e protestës është “Jo në emrin tim”.

Sipas Policisë, forca dhe njësi të ndryshme do të angazhohen para, gjatë dhe pas protestës për të ruajtur rendin e qetësinë publike dhe për të siguruar zhvillimin normal të tubimit, transmeton “Bota sot”.

Pjesëmarrja në protestë dhe lëvizja e qytetarëve pritet të sjellin, duke nisur nga ora 15:00, kufizime apo ndërprerje të përkohshme të qarkullimit në disa akse rrugore.

Përkohësisht do të ndalohet qarkullimi në rrugët “Luan Haradinaj” dhe “Enver Zymeri”.

Policia ka bërë të ditur se, në varësi të situatës dhe kërkesave operative, mund të vendosen kufizime të përkohshme edhe në rrugë të tjera.

Për të orientuar dhe menaxhuar trafikun, do të angazhohen njësi patrulluese, të cilat do të ridrejtojnë automjetet në rrugë alternative nëse do të jetë e nevojshme.

Institucioni policor ka ritheksuar se qytetarët kanë të drejtë të shprehin qëndrimet e tyre përmes tubimeve dhe protestave paqësore.

Ndërkohë, pjesëmarrësve u është kërkuar të zbatojnë ligjet dhe rregullat e qarkullimit rrugor, në mënyrë që protesta të përfundojë e qetë dhe pa incidente.

The post Protesta e sotme në Prishtinë, paralajmërohen kufizime në qarkullim appeared first on Albeu.com.

Me arrestimin e nëntë personave në Zubin Potok, në kuadër të operacionit të koduar “Dosja 23”, një prej ngjarjeve më të rënda të krimeve të luftës në veri të Kosovës është kthyer sërish në qendër të vëmendjes – rasti i njohur si “Grupi i Intelektualëve”.

Operacioni i ndërmarrë nga Prokuroria Speciale dhe Policia e Kosovës ka lidhje me hetimet për zhdukjen dhe vrasjen e 23 personave gjatë luftës së vitit 1999, ndërsa arrestimet e fundit vijnë pas gjetjes dhe identifikimit përmes ADN-së të mbetjeve mortore në Zubin Potok.

Rasti tashmë ka marrë një përmasë të re, sepse hetimet nuk përqendrohen vetëm te identifikimi i viktimave, por edhe te përpjekjet për të qartësuar përgjegjësinë penale të personave që dyshohet se kanë marrë pjesë në këto krime. Për Prokurorinë Speciale dhe Policinë e Kosovës, “Dosja 23” përbën një hap të ri në hetimin e krimeve të luftës, ndërsa për familjet e viktimave mbetet thelbësore të dihet e vërteta për fatin e të afërmve dhe të vendoset drejtësia.

Por çfarë rëndësie kanë këto arrestime për ndriçimin e krimeve të luftës në veri të Kosovës? A mund të hapë “Dosja 23” rrugë drejt provave dhe përgjegjësive të reja penale dhe sa mund të ndikojë ky rast në procesin e drejtësisë për viktimat dhe familjarët e tyre?

Pas pritjes prej gati tri dekadash, familjarët e personave të zhdukur gjatë luftës në Kosovë kanë të drejtë të marrin përgjigje për fatin e më të dashurve të tyre dhe që viktimat të marrin drejtësi. Eksperti i sigurisë, Fidair Berisha, vlerëson se çdo nismë institucionale për sqarimin e këtyre rasteve është e rëndësishme, sidomos kur flitet për raste që për vite të tëra kanë mbetur pa një përgjigje të plotë.

Në një koment për “Bota sot” lidhur me operacionin “Dosja 23” dhe arrestimin e nëntë personave në Zubin Potok, Berisha thotë se ky zhvillim mund të ketë rëndësi të veçantë për hetimin e krimeve të luftës në Kosovë.

Ai e konsideron operacionin dhe arrestimet si një zhvillim të rëndësishëm në procesin e hetimit dhe zbardhjes së krimeve të kryera gjatë luftës në Kosovë. Sipas tij, pesha e këtij operacioni rritet edhe më shumë për shkak se lidhet me rastin e njohur si “Grupi i Intelektualëve”, i cili për shumë vite nuk u ka dhënë një përgjigje të plotë as familjeve të viktimave, as opinionit publik.

Berisha thekson se hetimi nuk duhet të mbyllet me gjetjen dhe identifikimin e viktimave; ai duhet të shkojë deri te qartësimi i plotë i rrethanave të vrasjeve dhe zhdukjeve. Megjithatë, ai tërheq vëmendjen se arrestimet janë pjesë e një procesi hetimor dhe nuk nënkuptojnë automatikisht fajësinë e personave të arrestuar. Hetimet, sipas tij, duhet të kryhen në mënyrë profesionale, të mbështetura në prova dhe në përputhje me procedurat ligjore.

Berisha shpreh besimin se “Dosja 23” mund të sjellë zhvillime të reja në sqarimin e këtij rasti, nëse gjatë hetimeve sigurohen prova dhe dëshmi të mjaftueshme për të ndriçuar atë që u ka ndodhur 23 intelektualëve të zhdukur. Në fund, ai nënvizon se familjarët e viktimave presin prej vitesh zbardhjen e së vërtetës dhe se drejtësia nuk duhet të shtyhet më. Sipas tij, përgjegjësit, nëse identifikohen dhe u vërtetohet fajësia, duhet të dalin para drejtësisë dhe të marrin dënimin e merituar.

Nga ana tjetër, eksperti i kriminalistikës Muhamet Racaj vlerëson se arrestimet e nëntë personave në Zubin Potok, në kuadër të operacionit “Dosja 23”, kanë rëndësi të veçantë për zbardhjen e krimeve të luftës në veri të Kosovës. Ai thekson se pesha e këtij operacioni nuk kufizohet vetëm në aspektin penal, por shtrihet edhe në kriminalistikë dhe në dokumentimin e së vërtetës për ngjarjet e luftës.

Duke iu referuar të dhënave të bëra publike nga Policia e Kosovës dhe Prokuroria Speciale, Racaj thotë se nëntë persona u arrestuan nën dyshimin për krime lufte kundër popullatës civile, në një rast të lidhur me “Grupin e Intelektualëve”. Sipas tij, nga këndvështrimi kriminalistik, sfida kryesore e një operacioni të tillë është ndërtimi i një zinxhiri provash që e lidh të dyshuarin me veprën konkrete penale.

Ai thekson se nuk mjafton vetëm identifikimi i personave të dyshuar; duhet të ndërtohet një zinxhir provash që lidh personin, vendin, kohën, viktimën dhe mënyrën e kryerjes së veprës. Në këtë proces, sipas tij, rol të veçantë kanë provat materiale dhe forenzike, përfshirë mbetjet mortore, analizat e ADN-së, dokumentet ushtarake, komunikimet, të dhënat elektronike, dëshmitë e dëshmitarëve dhe çdo gjurmë tjetër që ndihmon në rindërtimin kriminalistik të ngjarjes.

Racaj përmend edhe zhvillimet e fundit të njoftuara nga autoritetet, sipas të cilave hetimet paraprake çuan në gjetjen e mbetjeve mortore dhe në identifikime përmes ADN-së. Gjatë operacionit të fundit, shton ai, u sekuestruan telefona, libreza ushtarake dhe materiale të tjera që autoritetet i shohin si të rëndësishme për rastin.

Për mundësinë që “Dosja 23” të sjellë zhvillime të reja në vendosjen e drejtësisë, Racaj thotë se operacioni potencialisht mund të jetë një pikë e rëndësishme për hetime të mëtejshme, por rezultati përfundimtar duhet të përcaktohet nga provat që do të administrohen në procedurën penale. Ai nënvizon se arrestimi përbën vetëm një fazë të procesit dhe nuk nënkupton fajësi; përgjegjësia penale duhet të provohet individualisht për çdo të dyshuar përmes një procesi të rregullt gjyqësor.

Në një këndvështrim më të gjerë, Racaj e lidh hetimin e krimeve të luftës me sigurinë juridike dhe institucionale të Kosovës. Ai argumenton se siguria e një shteti nuk ndërtohet vetëm përmes pranisë policore apo masave operative, por edhe përmes aftësisë së institucioneve për të hetuar, dokumentuar dhe ndjekur penalisht vepra të rënda, pavarësisht se kur janë kryer.

Prandaj, ai e sheh si të rëndësishëm vazhdimin e bashkëpunimit profesional ndërmjet Policisë së Kosovës, Prokurorisë Speciale, ekspertëve të kriminalistikës dhe strukturave forenzike, duke kërkuar ruajtjen e integritetit të provave dhe mbështetjen e hetimit në fakte. Drejtësia për viktimat, sipas tij, nuk do të thotë vetëm identifikimi i tyre, por edhe dokumentimi shkencor i rrethanave të vrasjes, zhdukjes dhe përgjegjësisë individuale të personave të përfshirë.

Në mbyllje, Racaj thekson se zbardhja e fatit të të zhdukurve dhe ndjekja e përgjegjësve, nëse fajësia u provohet, nuk duhet parë thjesht si një çështje e së shkuarës, por edhe si një element i rëndësishëm për të ardhmen e vendit. Sipas tij, krimet e luftës duhet të dokumentohen, autorët të përballen me drejtësinë dhe viktimave t’u kthehet e drejta për të vërtetën.

The post Dosja 23” dhe çështja e 23 intelektualëve: a do të sjellin provat përgjegjësi për krimet në veri? appeared first on Albeu.com.

Policia e Kosovës ka bërë të ditur se gjatë dy operacioneve të zhvilluara në veri të vendit ka sekuestruar armë, municion, veshje ushtarake dhe materiale të tjera.

Sipas Drejtorisë Rajonale të Policisë në Mitrovicë Veri, bastisjet u kryen më 27 shtator, pas marrjes së informacionit se në fshatin Dren të Leposaviqit dhe në Shipovë të Zubin Potokut mund të ruheshin armë apo mjete të paligjshme.

Në Dren, kontrollet u përqendruan në një objekt që shërbente si stallë. Aty u zbuluan dhe u morën si prova një armë përsëritëse M-56, një pistoletë CZ-99 e kalibrit 9 mm dhe një pistoletë CZ Mod-70 e kalibrit 7.65 mm.

Gjatë të njëjtit operacion u gjetën gjithashtu 99 fishekë të kalibrit 7.62 mm, 30 fishekë të kalibrit 9 mm dhe 10 fishekë të kalibrit 7.65 mm.

Për këtë rast është ndaluar S.V., i lindur më 1971. Ai është marrë në pyetje në Stacionin Policor në Leposaviq, në praninë e avokatit mbrojtës, ndërsa prokurori i shtetit ka urdhëruar ndalimin e tij për 48 orë.

Operacioni i dytë u zhvillua në një banesë të pabanuar në fshatin Shipovë të Zubin Potokut. Në këtë lokacion, zyrtarët policorë gjetën një pushkë automatike AK-47, gjashtë karikatorë dhe 157 fishekë të kalibrit përkatës.

Policia sekuestroi edhe një pushkë gjuetie M-48, së bashku me 186 fishekë për armë të gjatë, një bajonetë, uniforma ushtarake me emblemë serbe, dy çanta ushtarake dhe një pajisje ushtarake për ushqim.

Deri në këtë fazë, për ngjarjen në Shipovë nuk është arrestuar asnjë person.

Për të dyja rastet, me vendim të prokurorit të shtetit, është hapur hetim nën dyshimin për veprën penale “Mbajtja në pronësi, kontroll ose posedim të paautorizuar të armëve”.

The post Kontrolle në veri të Kosovës, sekuestrohen armë, municion dhe pajisje ushtarake me simbole serbe appeared first on Albeu.com.

Në prag të shpalljes së aktgjykimit për ish-udhëheqësit e Ushtrisë Çlirimtare të Kosovës, Drejtori i Përgjithshëm i Policisë së Kosovës, Gazmend Hoxha, ka folur rreth përgatitjeve të sigurisë për këtë ngjarje.

Ai e ka përshkruar këtë si një ditë të shënuar për Kosovën, duke nënvizuar peshën që UÇK-ja ka pasur në historinë e vendit.

“Siç e dini, sot merret vendim ndaj krerëve të UÇK-së. UÇK-ja ka qenë xhevahiri më i çmuar i historisë së Kosovës, ndoshta edhe i gjithë popullit shqiptar. Është një ditë e veçantë për shtetin tonë, andaj Policia e Kosovës ka marrë masat e duhura”, ka deklaruar Hoxha.

Më tej, ai bëri të ditur se institucionet e sigurisë kanë vënë në zbatim të gjitha masat e nevojshme për të menaxhuar situatën gjatë kësaj dite.

The post Gazmend Hoxha: Policia ka ndërmarrë masat e nevojshme për ditën e aktgjykimit ndaj ish-krerëve të UÇK-së appeared first on Albeu.com.

Inspektorati Policor i Kosovës ka kërkuar suspendimin me pagesë të një zyrtari policor të angazhuar në Stacionin Policor Kufitar të Aeroportit Ndërkombëtar të Prishtinës “Adem Jashari”.

Rasti në fjalë i ishte referuar IPK-së nga Policia e Kosovës më 14 shtator, pas dyshimeve për veprime të kundërligjshme nga polici që shërbente në këtë stacion.

Sipas të dhënave fillestare të mbledhura gjatë hetimit, më 9 shtator 2026 një punonjës i aeroportit kishte raportuar humbjen e 105 eurove.

Shqyrtimi i pamjeve të kamerave të sigurisë dhe veprimet e tjera hetimore zbuluan se shumën e parave e kishte gjetur një udhëtare, shtetase e Kosovës që jeton në Gjermani. Ajo më pas ia kishte dorëzuar paratë një zyrtari policor.

IPK bëri të ditur se pas pranimit të rastit ndërmori procedurat e nevojshme për mbledhjen, sigurimin dhe administrimin e informatave dhe provave të para.

Në bazë të shkresave të administruara, polici ka pranuar se i kishte marrë paratë, por nuk i kishte dorëzuar dhe as trajtuar në përputhje me procedurat ligjore dhe institucionale që zbatohen në raste të tilla.

Sipas dokumentacionit të referuar nga IPK-ja, zyrtari policor më vonë i kishte futur 105 eurot në kutinë e donacioneve të një organizate bamirëse në aeroport.

Duke vlerësuar se ekziston dyshimi i arsyeshëm dhe se pezullimi është i nevojshëm për të garantuar zhvillimin e papenguar të hetimeve, IPK i ka rekomanduar Policisë së Kosovës suspendimin me pagesë të zyrtarit.

Hetimi po zhvillohet për veprat penale “Përvetësimi në Detyrë” dhe “Shpërdorimi i pasurisë së huaj”. Hetuesit e IPK-së, në bashkëpunim të plotë me Prokurorinë, do të vijojnë veprimet e mëtejshme për të sqaruar të gjitha rrethanat e rastit.

The post IPK kërkon suspendimin me pagesë të policit që nuk dorëzoi 105 eurot e gjetura në aeroport appeared first on Albeu.com.

Inspektorati Policor i Kosovës ka nisur një hetim ndaj një zyrtari policor, i cili dyshohet se ka shkelur procedurat ligjore pasi mori në dorëzim 105 euro të gjetura në Aeroportin Ndërkombëtar të Prishtinës “Adem Jashari”.

Rasti është regjistruar nga IPK-ja më 14 shtator 2026, pas referimit të bërë nga Policia e Kosovës. Në qendër të hetimit ndodhet një zyrtar që shërben në Stacionin Policor Kufitar në aeroport.

Hetimet fillestare kanë treguar se më 9 shtator një punonjës i aeroportit kishte raportuar humbjen e shumës prej 105 eurosh. Pas verifikimit të pamjeve të kamerave të sigurisë, është vërtetuar se paratë i kishte gjetur një udhëtare, shtetase e Kosovës që jeton në Gjermani.

Udhëtarja ia kishte dorëzuar shumën një zyrtari policor, bëri të ditur IPK-ja, transmeton Klankosova.tv.

Gjatë marrjes në pyetje, zyrtari ka pohuar se i kishte pranuar paratë, por nuk i kishte dorëzuar apo administruar ato sipas rregullave ligjore dhe procedurave institucionale që zbatohen në raste të tilla.

Dokumentet e rastit tregojnë se, më pas, shuma ishte vendosur në kutinë e donacioneve të një organizate bamirëse në Aeroport.

Me arsyetimin se ka dyshim të arsyeshëm dhe se masa do të ndihmonte në mbarëvajtjen e hetimeve, IPK-ja i ka rekomanduar Policisë së Kosovës suspendimin me pagesë të zyrtarit.

Hetimi po zhvillohet nën dyshimet për kryerjen e veprave penale “Përvetësimi në Detyrë” dhe “Shpërdorimi i Pasurisë së Huaj”.

The post IPK kërkon pezullimin e policit të dyshuar për përvetësimin e 105 eurove në Aeroport appeared first on Albeu.com.