Me rastin e ditës përkujtimore për policët që kanë rënë në detyrë, ish-presidentja Vjosa Osmani ka nderuar kujtimin e tyre, duke shprehur mirënjohje për të gjithë zyrtarët që përditë ruajnë Republikën me trimëri, përkushtim profesional dhe besnikëri të palëkundur.

Në një mesazh të publikuar në Facebook, Osmani theksoi se heronjtë e Kosovës do të trashëgojnë lavdi të përhershme.

“Policia jonë është mburoja e sigurisë, e rendit kushtetues dhe e sovranitetit shtetëror në çdo skaj të Kosovës, qoftë në kohë paqeje apo në përballje me sfida, në veri e në jug. Në këtë ditë, që i dedikohet kujtimit të policëve të rënë në kryerje të detyrës, ne përulemi me respektin më të thellë për sakrificën e tyre”, shkroi ajo.

“Afrim Bunjaku, Enver Zymeri dhe të gjithë heronjtë e tjerë të Policisë treguan se Kosova nuk gjunjëzohet para askujt. Ata vunë detyrën, nderin dhe atdheun mbi gjithçka, ndaj dhe lavdia e tyre do të mbetet e amshuar”, përfundoi ish-presidentja.

The post Osmani nderon heronjtë e Policisë së Kosovës në ditën përkujtimore: Lavdia e tyre do të jetë e amshuar appeared first on Albeu.com.

Ndonëse nuk janë paraqitur në vendet e punës, 20 zyrtarë të Ministrisë së Mjedisit, Planifikimit Hapësinor dhe Infrastrukturës kanë vijuar të paguhen.

Zyrtarët në fjalë i përkasin komunitetit serb dhe lidhen me ish-“Mbrojtjen Civile”. Së fundmi, ndaj tyre është marrë vendim për ndërprerjen e kontratave të punës.

Në një deklaratë për “Bota sot”, avokati Gazmend Halilaj ka vlerësuar se institucionet e Kosovës duhet të veprojnë në çdo rast kur provohet se një zyrtar nuk e ka kryer detyrën ose ka marrë pagë pa punuar, pa marrë parasysh përkatësinë e tij etnike apo politike.

Sipas Halilajt, ndërprerja nga Ministria e kontratave të zyrtarëve që për vite nuk i kanë ushtruar detyrat përbën një vendim të ligjshëm dhe të drejtë, i cili respekton parimet e administrimit të mirë publik dhe të llogaridhënies. Ai ka nënvizuar se askush nuk mund ta ruajë një pozitë në administratën shtetërore nëse nuk e kryen punën për të cilën paguhet, pavarësisht lidhjeve politike ose përkatësisë etnike.

Avokati ka theksuar gjithashtu se institucionet janë ligjërisht të detyruara të zbatojnë masat e rekomanduara, nëse Zyra Kombëtare e Auditimit ka konstatuar shkelje.

Halilaj ka kërkuar që institucionet e Kosovës të shqyrtojnë në mënyrë të plotë dhe të paanshme të gjitha rastet ku ekzistojnë dyshime për mungesa të paarsyetuara, moskryerje të detyrës ose marrje pagash pa punuar. Sipas tij, çdo veprim duhet të mbështetet në ligj, prova dhe procedura të rregullta administrative, e jo në motive politike apo etnike.

Lidhur me ish-pjesëtarët e të ashtuquajturës “Mbrojtje Civile”, ai ka thënë se procesi i integrimit duhet të ndahet nga mënyra se si është zbatuar në praktikë.

Ai ka shpjeguar se integrimi rridhte nga detyrimet e marrëveshjeve të dialogut dhe synonte shtrirjen e rendit kushtetues dhe të sovranitetit të Republikës së Kosovës në veri të vendit. Në parim, sipas Halilajt, ky proces nuk ishte i gabuar, përderisa qëllimi ishte përfshirja e këtyre personave në institucionet e Kosovës dhe vendosja e tyre nën ligjet e saj.

Në përfundim, Halilaj ka deklaruar se institucionet kanë përgjegjësi të marrin masat e nevojshme ligjore nëse më vonë vërtetohet se individë të caktuar nuk kanë punuar, kanë bojkotuar institucionet ose janë paguar pa e ushtruar detyrën.

Sipas tij, sundimi i ligjit kërkon që çdo zyrtar publik të japë llogari për veprimet dhe mosveprimet e veta, ndërsa administrata publike duhet të udhëhiqet nga ligjshmëria, profesionalizmi dhe interesi publik.

The post Halilaj kërkon zbatimin e rekomandimeve të Auditorit për mungesat në punë dhe ndërprerjen e kontratave appeared first on Albeu.com.