Shpërthimi brenda një veture në Gjilan la të lënduar dy persona, ndërsa njëri prej tyre ndodhet në gjendje të rëndë shëndetësore.

Shefi i Mjekimit Intensiv Qendror, Shaqir Uka, ka dhënë informacione për gjendjen e 40-vjeçarit, duke konfirmuar se ajo vazhdon të jetë e rëndë.

Sipas Ukës, pacienti është transportuar mbrëmë nga Spitali Rajonal i Gjilanit në Qendrën Emergjente, pasi kishte pësuar dëmtime nga një mjet eksploziv. Atje iu kryen ekzaminime radiologjike dhe laboratorike, ndërsa për shkak të gjendjes së rënduar dhe shokut hemorragjik iu nënshtrua menjëherë një operacioni urgjent.

Pas ndërhyrjes, 40-vjeçari u dërgua në Njësinë e Mjekimit Intensiv për trajtim të mëtejshëm. Uka bëri të ditur se dëmtimet më të rënda janë në ekstremitetet e poshtme, ndërsa pacienti aktualisht mbahet i sedatuar dhe i lidhur me aparaturë mbështetëse mjekësore.

Për këtë rast ka folur edhe drejtori i Emergjencës në QKUK, Naser Syla. Ai deklaroi se pacienti u soll nga Spitali Rajonal i Gjilanit në gjendje të rëndë dhe, pas ekzaminimeve në Qendrën Emergjente, u dërgua në sallën e operacionit për një ndërhyrje urgjente.

Syla shtoi se, pas përfundimit të operacionit, pacienti u transferua në Mjekimin Intensiv Qendror (MIQ), ku po vijon trajtimin, ndërsa gjendja e tij vazhdon të mbetet e rëndë.

The post 40-vjeçari i plagosur nga shpërthimi në Gjilan vijon të jetë në gjendje të rëndë, mjekët zbardhin gjendjen appeared first on Albeu.com.

Katër personat që mbetën të plagosur nga përleshja me armë të enjten pasdite në Podujevë janë duke marrë trajtim në Qendrën Klinike Universitare të Kosovës.

Zëdhënësja e QKUK-së, Mirlinda Qyqalla, konfirmoi për media se të lënduarit janë sistemuar në klinika të ndryshme për vijimin e trajtimit.

Njëri prej tyre, pacienti A. Islami, i cili në momentin e plagosjes ishte kalimtar i rastit, është dërguar në Klinikën e Kirurgjisë Maksilofaciale. Atje ai i është nënshtruar një operacioni, gjatë të cilit predha është hequr me sukses dhe janë trajtuar kirurgjikisht të gjitha dëmtimet e konstatuara.

“Aktualisht, pacienti ndodhet në gjendje stabile, me parametra të mirë shëndetësorë. Ai do të vazhdojë trajtimin dhe monitorimin pas operacionit, në përputhje me protokollet e Klinikës së Kirurgjisë Maksilofaciale.” – ka deklaruar Qyqalla për Klan Kosovën.

Në ndërkohë, tre personat e tjerë, të cilët ishin të përfshirët kryesorë në përleshje, po trajtohen po ashtu në reparte të ndryshme.

Klani merr vesh se nga anëtarët e familjes Zejnullahu, 36-vjeçari është dërguar në Klinikën e Kirurgjisë Vaskulare, ndërsa 32-vjeçari po qëndron në Mjekimin Intensiv Qendror. Ky i fundit është operuar dje, pasi gjatë konfliktit kishte marrë plagë në kokë.

Nën trajtim në QKUK ndodhet edhe Agim Xhemajli, i cili është transferuar në Kirurgjinë Torakale për kujdes të mëtejmë mjekësor.

The post Të plagosurit nga ngjarja në Podujevë janë shpërndarë në disa klinika, ja si paraqitet gjendja e tyre appeared first on Albeu.com.