Prokuroria Themelore në Mitrovicë ka paraqitur aktakuzë ndaj V.M., të cilin e ngarkon me veprat penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve”.

Ngjarja për të cilën bëhet fjalë ka ndodhur më 1 nëntor 2025. Sipas pretendimeve të Prokurorisë, V.M. dyshohet se ka ndihmuar persona të tjerë në sulmin ndaj të dëmtuarit M.V.

Në aktakuzë thuhet se V.M. kishte fotografuar automjetin e M.V. pranë banesës së tij dhe ia kishte përcjellë fotografitë A.F.-së. Më vonë, kur M.V. ishte nisur drejt një lokacioni në fshatin Kapuricë të Leposaviqit për të blerë mjaltë, V.M. dyshohet se e kishte informuar A.F.-në për lëvizjen e tij.

Prokuroria pretendon se, pasi M.V. kishte mbërritur në atë lokacion, persona të panjohur e kishin plagosur dhe rrëmbyer, për ta dërguar më pas në territorin e Serbisë.

V.M. akuzohet edhe për armëmbajtje pa leje. Gjatë kontrollit të shtëpisë së tij në fshatin Leshak, autoritetet kanë gjetur dhe sekuestruar një armë gjuetie dytytëshe, një tytë të armës së gjatë, një jelek gjuetie me 28 fishekë dhe 11 fishekë të tjerë.

Prokuroria i ka kërkuar Gjykatës Themelore në Mitrovicë që V.M. ta shpallë fajtor dhe ta dënojë në përputhje me ligjin.

The post Mitrovicë: V.M. akuzohet për vrasje të rëndë në tentativë dhe armëmbajtje pa autorizim appeared first on Albeu.com.

Prokuroria Themelore në Prizren, përmes Departamentit të Krimeve të Rënda, i ka kërkuar Gjykatës Themelore në Prizren që ndaj të dyshuarit B.D. të caktojë masën e paraburgimit për 30 ditë. Ai ndodhet në ndalim prej 48 orësh, nën dyshimin e bazuar se ka kryer veprën penale “Vrasja e rëndë”, sipas nenit 173, paragrafi 1, nënparagrafi 1.3 të Kodit Penal të Republikës së Kosovës (KPRK).

Sipas kërkesës së prokurorisë, ngjarja ka ndodhur më 26.08.2026, rreth orës 00:05, në shtëpinë familjare të të dyshuarit në Prizren. Pas një konflikti verbal me bashkëshorten e tij, viktimën me inicialet L.D., B.D. dyshohet se e ka sulmuar fizikisht, duke i përplasur dhe goditur disa herë kokën në tokë.

Për shkak të plagëve të shumta në kokë dhe në pjesë të tjera të trupit, L.D. ka vdekur në vendin e ngjarjes.

Prokuroria pretendon gjithashtu se pas rastit, B.D. është përpjekur të largojë gjurmët e ngjarjes dhe më pas ka njoftuar familjarët për atë që kishte ndodhur.

“Prokuroria Themelore në Prizren mbetet e përkushtuar në luftimin e kriminalitetit, forcimin e sundimit të ligjit dhe sigurimin që secili person i dyshuar për kryerjen e veprave penale të përgjigjet para organeve të drejtësisë”, thuhet në njoftimin e institucionit.

The post Prokuroria kërkon 30 ditë paraburgim për 81-vjeçarin e dyshuar për vrasjen e bashkëshortes në Prizren appeared first on Albeu.com.

Egzon Bytyqi, i cili dyshohet se vrau bashkëshorten në fshatin Kërvasëri të Malishevës dhe më pas plagosi veten, vijon të jetë nën trajtim në Qendrën Klinike Universitare të Kosovës.

Zëdhënësja e QKUK-së, Mirlinda Qyqalla, deklaroi se gjendja shëndetësore e 26-vjeçarit nuk ka ndryshuar.

Çfarë dihet për tragjedinë në Malishevë? Deklaratat e Policisë dhe Prokurorisë

“Në lidhje me rastin e raportuar më 24 gusht 2026 në Qendrën Emergjente të Qendrës Klinike Universitare të Kosovës (QKUK), ju bëjmë me dije se gjendja shëndetësore e pacientit 26-vjeçar vazhdon të jetë e njëjtë. Ai po merr trajtim mjekësor dhe vijon të qëndrojë nën kujdesin e stafit shëndetësor në Qendrën Emergjente të QKUK-së”, ka deklaruar Qyqalla.

Ngjarja e rëndë u shënua të dielën, më 23 gusht, në orët e vona të mbrëmjes, në fshatin Kërvasari të Malishevës. Një grua shtatzënë mbeti e vrarë me armë zjarri.

Autoritetet dyshojnë se i dyshuari për krimin është bashkëshorti i saj, i cili gjithashtu u plagos rëndë me armë zjarri dhe ndodhet në gjendje të rëndë e kritike për jetën.

The post QKUK informon për gjendjen e 26-vjeçarit të dyshuar për vrasjen e gruas së tij në Malishevë appeared first on Albeu.com.

Flurim Ramaj, nga fshati Senik i Malishevës, është personi që ka humbur sot jetën në mënyrë tragjike.

Ngjarja ka ndodhur në lagjen Veternik të Prishtinës, ndërsa viktima dyshohet se ka rënë nga ndërtesa ku po punonte.

Për rastin kanë reaguar edhe familjarët e tij, të cilët kanë shkruar lidhur me ngjarjen tragjike.

Policia e ka konfirmuar rastin dhe ka nisur hetimet për zbardhjen e plotë të rrethanave.

The post Flurim Ramaj humb jetën pasi bie nga ndërtesa ku ishte duke punuar appeared first on Albeu.com.

Prokuroria Speciale e Republikës së Kosovës ka paraqitur aktakuzë kundër K.Xh., i cili dyshohet se ka kanosur kryeministrin në detyrë, Albin Kurti.

Në aktakuzë thuhet se më 22 tetor 2025, K.Xh., me dashje dhe synim për ta frikësuar një zyrtar për shkak të detyrës dhe pozitës së tij si kryeministër i Republikës së Kosovës, e ka kanosur publikisht të dëmtuarin A.K.

Sipas Prokurorisë, kërcënimi ndaj Kurtit është bërë përmes rrjetit social Facebook, ku i pandehuri ka deklaruar se do ta privojë nga jeta.

Për këto veprime, K.Xh. ngarkohet me veprën penale “Kanosja”.

Çështja i është dërguar për shqyrtim Departamentit Special të Gjykatës Themelore në Prishtinë.

The post Prokuroria Speciale ngre aktakuzë ndaj K.Xh. për kanosjen e Kurtit appeared first on Albeu.com.

Policia e Kosovës u ka bërë thirrje qytetarëve që të ndihmojnë në identifikimin e një personi të dyshuar për veprën penale “Vjedhje e rëndë”.

Me autorizimin e prokurorisë kompetente, Sektori i Hetimeve të Kryeqytetit ka bërë publike fotografinë e personit të dyshuar.

Qytetarët që kanë të dhëna të cilat mund të çojnë në identifikimin e tij, ftohen t’ia përcjellin ato policisë.

Informacionet mund të raportohen në numrin 192 të Policisë së Kosovës ose në adresën elektronike [email protected].

The post Policia kërkon bashkëpunimin e qytetarëve për të identifikuar të dyshuarin për “Vjedhje të rëndë appeared first on Albeu.com.

Prishtinë, 4 gusht – Një shtetas kosovar me inicialet K.B., i kërkuar ndërkombëtarisht për veprën penale “Vjedhje e rëndë”, është ekstraduar sot nga Zvicra në Kosovë, bëri të ditur Policia e Kosovës.

Sipas policisë, operacioni u krye nga Drejtoria për Bashkëpunim Ndërkombëtar Policor, në bashkërendim me njësitet përkatëse të Policisë së Kosovës dhe institucionet e drejtësisë.

K.B. ishte ndaluar më herët nga autoritetet zvicerane, pas lëshimit të një letër-rreshtimi ndërkombëtar përmes INTERPOL-it, me kërkesë të institucioneve të drejtësisë së Kosovës.

Me të arritur në Kosovë, ai iu dorëzua njësive kompetente të Policisë së Kosovës, të cilat do të vijojnë procedurat ligjore.

Policia e Kosovës deklaroi se do të vijojë bashkëpunimin me institucionet vendore, shtetet partnere dhe organizatat ndërkombëtare për shkëmbimin e informacionit. Ky bashkëpunim synon parandalimin, hetimin dhe zbulimin e veprimtarive kriminale, si dhe lokalizimin dhe arrestimin e personave të kërkuar brenda dhe jashtë vendit.

The post K.B. ekstradohet nga Zvicra në Kosovë për veprën penale “Vjedhje e rëndë appeared first on Albeu.com.

Prokuroria Speciale e Kosovës po merr në pyetje serbin e tretë të ndaluar një ditë më parë në Komunën e Zubin-Potokut, në kuadër të hetimeve për rastin “Krime të luftës”.

Ndërkohë, ndaj tij po zhvillohet seanca për përcaktimin e masës së paraburgimit, pasi dyshohet për kryerjen e veprës penale “Krime lufte kundër popullsisë civile”.

Arrestimi i të dyshuarit erdhi pas një pune intensive hetimore të kryer nga Prokuroria Speciale.

Në fshatin Kalludër e Vogël të Zubin-Potokut kanë nisur gërmimet, pasi dyshohet se aty ndodhen trupat e 23 personave të njohur si “grupi i intelektualëve” nga rajoni i Mitrovicës. Ata ishin rrëmbyer më 19 prill 1999.

Edhe pas 27 vjetësh, rrethanat dhe fati i tyre nuk janë zbardhur plotësisht.

The post Zhvillohet seanca për masën e paraburgimit ndaj serbit të arrestuar në Zubin Potok appeared first on Albeu.com.

Një tjetër shtetas i Kosovës është ndaluar nga autoritetet serbe, bëri të ditur avokati Arianit Koci.

Bëhet fjalë për Mentor Mustafën, 44 vjeç, nga fshati Jasenovik i Komunës së Novobërdës. Ai u ndalua të shtunën në mbrëmje, rreth orës 22:30, në pikëkalimin kufitar mes Hungarisë dhe Serbisë, ndërsa po udhëtonte me autobus nga Stuttgarti për në Kosovë.

Fejzullah Mustafa, vëllai i tij, ka deklaruar se autoritetet serbe e kanë arsyetuar ndalimin me një letërnjoftim të dëmtuar.

Koci tha se informacionin për rastin e kishte marrë pas mesnate. Sipas tij, menjëherë pas njoftimit ka nisur përpjekjet për të sqaruar rrethanat e ndalimit dhe për t’i siguruar Mustafës ndihmën e nevojshme juridike. Avokati theksoi se do të përdorë të gjitha mundësitë dhe kompetencat e tij që çështja të zgjidhet sa më shpejt.

Postimi i plotë:

Një tjetër qytetar i Kosovës është ndaluar nga autoritetet e Serbisë.

INFORMATË PËR PUBLIKUN

Autoritetet kufitare serbe ndaluan mbrëmë, rreth orës 22:30, shtetasin e Republikës së Kosovës Mentor Mustafa, 44 vjeç, nga fshati Jasenovik i Komunës së Novobërdës. Ndalimi ndodhi në pikëkalimin kufitar ndërmjet Hungarisë dhe Serbisë.

Kur u ndalua, Mustafa po udhëtonte me autobus nga Stuttgarti në drejtim të Kosovës, i shoqëruar nga vëllai i tij, Fejzullah Mustafa.

Vëllai i tij, i cili ishte i pranishëm gjatë ndalimit, ka deklaruar se autoritetet serbe i kishin thënë se masa lidhej me një letërnjoftim të dëmtuar.

Për këtë ngjarje jam informuar pas mesnate.

Sapo mora njoftimin, nisa angazhimin për të hedhur dritë mbi rrethanat e ndalimit dhe për t’i ofruar ndihmën juridike që i nevojitet. Do të vijoj të ndërmarr çdo hap që është brenda kompetencave dhe mundësive të mia, me synimin që ky rast të marrë zgjidhje sa më shpejt.

Asnjë qytetar i Kosovës nuk duhet ta ndiejë veten të braktisur kur has vështirësi jashtë vendit. Brenda mundësive të mia, do të qëndroj pranë qytetarëve tanë dhe do të punoj që ata të marrin ndihmën e nevojshme.

The post Autoritetet serbe ndalojnë një shtetas të Kosovës, avokati Arianit Koci tregon hollësitë appeared first on Albeu.com.

Një person i moshës 25 vjeçare, i identifikuar me inicialet M.P., ra në prangat e policisë të hënën në zonën veriore të Mitrovicës. Ai akuzohet se ka shkaktuar dëme materiale në dy makina duke i qëlluar me gurë, ndërkohë që ndaj tij peshonte edhe një fletarrest i lëshuar më parë nga gjykata për veprën e kanosjes.

Sipas të dhënave të forcave të rendit, i riu shfaqet si person nën hetim në dhjetë episode të tjera kriminale, ku përfshihen një rast vrasjeje, nxitje e urrejtjes dhe intolerancës, sulm ndaj zyrtarëve publikë si dhe armëmbajtje pa leje.

Në deklaratën e saj zyrtare, Policia bën me dije se më datë 20 korrik 2026 ka vënë në pranga të dyshuarin M.P., i lindur më 2001. Ai dyshohet se më 10 korrik të po këtij viti ishte përfshirë në dy incidente të regjistruara në Komisariatin e Mitrovicës së Veriut, të cilat kishin të bënin me shkatërrim prone. Hetimet e deritanishme tregojnë se ky shtetas ka goditur me gurë dy automjete, duke u shkaktuar dëme.

Autoritetet sqarojnë se personi në fjalë kishte arritur t’u shpëtonte uniformave blu më 14 korrik, por pasi u lokalizua sërish në Mitrovicën Veriore, u ndalua pavarësisht se bëri përpjekje të reja për t’u larguar.

“Policia njofton se në momentin e ndërhyrjes, i dyshuari ka tentuar t’i shmanget sërish kapjes, por efektivët e kanë neutralizuar dhe arrestuar me sukses”, thuhet në njoftimin zyrtar.

Gjatë marrjes në pyetje në prezencë të mbrojtësit të tij ligjor, 25-vjeçari M.P. ka rrëfyer se ishte autor i dëmtimit të dy makinave.

Po ashtu, uniformat blu zbuluan se ndaj tij ishte ende aktiv një mandat arresti i lëshuar nga organet e drejtësisë pikërisht për akuzën e “Kanosjes”.

“Për më tepër, të dhënat e sistemit policor e implikojnë atë si person nën hetim edhe në 10 raste të tjera penale, përfshirë këtu veprat ‘Vrasje’, ‘Nxitje e urrejtjes dhe mosdurimit’, ‘Sulm ndaj personit zyrtar’ dhe ‘Mbajtje në pronësi, kontroll ose posedim të paautorizuar të armëve’, raste këto që ndodhen në shqyrtim e sipër pranë instancave përkatëse gjyqësore”, theksohet në komunikatë.

Me vendim të prokurorit të shtetit, ndaj të dyshuarit u aplikua masa e ndalimit për 48 orë.

Në fund të njoftimit, Policia e Kosovës ritheksoi angazhimin e saj të palëkundur për të identifikuar dhe vënë para përgjegjësisë penale këdo që shkel ligjin, duke i sjellë autorët e veprave penale përpara organeve të drejtësisë.

The post Arrestohet në Mitrovicë të Veriut 25-vjeçari me precedentë të shumtë penalë, mes tyre edhe vrasje appeared first on Albeu.com.