Në 27-vjetorin e vrasjes së Agronit, Mehmetit dhe Ylli Bytyqit, organizata Albanians For America i ka përkujtuar tre vëllezërit, duke kërkuar që përgjegjësit dhe urdhërdhënësit e ekzekutimit të tyre të përballen me drejtësinë.

Në një reagim të publikuar në Facebook, organizata thekson se tre vëllezërit shqiptaro-amerikanë u ekzekutuan në mënyrë mizore nga strukturat shtetërore serbe, pasi më herët ishin arrestuar dhe dënuar me burg nga autoritetet e Serbisë.

“Edhe pas 27 vitesh, urdhërdhënësit dhe ekzekutorët e këtij krimi nuk janë nxjerrë para drejtësisë. Pavarësisht premtimeve të përsëritura të zyrtarëve serbë dhe kërkesave të pandërprera të Shteteve të Bashkuara, familja Bytyqi vazhdon të presë drejtësi, ndërsa Serbia vazhdon të mos japë përgjigjen që i detyrohet të vërtetës dhe ligjit.

Albanians For America nderon sakrificën e Agronit, Mehmetit dhe Yllit Bytyqi dhe rithekson se vendosja e drejtësisë nuk është vetëm një detyrim ndaj familjes së tyre, por edhe një provë e gatishmërisë së Serbisë për të marrë përgjegjësi për një krim të kryer nga strukturat e saj shtetërore“, thuhet tutje.

The post Në 27-vjetorin e vrasjes së vëllezërve Bytyqi, kërkohet drejtësi për autorët dhe urdhërdhënësit appeared first on Albeu.com.