Takimi nisi në mënyrë të pafavorshme për kongolezët, pasi Uzbekistani mori avantazhin që në minutën e 10-të me Eldor Shomurodov. Më herët, skuadrës uzbeke iu anulua edhe një gol për pozitë jashtë loje.

Kongo u kundërpërgjigj shpejt dhe gjeti rrugën e rrjetës në minutën e 17-të, kur Nathanael Mbuku shënoi një gol të shkëlqyer pas pasimit të Brian Cipengas, por pas rishikimit me VAR, goli u anulua për faull gjatë aksionit.

Në fraksionin e dytë të lojës, ekipi i Sébastien Desabre rriti ndjeshëm ritmin dhe në minutën e 66-të fitoi penallti, pas një ndërhyrjeje të parregullt në zonë nga Abdukodir Khusanov. Nga pika e bardhë, Yoane Wissa nuk gaboi dhe riktheu baraspeshën në 1-1.

Kthesa vendimtare ndodhi në minutën e 78-të, kur tentativa e Meschack Elias u devijua nga Fiston Mayele dhe përfundoi në rrjetë, duke i dhënë Kongos epërsinë 2-1.

Në minutën e parë të shtesës, Wissa shënoi sërish, këtë herë pas asistimit të Elias, dhe vulosi fitoren 3-1 me golin e tij të dytë personal.

Falë këtij suksesi, Republika Demokratike e Kongos e mbyll fazën duke siguruar për herë të parë kualifikimin në fazën eliminatore të Kupës së Botës nga vendi i tretë me 4 pikë, ndërsa Uzbekistani e përfundon rrugëtimin e tij në turne pas një paraqitjeje dinjitoze në fazën e grupeve.

The post DR Kongo bën kthesën ndaj Uzbekistanit dhe arrin për herë të parë fazën eliminatore appeared first on Albeu.com.

Një platformë e njohur sportive, 433, publikoi pamje që brenda pak orësh grumbulluan qindra mijëra pëlqime dhe u shndërruan në një fenomen global.

Në video shfaqet një djalë nga Irani, i cili edhe pse nuk mund ta shohë ekranin, e përjeton ndeshjen me emocion të jashtëzakonshëm. Që ai të mund të ndiente ritmin e lojës dhe emocionin e golit, i ati kishte gjetur një mënyrë sa të zgjuar, aq edhe prekëse.

Në dyshemenë e dhomës së ndenjes, babai kishte vendosur një tabelë të vogël taktike që simbolizonte fushën e lojës. Sa herë zhvillohej një aksion, ai i merrte dorën djalit dhe e lëvizte mbi tabelë, duke i përcjellë lëvizjen e topit, pasimet dhe zhvillimet në fushë.

Momenti më kulmor i videos vjen kur Cristiano Ronaldo realizon gol, ndërsa djali shpërthen në gëzim të pastër, duke e ndier saktësisht çastin kur topi kalon vijën fatale.

“Kjo është dashuri e pastër. Një baba e ndihmon të birin e verbër të ndjekë ndeshjen Portugali-Uzbekistan duke përdorur një tabelë taktike për të drejtuar dorën e tij gjatë aksionit”, thuhet në përshkrimin e postimit.

Pamjet prekëse të këtij babai, që ndihmon të birin e tij të verbër të “shohë” dhe ta jetojë ndeshjen, lanë pa fjalë njerëz në mbarë botën.

Ky episod i mbushur me dashuri prindërore dhe zgjuarsi tregon se pasioni për sportin nuk njeh pengesa. Postimi mblodhi mbi 360,000 pëlqime në kohë rekord, ndërsa komentet me mbështetje dhe admirim vërshuan nga e gjithë bota.

Shumë tifozë të futbollit theksuan se skena të tilla rikujtojnë thelbin e vërtetë të sportit. Në një kohë kur miliarda shpenzohen për transferime dhe marketing, vlera reale e futbollit mbetet aftësia e tij për të bashkuar njerëzit, për të kapërcyer barrierat dhe për të krijuar kujtime të paharrueshme brenda familjes.

Është një kujtesë për të gjithë ne se çfarë ka vërtet rëndësi në jetë.

The post Videoja që preku botën: Si ia përcolli një baba djalit të tij të verbër golin e Ronaldos me një tabelë taktike appeared first on Albeu.com.

Përballja ofroi gjithçka që mund të kërkohej nga një ndeshje e madhe: Cristiano Ronaldo realizoi dy herë, Nuno Mendes shënoi një gol spektakolar nga goditja e dënimit, ndërsa në rezultat ndikoi edhe një autogol. Megjithatë, ajo që tërhoqi më shumë vëmendje ishin skemat e ekzekutuara në mënyrë të shkëlqyer nga situatat standarde.

Shumë tifozë dhe analistë ia atribuuan këto zgjidhje të menduara me kujdes përzgjedhësit Roberto Martinez, por në të vërtetë pas tyre qëndron Austin MacPhee, eksperti i situatave standarde.

Trajneri skocez është ideatori i këtyre lëvizjeve. MacPhee e ndërtoi emrin e tij te Aston Villa, ku së bashku me Unai Emery e kthyen skuadrën angleze në një ekip jashtëzakonisht efikas nga goditjet e këndit, goditjet e lira dhe rivëniet anësore.

Në sezonin 2023/24, Aston Villa shënoi 25 gola nga situatat standarde, më shumë se çdo skuadër tjetër në Evropë, ndërsa një sezon më pas e konfirmoi sërish këtë forcë me 20 gola.

Kreativiteti mbetet elementi dallues i MacPhee. Ai nuk lejon që një skemë të përsëritet në të njëjtën formë, duke përdorur sinjale të ndryshme, bllokime hapësirash, lëvizje mashtruese dhe zgjidhje të papritura për të hutuar kundërshtarët.

Gjurmët e kësaj pune u panë që në fillim të sfidës me Uzbekistanin. Portugalia arriti të krijonte raste të rrezikshme përmes rivënieve anësore, kombinimeve të shpejta dhe lëvizjeve të mirëkoordinuara që e nxorën vazhdimisht mbrojtjen kundërshtare jashtë pozicionit.

Një nga episodet që u komentua më shumë ndodhi në minutën e 58-të, kur Cristiano Ronaldo dhe Bruno Fernandes ekzekutuan një goditje dënimi krejt të pazakontë.

Ronaldo bëri sikur po lëvizte drejt zonës, ndërsa Fernandes harkoi topin në hapësirë, duke e çorientuar totalisht prapavijën kundërshtare. Edhe pse aksioni nuk u mbyll me gol, ai u përhap menjëherë në rrjet.

Po aq mbresëlënës ishte edhe korneri që solli autogolin e portierit uzbek Abduvohid Nematov. Në fillim të aksionit, Bruno Fernandes dha sinjalet dhe drejtoi vendosjen e bashkëlojtarëve në zonë.

Bllokimet e harmonizuara dhe presioni i ushtruar bënë që mbrojtësit kundërshtarë të gabonin, duke përfunduar me autogolin.

Një tjetër skemë e zgjuar u pa te goli i Nuno Mendes nga goditja e lirë. Ronaldo krijoi bindjen se do të ishte ai ekzekutuesi, aq sa edhe kamerat u ndalën te fytyra e tij.

Në momentin kur mbrojtja u përgatit për goditjen e Ronaldos, ai u ndal papritur dhe Mendes e dërgoi topin direkt në rrjetë.

Me këtë arsenal taktik, Portugalia duket se ka sjellë një dimension të ri në Botërorin 2026.

Nëse vazhdon t’i shfrytëzojë me të njëjtën efikasitet situatat standarde, kundërshtarët do ta kenë jashtëzakonisht të vështirë të gjejnë mënyrën për të ndalur marshimin e luzitanëve drejt trofeut.

The post Portugalia zbulon forcën e saj të fshehtë në Botërorin 2026: Ronaldo, Bruno Fernandes dhe Austin MacPhee në qendër të vëmendjes appeared first on Albeu.com.

“U përgatitëm me kujdes. E studiuam Portugalinë, punuam në organizimin tonë mbrojtës dhe folëm shumë për Ronaldon”.

Sipas trajnerit italian, ka futbollistë që janë në gjendje ta ndryshojnë fatin e një ndeshjeje brenda një çasti, ndërsa theksoi se Ronaldo e tregoi pikërisht këtë. “Por disa lojtarë kanë aftësinë ta ndryshojnë një ndeshje në një moment të vetëm dhe sot Cristiano tregoi saktësisht pse është një nga futbollistët më të mëdhenj në histori”.

Cannavaro komentoi edhe dy golat e realizuar nga kapiteni i Portugalisë, duke veçuar mënyrën se si u shfaq cilësia e tij në të dy rastet.

“Dy golat e tij ishin të ndryshëm, por të dy treguan cilësinë e tij. Lëvizja, koha e reagimit dhe qetësia para portës ishin të jashtëzakonshme. Edhe kur mendon se e ke situatën nën kontroll, ai gjen një mënyrë për të krijuar rrezik dhe për të ndëshkuar gabimet”.

Ai nënvizoi se te Ronaldo nuk e mahnitin vetëm golat, por sidomos mënyra si e qaset lojës dhe mentaliteti që vazhdon të ruajë.

“Në moshën që ka, ajo që më bën më shumë përshtypje nuk janë vetëm golat, por edhe mentaliteti i tij. Ai vazhdon të luajë me urinë e një lojtari të ri që dëshiron të dëshmojë veten. Pikërisht ky qëndrim i dallon lojtarët e mëdhenj nga ata legjendarë, si ai”.

Në vazhdim, Portugalia do të përballet me Kolumbinë, ndërsa Uzbekistani do të ketë punë ndaj Dr. Congos.

The post Fabio Cannavaro vlerëson Cristiano Ronaldon: Sot dëshmoi pse hyn mes më të mëdhenjve të historisë appeared first on Albeu.com.

Ekipi i drejtuar nga Roberto Martínez kontrolloi plotësisht takimin dhe e mbylli atë me pesë gola, duke dëshmuar potencial të madh në repartin ofensiv.

Epërsia e portugezëve erdhi shumë herët, pasi në minutën e 6-të Cristiano Ronaldo realizoi për 1-0, pas një asisti të Joao Cancelo.

Në minutën e 17-të, Portugalia e thelloi avantazhin kur Nuno Mendes shënoi nga një goditje e lirë e ekzekutuar saktë, duke e çuar rezultatin në 2-0.

Në të 29-ën, Uzbekistani mendoi se kishte ngushtuar diferencën me një goditje të bukur nga distanca të Azizjon Ganiev, por VAR anuloi gjithçka për një faull në ndërtimin e aksionit, duke lënë në fuqi epërsinë e Portugalisë.

Pak para fundit të pjesës së parë, Bruno Fernandes shërbeu sërish për Cristiano Ronaldon, i cili realizoi golin e tij të dytë personal dhe të tretin për Portugalinë, duke vulosur shifrat 3-0 para pushimit.

Portugalia e nisi edhe pjesën e dytë me të njëjtin ritëm dhe, pas një aksioni të fuqishëm, një autogol i portierit Abduvakhid Nematov e çoi rezultatin në 4-0.

Uzbekistani tentoi të reagonte, por portugezët mbetën dukshëm më kërcënues në çdo aspekt të lojës.

Goli i pestë erdhi në minutën e 87-të, kur Rafael Leão goditi fuqishëm nga jashtë zone për të vulosur fitoren 5-0 të Portugalisë.

Ky sukses bindës konfirmon Portugalinë si një prej pretendentëve seriozë në Kupën e Botës 2026, ndërsa Cristiano Ronaldo dëshmoi edhe një herë peshën e tij vendimtare në skenën më të madhe të futbollit botëror.

The post Portugalia lëshon sinjal në Botërorin 2026, Ronaldo udhëheq triumfin 5-0 ndaj Uzbekistanit appeared first on Albeu.com.

Portugalia hyn në këtë përballje me pritshmëri të larta, teksa në krye të skuadrës është Cristiano Ronaldo, i cili e nis takimin nga minuta e parë.

Pas tij, mbështetja në repartin ofensiv do të vijë nga Bruno Fernandes, João Félix dhe Pedro Neto.

Në anën tjetër, Uzbekistani paraqitet në fushë me objektiva të mëdha, duke u mbështetur te sulmuesi Eldor Shomurodov dhe te talenti i ri Abbosbek Fayzullayev.

Gjithçka është gati për një tjetër ndeshje interesante në Kupën e Botës, ku Portugalia kërkon një fitore për të vijuar rrugën drejt fazës tjetër, ndërsa Uzbekistani synon befasinë e madhe.

Portugalia: Diogo Costa; Cancelo, Rúben Dias, Veiga, Nuno Mendes; Vitinha, João Neves; João Félix, Bruno Fernandes, Pedro Neto; Cristiano Ronaldo.

Uzbekistan: Nematov; Khusanov, Abdullaev, Nasrullaev, Ashurmatov; Karimov, Ganiev, Shukurov, Xamrobekov; Fayzullayev, Shomurodov.

The post Portugalia dhe Uzbekistani zbulojnë 11-shet, Ronaldo synon triumfin dhe golin e parë appeared first on Albeu.com.

Në sfidën hapëse të fazës së grupeve, Portugalia barazoi 1-1 në mënyrë zhgënjyese ndaj Republikës Demokratike të Kongos. Ronaldo qëndroi në fushë për 90 minuta, por nuk arriti as të shënojë dhe as të japë asistim.

Sipas Owen, është e gabuar që përgjegjësia për paraqitjen e Portugalisë të bjerë vetëm mbi sulmuesin portugez, pasi kritikat ndaj tij i konsideron të ekzagjeruara.

“Het-triku i Messit një ditë para ndeshjes së Portugalisë nuk e ndihmon Cristianon, por unë nuk do ta kritikoj atë”.

“Portugalia nuk tregoi versionin e saj më të mirë kundër Republikës Demokratike të Kongos dhe shumica e kritikave vijnë nga ideja se Ronaldo ishte problemi i ekipit. Por a nuk ka luajtur ai gjithmonë në këtë mënyrë, deri diku?”.

Ish-reprezentuesi anglez theksoi se në vitet e fundit Ronaldo nuk është përfshirë shumë në lojën e përgjithshme, por zakonisht bëhet vendimtar në çastet kryesore. Ai shtoi se, kur Ronaldo nuk realizon gol, është e lehtë që gishtat të drejtohen nga ai, sidomos duke pasur parasysh se në moshën 41-vjeçare ai vihet vazhdimisht në diskutim.

Owen shprehu bindjen se Ronaldo mund t’u japë përgjigje të menjëhershme kritikëve në takimin e ardhshëm.

“Kjo ka ndodhur shumë herë më parë dhe ai i ka bërë të gjithë të heshtin që në ndeshjen pasuese. Nuk do të habitesha nëse ai u përgjigjet me një het-trik ndaj Uzbekistanit”, përfundoi Owen.

Portugalia do të luajë ndaj Uzbekistanit në ndeshjen e dytë të grupit, ku Ronaldo do të ketë një tjetër rast për të treguar se mbetet vendimtar edhe në moshën 41-vjeçare.

The post Michael Owen mbron Ronaldon pas kritikave: Mund t’u kundërpërgjigjet të gjithëve me het-trik ndaj Uzbekistanit appeared first on Albeu.com.