Vendimi i FIFA-s për ta pezulluar me kusht ndëshkimin e sulmuesit amerikan Folarin Balogun, pas kartonit të kuq që mori në fazën e 1/16 së finales së Kupës së Botës 2026 kundër Bosnje dhe Hercegovinës, ka ndezur polemika të forta në botën e futbollit.

Si pasojë e këtij vendimi, Balogun pritet të jetë i gatshëm për ndeshjen çerekfinale me Belgjikën, ndërsa reagimet kanë qenë të shumta dhe të ashpra.

Rudi Garcia, trajneri i Belgjikës, e cilësoi këtë zhvillim si një “shaka të 1 Prillit”, ndërsa në rrjetet sociale kanë qarkulluar edhe aludime se ndryshimi i vendimit mund të jetë ndikuar nga ndërhyrje në nivele të larta politike.

Megjithatë, historia e Kupës së Botës tregon se FIFA, në shumë raste të tjera, nuk ka bërë asnjë lëshim edhe kur në qendër kanë qenë yjet më të mëdhenj të futbollit.

Më poshtë janë 11 futbollistë të njohur që, pavarësisht përpjekjeve dhe apelimeve të federatave të tyre, u detyruan të mungonin në ndeshje vendimtare.

Leonardo (Brazili) – Botërori 1994

Braziliani u ndëshkua me karton të kuq në ndeshjen e 1/16 së finales kundër SHBA-së, pasi goditi me bërryl Tab Ramos dhe i shkaktoi frakturë në mollëz.

Federata braziliane mbrojti idenë se Leonardo thjesht po përpiqej të shkëputej nga kapja e kundërshtarit, por FIFA jo vetëm që e la në fuqi kartonin, por e dënoi edhe me katër ndeshje pezullim.

Për pasojë, ai mungoi në çerekfinale, në gjysmëfinale dhe në finalen e atij turneu.

Alessandro Costacurta (Italia) – Botërori 1994

Mbrojtësi i Italisë u ndëshkua me kartonin e dytë të verdhë në gjysmëfinalen ndaj Bullgarisë, pasi ndërhyri me faull ndaj Hristo Stoichkov.

Italianët kërkuan rishqyrtim të rastit, por FIFA nuk pranoi as ta marrë në konsideratë. Kështu, Costacurta e humbi finalen kundër Brazilit, ku Italia u mund pas penalltive.

Patrick Kluivert (Holanda) – Botërori 1998

Sulmuesi i Holandës u përjashtua me të kuq në takimin hapës përballë Belgjikës, pasi goditi me bërryl Lorenzo Staelens.

Federata holandeze argumentoi se futbollisti ishte provokuar rëndë, por FIFA vendosi ta pezullojë për tre ndeshje. Kluivert u kthye vetëm në çerekfinale, ku gjeti rrugën e rrjetës kundër Argjentinës.

Zinedine Zidane (Franca) – Botërori 1998

Francezi u ndëshkua pasi shkeli me dashje mbi Said Al-Owairan gjatë fazës së grupeve.

FIFA e la jashtë për dy ndeshje, çka bëri që Zidane të mungonte ndaj Danimarkës dhe Paraguait. Ai u rikthye në çerekfinale dhe më vonë realizoi dy herë në finalen me Brazilin.

Laurent Blanc (Franca) – Botërori 1998

Ky mbetet një nga kartonët e kuq më polemikë në historinë e Botërorëve. Blanc u përjashtua në gjysmëfinalen me Kroacinë pas një kontakti të lehtë me Slaven Bilic, i cili simuloi rëndë.

Edhe pse Franca protestoi dhe pamjet televizive ngritën dyshime të forta, FIFA nuk ndryshoi vendim dhe Blanc mbeti jashtë finales kundër Brazilit.

Ronaldinho (Brazili) – Botërori 2002

Në çerekfinalen e famshme me Anglinë, Ronaldinho dha asist, shënoi një gol spektakolar nga goditja e lirë dhe më pas mori karton të kuq pas një ndërhyrjeje ndaj Danny Mills.

Brazili kërkoi heqjen e pezullimit me argumentin se ndërhyrja nuk kishte qenë e qëllimshme, por FIFA mbajti të njëjtin qëndrim. Ronaldinho mungoi në gjysmëfinalen kundër Turqisë.

Michael Ballack (Gjermania) – Botërori 2002

Mesfushori gjerman u ndëshkua me karton të verdhë në gjysmëfinalen përballë Koresë së Jugut pas një faulli taktik, duke plotësuar limitin e kartonëve.

Ndonëse më pas shënoi golin e suksesit, Ballack nuk luajti në finalen me Brazilin.

Rasti i tij ndikoi më vonë që FIFA të ndryshonte rregulloren dhe t’i fshinte kartonët pas çerekfinaleve.

Deco (Portugalia) – Botërori 2006

Në sfidën famëkeqe Portugali-Holandë, të njohur si “Beteja e Nurembergut”, Deco u përjashtua pas kartonit të dytë të verdhë për vonesë loje.

Federata portugeze pretendoi se arbitri e kishte humbur kontrollin e ndeshjes, por FIFA e hodhi poshtë apelimin. Deco mungoi në çerekfinalen kundër Anglisë.

Luis Suarez (Uruguai) – Botërori 2010

Në çerekfinalen ndaj Ganës, Suarez ndali topin me dorë mbi vijën fatale në minutën e 120-të.

Ai u përjashtua dhe nuk luajti në gjysmëfinalen përballë Holandës. FIFA nuk e fali pezullimin dhe madje mori në shqyrtim edhe mundësinë e një dënimi më të rëndë.

Thiago Silva (Brazili) – Botërori 2014

Kapiteni i Brazilit mori kartonin e dytë të verdhë në turne pas një pengimi të panevojshëm ndaj portierit David Ospina.

Federata Braziliane kërkoi anulimin e ndëshkimit, duke theksuar se kontakti ishte minimal, por FIFA e refuzoi kërkesën. Thiago Silva mungoi në gjysmëfinalen historike me Gjermaninë, ku Brazili u mund 7-1.

Jerome Boateng (Gjermania) – Botërori 2018

Boateng u përjashtua me kartonin e dytë të verdhë në fitoren dramatike ndaj Suedisë.

Gjermania apeloi duke argumentuar se kartoni i dytë ishte i ashpër, por FIFA nuk e ndryshoi vendimin. Pa Boateng, kampionët në fuqi u eliminuan pas humbjes 2-0 ndaj Koresë së Jugut.

Rasti i Garrinchës, përjashtimi historik

Përpara Balogun, historia kishte regjistruar vetëm një precedent të ngjashëm.

Në Botërorin e vitit 1962, Garrincha u përjashtua në gjysmëfinalen kundër Kilit. Në atë kohë, kartonët e kuq nuk përdoreshin fizikisht dhe pezullimet përcaktoheshin nga komisioni disiplinor.

Brazili ndërmori një fushatë të madhe për ta shpëtuar yllin e vet. Politikanë, tifozë kilianë dhe figura të tjera kërkuan faljen e tij, ndërsa raporti vendimtar i gjyqtarit anësor nuk mbërriti asnjëherë në komision.

Për shkak të mungesës së provave të plota, FIFA vendosi ta lejonte Garrinchën të luante në finale.

Për më shumë se gjashtë dekada, ky mbeti i vetmi rast kur një karton i kuq u fal para një finaleje të Kupës së Botës.

Vendimi më i fundit për Folarin Balogun e ka rikthyer sërish në qendër të vëmendjes këtë precedent historik dhe ka hapur debat të gjerë mbi mënyrën se si FIFA i zbaton rregullat disiplinore në turneun më të madh të futbollit.

The post Nga Zidane te Suarez, 11 emra të mëdhenj që munguan në duele vendimtare, në të kundërt të Balogun appeared first on Albeu.com.

Marcelo Bielsa do të largohet nga përfaqësuesja e Uruguait, pasi kombëtarja që drejtoi u ndal në fazën e grupeve të Kupës së Botës. Kështu mbyllet një periudhë e vështirë, e shoqëruar me vendimet për të lënë jashtë figura si Luis Suarez dhe Edinson Cavani, si edhe me tensionet e brendshme që pasuan.

Në konferencën e tij të lamtumirës, trajneri argjentinas bëri një bilanc të mandatit dhe foli hapur për shkaqet që, sipas tij, çuan te ky përfundim zhgënjyes.

“Ky fund, kjo lamtumirë, është shumë e dhimbshme. Për shkak të iluzioneve që kisha dhe mënyrës së shëmtuar se si përfundoi e gjitha”, u shpreh fillimisht Bielsa. Ai kishte mbërritur në Uruguai pothuajse katër vjet më parë me misionin për të realizuar një ndërrim brezash dhe për të ndryshuar mënyrën e lojës, por ky projekt mbeti i papërfunduar.

“Nëse duhet të vlerësoj performancën e ekipit që kam drejtuar, mendoj se i zhgënjyem tifozët. Është një zhgënjim i madh. Ishte krejtësisht e paparashikuar që rezultati të ishte kështu. Është e vështirë edhe ta imagjinosh. Kjo është një rënie që është e vështirë të përballohet”.

Ai shtoi se nuk gjen justifikim për epilogun e skuadrës dhe pranoi se administrimi i mundësive që kishte në dispozicion nuk ishte në nivelin e duhur. “Nuk mund ta justifikoj rezultatin që arritëm. Menaxhimi i burimeve që kisha në dispozicion nuk ishte mjaftueshëm i mirë. Ne dhamë gjithçka, unë, stafi im dhe lojtarët. Jam i bindur se edhe nëse do të kisha zgjedhur një mënyrë tjetër, nuk do ta kisha ndryshuar rezultatin”.

Më pas, Bielsa u ndal te raporti me futbollistët dhe kompromiset që tha se bëri për të ruajtur harmoninë në grup.

“Pati takime, shumë prej tyre, dhe zgjatën shumë. Lojtarët ngritën idenë që të mos stërvitemi veçmas në dy grupe. Ata e dinë pse unë preferoj atë mënyrë pune, por kur shprehën nevojën që të gjithë të stërviten së bashku, është absurde që unë të këmbëngul në diçka me të cilën ata nuk pajtohen”.

Ai shpjegoi se u kishte paraqitur lojtarëve përfitimet e ndarjes në dy grupe, duke theksuar se në atë mënyrë puna zgjaste gjysmën e kohës dhe shmangej pritja e panevojshme. Sipas tij, në kushte me temperatura të larta dhe lagështi të madhe, ndryshimi mes një seance 40-minutëshe dhe një tjetër prej një ore e gjysmë ishte i madh. Megjithatë, ai vendosi ta pranonte kërkesën e tyre që skuadra të qëndronte më e bashkuar.

Bielsa tregoi se lojtarët kishin kërkuar edhe më pak mbledhje taktike dhe më të shkurtra. “Ata kërkuan gjithashtu më pak biseda. Unë kam mënyrën time të shpjegimit të gjërave, por edhe këtë e pranova. Pas miqësores me Shtetet e Bashkuara, e bëra këtë angazhim, por në një moment nuk ishte e mjaftueshme. Nuk mund të lejoj që të mendohet se lojtarët nuk luajtën më mirë sepse ishin të zemëruar me mua”.

Duke folur për Federico Valverden, mesfushorin e Real Madridit, trajneri mohoi kategorikisht se kishte pasur përplasje me të.

“Nuk kam pasur kurrë problem me Valverden. Në fakt, nuk kam bërë kurrë më shumë lëshime për asnjë lojtar, sepse mendoj se ai i meriton ato”, deklaroi Bielsa.

Ai tregoi se i kishte thënë Valverdes se ndoshta do ta aktivizonte si mbrojtës qendror, si anësor apo në mesfushë, ndërsa përgjigjja që mori ishte, sipas tij, ideale dhe me gatishmëri të plotë. “I thashë se ndoshta duhet ta përdor si mbrojtës qendror ose si anësor dhe mesfushor, dhe mora përgjigjen ideale dhe gatishmëri të plotë. Nëse ka një konflikt, nuk e di. Kam ëndërruar të menaxhoj Araujon, Valverden, Bentancurin..”.

Argjentinasi foli edhe për vështirësitë që sollën dëmtimet e lojtarëve kryesorë. “Uruguai ka pesë yje: Araujo, De Arrascaeta, Valverde, Darëin dhe Gimenez. Araujo dhe De Arrascaeta mbërritën në takim në një formë të tillë saqë u dhashë mundësinë të mos stërviteshin. Para ndeshjes me Spanjën, ishte stërvitja e tyre e parë pas dy muajsh. Josema Gimenez nuk kishte luajtur për 70 ditë para mbërritjes së tij. Ka aq shumë dashuri për ekipin kombëtar sa të gjithë shtyjnë përpara dhe punojnë shumë”.

Edhe pse Uruguai u eliminua, Bielsa këmbënguli se skuadra e tij kishte bërë mjaftueshëm për të kaluar më tej nga grupi.

“Mund të shpjegoj pse duhet ta kishim mbyllur grupin me shtatë pikë. Nuk ka analizë serioze dhe të menduar mirë që nuk do të na vendoste si fitues kundër Arabisë Saudite, fitues kundër Kepit të Gjelbër dhe me një barazim kundër Spanjës”, tha ai.

Në vijim, ai kundërshtoi komentet për një ndarje mes ekipit dhe trajnerit. “Sot, zëdhënësi i federatës dërgoi një koment nga një ish-lojtar uruguaian i cili tha se ishte e qartë se lojtarët dhe trajneri ishin të përçarë. Unë them të kundërtën, ne ishim mjaftueshëm të bashkuar për të vrapuar 20% më shumë se Arabia Saudite, 30% më shumë se Kepi i Gjelbër dhe 25% më shumë se Spanja”.

Sipas tij, përkushtimi i futbollistëve u pa qartë edhe në mënyrën si krijuan raste gjatë ndeshjeve. “Angazhimi i lojtarëve ndaj asaj që duhet të bëjnë shprehet në përkushtimin e tyre. Ne krijuam pesë herë më shumë raste se Arabia Saudite, 50% më shumë se Kepi i Gjelbër dhe po aq sa Spanja. Trishtimi i përgjithshëm i të gjithë tifozëve është ajo që duhet të duroj”, shtoi ai.

Bielsa sqaroi edhe episodin me portierin Fernando Muslera, i cili sipas tij kërkoi të zëvendësohej pas një gabimi.

“Një ditë para ndeshjes, Muslera kishte një temperaturë prej 38.1 gradë. Ditën e ndeshjes, ai nuk kishte temperaturë dhe ishte gati për të luajtur. Më tha se ishte aq i prekur nga gabimi saqë preferoi të dilte nga loja sepse skuadra ishte në gjendje të luftonte dhe ai nuk ishte në gjendjen më të mirë. Për mua, më duket si një akt madhështie dhe bujarie të pabesueshme”, tha Bielsa.

Në fund, ai komentoi edhe reagimin e tij ndaj ekipit televiziv pas humbjes me Spanjën, duke pranuar se nuk kishte reaguar në mënyrën më të mirë. “Reagova ndaj vonesës me pyetje që isha i detyruar t’u përgjigjesha. Ato ishin shumë të vonuara dhe unë u shkatërrova. Ndoshta nuk isha aq i sjellshëm sa duhej të isha”.

The post Bielsa mbyll aventurën te Uruguai: “Për Valverden kam bërë më shumë lëshime se për këdo tjetër” appeared first on Albeu.com.

Uruguai e mbylli në mënyrë zhgënjyese aventurën e tij në Kupën e Botës 2026, pasi u ndal që në fazën e grupeve pas humbjes 1-0 ndaj Spanjës në sfidën vendimtare.

Takimi u vendos nga Alex Baena, autor i golit të vetëm që i siguroi Spanjës triumfin dhe njëherazi konfirmoi eliminimin e skuadrës së drejtuar nga Marcelo Bielsa.

Ky largim i parakohshëm ka sjellë reagime të shumta në Uruguai dhe ka shtuar ndjeshëm presionin mbi trajnerin argjentinas. Prej kohësh është folur për marrëdhënie jo të thjeshta mes tij dhe disa lojtarëve të ekipit, ndërsa tani e ardhmja e tij është vënë seriozisht në diskutim.

Sipas ESPN, menjëherë pas eliminimit Bielsa u foli futbollistëve në dhomat e zhveshjes, me një mesazh të fortë që thuhet se ishte i drejtuar kryesisht ndaj elementëve më me eksperiencë të skuadrës.

“Po largohem nga kjo Kupë Bote i trishtuar sepse më keni braktisur”, mësohet të ketë thënë ai, duke lënë të kuptohet zhgënjimi i madh për situatën e krijuar brenda grupit.

Episodi vjen në një moment shumë delikat për Bielsan, teksa e ardhmja e tij në pankinën e Uruguait mbetet krejtësisht e paqartë.

Vetë tekniku ka ushqyer edhe më tej aludimet për një largim të mundshëm me atë që deklaroi në konferencën për shtyp pas eliminimit.

“Si do të kujtohet periudha ime këtu? Si një periudhë që nuk solli asgjë”, u shpreh Bielsa.

Marrëveshja e Bieslas ishte parashikuar të mbyllej pas Kupës së Botës dhe tani mbetet për t’u parë nëse Federata Uruguaiane do të kërkojë vazhdimin e bashkëpunimit apo nëse palët do të ndajnë rrugët pas këtij dështimi të madh.

The post Marcelo Bielsa shpërthen pas daljes së Uruguait nga Kupa e Botës 2026: “Më keni braktisur” appeared first on Albeu.com.

Federata Uruguaiane e Futbollit (AUF) ka marrë masa ndëshkuese ndaj lojtarëve të Uruguait pas dështimit katastrofik në Kupën e Botës 2026.

Ekipi i drejtuar nga Marcelo Bielsa e mbylli turneun pa asnjë fitore dhe u largua që në fazën e grupeve, duke regjistruar dy barazime dhe një humbje në ndeshjen e fundit kundër Spanjës.

Takimi ndaj kampionëve të Europës u karakterizua nga kaos. Fernando Muslera, portieri veteran i skuadrës, u zëvendësua në pushimin mes pjesëve pasi bëri një gabim të rëndë, duke lejuar që një goditje e Alex Baenës të përfundonte në rrjetë.

Problemet u thelluan edhe më tej kur Manuel Ugarte, mesfushori i Manchester United, u largua nga fusha me barrelë pas një dëmtimi të dyshuar në gju, i cili mund ta lërë jashtë për një kohë të gjatë.

Përpara ndeshjes, mediat raportuan gjerësisht se disa lojtarë të Uruguait kishin dalë kundër Marcelo Bielsës dhe mënyrës së tij të punës. Sipas këtyre raportimeve, disa nga yjet e skuadrës nuk ishin të kënaqur me intensitetin e stërvitjeve dhe kishin kërkuar një ndryshim rrënjësor në aspektin taktik.

Pavarësisht kësaj situate, asgjë nuk u ndryshua dhe tani AUF duket se ka përcjellë një sinjal të qartë për pakënaqësinë ndaj paraqitjes së ekipit.

Sipas raportimeve të El Pais dhe Tenfield, pas eliminimit të parakohshëm nga Botërori është anuluar fluturimi privat që ishte planifikuar për kthimin e skuadrës në Montevideo.

Në planin fillestar, futbollistët dhe stafi duhej të udhëtonin së bashku me një avion çarter nga baza e tyre në Meksikë, por më pas u vendos që kthimi të bëhej përmes fluturimeve komerciale.

Si pasojë e këtij vendimi, lojtarët u ndanë në fluturime të ndryshme, me itinerare dhe ndalesa të ndryshme gjatë udhëtimit.

Uruguai, që mban vendin e 16-të në renditjen botërore, e përfundoi grupin në vendin e fundit mes skuadrave të renditura të tretat, me vetëm dy pike, më pak se Skocia, Koreja e Jugut dhe Irani.

The post AUF ndëshkon ashpër futbollistët e Uruguait pas eliminimit zhgënjyes në Botërorin 2026 appeared first on Albeu.com.

Ekipi i drejtuar nga Luis de la Fuente e arriti këtë rekord pas triumfit 1-0 përballë Uruguait, në ndeshjen e raundit të tretë të fazës së grupeve të Kupës së Botës 2026.

Falë këtij suksesi, ‘La Roja’ ka shkuar në 34 takime zyrtare rresht pa pësuar humbje, me bilancin prej 27 fitoreve dhe 7 barazimeve.

Disfata e fundit e spanjollëve në një përballje garuese është regjistruar në mars të vitit 2023, kur u mposhtën 0-2 nga Skocia në kualifikueset e Euro 2024.

Me faktin që nuk u mund nga Uruguai, Spanja ka kaluar zyrtarisht rekordin e mëparshëm botëror që mbahej nga Brazili, i cili kishte mbetur pa humbje në ndeshje zyrtare nga viti 1993 deri në vitin 1998.

Sipas sqarimit statistikor, në këtë rekord përfshihen vetëm ndeshjet zyrtare konkurruese, ndërsa përjashtohen miqësoret dhe sfidat e vendosura nga gjuajtjet e penalltive.

Për këtë arsye, humbja 0-1 ndaj Kolumbisë në një miqësore gjatë vitit 2024, si edhe humbja ndaj Portugalisë me penallti në finalen e Ligës së Kombeve në vitin 2025 (2-2, 3-5 me penallti), nuk e ndërpresin këtë ecuri historike të Spanjës.

The post Spanja thyen rekordin historik me 34 ndeshje zyrtare radhazi pa humbje appeared first on Albeu.com.

“La Roja” e fitoi ndeshjen me shifrat 0-1. Spanjollët kontrolluan posedimin gjatë takimit, por nuk arritën t’i konkretizonin rastet që krijuan.

Uruguai 0-[1] Espanha – A. Baena 42′ – Copa do Mundo 2026, 3ª rodada, Grupo H
by
u/meunomedeusuario in
futebol

Heroi i sfidës për Spanjën ishte mbrojtësi Alex Baene, i cili realizoi nga një kënd i vështirë. Goditja e tij përfundoi në rrjetë, ndërsa portieri i Uruguait nuk arriti ta ndalte, duke bërë një ndërhyrje të dobët.

Edhe në pjesën e dytë, Spanja krijoi më shumë mundësi për gol. Ferran Torres e ndali topin në traversë, ndërsa rrezikoi edhe Dani Olmo, por pa arritur të shënonte.

Në këtë mënyrë, Spanja e mbyll fazën e grupeve në krye të grupit H me shtatë pikë, ndërsa Uruguai i jep lamtumirën Botërorit me vetëm dy pikë.

The post Spanja mposht Uruguain dhe siguron kalimin në raundin tjetër të Kupës së Botës appeared first on Albeu.com.

Gjatë ndeshjes, futbollisti uruguaian përfundoi i shtrirë në fushë mes dhimbjesh të forta, çka bëri që ekipi mjekësor të hynte menjëherë për t’i dhënë ndihmën e nevojshme.

Edhe pas disa minutash intervenimi, Ugarte nuk mundi ta vazhdonte takimin dhe u nxor nga fusha me barelë, pasi nuk arrinte të ecte pa ndihmë.

Skenat e rënda ngjallën menjëherë shqetësim te tifozët e Uruguait dhe të Manchester United, ndërsa ende nuk dihet saktësisht shkalla e lëndimit që ai ka pësuar.

Tashmë, përfaqësuesja uruguaiane po pret me ankth rezultatet e kontrolleve mjekësore, duke shpresuar që një prej lojtarëve më të rëndësishëm të ekipit të ketë shmangur një dëmtim serioz dhe një mungesë të gjatë.

Një lëndim i Ugartes do të ishte një goditje e madhe për Uruguain në fazën eliminatore të Botërorit, duke pasur parasysh peshën e tij në mesfushë dhe rolin vendimtar që ka në ekuilibrin e skuadrës.

The post Manuel Ugarte dëmtohet rëndë në ndeshjen ndaj Spanjës appeared first on Albeu.com.

Teksa foli për rrezikun që sjell sulmuesi i ri, tekniku uruguaian zbuloi edhe qasjen taktike që synon të përdorë për ta frenuar atë.

“Është një lojtar që mund të ndryshojë ndeshjen. Do të ketë diskutime mes lojtarit që e markon rregullisht dhe nevojës për ta ndihmuar atë në fushë për ta ndalur në atë zone”, tha ai.

“Do të ketë ndihmë nga lojtarët uruguaianë për ta neutralizuar, sepse është një lojtar vendimtar që mund të ndryshojë rrjedhën e ndeshjes”.

Sipas Bielsas, Uruguai do të mbetet besnik ndaj mënyrës së vet të lojës, edhe pse në ndeshjet ndaj Arabisë Saudite dhe Kepit të Gjelbër skuadra ka shfaqur luhatje në paraqitje.

“Do të bëjmë atë që bëjmë gjithmonë. Kundër Arabisë Saudite dhe Kepit të Gjelbër kemi pasur ulje dhe ngritje; ajo që dua është që ekipi të jetë dinamik, të marrë iniciativën dhe të jetë në gjendje ta bëjë këtë edhe kundër një kundërshtari më të fortë”.

Ai theksoi se forca e Spanjës qëndron te loja kolektive, ndërsa ndërtimi i aksioneve mbetet elementi kryesor në të gjitha fazat e saj.

“Stili i lojës së Spanjës bazohet në ekipin. Krijimi i aksioneve është prioritet në çdo aspekt të lojës së tyre, prandaj mbrojtja do të jetë vendimtare dhe nuk do të jetë aspak e lehtë”.

Bielsa shtoi se kufizimi i kontrollit të topit nga kundërshtari është një prej mënyrave më efikase për t’u mbrojtur ndaj një skuadre si Spanja.

“Një nga mënyrat më të mira për t’u mbrojtur është të kufizosh posedimin e kundërshtarit dhe ne do të përpiqemi ta bëjmë këtë”, përfundoi ai.

Në të njëjtën kohë, para kësaj përballjeje të rëndësishme, në kampin uruguaian kanë qarkulluar raportime për pakënaqësi të disa futbollistëve lidhur me ngarkesën e madhe në seancat stërvitore të drejtuara nga Bielsa.

The post Bielsa paralajmëron planin e Uruguait ndaj Spanjës, me fokus të veçantë te Yamal appeared first on Albeu.com.

Në vend që atmosfera të jetë e qetë në prag të sfidës, skuadra është përfshirë nga një përplasje mes futbollistëve dhe trajnerit Marcelo Bielsa. Pas barazimit 1-1 ndaj Arabisë Saudite dhe 2-2 kundër Kepit të Gjelbër, Uruguai me shumë gjasa ka nevojë për fitore ndaj rivalit më të fortë për të siguruar kualifikimin nga Grupi H.

Sipas raportimit të radios Espectador Deportes, të përcjellë nga portali Globo, një grup lojtarësh të drejtuar nga ylli i Real Madridit Federico Valverde, Manuel Ugarte i Manchester United dhe Rodrigo Bentancur i Tottenham janë ngritur kundër përzgjedhësit.

Bëhet e ditur se lojtarët e thirrën Bielsën në një takim, ku kërkuan ndryshim të qasjes dhe të stilit të lojës për ndeshjen vendimtare me Spanjën. Ata nuk janë të kënaqur me volumin dhe intensitetin e stërvitjeve, që sipas tyre kanë ndikuar te lëndimet, ndërsa kërkojnë që skuadra të luajë me bllok të ulët ndaj spanjollëve dhe të kërkojë rastet në kundërsulm.

Takim me tension dhe akuza nga Bielsa

Si përgjigje, Bielsa mblodhi të gjithë ekipin dhe u bëri të ditur se plani ishte të kopjohej formacioni i spanjollëve. Më pas u zhvillua një takim 48-minutësh, gjatë të cilit ai mbrojti metodat e tij, sipas pretendimeve të radios.

Trajneri argjentinas i akuzoi futbollistët se prej kohësh po tentojnë ta largojnë, që nga momenti kur ai e la jashtë kombëtares legjendën Luis Suarez dhe nuk e grumbulloi për Kupën e Botës mesfushorin e Al-Qadsiah, Nahitan Nandez, i cili numëron 70 paraqitje me përfaqësuesen.

Po ashtu, ai mësohet të ketë thënë se ka ndërtuar karrierën e disa futbollistëve të kombëtares, si Martin Caceres dhe Maxi Araujo. Këto deklarata shkaktuan reagim të ashpër te disa lojtarë, të cilët u larguan në mënyrë demonstrative nga mbledhja. Mbrojtësi Jose Maria Gimenez tentoi të ulte tensionet, por pa rezultat.

A është trajneri pranë largimit?

E gjithë çështja mori edhe më shumë peshë pasi, sipas raportimeve, një nga drejtuesit e Federatës së Futbollit të Uruguait i tha radios së përmendur se Bielsa do të largohej nga stoli “në më pak se një muaj”.

Megjithatë, pavarësisht zhvillimeve të bujshme, as Marcelo Bielsa dhe as Rodrigo Aguirre nuk folën për konfliktin gjatë konferencës për shtyp para ndeshjes.

The post Tensione te Uruguai para duelit me Spanjën, Bielsa akuzon futbollistët se po kërkojnë largimin e tij appeared first on Albeu.com.

Sulmuesi i Inter Miamit tha se e përjeton me vështirësi faktin që po e ndjek ekipin nga jashtë, pasi dëshira për të dhënë ndihmë mbetet ende shumë e madhe.

“Ndjehem i pafuqishëm sepse nuk ka asgjë që mund të bëj. Kam adrenalinë dhe dëshirë për ta ndihmuar ekipin, por tani për tani vetëm po e shikoj”.

Ai tregoi gjithashtu se nuk e ka aspak të lehtë të shohë reagimet e futbollistëve pas këtyre rezultateve.

“Kur i shoh emocionet dhe zhgënjimin e djemve, nuk është e lehtë. U thashë të qëndrojnë të fortë — do ta kalojnë edhe këtë situatë”.

Suarez u ndal edhe te puna e përzgjedhësit Marcelo Bielsa, duke nënvizuar se çdo trajner ka qasjen e vet në drejtimin e skuadrës.

“Puna e Bielsas? Çdo trajner ka stilin e tij. Tani është e rëndësishme të luajmë sa më mirë kundër Spanjës. Nuk do të doja që gjithçka të vendosej në një ndeshje të vetme, por kjo është situata”, shtoi ai.

Deri tani, Uruguai nuk ka arritur ende të marrë një fitore në këtë Botëror, pasi ka barazuar 1-1 me Arabinë Saudite dhe 2-2 me Kepin e Gjelbër.

Në ndeshjen e tretë, e cila do të jetë vendimtare për fazën e grupeve, uruguaianët do të luajnë ndaj Spanjës, në një përballje që mund të vendosë fatin e tyre në këtë turne.

The post Luis Suarez flet me zhgënjim për formën e Uruguait: “Ndihem i pafuqishëm, sepse nuk mund të bëj asgjë” appeared first on Albeu.com.