Gola të rrallë, kthesa të pabesueshme në rezultat, fitore të vulosura në çastet e fundit dhe rezultate që pak kush mund t’i kishte parashikuar kanë shoqëruar deri tani Kupën e Botës 2026.

Tani që turneu po hyn në fazën e çerekfinaleve, po forcohet gjithnjë e më shumë diskutimi nëse ky është Botërori më i mirë i zhvilluar ndonjëherë.

Ky është edicioni i parë me 48 përfaqësuese dhe zhvillohet në Shtetet e Bashkuara të Amerikës, Kanada dhe Meksikë. Përmasat e tij kanë vendosur rekord, por edhe shifrat në fushë tregojnë se mund të kemi të bëjmë me një nga turnetë më tërheqës të historisë.

Shumë gola dhe ritëm sulmues

Në 96 nga 104 ndeshjet e planifikuara janë realizuar 280 gola, që do të thotë një mesatare prej 2.92 golash për takim.

Kjo përbën mesataren më të lartë në një Kupë Bote që prej Botërorit të vitit 1970 në Meksikë, i cili kishte 2.97 gola për ndeshje.

Krahasuar me edicionet e fundit, shifrat janë këto:

Katar 2022 – 2.69 gola për ndeshje

Rusia 2018 – 2.64

Brazili 2014 – 2.67

Afrika e Jugut 2010 – 2.27

Ndeshja që ka prodhuar më shumë gola deri tani është triumfi 7-1 i Gjermanisë ndaj Curaçaos. Përveç saj, shtatë sfida të tjera kanë nxjerrë nga gjashtë gola, ndërsa 13 përballje janë mbyllur me pesë gola.

Një tjetër element që nxjerr në pah lojën sulmuese është fakti se 74.6% e golave kanë ardhur nga aksioni i hapur. Vetëm 5% janë shënuar nga pika e bardhë, përqindja më e ulët ndonjëherë në historinë e Kupës së Botës.

Vendime në fund dhe përmbysje të mëdha

As ndeshjet me eliminim direkt nuk kanë munguar në dramë. Nga 24 duelet e kësaj faze, tetë janë zgjidhur me gol pas minutës së 85-të, ndërsa katër përballje kanë shkuar deri te penalltitë.

Goli i fitores që Enzo Fernandez shënoi ndaj Egjiptit ishte edhe goli i 10-të vendimtar i realizuar pas minutës së 90-të, një shifër rekord për një Kupë Bote.

Vetëm gjatë muajit korrik janë luajtur disa takime që tashmë po konsiderohen klasike.

Belgjika ktheu gjithçka ndaj Senegalit dhe fitoi 3-2.

Argjentina përmbysi Egjiptin dhe e mbylli ndeshjen me sukses 3-2.

Anglia mundi Meksikën 3-2, ndonëse luajti rreth 40 minuta me një lojtar më pak pas përjashtimit të Jarell Quansah.

Në veçanti, Belgjika dhe Argjentina arritën të rikuperonin një disavantazh prej dy golash, diçka që nuk kishte ndodhur më shumë se një herë në të njëjtin Botëror që nga viti 1970.

Edhe 0-0 kanë peshën e tyre

Turneu ka sjellë edhe tetë barazime pa gola, një rekord i ri në historinë e Kupës së Botës.

Megjithatë, shumë analistë nuk e lexojnë këtë si mungesë emocionesh, por si provë të balancës më të madhe mes ekipeve kombëtare.

Tribuna të mbushura dhe rivalitet i fortë mes yjeve

Edhe pse ka pasur kritika të vazhdueshme për çmimet e larta të biletave dhe shpenzimet e udhëtimit, stadiumet janë mbushur nga tifozët.

Sipas FIFA-s, janë zënë 99.7% e vendeve të disponueshme. Deri tani, turneu ka tërhequr mbi 6.2 milionë spektatorë, me një mesatare prej më shumë se 65 mijë tifozësh për ndeshje.

Në fushë, protagonistë kanë qenë edhe emrat më të mëdhenj të futbollit botëror.

Gara për Këpucën e Artë po konsiderohet një nga më të fortat që është parë ndonjëherë:

Lionel Messi – 8 gola

Kylian Mbappe – 7 gola

Erling Haaland – 7 gola

Harry Kane – 6 gola

Për herë të parë në historinë e Botërorit, tre lojtarë kanë arritur të shënojnë të paktën shtatë gola në të njëjtin turne.

Kombëtaret modeste kanë lënë gjurmë

Zgjerimi në 48 skuadra kishte ngritur dyshime se do të prodhonte shumë ndeshje të pabalancuara, por disa nga rrëfimet më të bukura të këtij edicioni kanë ardhur pikërisht nga ekipet më të vogla.

Curaçao, shteti më i vogël që është kualifikuar ndonjëherë në një Kupë Bote, reagoi pas humbjes 7-1 ndaj Gjermanisë duke marrë një barazim kundër Ekuadorit.

Katari, edhe pse u mund 6-0 nga Kanadaja, arriti të ndalte Zvicrën me një barazim 1-1.

Nga surprizat më të mëdha të turneut ka qenë edhe Kepi i Gjelbër.

Me portierin 40-vjeçar Vozinha, përfaqësuesja afrikane barazoi me Spanjën, Uruguain dhe Arabinë Saudite për të kaluar fazën e grupeve. Më pas, në 1/16 e finales, i hapi shumë punë Argjentinës dhe u eliminua vetëm pas kohës shtesë me rezultatin 3-2.

Jo pa polemika

Pavarësisht ecurisë së suksesshme në aspektin sportiv, turneu është shoqëruar edhe me debate. Tifozët kanë renditur si kritikat kryesore çmimet e larta të biletave, hoteleve dhe transportit.

Në disa stadiume janë kundërshtuar edhe ndërprerjet për hidratim, sidomos në rastet kur ndeshjet janë zhvilluar në ambiente me çati të mbyllur ose me ajër të kondicionuar.

Po ashtu, janë ngritur shqetësime për ngarkesën fizike të futbollistëve, duke pasur parasysh se sezoni i ri i Ligës Premier nis vetëm një muaj pas finales së Botërorit.

Çështja Balogun hapi debat të madh

Një nga episodet që ka shkaktuar më shumë diskutime ka qenë ai i sulmuesit amerikan Folarin Balogun.

Pasi u ndëshkua me karton të kuq ndaj Bosnje dhe Hercegovinës, Balogun mori leje të luante në takimin e radhës kundër Belgjikës, sepse FIFA pezulloi dënimin duke u mbështetur në nenin 27 të Kodit Disiplinor.

Ky vendim u sulmua ashpër nga UEFA, Belgjika dhe trajneri i Anglisë, Thomas Tuchel. Ndërkohë, mediat raportuan se presidenti amerikan Donald Trump kishte zhvilluar një bisedë telefonike me presidentin e FIFA-s, Gianni Infantino, për këtë çështje.

Pavarësisht polemikave, për FIFA-n ky mund të konsiderohet një nga Botërorët më të suksesshëm të organizuar ndonjëherë.

Spektakli në fushë, stadiumet e mbushura, atmosfera elektrizuese dhe prania e yjeve më të mëdhenj të futbollit kanë krijuar një turne që tashmë po krahasohet me edicionet më të mira në histori.

Me Argjentinën, Spanjën, Francën dhe Anglinë ende në garë dhe të vendosura në çerekfinale të ndryshme, pjesa përmbyllëse e turneut premton edhe më shumë emocione.

Nëse ndeshjet që kanë mbetur do të ruajnë të njëjtin nivel spektakli, Botërori 2026 mund të mbetet përgjithmonë në histori si edicioni më i mirë i zhvilluar ndonjëherë.

The post Botërori 2026 thyen rekorde, sjell surpriza dhe ndez debatin: a po shohim edicionin më spektakolar ndonjëherë? appeared first on Albeu.com.

Menjëherë pas sfidës së humbur 3-2 ndaj Anglisë në fazën e 1/16 së finales së Botërorit, sulmuesi i Meksikës Santiago Gimenez u dërgua me urgjencë në spital për shkak të një dëmtimi të rëndë në kyçin e këmbës.

Futbollisti u hodh në fushë si zëvendësues në minutat e fundit, në kohën kur Meksika po përpiqej të gjente golin e barazimit për ta çuar ndeshjen në vazhdime.

Por në minutën e 98-të, sulmuesi i Milanit u ul në mënyrë të pafat mbi kyçin e këmbës gjatë ndjekjes së një topi. Ai përfundoi menjëherë në tokë dhe shpërtheu në britma nga dhimbja.

Në fillim tentoi të largohej duke çaluar nga fusha, por më pas u transportua për në spital, ndërsa në ‘Estadio Azteca’ lojtarët e Anglisë po festonin kualifikimin.

Si pasojë e këtij dëmtimi, Meksika i luajti minutat e fundit me 10 lojtarë. Në të njëjtën situatë ishte edhe Anglia, që mbeti me një futbollist më pak pasi Jarell Quansah u ndëshkua me karton të kuq direkt në minutën e 54-të, kur anglezët kryesonin 2-1.

Gazetari meksikan Ruben Rodriguez ka bërë të ditur se kontrollet mjekësore kanë konfirmuar një ndrydhje të shkallës së dytë në kyçin e këmbës për Gimenez, ndërsa mungesa e tij pritet të zgjasë rreth tetë javë.

Problemet fizike nuk munguan as te skuadra e drejtuar nga Thomas Tuchel, madje në rrethana të pazakonta.

Pas ndeshjes, gjatë festimeve, mesfushori Jordan Henderson humbi ekuilibrin teksa po kalonte mbi një tabelë reklamuese dhe u rrëzua duke rënë direkt mbi kyçin e dorës.

Lojtari i Brentford po i nënshtrohet ekzaminimeve mjekësore, ndërsa Tuchel është shprehur se dëmtimi i tij “duket vërtet shumë i rëndë”.

The post Santiago Gimenez përfundon me urgjencë në spital pas humbjes së Meksikës ndaj Anglisë appeared first on Albeu.com.

Gilberto Mora, i cili prej kohësh është përfolur për një kalim te Liverpooli, tani mund të përfundojë te një tjetër gjigant i Ligës Premier, pasi edhe Arsenali është futur fuqishëm në garë për të.

Në ditët e fundit, media të ndryshme kanë raportuar se Liverpooli ka shtuar interesimin për mesfushorin 17-vjeçar, ndërsa disa burime kanë shkuar edhe më tej duke pretenduar se “Të Kuqtë” ishin të gatshëm të përshpejtonin bisedimet për ta transferuar.

Por projekti i klubit nga “Anfield” mund të hasë në një rival të fortë.

Sipas CaughtOffside, Arsenali tashmë i është bashkuar garës dhe duket i vendosur të bëjë maksimumin për të siguruar një nga talentet më premtues të futbollit meksikan.

Raportimet tregojnë se londinezët janë të përgatitur të paraqesin një ofertë më të mirë se ajo që Liverpooli i ka dorëzuar tashmë Club Tijuana, klubit ku aktivizohet Mora.

Nuk janë bërë publike shumë hollësi për vlerën e ofertës, por dihet se Gilberto Mora është i lidhur me Tijuanan me kontratë deri në vitin 2029 dhe se marrëveshja e tij përfshin një klauzolë lirimi prej 25 milionë eurosh.

I rritur në akademinë e “Xolos”, ai u ngjit në ekipin e parë në verën e vitit 2024 dhe prej atij momenti ka spikatur me paraqitjet e tij.

Deri më tani, mesfushori ka regjistruar 53 ndeshje zyrtare, ka shënuar 10 gola dhe ka dhënë dy asistime.

Forma e tij e mirë i ka siguruar gjithashtu vend edhe te Kombëtarja e Meksikës, me të cilën ka zhvilluar deri tani 12 ndeshje ndërkombëtare.

Me Arsenalin dhe Liverpoolin që po e ndjekin nga afër, e ardhmja e Gilberto Morës pritet të kthehet në një nga çështjet më interesante të afatit kalimtar, pasi dy nga klubet më të mëdha angleze po përplasen për firmën e një prej talenteve më të mëdhenj të brezit të ri.

The post Arsenali hyn në garë me Liverpoolin për Gilberto Morën, londinezët synojnë ta rrëmbejnë talentin meksikan appeared first on Albeu.com.

Ndërsa Kupa e Botës 2026 vijon ende, deri në këtë pikë 13 përzgjedhës kanë humbur vendin e punës. Shkaqet kanë qenë të ndryshme: disa janë shkarkuar menjëherë pas një ndeshjeje, të tjerë janë larguar pas eliminimit, ndërsa në disa raste pesha nuk ka ardhur vetëm nga rezultatet, por edhe nga klima e krijuar rreth skuadrës.

Ja cilët janë trajnerët që janë ndarë deri tani nga kombëtaret e tyre në Botërorin 2026, që po zhvillohet në Shtetet e Bashkuara të Amerikës, Kanada dhe Meksikë.

Roberto Martinez (Portugali)

Pas disfatës 1-0 kundër Spanjës në fazën e 1/8-tës, Roberto Martinez bëri të ditur largimin nga stoli i Portugalisë. Ai tha se kishte ardhur me objektivin për të fituar Kupën e Botës dhe se, pa e arritur këtë, nuk kishte kuptim të vijonte. Kështu u mbyll periudha e tij trevjeçare e gjysmë, ku veçohet fitimi i Ligës së Kombeve 2025 dhe dy kualifikime në çerekfinale, por pa shkuar në asnjë finale në pesë turne madhorë si trajner.

Sabri Lamouchi, Herve Renard (Tunizi)

Botërori i Tunizisë u shndërrua në një rrëmujë të plotë. Sabri Lamouchi u largua nga detyra pas humbjes 5-1 përballë Suedisë. Në vendin e tij erdhi Herve Renard, por as ai nuk mundi të përmbysë situatën, pasi skuadra u mund edhe nga Japonia dhe Holanda. Me përfundimin e aventurës së Tunizisë, edhe Renard zgjodhi të largohej.

Javier Aguirre (Meksikë)

Mandati i Javier Aguirre përfundoi pas humbjes 3-2 ndaj Anglisë në fazën e 1/8-tës. Largimi i tij ishte parashikuar më herët, teksa Rafael Marquez ishte bërë gati për ta pasuar. Aguirre u nda me kombëtaren me ndjenjë krenarie, pasi e drejtoi Meksikën drejt paraqitjes së saj më të mirë në Kupën e Botës pas shumë vitesh.

Steve Clarke (Skoci)

Menjëherë pasi Skocia u eliminua në fazën e grupeve, Steve Clarke paraqiti dorëheqjen, edhe pse vetëm pak javë më parë kishte zgjatur kontratën. Ai largohet si tekniku më i suksesshëm i epokës moderne të futbollit skocez, duke rikthyer përfaqësuesen në Kampionatin Evropian dhe në Kupën e Botës pas dekadash mungese.

Hong Myung-bo (Koreja e Jugut)

Për Hong Myung-bo, aventura mori fund pas daljes në fazën e grupeve. Përtej rezultateve jo bindëse, ai hasi edhe kritika të forta publike dhe kërcënime, ndërsa emërimi i tij kishte qenë i diskutueshëm që në nisje.

Ronald Koeman (Holandë)

Eliminimi nga Maroku me penallti solli fundin e qëndrimit të Ronald Koeman. Fillimisht ai mbrojti vendimet e veta taktike, por të nesërmen vendosi të japë dorëheqjen. Tekniku holandez pranoi zhgënjimin për dështimin në Botëror dhe theksoi se kishte ardhur momenti për ta mbyllur mandatin.

Carlos Queiroz (Gana)

Carlos Queiroz mori drejtimin e Ganës vetëm disa muaj përpara Kupës së Botës dhe arriti ta çojë ekipin në fazën eliminatore për herë të parë që nga viti 2010. Sidoqoftë, pas humbjes me Kolumbinë në 1/16-tën e finales, portugezi njoftoi se po largohej, duke kërkuar më tepër investime për zhvillimin e futbollit në vend.

Sebastian Beccacece (Ekuador)

Pas humbjes ndaj Meksikës në fazën e 1/16-tës, Sebastian Beccacece u largua me mbylljen e kontratës së tij. Argjentinasi e la skuadrën pasi e kishte kualifikuar në Botëror dhe e kishte çuar në raundin eliminator për herë të parë në 20 vjet.

Miroslav Koubek (Çeki)

Pas përfundimit të Çekisë në vendin e fundit të grupit, Miroslav Koubek u nda nga kombëtarja. Sipas vetë trajnerit, vendimi u ndikua edhe nga klima e krijuar nga mediat, pavarësisht faktit se ai e kishte rikthyer ekipin në Kupën e Botës pas dy dekadash.

Marcelo Bielsa (Uruguai)

Dihej paraprakisht se Marcelo Bielsa do të largohej pas Botërorit, por eliminimi i shpejtë dhe konfliktet me lojtarët e bënë fundin e tij edhe më të hidhur. Argjentinasi e pranoi se nuk arriti të sillte rezultatet që priteshin prej tij.

Jamal Sellami (Jordani)

Jamal Sellami e çoi Jordaninë në Kupën e parë të Botës në historinë e saj dhe mori gjithashtu shtetësinë jordaneze. Megjithatë, pas tre humbjeve në fazën e grupeve, ai vendosi të largohej, duke mbyllur një periudhë historike për futbollin e vendit.

Julian Nagelsmann (Gjermani)

Pas eliminimit të Gjermanisë nga Paraguai me penallti, Julian Nagelsmann njoftoi dorëheqjen, ndonëse mediat gjermane raportuan se në të vërtetë bëhej fjalë për një shkarkim të kamufluar. Pas afro tre vitesh në krye të përfaqësueses, ai largohet, ndërsa si pasues pritet Jurgen Klopp.

Trajnerët që mund të largohen së shpejti

Kjo listë mund të zgjatet në një kohë shumë të shkurtër. Hugo Broos ka sinjalizuar dorëheqjen pas eliminimit të Afrikës së Jugut, Zlatko Daliç duket pranë fundit të ciklit të tij me Kroacinë, ndërsa Vladimir Petkoviç ndodhet nën presion të fortë në Algjeri dhe largimi i tij shihet vetëm si çështje kohe.

The post Botërori 2026 ka sjellë deri tani 13 largime trajnerësh, Roberto Martinez mbyll listën e fundit appeared first on Albeu.com.

Pas triumfit 3-2 të Anglisë ndaj Meksikës në Kupën e Botës, mbrojtësi John Stones dhuroi një skenë komike në dhomën e zhveshjes, ku në qendër të shakasë së tij ishte trajneri Thomas Tuchel.

Ish-lojtari i Manchester Cityt u shtir sikur kishte pësuar një dëmtim në shpatull, duke e mbajtur me siklet dhe duke alarmuar për pak çaste teknikun gjerman.

Më pas, Stones e ndërpreu aktrimin dhe nisi të kërcejë me lëvizje plot energji, çka bëri që e gjithë dhoma, përfshirë edhe Tuchelin, të shpërthente në të qeshura.

Ky episod argëtues është bërë viral, duke tërhequr vëmendje për frymën pozitive dhe atmosferën e shëndetshme të batutave brenda kombëtares angleze.

Ndërkohë, Anglia e ka prerë tashmë biletën për në çerekfinale, ku e pret përballja me Norvegjinë.

Skuadra që do të dalë fituese nga ky duel do të ndeshet më pas me fituesin e çifteve Argjentinë-Egjipt dhe Zvicër-Kolumbi.

The post John Stones vë në lojë Tuchelin me një dëmtim të shtirur pas suksesit ndaj Meksikës dhe më pas shpërthen në vallëzim appeared first on Albeu.com.

Pas fitores dramatike 3-2 të Kombëtares së Anglisë ndaj Kombëtares së Meksikës në raundin e 1/16 të Kupës së Botës 2026, më shumë se gjithçka tjetër pas ndeshjes tërhoqi vëmendje aktiviteti i tyre në rrjetet sociale.

Faqja zyrtare e përfaqësueses angleze u kthye në fenomen viral për shkak të një kombinimi humoristik postimesh, të publikuara menjëherë pas suksesit ndaj Meksikës.

Fillimisht, administruesit e faqes postuan mesazhin “Natën e mirë, tifozë të Anglisë!”, por vetëm dy minuta më vonë i habitën sërish ndjekësit me një tjetër publikim: “Mirëmëngjes, tifozë të Anglisë!”.

Ndryshimi i menjëhershëm nxiti reagime të shumta në rrjetet sociale, ku tifozët e shndërruan episodin në batutë, duke komentuar se stafi i mediave sociale “nuk pati as kohë të flejë” dhe duke ironizuar me shprehje si “dielli nuk perëndon kurrë për Anglinë”.

Episodi u përhap gjerësisht si një shembull tipik i humorit dhe banter-it që shoqëron futbollin modern në rrjetet sociale, duke u kthyer në një nga momentet më të diskutuara pas sfidës.

The post “Natën e mirë” dhe menjëherë “Mirëmëngjes”/ Postimi që bëri virale Anglinë pas triumfit në Kupën e Botës 2026 appeared first on Albeu.com.

Fitorja historike 3-2 e Anglisë ndaj Meksikës, që i siguroi kombëtares kualifikimin në çerekfinale të Kupës së Botës, u shoqërua në fund me shqetësim për Jordan Henderson.

Edhe pse mesfushori 36-vjeçar nuk u aktivizua fare në ndeshje, ai tërhoqi vëmendjen fillimisht kur u ndëshkua me karton të verdhë si zëvendësues, pas një incidenti pranë vijës anësore gjatë nxehjes.

Por ngjarja më serioze ndodhi sapo përfundoi takimi. Gjatë festës me shokët e skuadrës, Henderson u rrëzua mbi një tabelë reklamuese dhe dyshohet se dëmtoi kyçin e dorës.

Ai mori ndihmën e parë në fushë, iu vendos oksigjen dhe më pas u transportua me barelë drejt spitalit për kontrolle të tjera.

Pas sfidës, trajneri Thomas Tuchel bëri të ditur se Henderson ishte dërguar në spital.

“Jordan e lëndoi kyçin e dorës. Thjesht nuk i përshtatet kësaj mbrëmjeje fakti që Jordani nuk është me ne”.

“Nuk e di procedurën. Mjeku më tha se ai ndodhet në spital”, deklaroi Tuchel.

Për gjendjen e bashkëlojtarit folën edhe Jude Bellingham dhe Harry Kane.

“Ka një problem të vogël”, u shpreh Bellingham.

“Hendo thjesht u rrëzua atje. Besoj se është mirë. Ka të bëjë me krahun e tij”, tha Kane.

Deri tani nuk ka asnjë përditësim zyrtar nga stafi mjekësor i Anglisë, por ekziston frika se Henderson mund të mungojë në çerekfinalen kundër Norvegjisë, madje edhe në pjesën e mbetur të Kupës së Botës./

The post Jordan Henderson përfundon në spital pas festës së golit, ndonëse nuk luajti asnjë minutë appeared first on Albeu.com.

Meksika nuk arriti të marrë një biletë për në çerekfinale të Kupës së Botës, pasi u ndal nga Anglia me rezultatin 3-2 në një përballje dramatike të fazës me eliminim direkt.

Në përfundim të ndeshjes, trajneri i Meksikës, Javier Aguirre, doli në mbrojtje të skuadrës së tij dhe vlerësoi angazhimin maksimal të futbollistëve ndaj një rivali tejet të fortë.

“Nuk kam asgjë për t’u thënë lojtarëve të mi, ata dhanë gjithçka”.

“Ky është futbolli. Ata (Anglia) janë një ekip i madh. Ne bëmë atë që mundëm”, deklaroi Aguirre.

Ekipi meksikan luftoi deri në çastet e fundit dhe provoi të rikthehej në lojë, por nuk ia doli të shmangte eliminimin, edhe pse zhvilloi një paraqitje të mirë përpara tifozëve të vet.

Falë këtij suksesi, Anglia preu biletën për në çerekfinale të Kupës së Botës, aty ku do të ndeshet me Norvegjinë, ndërsa për Meksikën aventura në këtë turne u mbyll me kokën lart./

The post Javier Aguirre pas humbjes me Anglinë: Lojtarët e mi lanë gjithçka në fushë appeared first on Albeu.com.

Takimi i shumëpritur mes Meksikës dhe Anglisë në 1/8-at e Kupës së Botës 2026 është vënë në pikëpyetje për shkak të motit të keq.

Sky Sports raportoi se vetëm disa orë përpara nisjes së sfidës është shtuar ndjeshëm rreziku për stuhi dhe goditje rrufesh pranë stadiumit “Estadio Azteca” në Mexico City, ndërsa parashikimet flasin për një mundësi prej 92 për qind.

Më herët, FIFA kishte marrë në konsideratë mundësinë që ndeshja të luhej gjashtë orë më parë për shkak të kushteve atmosferike, por ky opsion u rrëzua për arsye logjistike.

Në këto kushte, ndryshimi i orarit të fillimit nuk është më i mundur, pasi përballja është caktuar të nisë në orën 18:00 me kohën lokale në Mexico City.

Sidoqoftë, në rast se gjatë ndeshjes regjistrohen goditje rrufesh brenda perimetrit të sigurisë të vendosur nga organizatorët, sipas protokollit të FIFA-s takimi mund të ndërpritet ose të shtyhet për 30 minuta.

Tani mbetet për t’u parë nëse moti do të lejojë zhvillimin normal të sfidës, apo nëse organizatorët do të detyrohen të ndërhyjnë për çështje sigurie.

Nëse jo, është paraparë që ndeshja të nisë të hënën nga ora 2 të mëngjesit.

The post Rrufe dhe stuhi kërcënojnë duelin Meksikë – Angli, ndeshja mund të shtyhet appeared first on Albeu.com.

Përpara sfidës së 1/8 së finales së Kupës së Botës ndaj Meksikës, Harry Kane vazhdon të jetë në qendër të vëmendjes.

Javier Aguirre, trajneri i përfaqësueses meksikane, ka shprehur vlerësim të madh për sulmuesin e Bayern Munich, duke e konsideruar atë një futbollist të nivelit më të lartë.

Duke folur për kapitenin anglez, Aguirre tha: “Harry Kane është një ikonë globale. Golat që ka shënuar për Tottenhamin, Bayernin apo për kombëtaren janë të një futbollisti të klasit botëror”.

Më tej, tekniku meksikan shtoi: “Ai është 1.88 metra i gjatë dhe, pavarësisht shtatlartësisë, ka teknikë të jashtëzakonshme. Është i fortë në ajër, ka gjithçka. Punon shumë, ndihmon në mbrojtje dhe është kapiten. Çfarë mund të shtoj më shumë për të?”.

Në të njëjtën kohë, Aguirre bëri të ditur edhe mënyrën se si Meksika synon ta frenojë sulmuesin anglez.

“Do të përpiqemi ta neutralizojmë, jo vetëm me qendërmbrojtësit, por edhe me mesfushën dhe me ndihmën e mbrojtësve anësorë”.

Ai sqaroi edhe më tej planin: “Duam të sigurohemi që ai të mos ndihet rehat në fushë kur zbret poshtë për të marrë topin. Ai duhet të ketë gjithmonë një kundërshtar pranë, në mënyrë që të mos krijojë asgjë”.

Anglia dhe Meksika do të përballen në 1/8 e finales së Kupës së Botës, ndërsa vëmendja pritet të përqendrohet sërish te Harry Kane, shpresa kryesore e “Tre Luanëve”.

The post Trajneri i Meksikës tregon strategjinë për të ndalur yllin e Anglisë: Harry Kane s’duhet lënë i lirë appeared first on Albeu.com.