Pas përfundimit të Kupës së Botës 2026, FIFA ka nxjerrë klasifikimin e përditësuar të kombëtareve, ku kampionia e botës, Spanja, është ngjitur zyrtarisht në vendin e parë. Suksesi në turne e ka çuar “La Rojan” në krye, ndërsa Argjentina ka kaluar në pozitën e dytë.

Spanja udhëheq renditjen botërore me 1995.88 pikë. Kampionët e botës rezultojnë gjithashtu përfituesit më të mëdhenj të këtij përditësimi, pasi kanë shtuar 121.17 pikë, më shumë se çdo përfaqësuese tjetër.

Pas dy vendeve të para, Franca pozicionohet e treta, Anglia renditet e katërta dhe Brazili mban vendin e pestë.

Një arritje historike ka regjistruar Maroku, i cili është ngjitur në pozitën e gjashtë, më e larta në historinë e tij. Në dhjetëshen e parë përfshihen gjithashtu Portugalia, Belgjika, Holanda dhe Meksika.

Të dhënat e publikuara nga FIFA tregojnë se Norvegjia ka realizuar avancimin më të madh në renditje, me një ngjitje prej 12 pozicionesh. Në kahun e kundërt, Tunizia ka shënuar rënien më të thellë, duke humbur 12 vende.

Sa u përket pikëve, dëmin më të madh e ka pësuar Panamaja. Kombëtarja ka humbur 60.74 pikë, duke qenë skuadra më e prekur në klasifikimin e ri.

Përditësimi evidenton efektin e rezultateve të Kupës së Botës 2026 në hierarkinë ndërkombëtare. Spanja është rikthyer në majën e futbollit botëror, ndërsa paraqitjet në turne u kanë mundësuar disa kombëtareve të shënojnë lëvizje historike.

The post Spanja merr kreun e FIFA-s pas Botërorit 2026, Maroku arrin pozicionin më të mirë historik appeared first on Albeu.com.

Antonio Conte, ish-trajneri i kombëtares italiane, ka ndarë një analizë të veçantë mbi edicionin e fundit të Kupës së Botës, duke veçuar emrat që e lanë të impresionuar gjatë turneut.

Ndërsa e gjithë bota fokusohej te figurat kryesore si Lionel Messi, Kylian Mbappe, Erling Haaland dhe Jude Bellingham, trajneri italian preferoi të nxirrte në pah tre futbollistë të tjerë, larg qendrës së vëmendjes, të cilët zhvilluan një turne të shkëlqyer sipas tij.

Conte vlerësoi lojtarët që arritën të dalloheshin me performancat e tyre, pavarësisht se nuk mbajnë të njëjtin renome si emrat më të famshëm të futbollit ndërkombëtar.

“Më pëlqeu Hassan, anësori egjiptian; Bouaddi, mesfushori maroken; dhe Oulai, mesfushori i Bregut të Fildishtë”, u shpreh Conte.

Këta tre futbollistë u renditën mes zbulimeve më tërheqëse të Kupës së Botës 2026, duke spikatur me energjinë, finesën teknike dhe peshën që patën në lojën e skuadrave të tyre kombëtare.

Një vlerësim i ardhur nga një trajner me bagazhin profesional të Contes pritet t’i fusë ata edhe më thellë në objektivat e klubeve elitare të Europës.

Teksa Kupa e Botës po kalon drejt fazave finale, paraqitjet e këtyre lojtarëve më pak të njohur mbeten një nga rrëfimet më frymëzuese të këtij edicioni, duke rikonfirmuar se skena më e madhe e futbollit global është vendi i përsosur për të parë të lindin yje të rinj.

The post Antonio Conte tregon lojtarët e panjohur që i bënë përshtypje në Botëror appeared first on Albeu.com.

Pavarësisht se Kampionati Botëror i vitit 2026 nuk ka nisur ende, gjashtë ekipe përfaqësuese kanë konfirmuar tashmë vendin e tyre në turneun pasues, që do të mbahet në vitin 2030.

Këto janë Spanja, Portugalia dhe Maroku si nikoqirët kryesorë, si dhe Argjentina, Uruguai dhe Paraguai, të cilat do të mirëpresin ndeshjet inauguruese të kompeticionit.

Për herë të parë në histori, formati i organizimit parashikon ndarjen e eventit mes gjashtë kombeve të vendosura në tre kontinente të ndryshme. Madje, FIFA po shqyrton mundësinë e rritjes së numrit të skuadrave pjesëmarrëse në 64.

Shumica dërrmuese e takimeve do të luhen në territorin e Spanjës, Portugalisë dhe Marokut, të cilat bartin peshën kryesore të mikpritjes së Kupës së Botës.

Si pjesë e përkujtimit të njëqindvjetorit të kompeticionit, organi drejtues i futbollit botëror ka vendosur që sfidat e para të turneut të zhvillohen në Amerikën e Jugut, konkretisht në Uruguai, Argjentinë dhe Paraguai.

Uruguait i është besuar një ndeshje për nder të rolit të saj si vendi që organizoi edicionin debutues të Botërorit në 1930, ndërsa Argjentina dhe Paraguai do të presin gjithashtu nga një takim në kuadrin e festimeve të këtij jubileu madhor.

Rrjedhimisht, falë statusit të tyre si shtete pritëse, gjashtë federatave u është akorduar një vend i garantuar në fazën finale të Kupës së Botës 2030, pa u kushtëzuar nga ecuria e tyre në ciklin kualifikues.

The post Gjashtë kombëtare sigurojnë biletën për Botërorin 2030, ndërsa edicioni 2026 ende nuk ka filluar appeared first on Albeu.com.

Franca ka prerë biletën për në gjysmëfinalen e Kupës së Botës, pasi mundi Marokun me rezultatin 2-0 në një përballje të fortë që mbeti e hapur deri në fund.

Skuadra e drejtuar nga Didier Deschamps hyri menjëherë me ritëm të lartë dhe ushtroi presion që në start. Që në minutën e katërt, “Gjelat” iu afruan avantazhit, por Bono u tregua vendimtar duke ndalur goditjen me kokë të Dayot Upamecanos.

Momenti më i rëndësishëm i pjesës së parë u regjistrua në minutën e 28-të, kur Franca fitoi një penallti pas ndërhyrjes së Noussair Mazraouit. Edhe pas kontrollit në VAR, vendimi mbeti në fuqi, por Bono arriti të kuptonte krahun e goditjes së Kylian Mbappes dhe priti tentativën e tij.

Francezët nuk e ndalën kërkimin për golin dhe në minutën e 45+2 Lucas Digne provoi nga larg, duke goditur traversën. Pavarësisht rasteve, 45 minutat e para u mbyllën me rrjeta të paprekura.

Në nisje të pjesës së dytë, Mbappe mori përsipër peshën e sulmit. Në minutën e 60-të, ai realizoi me një goditje nga distanca, duke e dërguar topin pranë shtyllës së djathtë dhe duke i dhënë Francës epërsinë 1-0.

Maroku u përpoq të kthente ndeshjen dhe iu afrua barazimit me Neil El Aynaoui, i cili pas një goditjeje nga këndi të Achraf Hakimit goditi me kokë, por topi përfundoi fare pranë shtyllës.

Goli i dytë erdhi në minutën e 66-të, kur Franca vulosi suksesin. Mbappe shërbeu për Ousmane Dembelen, ndërsa ky i fundit nga skaji i zonës goditi drejt portës dhe e dërgoi topin në këndin e poshtëm të djathtë për 2-0.

Në minutën e 77-të, Mbappe u largua i dëmtuar nga fusha dhe vendin e tij e mori Jean-Philippe Mateta. Sulmuesi i futur në lojë pati një rast shumë të mirë në minutën e 88-të, por nga vija e portës e dërgoi topin me kokë mbi traversë.

Deri në vërshëllimën përfundimtare, Franca e ruajti me qetësi avantazhin dhe siguroi një fitore të rëndësishme, duke avancuar në gjysmëfinalen e Kupës së Botës.

The post Franca kalon në gjysmëfinalen e Kupës së Botës, Mbappe dhe Dembele mposhtin Marokun appeared first on Albeu.com.

Franca ka kaluar në avantazh 1-0 përballë Marokut në çerekfinalen e Kupës së Botës 2026, pasi Kylian Mbappe gjeti rrugën e rrjetës në pjesën e dytë.

Goli i sulmuesit francez erdhi në minutën e 60-të, kur ai goditi fuqishëm nga distanca dhe e çoi topin pranë shtyllës së djathtë, pa i lënë mundësi Bono-s të ndërhynte.

Kështu, Mbappe reagoi në mënyrën më të mirë pas episodit të pjesës së parë, kur humbi një penallti që u ndal me sukses nga Bono.

Pas këtij realizimi, francezët kanë marrë epërsinë në një përballje shumë të fortë dhe tani janë më afër kualifikimit në gjysmëfinalen e Kupës së Botës.//

The post Mbappe shënon supergol, Franca merr avantazhin ndaj Marokut appeared first on Albeu.com.

Pas 45 minutave të para, Franca nuk arriti të ndryshojë rezultatin ndaj Marokut, edhe pse kontrolloi lojën dhe ishte skuadra më kërcënuese në fushë.

“Gjelat” hynë fuqishëm në ndeshje dhe shumë shpejt rrezikuan portën kundërshtare. Në minutën e katërt, Dayot Upamecano u gjend mirë në zonë pas një krosimi, por goditja e tij me kokë u neutralizua nga Bono me një pritje të shkëlqyer.

Rasti më i rëndësishëm i pjesës së parë u regjistrua në minutën e 28-të, kur Franca fitoi penallti pas ndërhyrjes së Noussair Mazraoui. Vendimi i gjyqtarit Facundo Tello mbeti në fuqi edhe pas verifikimit të episodit në VAR.

Megjithatë, Kylian Mbappe nuk mundi ta shndërronte në gol këtë mundësi, sepse Bono e kuptoi drejtimin e goditjes së tij në këndin e poshtëm të djathtë dhe priti penalltinë.

Franca vijoi të ushtrojë presion dhe në minutën e 35-të Desire Doue depërtoi në zonë pas një veprimi individual, por edhe përpjekja e tij u ndal nga gardiani maroken.

Në minutat shtesë të pjesës së parë, Lucas Digne iu afrua shumë një goli të bukur nga larg, por tentativa e tij e fortë përfundoi në traversë.

Maroku e mbajti portën të paprekur falë Bonos, i cili ishte figura qendrore e pjesës së parë, ndërsa Franca mbetet në kërkim të golit në fraksionin e dytë për ta shndërruar epërsinë në rezultat.

The post Bono ndal Mbappen nga pika e bardhë, Franca e mbyll pa gol pjesën e parë pavarësisht epërsisë appeared first on Albeu.com.

Janë bërë publike formacionet zyrtare të ndeshjes së madhe çerekfinale të Kupës së Botës mes Francës dhe Marokut, sfidë nga e cila do të dalë skuadra që siguron biletën për në gjysmëfinale.

Franca do ta nisë takimin me Mike Maignan në portë. Në prapavijë janë aktivizuar Jules Koundé, Dayot Upamecano, William Saliba dhe Lucas Digne, ndërsa në mesin e fushës Didier Deschamps ka vendosur Manu Koné dhe Adrien Rabiot.

Në fazën sulmuese, “Gjelat” do të paraqiten me Ousmane Dembélé, Michael Olise, Désiré Doué dhe Kylian Mbappé, me këtë të fundit që pritet të jetë referenca kryesore e ofensivës franceze.

Nga ana tjetër, Maroku e nis ndeshjen me Yassine Bounou mes shtyllave. Katërshja mbrojtëse përbëhet nga Achraf Hakimi, Issa, Noussair Mazraoui dhe Zakaria Salah-Eddine.

Në mesfushë do të jenë Bouaddi, Neil El Aynaoui dhe Azzedine Ounahi, ndërsa në repartin e avancuar Mohamed Ouahbi ka përzgjedhur Brahim Díaz, Bilal El Khannouss dhe Eliesse Ben Seghir Talbi.

Franca futet në këtë duel si një nga ekipet favorite të kompeticionit, megjithatë Maroku ka dëshmuar deri tani se ka kapacitetin të vërë në vështirësi çdo rival. Skuadra që triumfon në këtë takim do të kalojë në gjysmëfinalen e Kupës së Botës.

Franca: Maignan; Koundé, Upamecano, Saliba, Digne; Koné, Rabiot; Dembélé, Olise, Doué; Mbappé.

Maroku: Bounou; Hakimi, Issa, Mazraoui, Salah-Eddine; Bouaddi, El Aynaoui, Ounahi; Brahim, El Khannouss, Talbi.

The post Zbulohen 11-shet zyrtare të Francës dhe Marokut për duelin që vendos gjysmëfinalistin appeared first on Albeu.com.

Mohamed Ouahbi nuk ka kaluar nëpër itinerarin e zakonshëm që të çon te drejtimi i një kombëtareje në Kupën e Botës. Ai nuk ka qenë futbollist dhe nuk e ka ngritur emrin e tij duke fituar trofe në majat e futbollit.

Për shumë vite të jetës së tij, Ouahbi punoi si mësues i edukimit fizik. Në një shkollë të Brukselit, ai u jepte mësim fëmijëve të moshës gjashtë deri në dymbëdhjetë vjeç. Sapo përfundonte orët e mësimit, ai linte klasën dhe shkonte në fushën stërvitore, ku vazhdonte të merrej me atë që e pasiononte më shumë.

Kështu mori jetë rrëfimi i “Trajnerit Momo”, njeriut që tashmë do të drejtojë Marokun ndaj Francës, në duelin ku vendoset një vend në gjysmëfinalen e Kupës së Botës.

Ouahbi ka lindur 49 vjet më parë në Bruksel, në një familje me prejardhje marokene, dhe kontaktin me futbollin e pati që në fëmijëri.

Ai e përjetoi nga afër Kupën e Botës 1986, turne në të cilin “Luanët e Atlasit” mbërritën për herë të parë në raundin e 16 më të mirave.

Ajo skuadër kombëtare i krijoi një ndjesi përkatësie që mbeti e fortë ndër vite, edhe pse jeta dhe formimi i tij, si në aspektin personal ashtu edhe profesional, u zhvilluan në Belgjikë.

Nga klasa te stoli i Kupës së Botës

Kur ishte vetëm 21 vjeç, Ouahbi hodhi hapat e parë si trajner te Maccabi Brussels. Ishte nisja e një rruge të qetë, por të qëndrueshme, e cila mori një kthesë të rëndësishme në vitin 2003, kur ai u kontaktua nga Anderlecht.

Te klubi belg, ai mori në dorë ekipin U9 në Neerpede dhe më pas qëndroi plot 17 vjet në akademinë e Anderlechtit.

Me kalimin e kohës, ai avancoi gradualisht në hierarkinë e klubit, derisa u bë një nga figurat më të vlerësuara të akademisë. Në disa periudha, ai punoi edhe si ndihmës-trajner i ekipit të parë, përkrah legjendës shqiptare, Bensik Hasi.

Nëpër procesin e tij të punës kanë kaluar disa prej talenteve më të spikatura të futbollit belg të dy dekadave të fundit.

Mes futbollistëve që janë zhvilluar nën metodën e tij përmenden Romelu Lukaku, Youri Tielemans, Jérémy Doku dhe Dodi Lukebakio.

Stërviti edhe çiklistin e famshëm, ndërsa zbulon edhe rëndësinë e shkollimit për lojtarët

Nën drejtimin e Ouahbit është stërvitur edhe Remco Evenepoel, përpara se të linte futbollin dhe të shndërrohej në një nga çiklistët më të mirë në botë.

“E kishim Remcon te Anderlecht deri në nivelin U19”, kujtoi vetë Ouahbi disa muaj më parë.

Trajneri maroken ka vënë vazhdimisht në dukje peshën që ka arsimi në formimin e një futbollisti, duke e lidhur disiplinën në shkollë me arritjet në sport.

“Kur isha në akademinë e të rinjve të Anderlechtit, e kuptuam se lojtarët që arrinin në ekipin e parë ishin ata që kishin diplomë të shkollës së mesme. Sot, futbolli është shumë i strukturuar. Lojtarët kanë nevojë për disiplinë dhe arsimi i ndihmon shumë në këtë drejtim”, ka shpjeguar Ouahbi.

Kjo ishte një filozofi që ai e kishte ushtruar për vite të tëra në klasë dhe që më vonë e transferoi edhe në dhomën e zhveshjes.

Telefonata që i ndryshoi jetën

Pas një eksperience të shkurtër në Arabinë Saudite, ku bashkëpunoi me Yannick Ferreira te Al-Fateh, erdhi thirrja që do t’i kthente kahun karrierës.

Në vitin 2022, presidenti i Federatës Marokene të Futbollit, Fouzi Lekjaa, vendosi t’ia besonte atij drejtimin e kombëtares U20 të Marokut. Lekjaa e kishte ndjekur nga afër aktivitetin e Ouahbit në Belgjikë dhe ishte i bindur se ai ishte profili i duhur për të çuar përpara projektin që federata kishte ndërtuar prej vitesh.

Brenda vetëm tre vjetësh, Ouahbi krijoi një ekip të ri, konkurrues dhe me identitet të qartë. Maroku arriti të fitojë Kupën e Botës U20, pasi mundi Argjentinën në finale.

Më pas, pas largimit të Walid Regraguit, federata i dha mundësinë Ouahbit të merrte drejtimin e kombëtares së parë.

Një zgjedhje befasuese, por e suksesshme për Marokun

Për shumë njerëz, ky emërim ishte i papritur. Ai ishte pothuajse i panjohur për publikun e gjerë, pa eksperiencë në drejtimin e një kombëtareje të të rriturve dhe u vendos në detyrë vetëm pak muaj para Kupës së Botës.

Pavarësisht kësaj, Federata Marokene tregoi vendosmëri dhe deri tani rezultatet e kanë justifikuar plotësisht zgjedhjen.

Me një moshë mesatare prej vetëm 26.4 vjeç, Maroku paraqitet si skuadra e tretë më e re e turneut dhe njëkohësisht si një nga përfaqësueset që ka bërë përshtypjen më të madhe.

“Lojtarët e rinj shpesh kritikohen se nuk i dëgjojnë më të vjetrit dhe se ndjekin rrugën e tyre. Por në këtë skuadër është e kundërta. Ata dëgjojnë me shumë kujdes stafin e trajnerëve dhe lojtarët veteranë. Ka një respekt të madh të ndërsjellë”, ka thënë Ouahbi.

Ky transformim në mënyrën e të menduarit përmbledh më së miri edhe profilin e Mohamed Ouahbit.

Tashmë, pengesa e radhës për “Trajnerin Momo” dhe Marokun është Franca, në një sfidë të madhe që mund t’i dërgojë “Luanët e Atlasit” në gjysmëfinalen e Kupës së Botës.

The post Nga mësues edukimi fizik në sfidues të Francës, rrugëtimi i jashtëzakonshëm i “Trajnerit Momo”, ish-ndihmësit të Besnik Hasit appeared first on Albeu.com.

Neil Ward është i bindur se Maroku zotëron kapacitetin për t’u kthyer në një forcë dominuese të futbollit në arenën botërore, pasi ka ndjekur nga afër energjinë dhe synimet e vendit për të ndryshuar vendin e tij në historinë e këtij sporti.

Ish-përgjegjësi i operacioneve teknike në Federatën Mbretërore të Futbollit të Marokut (RMFF) ka qenë pjesë e këtij vizioni në periudhën që konsiderohet më e suksesshmja për futbollin maroken.

Në vitin 2022, teksa ndodhej në Rabat, ai përjetoi momentin kur “Luanët e Atlasit” u bënë përfaqësuesja e parë afrikane që siguroi një vend në gjysmëfinalet e Kupës së Botës.

Edhe pse në Katar Maroku u eliminua nga Franca me rezultatin 2-0, ecuria e asaj skuadre ndezi një entuziazëm të rrallë në mbarë vendin.

Ward kujton se atmosfera e festës pushtoi gjithë qytetin deri në orët e para të mëngjesit dhe se edhe mbreti ishte mes njerëzve duke festuar.

Tani, Maroku synon të hapë një tjetër faqe historike, ndërsa përballet sërish me Francën për të siguruar një vend në gjysmëfinalet e Kupës së Botës.

Pavarësisht se si do të mbyllet ky duel, është e qartë se kjo kombëtare synon të vazhdojë përpara, aq më tepër kur vendi do të jetë një nga organizatorët e Botërorit 2030 së bashku me Spanjën dhe Portugalinë.

Një strategji e mbështetur nga ambicia e shtetit

Simon Jennings, që drejtoi zhvillimin e talenteve të rinj në Marok nga viti 2020 deri në 2024, thotë se arritjet e fundit janë fryt i një plani të mirëpërcaktuar dhe jo i rastësisë.

Sipas tij, pas këtij suksesi qëndron një ambicie kombëtare e qartë.

Mbështetja për futbollin, thekson ai, ka ardhur nga nivelet më të larta shtetërore, me përfshirjen e drejtpërdrejtë të mbretit Mohammed VI.

Gjatë viteve të fundit, Maroku ka hedhur investime të mëdha në qendra bashkëkohore stërvitore, akademinë kombëtare të futbollit, qendra rajonale zhvillimi, rikonstruksionin e stadiumeve dhe në mijëra fusha për futbollin amator.

Ward vëren se kur futbollistët që aktivizohen në Evropë shohin një kompleks stërvitor të këtij niveli, e kuptojnë menjëherë se bëhet fjalë për një projekt serioz që synon suksesin.

Sipas tij, këto investime nuk janë bërë vetëm për arritje sportive, por edhe për të forcuar peshën ndërkombëtare të Marokut përmes futbollit.

Diaspora, elementi kyç i suksesit

Një nga shtyllat kryesore të ngritjes së Marokut ka qenë aktivizimi i diasporës. Më shumë se pesë milionë marokenë jetojnë jashtë vendit dhe federata ka punuar në mënyrë të vazhdueshme për të gjetur lojtarë me origjinë marokene në Evropë.

Për këtë qëllim, janë vendosur skautë të përhershëm në Francë, Holandë, Spanjë, Gjermani, Norvegji, Suedi dhe Danimarkë.

Jennings shpjegon se këta futbollistë e ndiejnë veten plotësisht marokenë dhe nuk e shohin këtë si zgjedhje të një kombëtareje të dytë, pasi lidhja e tyre me kulturën dhe identitetin është shumë e fortë.

Kjo qasje ka dhënë efekt të menjëhershëm: 19 nga 26 lojtarët e grumbulluar nga Maroku për Botërorin aktual kanë lindur jashtë vendit.

Mes tyre përfshihen edhe emra që mund të kishin përfaqësuar vende të tjera, si mesfushori premtues i Lille, Ayyoub Bouaddi, i cili më parë kishte qenë pjesë e ekipeve të moshave të Francës.

Po ashtu, federata marokene kishte lëvizur herët edhe për yllin e Barcelonës, Lamine Yamal, i cili ka baba maroken, duke kontaktuar me të dhe familjen e tij që kur ishte vetëm 12 apo 13 vjeç.

Ward thekson se në kërkimin e talenteve nuk lihet asnjë mundësi pa u eksploruar.

Objektivi i ardhshëm: më shumë lojtarë të dalë nga vendi

Megjithatë, në Marok ekziston vetëdija se për t’u bërë një fuqi e qëndrueshme e futbollit botëror, vendi duhet të prodhojë më shumë futbollistë përmes strukturës së vet të brendshme.

Plani i federatës është që deri në Botërorin 2030 kombëtarja të ketë një balancë më të madhe mes lojtarëve të lindur në Marok dhe atyre që janë rritur jashtë tij.

Chris van Puyvelde, ish-drejtori teknik i RMFF, ka vlerësuar se organizimi i futbollit brenda vendit ka ende nevojë për përmirësime.

Ai ka paralajmëruar gjithashtu se kërkesa për rezultate të shpejta mund të sjellë rrezikun e lënies në hije të futbollistëve me potencial afatgjatë.

Sidoqoftë, durimi dhe investimet kanë nisur të japin fryte. Mohamed Ouahbi, pas një periudhe të vështirë me ekipet e moshave, e drejtoi Marokun U-20 drejt fitimit të Kupës së Botës për këtë kategori në vitin 2025.

Disa muaj më pas, ai u emërua trajner i kombëtares së parë pas largimit të Walid Regraguit.

Një tjetër tregues domethënës i projektit maroken është edhe mosha e skuadrës. “Luanët e Atlasit” paraqiten me një nga përfaqësueset më të reja në Botëror, me një mesatare moshe të titullarëve prej 26 vitesh e 126 ditësh.

Rezultatet e arritura nga ekipet e moshave sugjerojnë se një valë e re talentesh po vjen.

Sipas Van Puyvelde, Maroku nuk po kufizohet vetëm te ndërtimi i stadiumeve, por po ngre gjithë strukturën që nga baza.

Ai beson se ajo që u pa në Katar në vitin 2022 përbënte vetëm pikënisjen.

Në fjalët e tij, kur një vend merr pak oksigjen, siç i ndodhi Marokut në Katar, ai përhapet me shpejtësi në të gjithë vendin.

Me investime të vazhdueshme, me breza të rinj futbollistësh dhe me një pasion të jashtëzakonshëm për lojën, Maroku po punon për të kaluar nga një histori surprizuese në një fuqi të qëndrueshme të futbollit botëror.

The post A është Maroku në rrugën për t’u shndërruar në një superfuqi të futbollit? appeared first on Albeu.com.

Konferenca për shtyp që paraprinte përballjen e shumëpritur mes Marokut dhe Francës në çerekfinalet e Kupës së Botës 2026, në vend që të zhvillohej qetësisht, mori papritur një kthesë të pazakontë.

Ndërsa Brahim Diaz po iu përgjigjej pyetjeve lidhur me sfidën vendimtare ndaj francezëve, në sallë nisi një debat i fortë mes dy gazetarëve.

Për disa çaste, edhe kamerat e transmetimit e hoqën fokusin nga lojtari maroken për t’u përqendruar te vendi nga vinte zhurma.

Siç shfaqet në pamjet e publikuara, dy përfaqësuesit e medias patën një shkëmbim të tensionuar në gjuhën franceze, ndërsa përplasja duket se lindi nga një mosmarrëveshje që lidhej me hapësirën personale dhe shqetësimet gjatë mbulimit të konferencës.

Tensioni u rrit edhe më shumë, por ndërhyrja e menjëhershme e gazetarëve të tjerë shërbeu për të qetësuar situatën dhe për të ndalur konfliktin, çka bëri të mundur vijimin normal të konferencës.

Në mënyrë të papritur, Brahim Diaz reagoi me shumë qetësi ndaj asaj që po ndodhte.

Ai u vu re teksa buzëqeshte dhe madje bëri edhe shaka me të pranishmit për të lehtësuar atmosferën, përpara se të rifillonte me përgjigjet e tij sapo gjithçka u normalizua.

Kjo skenë e rrallë i dha një episod të veçantë përgatitjeve për një nga ndeshjet më të pritura të fazës çerekfinale të Botërorit.

The post Konferenca e Brahim Diaz ndërpritet nga tensioni mes gazetarëve para duelit Marok – Francë appeared first on Albeu.com.