Sipas Football Asian, në pamjet e filmuara gazetarët dëgjohen duke bërë shaka me shërbimin ushtarak të Sonit, madje duke thënë se ai “as nuk e kreu siç duhet dënimin”. Sulmuesi ishte liruar nga shërbimi i detyrueshëm ushtarak prej 21 muajsh pasi me ekipin kombëtar fitoi Lojërat Aziatike 2018. Në vend të kësaj, ai kreu tre muaj trajnim bazë ushtarak, por këto komente sollën pasoja për gazetarët.

Në reagimin e saj, KFA shprehu keqardhje për deklaratat e papërshtatshme të bëra nga disa përfaqësues të medias gjatë seancave stërvitore të kombëtares në kampin bazë në Guadalajara, aty ku skuadra po përgatitet për Kupën e Botës 2026.

“Taegeuk Warriors, të vetëdijshëm për përgjegjësinë e përfaqësimit të Koresë së Jugut në skenën botërore në Kupën e Botës, po bëjnë çmos për të përmbushur mbështetjen dhe pritjet e kombit. Megjithatë, rrjedhja e fundit e bisedave të papërshtatshme midis disa prej personelit të medias në vendin e stërvitjes ka shkaktuar tronditje dhe zhgënjim të madh brenda ekipit”, thuhet në fillim të deklaratës.

Më tej, federata nënvizoi se e vlerëson punën e medias dhe rolin që ajo ka, por theksoi se raportimi nga terreni duhet të ndërtohet mbi respektin e ndërsjellë dhe besimin, duke vendosur në plan të parë mbrojtjen dhe respektimin e lojtarëve.

Për këtë arsye, KFA u bëri thirrje mediave dhe gazetarëve që të tregojnë më shumë përgjegjësi dhe konsideratë ndaj ekipit kombëtar dhe futbollistëve, në mënyrë që raste të tilla të mos përsëriten.

“U kërkojmë mediave dhe anëtarëve të komunitetit të futbollit të bashkohen në mbështetje të ekipit të futbollit të Koresë së Jugut, në mënyrë që të tregojë performancën e saj më të mirë në Kupën e Botës. Federata Koreane e Futbollit do të vazhdojë t’i japë përparësi mbrojtjes së lojtarëve dhe të përpiqet të krijojë një mjedis të shëndetshëm mediatik”, mbyllej deklarata.

Ndërkohë, Koreja e Jugut e nisi me fitore turneun duke mposhtur Republikën Çeke 2-1 në raundin e parë dhe la përshtypje të mira me paraqitjen e saj. Në ndeshjen e ardhshme do të luajë kundër Meksikës, ndërsa në të tretën do të përballet me Afrikën e Jugut.

The post Federata koreane del në mbrojtje të Sonit pas talljeve të gazetarëve në kampin e kombëtares appeared first on Albeu.com.