Vozinha ka mbërritur në Kili për të mbyllur transferimin te Colo-Colo, ndërsa pritja e rezervuar për portierin e Kombëtares së Kepit të Gjelbër ishte spektakolare, me qindra tifozë që e mirëpritën në aeroportin e Santiagos.

Mbështetësit e klubit kënduan emrin e 40-vjeçarit, valëvitën flamuj dhe ngritën pankarta, duke krijuar një atmosferë të ngjashme me atë që shoqëron ardhjen e yjeve më të mëdhenj të futbollit.

Vozinha nuk e fshehu habinë për këtë pritje të jashtëzakonshme. Ai përshëndeti tifozët, të cilët vazhdimisht duartrokisnin dhe brohorisnin emrin e tij.

Për portierin, i cili pjesën më të madhe të karrierës e ka kaluar larg vëmendjes së madhe mediatike, ky ishte me shumë gjasë momenti i parë që përjetoi një mikpritje të tillë.

Pas mbërritjes në Kili, Vozinha zhvilloi një takim me presidentin e Colo-Colos, Aníbal Mosa. Transferimi pritet të formalizohet pasi ai të kryejë ekzaminimet mjekësore.

Mediat kiliane raportojnë se marrëveshja do të jetë gjashtëmujore, me mundësi zgjatjeje deri në fund të sezonit 2027.

Sipas këtyre raportimeve, portieri do të marrë rreth 25 mijë dollarë në muaj, një shifër pothuajse tre herë më e lartë se paga që përfitonte te skuadra portugeze Chaves përpara paraqitjeve të tij në Kupën e Botës.

Colo-Colo iu drejtua Vozinhas pasi bisedimet për transferimin e portierit uruguaian Santiago Mele nuk patën sukses. Negociatat për afrimin e veteranit u drejtuan personalisht nga presidenti Mosa.

Për klubin kilian, kjo marrëveshje përfaqëson edhe një mundësi të rëndësishme komerciale, pasi fama e Vozinhas u rrit ndjeshëm pas Botërorit.

Portieri ishte një prej zbulimeve kryesore të turneut, veçanërisht falë paraqitjeve të tij ndaj Spanjës dhe Argjentinës. Këto performanca i siguruan atij një vend në formacionin më të mirë të Kupës së Botës, të përzgjedhur nga tifozët e FIFA-s.

Edhe në rrjetet sociale ndikimi i tij ishte i jashtëzakonshëm: nga më pak se 50 mijë ndjekës përpara turneut, ai arriti në afro 30 milionë pas përfundimit të tij.

Pas verës më të rëndësishme të karrierës, Vozinha është gati të hapë një kapitull të ri me Colo-Colon, aventurë që nisi me një pritje madhështore në Kili./

The post Vozinha mbërrin te Colo-Colo dhe pritet si një superyll në Kili pas suksesit në Botëror appeared first on Albeu.com.

Goli i reprezentuesit të Kepit të Gjelbër, Sidny Lopes Cabral, është përzgjedhur zyrtarisht nga FIFA si më i bukuri i Kupës së Botës 2026.

Ky sukses e bën mbrojtësin e majtë lojtarin e parë të një kombëtareje afrikane që nderohet me këtë çmim prestigjioz në të gjithë historinë e Kampionateve Botërore.

Cabral e siguroi vlerësimin me realizimin spektakolar në përballjen kundër Argjentinës, të vlefshme për fazën e 1/8 së finales. Gjatë vazhdimeve, ai shmangu në mënyrë mjeshtërore Alexis Mac Allisterin me një driblim të jashtëzakonshëm dhe më pas goditi me saktësi nga skaji i zonës, pa i lënë mundësi portierit Emiliano Martínez.

Kepi i Gjelbër u eliminua pas një autogoli të pafat në minutat e fundit të kohës shtesë, por rrugëtimi deri mes 16 skuadrave më të mira të botës, në pjesëmarrjen debutuese në Kupën e Botës, do të kujtohet si një prej surprizave më të mëdha të këtij turneu.

Tashmë, kryevepra e Sidny Lopes Cabral është nderuar edhe me çmimin më të lartë individual të FIFA-s, duke u regjistruar përfundimisht në historinë e Kampionateve Botërore si goli më i bukur i edicionit 2026.

The post FIFA shpall golin më të bukur të Botërorit 2026, realizimi magjik që mahniti futbolldashësit appeared first on Albeu.com.

Pas paraqitjeve të shkëlqyera në Kupën e Botës 2026, ku u shpall edhe portieri më i mirë i turneut, gardiani i Kepit të Gjelbër, Vozinha, ka siguruar një kontratë me gjigantët kilianë Colo Colo.

Portieri 40-vjeçar, i cili mbeti pa ekip gjatë Botërorit pas përfundimit të kontratës me Chaves, do t’i bashkohet një prej klubeve më të mëdha në Amerikën e Jugut.

Presidenti i Colo Colos, Anibal Mosa, konfirmoi arritjen e marrëveshjes, duke deklaruar: “Detajet e fundit po finalizohen, por tashmë kemi marrë konfirmim nga shoqëruesit dhe përfaqësuesi i tij se është rënë dakord pas ofertës që iu dërgua.”

Ai shtoi se portieri së shpejti do të udhëtojë drejt Kilit për t’iu nënshtruar kontrolleve mjekësore dhe më pas do të prezantohet zyrtarisht në stadiumin Monumental.

Colo Colo krenohet me 34 tituj kampion në Kili, 14 trofe të Kupës, 4 Superkupa dhe një titull të Copa Libertadores. Në vitin 1991, skuadra u mposht në finalen e Kupës Ndërkontinentale nga Crvena Zvezda.

Vozinha ka një karrierë të gjatë nëpër klube evropiane si Trencin, AEL Limassol, Gil Vicente dhe Zimbra, si dhe ka luajtur për Progresso në Angolë dhe CS Mindelans e Batuque në vendlindjen e tij.

Për Kombëtaren e Kepit të Gjelbër, ai ka grumbulluar 92 paraqitje, duke pësuar 86 gola dhe duke ruajtur portën e paprekur në 37 ndeshje.

Në Botërorin 2026, Vozinha mbrojti në katër takime dhe pësoi vetëm katër gola, ndërsa skuadra e tij nuk humbi asnjë ndeshje në kohën e rregullt, duke u përballur edhe me finalistët Spanjën dhe Argjentinën.

The post Portieri më i mirë i Botërorit 2026, Vozinha, i bashkohet Colo Colo në moshën 40-vjeçare appeared first on Albeu.com.

Portieri i Kepit të Gjelbër, Vozinha, ka folur për hapat e ardhshëm në karrierën e tij, pas një paraqitjeje individuale të spikatur në Kupën e Botës 2026.

40-vjeçari me përvojë ndodhet pa klub, pasi marrëveshja e tij me Chavesin e Portugalisë përfundoi më 30 qershor.

Vozinha pati rol vendimtar në rrugëtimin historik të Kepit të Gjelbër deri në fazën e 1/16-tës së Kupës së Botës. Në atë fazë, përfaqësuesja e tij i rezistoi fort Argjentinës, finalistes së turneut, por u mposht ngushtë me rezultat 2-3.

Në katër ndeshjet e zhvilluara gjatë turneut, gardiani pësoi pesë gola, regjistroi dy ndeshje pa pësuar gol dhe realizoi gjithsej 18 pritje.

Forma e tij e shkëlqyer ka tërhequr vëmendjen e disa klubeve, përfshirë edhe skuadra evropiane, ndërsa vetë Vozinha ka shprehur qëndrimin e tij për të ardhmen.

“Ndeshja kundër Argjentinës ishte një përvojë e jashtëzakonshme për ne”, u shpreh fillimisht Vozinha.

“Ne u përballëm kokë më kokë me ta deri në vërshëllimën e fundit dhe kishim shanse të vërteta për të fituar. Ishte një moment i madh si për mua personalisht ashtu edhe për Kepin e Gjelbër. Ia dëshmuam të gjithë botës se kemi një nivel të lartë loje”.

“Dua të vazhdoj të luaj futboll për një ose dy vjet të tjerë – ndoshta tre. Do të shoh se si do të reagojë trupi im. Aktualisht, jam një lojtar i lirë dhe kërkoj një projekt të mirë. Shpresoj të gjej një ekip të mirë së shpejti”, përfundoi Vozinha. //

The post Vozinha zbulon planet për vazhdimin e karrierës pas paraqitjeve në Kupën e Botës appeared first on Albeu.com.

Hans Vanaken ka zënë vendin e parë falë një goli të jashtëzakonshëm nga 32.45 metra. Në listën e pesë realizimeve më të largëta të turneut bëjnë pjesë edhe argjentinasit Julian Alvarez dhe Enzo Fernandez.

Kupa e Botës 2026 është karakterizuar nga shumë gola të bukur, por disa kanë tërhequr vëmendje të veçantë për largësinë prej së cilës janë goditur. Të dhënat e siguruara nga topi zyrtar Trionda kanë përcaktuar pesë golat e realizuar nga distancat më të mëdha gjatë kompeticionit.

Rekordi i këtij Botërori i takon mesfushorit belg Hans Vanaken. Ai gjeti rrugën e rrjetës nga 32.45 metra në ndeshjen kundër Shteteve të Bashkuara të Amerikës, duke firmosur goditjen më të largët që ka përfunduar gol në turneun e këtij viti.

Julian Alvarez renditet i dyti, pasi shënoi nga 28.18 metra në përballjen e Argjentinës me Zvicrën. Pozita e tretë i përket Sidny Lopes Cabral, autor i një goli nga 25.52 metra në ndeshjen mes Argjentinës dhe Kepit të Gjelbër.

Malik Tillman i Shteteve të Bashkuara mban vendin e katërt me realizimin e tij nga 23.52 metra kundër Belgjikës. Listën e pesë golave më të largët e plotëson Enzo Fernandez, i cili shënoi nga 23.14 metra në gjysmëfinalen ndaj Anglisë.

Goditjet nga distanca janë shndërruar në një prej elementeve më tërheqëse të Kupës së Botës 2026, duke nxjerrë në pah aftësinë teknike dhe guximin e futbollistëve për të kërkuar golin edhe nga largësi që rrallë shpërblehen me realizim.

The post Pesë goditjet nga më larg që përfunduan në gol në Kupën e Botës 2026 appeared first on Albeu.com.

Në prag të gjysmëfinales së sotme mes Argjentinës dhe Anglisë, që starton në orën 21:00, rrjetet sociale po vlojnë nga pretendimet për një trajtim preferencial që skuadra argjentinase gjoja ka marrë gjatë këtij Botërori.

Sipas këtyre zërave që janë përforcuar në fazën me eliminim direkt, Argjentina ka pasur një rrugëtim të lehtësuar falë shortit, duke u përballur me ekipe si Kepi i Gjelbër, Egjipti dhe Zvicra në ndeshjet para gjysmëfinales.

Ata që propagandojnë këto ide konspirative i konsiderojnë këto skuadra si kundërshtarë dukshëm më të dobët se ata që u dolën përpara gjysmëfinalistëve të tjerë. Megjithatë, fakti që Argjentina fitoi vetëm dy nga këto duele pas kohës shtesë dhe pësoi një disavantazh 0-2 ndaj Egjiptit deri në minutën e 79-të, nuk duket se ka rëndësi për përkrahësit e këtyre teorive.

Ata shohin prova të reja në përmbysjen kundër Egjiptit, duke pretenduar se gjyqtari ndihmoi ndjeshëm Argjentinën dhe Lionel Messin për të mbrojtur titullin kampion. Një tjetër pikë ku mbështeten këto teori është faza e grupeve, ku shorti i vendosi argjentinasit bashkë me Austrinë, Algjerinë dhe Jordaninë.

Një postim nga një llogari në platformën X, i shoqëruar me video, shkon edhe më tej: “Argjentina nuk ishte fillimisht në Grupin J. Gjatë shortit të Kupës së Botës, ata u zhvendosën pa asnjë shpjegim të vërtetë. Të gjithë u sollën sikur nuk kishte ndodhur asgjë, por shikoni Didier Deschamps. Ai e dinte”.

Kjo deklaratë nuk përputhet me realitetin. Në fakt, vendosja e Argjentinës në Grupin J në vend të Grupit I u bë për të respektuar rrugëtimin e veçantë drejt gjysmëfinaleve me Spanjën, siç u komunikua gjatë transmetimit të shortit, dhe në përputhje me kufizimet e vendosura nga FIFA. Rregullorja nuk lejon që katër kombëtaret me pozicionimin më të mirë në renditjen botërore të përballen para fazës gjysmëfinale.

Një variant tjetër i kësaj historie që po shpërndahet gjerësisht thotë: “Mos harroni kurrë. Argjentina nuk duhej të kishte qenë kurrë në Grupin J. Gjatë shortit të Kupës së Botës, ata fillimisht u vendosën në Grupin I, jo në Grupin J. Pastaj, në mes të transmetimit të drejtpërdrejtë në të gjithë botën, u ndryshua pa ndonjë shpjegim të qartë. Nga njerëzit pritet ende të bëjnë sikur nuk ka ndodhur asgjë”.

Këta teoricienë mendojnë se Argjentina duhej të ishte në një grup shumë më të ndërlikuar, atë që përfshinte Norvegjinë dhe Senegalin, por realiteti është krejt ndryshe. Gjatë shortit zyrtar të FIFA-s për Kupën e Botës 2026, mbajtur më 5 dhjetor 2025, Argjentina u hodh direkt në Grupin J, së bashku me Algjerinë, Austrinë dhe Jordaninë, ndërsa Grupi I përbëhej nga Franca, Senegali, Iraku dhe Norvegjia.

Asnjë burim i besueshëm, komunikim nga FIFA apo raport mbi procedurën e shortit nuk përmend një vendosje fillestare të Argjentinës në Grupin I, një ndryshim gjatë transmetimit apo ndonjë gabim në dobi të skuadrës argjentinase. Procesi i shortit ndoqi protokollet standarde për 12 grupet dhe nuk pati asnjë incident të kësaj natyre.

The post Përhapja e miteve për favorizimin e Argjentinës në Kupën e Botës dhe pse ato nuk qëndrojnë appeared first on Albeu.com.

Pas performancave që tërhoqën vëmendjen në Kupën e Botës, portieri i Kombëtares së Kepit të Gjelbër, Vozinha, është vlerësuar në një mënyrë të pazakontë dhe mjaft të veçantë, pasi luajti rol kyç që vendi i tij të hynte në histori në debutimin në këtë turne.

Biologu detar spanjoll Jesus Ortea ka vendosur që një specie e re molusku detar, e zbuluar së fundmi, të mbajë emrin e portierit veteran.

Specia, e emërtuar “Aldisa vozinhai”, është një kërmill i vogël detar me ngjyrë të kuqe dhe me gjatësi rreth katër milimetra, i panjohur më herët për botën shkencore.

Përshkrimi i këtij zbulimi është bërë në punimin e Ortea-s me titull “Historitë e Biodiversitetit”.

Molusku është gjetur në ujërat pranë Havanës në Kubë dhe Guadelupës, ndërsa studiuesi spanjoll zgjodhi që publikimin e studimit ta lidhte me periudhën e Kupës së Botës, pas paraqitjes së shkëlqyer të Vozinhas kundër Spanjës.

Në atë përballje, 40-vjeçari u vlerësua si futbollisti më i mirë i ndeshjes, pasi bëri shtatë pritje në barazimin pa gola ndaj kampionëve të Evropës.

Sipas raportimeve, ky emërtim u zgjodh nga Ortea edhe si një shenjë mirënjohjeje për popullin e Kepit të Gjelbër, me të cilin ai ka një lidhje të veçantë.

Në vitin 2023, studiuesi spanjoll mori Medaljen e Meritës Mjedisore për kontributin e tij në kërkimin mbi biodiversitetin detar në këtë arkipelag.

Kjo nuk është hera e parë që Ortea zgjedh të nderojë një futbollist në këtë formë.

Në vitin 2019, profesori i Universitetit të Oviedos i vendosi emrin e ish-portierit të Real Madridit dhe Kosta Rikës, Keylor Navas, një specieje të re kërmilli detar.

The post Një molusk i ri detar pagëzohet me emrin e Vozinhas pas paraqitjeve të tij të jashtëzakonshme në Botëror appeared first on Albeu.com.

Gola të rrallë, kthesa të pabesueshme në rezultat, fitore të vulosura në çastet e fundit dhe rezultate që pak kush mund t’i kishte parashikuar kanë shoqëruar deri tani Kupën e Botës 2026.

Tani që turneu po hyn në fazën e çerekfinaleve, po forcohet gjithnjë e më shumë diskutimi nëse ky është Botërori më i mirë i zhvilluar ndonjëherë.

Ky është edicioni i parë me 48 përfaqësuese dhe zhvillohet në Shtetet e Bashkuara të Amerikës, Kanada dhe Meksikë. Përmasat e tij kanë vendosur rekord, por edhe shifrat në fushë tregojnë se mund të kemi të bëjmë me një nga turnetë më tërheqës të historisë.

Shumë gola dhe ritëm sulmues

Në 96 nga 104 ndeshjet e planifikuara janë realizuar 280 gola, që do të thotë një mesatare prej 2.92 golash për takim.

Kjo përbën mesataren më të lartë në një Kupë Bote që prej Botërorit të vitit 1970 në Meksikë, i cili kishte 2.97 gola për ndeshje.

Krahasuar me edicionet e fundit, shifrat janë këto:

Katar 2022 – 2.69 gola për ndeshje

Rusia 2018 – 2.64

Brazili 2014 – 2.67

Afrika e Jugut 2010 – 2.27

Ndeshja që ka prodhuar më shumë gola deri tani është triumfi 7-1 i Gjermanisë ndaj Curaçaos. Përveç saj, shtatë sfida të tjera kanë nxjerrë nga gjashtë gola, ndërsa 13 përballje janë mbyllur me pesë gola.

Një tjetër element që nxjerr në pah lojën sulmuese është fakti se 74.6% e golave kanë ardhur nga aksioni i hapur. Vetëm 5% janë shënuar nga pika e bardhë, përqindja më e ulët ndonjëherë në historinë e Kupës së Botës.

Vendime në fund dhe përmbysje të mëdha

As ndeshjet me eliminim direkt nuk kanë munguar në dramë. Nga 24 duelet e kësaj faze, tetë janë zgjidhur me gol pas minutës së 85-të, ndërsa katër përballje kanë shkuar deri te penalltitë.

Goli i fitores që Enzo Fernandez shënoi ndaj Egjiptit ishte edhe goli i 10-të vendimtar i realizuar pas minutës së 90-të, një shifër rekord për një Kupë Bote.

Vetëm gjatë muajit korrik janë luajtur disa takime që tashmë po konsiderohen klasike.

Belgjika ktheu gjithçka ndaj Senegalit dhe fitoi 3-2.

Argjentina përmbysi Egjiptin dhe e mbylli ndeshjen me sukses 3-2.

Anglia mundi Meksikën 3-2, ndonëse luajti rreth 40 minuta me një lojtar më pak pas përjashtimit të Jarell Quansah.

Në veçanti, Belgjika dhe Argjentina arritën të rikuperonin një disavantazh prej dy golash, diçka që nuk kishte ndodhur më shumë se një herë në të njëjtin Botëror që nga viti 1970.

Edhe 0-0 kanë peshën e tyre

Turneu ka sjellë edhe tetë barazime pa gola, një rekord i ri në historinë e Kupës së Botës.

Megjithatë, shumë analistë nuk e lexojnë këtë si mungesë emocionesh, por si provë të balancës më të madhe mes ekipeve kombëtare.

Tribuna të mbushura dhe rivalitet i fortë mes yjeve

Edhe pse ka pasur kritika të vazhdueshme për çmimet e larta të biletave dhe shpenzimet e udhëtimit, stadiumet janë mbushur nga tifozët.

Sipas FIFA-s, janë zënë 99.7% e vendeve të disponueshme. Deri tani, turneu ka tërhequr mbi 6.2 milionë spektatorë, me një mesatare prej më shumë se 65 mijë tifozësh për ndeshje.

Në fushë, protagonistë kanë qenë edhe emrat më të mëdhenj të futbollit botëror.

Gara për Këpucën e Artë po konsiderohet një nga më të fortat që është parë ndonjëherë:

Lionel Messi – 8 gola

Kylian Mbappe – 7 gola

Erling Haaland – 7 gola

Harry Kane – 6 gola

Për herë të parë në historinë e Botërorit, tre lojtarë kanë arritur të shënojnë të paktën shtatë gola në të njëjtin turne.

Kombëtaret modeste kanë lënë gjurmë

Zgjerimi në 48 skuadra kishte ngritur dyshime se do të prodhonte shumë ndeshje të pabalancuara, por disa nga rrëfimet më të bukura të këtij edicioni kanë ardhur pikërisht nga ekipet më të vogla.

Curaçao, shteti më i vogël që është kualifikuar ndonjëherë në një Kupë Bote, reagoi pas humbjes 7-1 ndaj Gjermanisë duke marrë një barazim kundër Ekuadorit.

Katari, edhe pse u mund 6-0 nga Kanadaja, arriti të ndalte Zvicrën me një barazim 1-1.

Nga surprizat më të mëdha të turneut ka qenë edhe Kepi i Gjelbër.

Me portierin 40-vjeçar Vozinha, përfaqësuesja afrikane barazoi me Spanjën, Uruguain dhe Arabinë Saudite për të kaluar fazën e grupeve. Më pas, në 1/16 e finales, i hapi shumë punë Argjentinës dhe u eliminua vetëm pas kohës shtesë me rezultatin 3-2.

Jo pa polemika

Pavarësisht ecurisë së suksesshme në aspektin sportiv, turneu është shoqëruar edhe me debate. Tifozët kanë renditur si kritikat kryesore çmimet e larta të biletave, hoteleve dhe transportit.

Në disa stadiume janë kundërshtuar edhe ndërprerjet për hidratim, sidomos në rastet kur ndeshjet janë zhvilluar në ambiente me çati të mbyllur ose me ajër të kondicionuar.

Po ashtu, janë ngritur shqetësime për ngarkesën fizike të futbollistëve, duke pasur parasysh se sezoni i ri i Ligës Premier nis vetëm një muaj pas finales së Botërorit.

Çështja Balogun hapi debat të madh

Një nga episodet që ka shkaktuar më shumë diskutime ka qenë ai i sulmuesit amerikan Folarin Balogun.

Pasi u ndëshkua me karton të kuq ndaj Bosnje dhe Hercegovinës, Balogun mori leje të luante në takimin e radhës kundër Belgjikës, sepse FIFA pezulloi dënimin duke u mbështetur në nenin 27 të Kodit Disiplinor.

Ky vendim u sulmua ashpër nga UEFA, Belgjika dhe trajneri i Anglisë, Thomas Tuchel. Ndërkohë, mediat raportuan se presidenti amerikan Donald Trump kishte zhvilluar një bisedë telefonike me presidentin e FIFA-s, Gianni Infantino, për këtë çështje.

Pavarësisht polemikave, për FIFA-n ky mund të konsiderohet një nga Botërorët më të suksesshëm të organizuar ndonjëherë.

Spektakli në fushë, stadiumet e mbushura, atmosfera elektrizuese dhe prania e yjeve më të mëdhenj të futbollit kanë krijuar një turne që tashmë po krahasohet me edicionet më të mira në histori.

Me Argjentinën, Spanjën, Francën dhe Anglinë ende në garë dhe të vendosura në çerekfinale të ndryshme, pjesa përmbyllëse e turneut premton edhe më shumë emocione.

Nëse ndeshjet që kanë mbetur do të ruajnë të njëjtin nivel spektakli, Botërori 2026 mund të mbetet përgjithmonë në histori si edicioni më i mirë i zhvilluar ndonjëherë.

The post Botërori 2026 thyen rekorde, sjell surpriza dhe ndez debatin: a po shohim edicionin më spektakolar ndonjëherë? appeared first on Albeu.com.

Me fitoren ndaj Kepit të Gjelbër, një prej skuadrave surprizë të këtij turneu, Argjentina siguroi kalimin në fazën e 1/16 së finales të Kupës së Botës.

Për argjentinasit shënuan Lionel Messi dhe Lisandro Martinez, ndërsa një autogol i Diney Borges kontribuoi gjithashtu në suksesin e tyre. Në anën tjetër, për Kepin të Gjelbër realizuan Deroy Duarte dhe Sidny Lopes Cabral.

Një nga episodet më mbresëlënëse të ndeshjes erdhi te goli i dytë i Kepit të Gjelbër. Në minutën e 103-të, me Argjentinën në avantazh 2-1, topi shkoi te mbrojtësi i majtë Sidny Lopes Cabral në krahun e majtë të fushës.

Ai depërtoi drejt mesit me të djathtën dhe goditi në mënyrë të shkëlqyer, duke e çuar topin në cepin e sipërm të portës së Emiliano Martinez. Ky realizim solli barazimin 2-2 dhe riktheu shpresat e Kepit të Gjelbër për një tjetër befasi të madhe.

Sidny Lopes Cabral është 23 vjeç dhe ka lindur në Roterdam të Holandës.

Gjatë kësaj vere, ai u transferua te Trabzonspori nga Benfica, në një marrëveshje me vlerë 7 milionë euro.

Me kombëtaren e Kepit të Gjelbër, Cabral numëron 14 paraqitje, ndërsa goli kundër Argjentinës ishte i treti i tij me fanellën e përfaqësueses.

The post Kepi i Gjelbër u largua nga turneu, por Cabral mund të ketë realizuar golin më spektakolar të këtij Kampionati Botëror appeared first on Albeu.com.

Me shumë vështirësi dhe vetëm pas kohës shtesë, Argjentina arriti të sigurojë një vend në fazën e 1/8 së finales të Kupës së Botës, duke triumfuar 3-2 ndaj Kepit të Gjelbër në një përballje tejet dramatike.

Që në fillim të takimit, argjentinasit morën kontrollin e lojës dhe mbajtën iniciativën, ndërsa Lionel Messi ishte pika kryesore e sulmeve të skuadrës së tij.

Rasti i parë serioz i takoi Messit në minutën e 14-të, kur u gjend i lirë brenda zonës, por tentativa e tij kaloi ngjitur me shtyllën. Vetëm katër minuta më pas, ai provoi edhe nga një goditje dënimi, por Vozinha reagoi saktë edhe kësaj radhe.

Pas këmbënguljes së vazhdueshme, Argjentina e zhbllokoi sfidën në minutën e 29-të. Lisandro Martinez shërbeu me një pasim të gjatë dhe preciz për Messin, i cili hyri në zonë dhe realizoi bukur për rezultatin 1-0.

Deri në fund të pjesës së parë, skuadra amerikano-jugore kërkoi edhe golin e dytë, por mbrojtja e Kepit të Gjelbër qëndroi e organizuar. Në minutën e 45-të, Enzo Fernandez provoi nga largësia, por Vozinha regjistroi një tjetër ndërhyrje shumë të mirë.

Barazimi erdhi në minutën e 59-të për përfaqësuesen afrikane. Ryan Mendes dërgoi një top të thjeshtë në zonë për Deroy Duarte, i cili finalizoi saktë në këndin e poshtëm të portës për 1-1.

Ky gol e vendosi Argjentinën nën presion, por ekipi reagoi menjëherë duke kërkuar sërish epërsinë. Messi krijoi disa mundësi të mira, por Vozinha u tregua vendimtar dhe bëri që ndeshja të shkonte në vazhdime.

Koha shtesë solli një fund të jashtëzakonshëm, me tri gola, raste të pastra dhe tension të madh deri në sekondat e fundit.

Argjentina e nisi më mirë edhe këtë pjesë të lojës dhe kaloi sërish përpara në minutën e 92-të. Pas një goditjeje nga këndi, Alexis Mac Allister uli topin në zonë, ndërsa Lisandro Martinez u gjend në vendin e duhur dhe e dërgoi në rrjetë për 2-1.

Sidoqoftë, Kepi i Gjelbër nuk hoqi dorë. Në minutën e 103-të, Sidny Lopes Cabral mori një pasim të mirë dhe goditi fuqishëm nga distanca. Topi përfundoi në këndin e sipërm të djathtë të portës së Emiliano Martinez, duke sjellë barazimin 2-2 dhe duke rritur edhe më tej dramën e ndeshjes.

Kur gjithçka po shkonte drejt penalltive, Argjentina gjeti golin që i dha kualifikimin në minutën e 111-të. Pas një tjetër goditjeje nga këndi, Diney Borges u përpoq të largonte topin nga zona e vogël, por e devijoi pa dashje në portën e tij. Ky autogol vendosi shifrat në 3-2 për Argjentinën.

Kepi i Gjelbër pati ende mundësi të mëdha për të barazuar. Në minutën e 116-të, Sidny Lopes Cabral provoi nga goditja e lirë, por Emiliano Martinez bëri një pritje të shkëlqyer. Portieri i Argjentinës u tregua sërish vendimtar edhe në minutën e 119-të, kur ndali me refleks fantastik goditjen me kokë të Steven Moreira.

Në fund, Argjentina e ruajti avantazhin dhe fitoi 3-2 pas vazhdimeve, në një nga ndeshjet më dramatike të këtij edicioni të Kupës së Botës.

The post Argjentina avancon në 1/8 e finales pas një drame me pesë gola, autogoli në vazhdime rrëzon Kepin e Gjelbër appeared first on Albeu.com.