Zhgënjimi ka qenë gjithmonë pjesë e pandarë e Botërorit: krahas momenteve të lavdisë, turneu prodhon edhe rrëfime të dhimbshme për përfaqësueset që dalin jashtë në mënyrë dramatike. Megjithatë, mënyra se si përfundoi aventura e Iranit në Botërorin 2026 renditet mes episodeve më të rënda.

Edhe pse u përball me vështirësi të mëdha që përpara nisjes së garës, ekipi i drejtuar nga Amir Ghalenoei arriti deri aty sa kualifikimi në fazën e 1/32-ave të varej vetëm nga vetja. Por, në çastet e fundit, kjo mundësi iu hoq dy herë.

Irani e mbylli fazën e grupeve pa pësuar humbje, por kjo nuk mjaftoi për të kaluar më tej. Diferenca e golave e la jashtë fazës nokaut, në një eliminim tejet të dhimbshëm.

Një gol i fshirë në kohën shtesë

Pas dy barazimeve kundër Zelandës së Re dhe Belgjikës, iranianët hynë në ndeshjen ndaj Egjiptit në Seattle me llogari të qartë: fitorja do t’u siguronte biletën për në raundin tjetër.

Takimi nisi keq për ta, pasi mbetën shpejt në disavantazh, por reagimi nuk vonoi. Edhe pse Mehdi Taremi shpërdoroi një penallti, Ramin Rezaeian riktheu ekuilibrin me një realizim të mençur nga një kënd i vështirë.

Kur gjithçka po shkonte drejt një barazimi 1-1, në minutat shtesë erdhi momenti që dukej vendimtar: Shoja Khalilzadeh dërgoi topin në rrjetë pas një rrëmuje në zonë, duke shpërthyer festën te Irani.

Por entuziazmi zgjati pak. Pas ndërhyrjes së VAR-it, goli u anulua për pozicion jashtë loje, në një episod të debatueshëm, ku lojtari ishte përpara mbrojtësit të fundit vetëm me majën e këmbës. Ndeshja u mbyll përfundimisht 1-1.

Ndeshja tjetër që i preu shpresat

Pas kësaj, Irani nuk e kishte më fatin plotësisht në dorë dhe duhej të priste zhvillimet në përballjet e tjera për të kuptuar nëse do të mbetej në garë.

Vendimtare u bë sfida mes Algjerisë dhe Austrisë, ku çdo fitore e njërës skuadër do të favorizonte Iranin. Edhe aty, drama nuk mungoi.

Në minutën e 93-të, Riyad Mahrez shënoi për Algjerinë dhe riktheu shpresën e madhe te kampi iranian për kualifikim.

Megjithatë, vetëm pak çaste më pas, Austria gjeti barazimin me Sasa Kalajdzic, duke i shkatërruar për herë të dytë brenda 24 orëve ëndrrat e Iranit.

Në përfundim, Senegali siguroi kalimin më tej falë diferencës së golave, ndërsa Kepi i Gjelbër përfitoi nga zhvillimet në grupin tjetër.

“Na kanë trajtuar padrejtësisht”

Rrugëtimi i Iranit nuk u vështirësua vetëm nga ajo që ndodhi në fushë, por edhe nga faktorë jashtë saj.

Përfaqësuesja hasi pengesa të shumta në udhëtime dhe u detyrua të ndryshonte vazhdimisht bazën stërvitore, duke lëvizur nga Arizona në Tijuana.

Veç kësaj, skuadra mori leje për të hyrë në SHBA vetëm një ditë para ndeshjeve, ndërsa duhej të largohej menjëherë pasi ato përfundonin.

Trajneri Amir Ghalenoei deklaroi se ekipi i tij ishte “më i shtypuri në turne”, duke theksuar se kushtet e përgatitjes së tyre kishin qenë ndjeshëm më të kufizuara në krahasim me kombëtaret e tjera.

“Lojtarët e mi janë të jashtëzakonshëm. Ajo që kanë bërë këta të rinj duhet të shkruhet në histori. Pavarësisht problemeve, kemi arritur të paraqitemi mirë dhe bota duhet të jetë krenare me Iranin”, u shpreh ai.

Po ashtu, ai i kërkoi FIFA-s që në turnetë e ardhshëm të garantojë trajtim të barabartë për të gjitha përfaqësueset.

The post Irani dhe eliminimi më i hidhur: një histori fati të pamëshirshëm në Kupën e Botës? appeared first on Albeu.com.

Ndeshja ishte e ekuilibruar nga fillimi deri në fund dhe në përfundim u mbyll me shifrat 1-1.

Skuadra egjiptiane kaloi në avantazh shumë shpejt, kur në minutën e pestë Mahmoud Saber u gjend në momentin dhe vendin e duhur për të realizuar për 1-0 (5’).

Iranianët patën një mundësi ideale për ta kthyer menjëherë baraspeshën, por Oufa Shobeir nuk u tregua i saktë nga pika e bardhë në minutën e 11-të (11’).

Gjithsesi, reagimi i Iranit erdhi shpejt, pasi vetëm tre minuta më pas Ramin Rezaeian realizoi një gol shumë të bukur për 1-1 (14’).

Pas golit të barazimit, takimi u zhvillua me ritëm të lartë dhe me raste në të dyja anët, por asnjëra skuadër nuk arriti ta dërgonte sërish topin në rrjetë.

Në fund, Irani mendoi se gjeti golin e fitores me Khalilzadeh, por pas kontrollit me VAR u konstatua se ai ishte në pozitë jashtë loje.

Me këtë rezultat, Egjipti e mbyll Grupin G në vendin e dytë dhe avancon në fazën tjetër, ndërsa Iranit i duhet të presë një kualifikim të mundshëm nga pozita e tretë.

The post Egjipti barazon me Iranin dhe kalon tutje si i dyti i Grupit G appeared first on Albeu.com.

Sipas raportimit të kanalit sportiv Pitch Wire, përfaqësuesit iranianë janë të gatshëm të marrin një vendim ekstrem: të braktisin fushën dhe ta ndërpresin takimin në rast se në stadium paraqiten simbole LGBTQ+ ose mesazhe politike që bien ndesh me parimet e tyre.

Në një deklaratë zyrtare që shkaktoi reagime të shumta në opinionin sportiv, Donyamali theksoi se Irani nuk do të pranojë asnjë veprimtari që del jashtë kufijve të sportit.

“Ne e kemi informuar qartë FIFA-n se nëse delegacioni ose lojtarët tanë i nënshtrohen ndonjë fyerjeje politike ose slogani të paautorizuar brenda stadiumit, ne nuk do të hezitojmë t’i urdhërojmë menjëherë ekipit të largohet nga fusha dhe të ndërpresë ndeshjen”, deklaroi ministri iranian i sportit.

Ai nënvizoi më tej se skuadra ka ardhur për të konkurruar në turneun global vetëm sipas rregullave sportive të FIFA-s, ndërsa përfshirja e çdo agjende të jashtme, sipas tij, mbetet krejtësisht e papranueshme.

“Është e papranueshme të sjellim në këtë ndeshje axhenda politike ose sociale që nuk janë në përputhje me parimet dhe vlerat tona”.

Për këtë arsye, autoritetet iraniane ua kanë lënë organizatorëve të turneut të gjithë përgjegjësinë, duke kërkuar masa të rrepta kontrolli në stadium për të parandaluar çdo incident apo provokim nga tribunat.

Po ashtu, u vu në dukje se siguria dhe dinjiteti i anëtarëve të kombëtares janë prioritet absolut, ndërsa FIFA duhet të mbajë përgjegjësi për zhvillimin e rregullt të ndeshjes.

“Siguria dhe dinjiteti i lojtarëve tanë janë në plan të parë dhe ne presim që FIFA dhe organizatorët të marrin përgjegjësinë e plotë për të siguruar që ndeshja të luhet në një atmosferë thjesht sportive, pa provokime”, përfundoi Donyamali.

Ky qëndrim i Iranit e vë sërish qeverinë e futbollit botëror në një pozitë të vështirë, mes rregullave të saj për përfshirjen dhe kërkesave të forta të shteteve pjesëmarrëse konservatore, ndërsa sfida e ardhshme me Egjiptin tashmë pritet të jetë nën vëmendjen e veçantë të opinionit publik ndërkombëtar.

The post Irani i vendos kusht FIFA-s para duelit me Egjiptin: largohemi nga fusha nëse shfaqen simbole LGBTQ+ appeared first on Albeu.com.

Ndeshja u luajt në stadiumin SoFi në Los Angeles, ndërsa pas saj futbollistët iranianë lanë në dhomën e zhveshjes një mesazh prekës, ku falënderonin qytetin amerikan për mikpritjen dhe përcillnin një thirrje për paqe e respekt mes kombeve.

Dy përballjet e para të turneut Irani i zhvilloi në Los Angeles. Autoritetet amerikane u dhanë mundësi lojtarëve iranianë të qëndronin 24 orë në qytet, përpara se të ktheheshin në kampin e tyre në Tijuana të Meksikës.

Në mesazhin e lënë në dhomën e zhveshjes thuhej:

“Nga Persia e lashtë mijëra vjet më parë deri te Irani i qytetëruar i sotëm, shpirti i Iranit mbetet i gjallë dhe i palëkundur. Erdhëm në Los Angeles me krenari, garuam me nder dhe largohemi me dinjitet. Faleminderit Los Angeles për mikpritjen tuaj. Faleminderit çdo iraniani që dha zemrën, zërin dhe shpirtin e tij për Iranin gjatë këtyre 180 minutave. Paqja, respekti dhe miqësia mbizotëroftë mes të gjitha kombeve”.

Mesazhi ishte shoqëruar edhe me dy zemra, si simbol i unitetit dhe mirëkuptimit.

Ndeshjen e fundit në fazën e grupeve, Irani do ta luajë më 27 qershor ndaj Egjiptit. Takimi në Seattle do të jetë vendimtar për fatin e skuadrës iraniane në Kupën e Botës 2026.

The post Mesazhi emocionues që Irani la për amerikanët dhe Los Angelesin pas barazimit me Belgjikën appeared first on Albeu.com.

Por, njësoj si në sfidat e mëhershme të këtij turneu, fokusi nuk mbeti vetëm te loja, pasi përballja u shënua edhe nga tensione politike dhe episode të lidhura me sigurinë.

Qindra protestues u mblodhën jashtë stadiumit në Los Anxhelos për të kundërshtuar regjimin iranian, ndërsa brenda impiantit u shfaqën si flamujt zyrtarë të Iranit, ashtu edhe flamujt historikë me luanin dhe diellin, simbole të periudhës para revolucionit të vitit 1979. Në tribuna ishin të pranishëm edhe tifozë belgë.

Pas mbylljes së takimit, të paktën një person u arrestua pasi u përpoq të hynte në fushë i veshur me një fanellë që mbante simbolikën e flamurit iranian të kohës para Revolucionit Islamik të vitit 1979.

Gjithashtu, jashtë stadiumit u raportua një përplasje mes një tifozi dhe protestuesve, ndërsa një person u dërgua me autoambulancë.

Tensionet kishin nisur edhe përpara fillimit të ndeshjes. Zyrtari amerikan i sigurisë së brendshme, Markwayne Mullin, tha se autoritetet kishin ndaluar hyrjen në SHBA të një personi me lidhje të drejtpërdrejta me Gardën Revolucionare Islamike të Iranit (IRGC).

Federata Iraniane e Futbollit reagoi menjëherë, duke i quajtur këto pretendime “plotësisht të pavërteta”.

“Pretendimi se një përfaqësues zyrtar i Federatës Iraniane të Futbollit tentoi të hynte në Shtetet e Bashkuara dhe u ndalua nga autoritetet është një gënjeshtër e hapur dhe e padiskutueshme”, thuhej në deklaratën e federatës.

Në një prononcim për Fox News, Mullin deklaroi se shumica e kombëtareve udhëtojnë me rreth 120 persona, ndërsa Iranit iu lejua një delegacion me vetëm 53 anëtarë. Sipas tij, personat e tjerë për të cilët ishte kërkuar vizë kishin lidhje me IRGC-në dhe nuk ishin pjesë e delegacionit të zakonshëm sportiv.

Këto akuza u hodhën poshtë nga federata iraniane, e cila theksoi se ato nuk mbështeten në asnjë provë dhe se përbëjnë një përpjekje për të arsyetuar trajtimin diskriminues ndaj përfaqësueses së Iranit.

Gjatë gjithë turneut, Irani ka shprehur vazhdimisht shqetësimin për përfshirjen e çështjeve politike në pjesëmarrjen e tij sportive.

Më herët, futbollistët dhe stafi teknik kishin shfaqur pakënaqësi për ndryshimet në organizimin e udhëtimeve, si edhe për ndalimin e hyrjes në Shtetet e Bashkuara të disa zyrtarëve dhe anëtarëve të stafit.

Federata ka bërë të ditur se do të dorëzojë një ankesë zyrtare në FIFA.

Mesfushori Alireza Jahanbakhsh u shpreh se skuadra synon të përqendrohet vetëm te futbolli dhe te ndeshja e ardhshme ndaj Egjiptit në Seattle.

“Nuk po kërkojmë asgjë më shumë. Kërkojmë vetëm të trajtohemi njësoj si të gjitha 47 kombëtaret e tjera”, deklaroi ai.

The post Barazimi Iran – Belgjikë në Botërorin 2026 shoqërohet me tensione politike dhe incidente sigurie appeared first on Albeu.com.

Ndër episodet më vendimtare të takimit ishte ai i minutës së 59-të, kur ai priti në mënyrë spektakolare goditjen e Maxime De Cuyper dhe ndali një rast që dukej i destinuar të përfundonte në rrjetë për belgët.

Paraqitja e shkëlqyer bëri që Beiranvand të zgjidhej lojtari më i mirë i ndeshjes.

Megjithatë, historia e tij për të mbërritur në elitën e futbollit botëror nuk ka qenë aspak e thjeshtë.

I lindur dhe i rritur në provincën Lorestan të Iranit, Beiranvand vjen nga një familje barinjsh. Babai i tij nuk ishte dakord me dëshirën që ai të bëhej futbollist, pasi preferonte që djali të ndiqte një zanat më të sigurt për jetën.

Në vitet e adoleshencës, ai vendosi të largohej nga shtëpia dhe mori rrugën për në Teheran, pasi kishte marrë hua para për udhëtimin. Në fillim të qëndrimit atje, ai nuk kishte as një vend ku të strehohej dhe as një burim të qëndrueshëm të ardhurash.

Raportimet tregojnë se ai flinte pranë një qendre stërvitore futbolli dhe përreth Sheshit Azadi. Për një kohë jetoi në një punishte rrobaqepësie, ndërsa më pas gjeti punë në një piceri, ku iu ofrua edhe një vend për të fjetur.

Për të përballuar jetesën, Beiranvand punoi në larje makinash, në piceri, në pastrimin e rrugëve dhe si ndihmës në një punishte rrobaqepësie. Për shkak të shtatlartësisë së tij, shpesh i besohej larja e automjeteve të mëdha.

Pas shumë përpjekjesh, ai arriti të hynte në futbollin profesionist dhe rreth një dekadë më parë u bë portieri titullar i përfaqësueses së Iranit.

Në skenën ndërkombëtare, emri i tij mori jehonë të madhe në Kupën e Botës 2018, kur ndali penalltinë e Cristiano Ronaldos në ndeshjen ndaj Portugalisë. Ai moment u bë aq i njohur në kulturën popullore iraniane, sa u rikrijua edhe në dy seriale televizive vendase, “Rebel” dhe “Savage”.

Pas paraqitjeve të spikatura në Botërorin e vitit 2018, u realizua edhe filmi biografik “Beyro”, i frymëzuar nga historia e tij e pazakontë.

Beiranvand është gjithashtu mbajtës i dy rekordeve botërore Guinness: për hedhjen më të gjatë të topit me duar në futboll, 61.26 metra, dhe për goditjen më të gjatë nga duart e portierit, 78.014 metra, një tregues i qartë i forcës së tij të rrallë fizike.

Rruga e tij në karrierë nuk ka kaluar pa polemika apo kritika. Në periudha të ndryshme, ai është përballur me reagime negative nga tifozët për formën e treguar, si edhe me disa debate jashtë fushe, ndërsa nuk kanë munguar as zërat që kërkonin largimin e tij nga kombëtarja.

Sidoqoftë, në përballjen ndaj Belgjikës, ai dha përgjigjen më bindëse ndaj kritikëve, duke zhvilluar një ndeshje të jashtëzakonshme që e bëri protagonistin absolut të mbrëmjes./

The post Nga fëmijëria si bari në Lorestan te protagonisti i Iranit në Kupën e Botës: rrëfimi i veçantë i Alireza Beiranvand appeared first on Albeu.com.

Ndonëse konsiderohej favorite absolute në këtë sfidë, skuadra belge nuk ia doli të tundë rrjetën dhe takimi u mbyll me shifrat 0-0.

Belgët e nisën më mirë ndeshjen, duke ndërtuar disa mundësi për gol, por pa arritur t’i konkretizojnë ato.

Më pas, në një moment të papritur, Irani e dërgoi topin në rrjetë me anë të Taremit, por goli nuk u pranua pasi VAR-i sinjalizoi pozitë jashtë loje.

Belgjika vijoi të kontrollojë posedimin dhe të krijojë raste të shumta, por lojtarët e saj të repartit ofensiv mbetën larg saktësisë së nevojshme, ndërsa portieri i Iranit ishte vazhdimisht në vendin e duhur.

Gjërat u ndërlikuan edhe më shumë për belgët kur mbrojtësi Dario Herrera bëri një ndërhyrje të panevojshme dhe u ndëshkua menjëherë me karton të kuq.

Me këtë rezultat, Belgjika siguron barazimin e dytë në grupin G, ndërsa në xhiron e fundit i duhet medoemos fitorja për të avancuar më tej.

The post Belgjika zhgënjen përsëri, ndalet në barazim edhe ndaj Iranit appeared first on Albeu.com.

Sulmuesi iranian tregoi se lojtarët e pyetën kreun e FIFA-s për arsyen pse disa zyrtarë të përfaqësueses së tyre nuk po lejoheshin të hynin në Shtetet e Bashkuara të Amerikës.

Interesi i gazetarëve u përqendrua te fjalët e Infantinos, ndërsa më pas u bë publik edhe një incizim i fjalimit të tij.

“E di çfarë po kalon. E kuptoj. Por ti je më i fortë se çdo gjë. E ke bashkuar të gjithë botën, faleminderit. Dhe në këto dy ndeshje që të kanë mbetur, do ta bësh të gjithë botën krenare për atë që po bën. Dhe nëse trajneri ka nevojë për një sulmues, unë do të vij në ndeshjen tjetër për të luajtur me ty”.

“Ai thjesht do të na ndihmojë”, deklaroi Taremi, duke përcjellë mesazhin që ekipi mori nga njeriu i parë i futbollit botëror. “Tani është fillimi i Kupës së Botës dhe ai do të na ndihmojë. Ne i besojmë gjithçkaje që ai thotë”, shtoi sulmuesi iranian.

Sipas të dhënave në dispozicion, Infantino i bëri me dije kombëtares iraniane në dhomën e zhveshjes se do të angazhohej maksimalisht që më shumë zyrtarë iranianë, të cilëve më herët u ishte refuzuar viza, të udhëtonin drejt SHBA-së dhe të ishin të pranishëm në ndeshjet e mbetura të fazës së grupeve të turneut.

E gjithë kjo po ndodh në një periudhë tensionesh të rritura politike mes Shteteve të Bashkuara të Amerikës dhe Iranit.

Situata mori edhe më shumë vëmendje pas deklaratës së Presidentit të SHBA-së Donald Trump, i cili fundjavën e kaluar tha se marrëveshja për t’i dhënë fund luftës me Iranin “është rënë dakord dhe nënshkruar plotësisht”.

Sipas njoftimeve, ceremonia zyrtare për nënshkrimin e marrëveshjes pritet të zhvillohet të premten në Zvicër.

The post Infantino futet në zhveshtoren e Iranit dhe u drejtohet lojtarëve pas telasheve me vizat appeared first on Albeu.com.

Numri një i futbollit botëror u foli lojtarëve dhe stafit teknik të Iranit me tone inkurajuese, duke përgëzuar paraqitjen e skuadrës dhe mesazhin që, sipas tij, ajo po përcjell në skenën ndërkombëtare.

“Ndeshja e sotme ishte e vështirë dhe me pak më shumë fat mund ta kishit fituar. Por ju po luani futboll të mirë. Keni edhe dy ndeshje të mbetura dhe do ta bëni botën krenare edhe një herë me atë që do të tregoni në fushë”.

“E di se çfarë po kaloni, e kuptoj, por ju jeni më të fortë se gjithçka. Po dërgoni një sinjal për të gjithë botën. Sonte e bashkuat të gjithë stadiumin rreth jush”.

“Ia treguat këtë botës dhe dërguat një mesazh të fuqishëm. Ju falënderoj shumë”, deklaroi Infantino.

Pas këtij barazimi 2-2 ndaj Zelandës së Re, Irani mori një pikë me peshë në garën e tij në turne.

Ky rezultat i mban iranianët plotësisht në lojë për kualifikimin në fazën eliminatore, ndërsa u kanë mbetur edhe dy ndeshje për të siguruar praninë në raundin e ardhshëm të kompeticionit./

The post Gianni Infantino takon Iranin pas 2-2 me Zelandën e Re: “Po i jepni një mesazh gjithë botës” appeared first on Albeu.com.

Sipas medias shtetërore iraniane, pjesëmarrja e sulmuesit të krahut Mehdi Torabi në vazhdim të turneut është vënë seriozisht në pikëpyetje, pasi viza e tij amerikane skadoi menjëherë pas ndeshjes së parë ndaj Zelandës së Re, e mbyllur 2-2.

Ky zhvillim ka shtuar edhe më shumë tensionin në raportet diplomatike, që prej kohësh janë të acaruara, mes Teheranit dhe Uashingtonit.

Ndërsa pjesa tjetër e futbollistëve iranianë u pajisën me viza me shumë hyrje, Torabi kishte marrë vetëm një vizë me një hyrje për në Shtetet e Bashkuara.

Në Los Angeles, Irani barazoi 2-2 me Zelandën e Re, ndërsa agjencia shtetërore e lajmeve IRNA bëri të ditur se dokumenti i udhëtimit të Torabit humbi vlefshmërinë menjëherë pas përfundimit të takimit.

Federata Iraniane e Futbollit reagoi me urgjencë duke nisur procedurat për sigurimin e një vize të re, me qëllim që lojtari të mbetet pjesë e garës, por deri tani nuk ka asnjë konfirmim zyrtar për përfundimin e kësaj çështjeje.

IRNA nuk sqaroi nëse Torabi hasi probleme për t’u larguar nga territori amerikan, por raportoi se i gjithë delegacioni i kombëtares hipi në avionin që u nis drejt Meksikës pas ndeshjes.

Baza e përkohshme e Iranit ndodhet pikërisht në Meksikë, zgjedhje që është bërë për arsye sigurie për shkak të tensioneve të fundit ushtarake në Lindjen e Mesme, ku është e përfshirë edhe SHBA-ja.

Ndonëse mes dy vendeve është arritur më pas një marrëveshje paraprake për t’i dhënë fund konfliktit, futbollistët iranianë mbeten të detyruar të hyjnë dhe të dalin vazhdimisht nga SHBA-ja për çdo sfidë të fazës së grupeve.

Kjo nuk përbën problemin e parë burokratik për Iranin në këtë turne. Më herët, zyrtarët në Teheran kishin bërë të ditur se Shtetet e Bashkuara refuzuan të lëshonin viza për deri në 15 anëtarë të delegacionit, duke vështirësuar ndjeshëm organizimin dhe përgatitjet e skuadrës kombëtare.

Sikur të mos mjaftonte kjo, në një raport tjetër IRNA nënvizoi se skadimi i vizës së Torabit nuk ishte i vetmi incident gjatë largimit nga Los Angeles. Kapiteni i ekipit kombëtar, Mehdi Taremi, bashkë me një anëtar të stafit profesional, u përballën me shqetësime dhe vonesa serioze në aeroport para nisjes për në Meksikë.

Deri në këtë moment, autoritetet amerikane dhe organizatorët e kampionatit nuk kanë pranuar të japin komente për atë që ka ndodhur.

Tashmë Irani është përballë një sfide me kohën dhe procedurat administrative. Kombëtarja duhet të rikthehet të dielën në Los Angeles për ndeshjen ndaj Belgjikës në raundin e dytë të Grupit G, ndërsa më 26 qershor e pret përballja me Egjiptin në Seattle.

Mbetet ende krejtësisht e paqartë nëse Torabi do të marrë miratimin për t’u rikthyer në territorin amerikan deri atëherë.

The post Tjetër polemikë në Kupën e Botës: Mehdi Torabi mbetet në pritje pasi i përfundoi viza amerikane pas debutimit appeared first on Albeu.com.