Botërori 2026 solli rezultate tronditëse, surpriza të mëdha dhe dalje nga gara që shumë pak i kishin parashikuar. Nëse skuadrat që arritën deri në çerekfinale mund ta quajnë turneun të pranueshëm, disa përfaqësuese e mbyllin këtë edicion me një zhgënjim të thellë.

Duke marrë për bazë diferencën mes asaj që pritej dhe asaj që u pa në fushë, këto janë 10 kombëtaret që dështuan më shumë në Kupën e Botës 2026.

10. Republika Çeke

Nuk kishte pritshmëri për ndonjë mrekulli nga çekët, por në një grup që shihej si i përballueshëm, kalimi në fazën me eliminim direkt konsiderohej minimumi i kërkuar.

Në vend të kësaj, ata e mbyllën fazën e grupeve me vetëm një pikë dhe u renditën mes skuadrave që ofruan futbollin më pak tërheqës në turne.

Pas daljes nga Botërori, Patrik Schick u tërhoq nga kombëtarja në moshën 30-vjeçare, ndërsa trajneri Miroslav Koubek dha dorëheqjen dhe akuzoi mediat për një fushatë të padrejtë ndaj tij.

9. Skocia

Ndonëse ishte vendosur në një grup të fortë me Brazilin dhe Marokun, nga Skocia pritej të paktën të siguronte një vend mes të tretave më të mira.

Por ekipi i Steve Clarke nuk e arriti këtë objektiv dhe regjistroi eliminimin e 13-të radhazi në fazën e grupeve të një turneu madhor.

Edhe pse tifozët e saj krijuan një atmosferë fantastike në SHBA, niveli i paraqitjeve në fushë mbeti dukshëm më poshtë.

8. Ekuadori

Rruga e Ekuadorit në këtë Botëror ishte e mbushur me kontraste. Triumfi ndaj Gjermanisë solli entuziazëm, por ndeshjet kundër Bregut të Fildishtë dhe Curaçaos ishin shumë larg asaj që pritej.

Në fund, skuadra u ndal nga Meksika, ndërsa trajneri Sebastian Beccacece dha dorëheqjen, duke mbyllur kështu një eksperiencë zhgënjyese.

7. Brazili

Vetë fakti që Brazili nuk shihej si favorit kundër Japonisë tregon qartë sa të ulëta kishin rënë pritshmëritë për ekipin e Carlo Ancelottit.

“Seleçao” nuk arriti të japë siguri në asnjë sfidë të madhe dhe u eliminua nga Norvegjia në fazën e 1/16-ës. Kjo ishte hera e parë që Brazili ndalej në këtë fazë të Botërorit që nga viti 1990.

Lotët e Neymarit, kritikat e legjendave të futbollit brazilian dhe dilemat rreth projektit të Ancelottit përmbledhin në mënyrë të qartë turneun e pesë herë kampionëve të botës.

6. Holanda

Analisti gjerman Joachim Klement e kishte parashikuar Holandën si fituese të Botërorit, duke qenë se modeli i tij ishte treguar i saktë në tre edicionet e fundit.

Megjithatë, skuadra e Ronald Koeman u ndal që në raundin e parë me eliminim direkt nga Maroku.

Ndonëse nuk pësoi asnjë humbje brenda kohës së rregullt, kjo nuk mjaftoi për të shmangur një tjetër zhgënjim të madh.

5. Portugalia

Portugalia ishte ndër përfaqësueset më të diskutuara të këtij Botërori, kryesisht sepse kjo ishte pjesëmarrja e fundit e Cristiano Ronaldos në Kupën e Botës.

Dalja dramatike ndaj Spanjës me gol në minutat shtesë nuk shihet si turp, por skuadra e Roberto Martinez nuk arriti të bindte në asnjë ndeshje të rëndësishme. Përveç fitores ndaj Uzbekistanit, paraqitjet mbetën shumë larg pritshmërive.

4. Koreja e Jugut

Në Korenë e Jugut, eliminimi që në fazën e grupeve u perceptua si një katastrofë kombëtare.

Presidenti Lee Jae-myung kërkoi hetim për dështimin e kombëtares, ndërsa trajneri Hong Myung-bo u vu nën kritika të forta nga mediat dhe tifozët.

Disfata ndaj Afrikës së Jugut mbeti një nga befasitë më të mëdha të gjithë turneut.

3. Uruguai

Uruguai pati një Botëror thellësisht poshtë pritshmërive, të shoqëruar nga polemika dhe rezultate zhgënjyese.

Gabimet e Fernando Muslerës, tensionet që përfshinë Marcelo Bielsan dhe paraqitjet e dobëta të yjeve si Federico Valverde dhe Darwin Nunez bënë që skuadra të dështonte në arritjen e objektivave. Lëndimi i Manuel Ugarte e rëndoi edhe më shumë situatën, ndërsa në fund Bielsa dha dorëheqjen.

2. Turqia

Shumë pak njerëz do ta kishin menduar se Turqia do të ishte mes skuadrave të para që do të përshëndeste Botërorin.

Pritshmëritë për ekipin e Vincenzo Montellas ishin tepër të larta, por rezultatet nuk i mbështetën aspak.

Edhe pse skuadra reagoi në ndeshjen ndaj SHBA-së, gjithçka erdhi shumë vonë për të shpëtuar kualifikimin.

Montella vazhdoi në detyrë, ndërsa Federata premtoi ndryshime të rëndësishme në përbërjen e skuadrës.

1. Gjermania

Dështimi më i madh i Botërorit 2026 i përket Gjermanisë.

Eliminimi nga Paraguai në fazën e 1/16-ës u konsiderua surpriza më e madhe e turneut.

Ekipi i Julian Nagelsmann nuk gjeti dot identitet loje dhe paraqitjet ishin shumë larg nivelit që pritej nga katër herë kampionët e botës.

Megjithatë, ky dështim solli edhe një zhvillim me peshë: rikthimin e Jurgen Kloppit në krye të kombëtares gjermane.

Tani, shpresat janë që ai të ndërtojë një projekt të ri me synimin për ta rikthyer Gjermaninë në elitën e futbollit botëror përpara Euro 2028.

The post 10 kombëtaret që zhgënjyen më shumë në Botërorin 2026, nga Gjermania te Brazili appeared first on Albeu.com.

Ndërsa Kupa e Botës 2026 vijon ende, deri në këtë pikë 13 përzgjedhës kanë humbur vendin e punës. Shkaqet kanë qenë të ndryshme: disa janë shkarkuar menjëherë pas një ndeshjeje, të tjerë janë larguar pas eliminimit, ndërsa në disa raste pesha nuk ka ardhur vetëm nga rezultatet, por edhe nga klima e krijuar rreth skuadrës.

Ja cilët janë trajnerët që janë ndarë deri tani nga kombëtaret e tyre në Botërorin 2026, që po zhvillohet në Shtetet e Bashkuara të Amerikës, Kanada dhe Meksikë.

Roberto Martinez (Portugali)

Pas disfatës 1-0 kundër Spanjës në fazën e 1/8-tës, Roberto Martinez bëri të ditur largimin nga stoli i Portugalisë. Ai tha se kishte ardhur me objektivin për të fituar Kupën e Botës dhe se, pa e arritur këtë, nuk kishte kuptim të vijonte. Kështu u mbyll periudha e tij trevjeçare e gjysmë, ku veçohet fitimi i Ligës së Kombeve 2025 dhe dy kualifikime në çerekfinale, por pa shkuar në asnjë finale në pesë turne madhorë si trajner.

Sabri Lamouchi, Herve Renard (Tunizi)

Botërori i Tunizisë u shndërrua në një rrëmujë të plotë. Sabri Lamouchi u largua nga detyra pas humbjes 5-1 përballë Suedisë. Në vendin e tij erdhi Herve Renard, por as ai nuk mundi të përmbysë situatën, pasi skuadra u mund edhe nga Japonia dhe Holanda. Me përfundimin e aventurës së Tunizisë, edhe Renard zgjodhi të largohej.

Javier Aguirre (Meksikë)

Mandati i Javier Aguirre përfundoi pas humbjes 3-2 ndaj Anglisë në fazën e 1/8-tës. Largimi i tij ishte parashikuar më herët, teksa Rafael Marquez ishte bërë gati për ta pasuar. Aguirre u nda me kombëtaren me ndjenjë krenarie, pasi e drejtoi Meksikën drejt paraqitjes së saj më të mirë në Kupën e Botës pas shumë vitesh.

Steve Clarke (Skoci)

Menjëherë pasi Skocia u eliminua në fazën e grupeve, Steve Clarke paraqiti dorëheqjen, edhe pse vetëm pak javë më parë kishte zgjatur kontratën. Ai largohet si tekniku më i suksesshëm i epokës moderne të futbollit skocez, duke rikthyer përfaqësuesen në Kampionatin Evropian dhe në Kupën e Botës pas dekadash mungese.

Hong Myung-bo (Koreja e Jugut)

Për Hong Myung-bo, aventura mori fund pas daljes në fazën e grupeve. Përtej rezultateve jo bindëse, ai hasi edhe kritika të forta publike dhe kërcënime, ndërsa emërimi i tij kishte qenë i diskutueshëm që në nisje.

Ronald Koeman (Holandë)

Eliminimi nga Maroku me penallti solli fundin e qëndrimit të Ronald Koeman. Fillimisht ai mbrojti vendimet e veta taktike, por të nesërmen vendosi të japë dorëheqjen. Tekniku holandez pranoi zhgënjimin për dështimin në Botëror dhe theksoi se kishte ardhur momenti për ta mbyllur mandatin.

Carlos Queiroz (Gana)

Carlos Queiroz mori drejtimin e Ganës vetëm disa muaj përpara Kupës së Botës dhe arriti ta çojë ekipin në fazën eliminatore për herë të parë që nga viti 2010. Sidoqoftë, pas humbjes me Kolumbinë në 1/16-tën e finales, portugezi njoftoi se po largohej, duke kërkuar më tepër investime për zhvillimin e futbollit në vend.

Sebastian Beccacece (Ekuador)

Pas humbjes ndaj Meksikës në fazën e 1/16-tës, Sebastian Beccacece u largua me mbylljen e kontratës së tij. Argjentinasi e la skuadrën pasi e kishte kualifikuar në Botëror dhe e kishte çuar në raundin eliminator për herë të parë në 20 vjet.

Miroslav Koubek (Çeki)

Pas përfundimit të Çekisë në vendin e fundit të grupit, Miroslav Koubek u nda nga kombëtarja. Sipas vetë trajnerit, vendimi u ndikua edhe nga klima e krijuar nga mediat, pavarësisht faktit se ai e kishte rikthyer ekipin në Kupën e Botës pas dy dekadash.

Marcelo Bielsa (Uruguai)

Dihej paraprakisht se Marcelo Bielsa do të largohej pas Botërorit, por eliminimi i shpejtë dhe konfliktet me lojtarët e bënë fundin e tij edhe më të hidhur. Argjentinasi e pranoi se nuk arriti të sillte rezultatet që priteshin prej tij.

Jamal Sellami (Jordani)

Jamal Sellami e çoi Jordaninë në Kupën e parë të Botës në historinë e saj dhe mori gjithashtu shtetësinë jordaneze. Megjithatë, pas tre humbjeve në fazën e grupeve, ai vendosi të largohej, duke mbyllur një periudhë historike për futbollin e vendit.

Julian Nagelsmann (Gjermani)

Pas eliminimit të Gjermanisë nga Paraguai me penallti, Julian Nagelsmann njoftoi dorëheqjen, ndonëse mediat gjermane raportuan se në të vërtetë bëhej fjalë për një shkarkim të kamufluar. Pas afro tre vitesh në krye të përfaqësueses, ai largohet, ndërsa si pasues pritet Jurgen Klopp.

Trajnerët që mund të largohen së shpejti

Kjo listë mund të zgjatet në një kohë shumë të shkurtër. Hugo Broos ka sinjalizuar dorëheqjen pas eliminimit të Afrikës së Jugut, Zlatko Daliç duket pranë fundit të ciklit të tij me Kroacinë, ndërsa Vladimir Petkoviç ndodhet nën presion të fortë në Algjeri dhe largimi i tij shihet vetëm si çështje kohe.

The post Botërori 2026 ka sjellë deri tani 13 largime trajnerësh, Roberto Martinez mbyll listën e fundit appeared first on Albeu.com.

Pak ditë para përballjes së Botërorit mes Meksikës dhe Anglisë, një deklaratë e gazetarit argjentinas Eduardo Feinmann ka nxitur shumë reagime.

Në një prononcim për Radio Mitre, Feinmann tha se përpara ndeshjes së fazës së 1/16 së finales kundër Meksikës, disa lojtarë të Ekuadorit ishin kërcënuar nga një kartel meksikan. Sipas tij, kjo sfidë u mbyll me humbjen 2-0 të ekuadorianëve në stadiumin Azteca.

“Çështja e Botërorit është mjaft e ndërlikuar, sepse duket se tashmë është konfirmuar se ka pasur kërcënime nga një kartel meksikan të drejtuara ndaj futbollistëve të Ekuadorit. Ata kontaktuan pesë lojtarë, duke u dhënë detaje specifike për familjarët e tyre në Ekuador dhe Meksikë. Është tronditëse”.

“Ata u kërcënuan që të humbnin atë ditë në stadiumin Azteca kundër Meksikës”.

“Kjo është ajo që janë kartelet e drogës, është tronditëse. Dhe duket se ata duan që Meksika të bëhet kampione e botës në vitin 2026 me çdo kusht”.

Megjithatë, portali meksikan De10.mx raportoi se deri në këtë moment, as FIFA dhe as Federata Ekuadoriane e Futbollit nuk e kanë konfirmuar zyrtarisht ekzistencën e këtyre kërcënimeve.

Përpara ndeshjes, pakënaqësia e vetme e shprehur nga Federata Ekuadoriane kishte të bënte me atë që ndodhte pranë hotelit ku qëndronte kombëtarja, më saktësisht me zhurmat, serenatat dhe përdorimin e mjeteve piroteknike jashtë vendqëndrimit të ekipit.

Takimi mes Meksikës dhe Ekuadorit u luajt më 1 korrik dhe përfundoi 2-0 në favor të vendasve.

Në fazën e 1/8 së finales, Meksika do të luajë ndaj Anglisë në stadiumin Azteca, në një ndeshje të parashikuar për më 6 korrik./

The post Gazetari argjentinas hedh akuza të rënda: karteli meksikan kërcënoi lojtarët e Ekuadorit që të humbnin ndaj Meksikës appeared first on Albeu.com.

Udhëtimi i Ekuadorit në Kupën e Botës 2026 u mbyll në fazën e 1/16-tës, pasi skuadra u mund nga Meksika. Por, sipas raportimeve, prapa këtij rezultati mund të kenë ndikuar faktorë shumë më të thellë sesa vetëm zhvillimet në fushën e lojës.

Burime të shumta kanë raportuar se gjatë përgatitjeve për këtë përballje, delegacioni ekuadorian është përballur me kërcënime serioze që lidhen me kartelet meksikane të drogës. Sipas këtyre pretendimeve, qëllimi i kësaj fushate frikësimi ka qenë që lojtarët të viheshin nën presion deri në humbjen e ndeshjes.

Po sipas këtyre pretendimeve, ndikimi psikologjik mbi skuadrën ka qenë i madh, pasi shumë prej futbollistëve thuhet se kanë qenë më të preokupuar për sigurinë e familjarëve të tyre sesa për përgatitjen taktike të sfidës në fushë.

Kartelet e drogës njihen si organizata kriminale që merren kryesisht me trafikimin e narkotikëve, kontrabandën dhe forma të tjera veprimtarish të paligjshme.

Gjatë viteve të fundit, janë shtuar shqetësimet për përpjekjet e dyshuara të tyre për të ndikuar në futboll përmes tregjeve të jashtëligjshme të basteve, frikësimit dhe ryshfetit.

Edhe më herët ka pasur raportime që e lidhnin aktivitetin e karteleve me tentativa për të ushtruar presion ndaj skuadrave të rajonit CONCACAF gjatë kualifikueseve të Kupës së Botës.

Pavarësisht këtij presioni të supozuar jashtë fushës, Ekuadori la përshtypje të mira gjatë gjithë turneut. Skuadra e kaloi me sukses fazën e grupeve dhe siguroi vendin në raundet eliminatore pas disa paraqitjeve të forta.

Edhe në ndeshjen ndaj Meksikës, ekipi ekuadorian luftoi deri në vërshëllimën e fundit, duke shfaqur vendosmëri të madhe përballë rrethanave të vështira që, sipas raportimeve, e shoqëruan këtë sfidë.

Ndonëse u ndal në fund, rrugëtimi i Ekuadorit në Kupën e Botës ka gjasa të kujtohet jo vetëm për atë që tregoi në fushë, por edhe për sfidat e jashtëzakonshme me të cilat thuhet se u përball jashtë futbollit.

The post Raporte të reja: delegacioni i Ekuadorit dyshohet se u kërcënua nga kartelet meksikane para disfatës ndaj Meksikës appeared first on Albeu.com.

Sebastian Beccacece i ka dhënë fund me një mesazh emocional aventurës së tij në krye të Ekuadorit, pas humbjes 2-0 kundër Meksikës në fazën e 1/16-tës së Kupës së Botës. Ai pranoi se do të kishte dashur të vazhdonte në këtë post, por tha se nuk i kishte përmbushur premtimet e dhëna.

E mërkura ka nisur me një valë shkarkimesh dhe largimesh trajnerësh nga skuadrat që janë eliminuar dhe nuk kanë përmbushur pritshmëritë.

Mes të fundit që konfirmoi dorëheqjen ishte trajneri argjentinas i Ekuadorit, Beccacece, i cili ishte vlerësuar si surpriza e turneut pas fitores ndaj Gjermanisë dhe kalimit nga grupi.

“Kontrata jonë mbaroi me Kupën e Botës. Nuk besoj se arritëm atë që kishim premtuar: ta bënim këtë Kupë Bote më të mirën e të gjitha kohërave. Sot më takon mua të them lamtumirë”, u shpreh Beccacece pas ndeshjes së humbur.

Ai shtoi se largimi ishte i pashmangshëm: “Për këtë arsye duhet të iki. Do të kisha dashur të vazhdoja, sepse ajo që mora nga lojtarët dhe nga drejtuesit më bindte se kishte hapësirë për të vijuar. Por e kuptoj mënyrën se si funksionon kjo dhe dhemb, megjithatë mendoj se vendimi ishte i qartë”.

Edhe pse eliminimi i shkaktoi zhgënjim, Beccacece u ndal te raporti i veçantë që ndërtoi me skuadrën dhe me vendin gjatë këtij rrugëtimi. Kur u pyet për trashëgiminë që lë pas, ai ia atribuoi meritat lojtarëve: “Trashëgimia është e lojtarëve, sepse ata janë ekipi më i ri në Ekuador”.

Ekuadori kishte mposhtur Gjermaninë 2-1 në raundin e fundit të fazës së grupeve në këtë Kupë Bote. Ata e nisën turneun si një “kalë i errët”, pra një skuadër e aftë të befasojë, edhe për shkak të vendit të dytë në kualifikueset shumë të forta të Amerikës së Jugut.

The post Beccacece largohet pas eliminimit të Ekuadorit, e cilëson veten të dështuar appeared first on Albeu.com.

Piero Hincapie, mbrojtësi ekuadorian, u ndëshkua me karton të kuq në çastet e fundit të humbjes 2-0 ndaj Meksikës, pas një përplasjeje me Santi Gimenez, në zbatim të një rregulli të ri të FIFA-s.

Incidenti ndodhi në minutën e 95-të të sfidës së fazës së 1/16-tës, kur Hincapie u përfshi në një debat verbal me sulmuesin meksikan Santi Gimenez. Me atë disfatë, Ekuadori i dha fund rrugëtimit të tij në turne.

Sipas rregullores së re të vendosur nga FIFA, çdo futbollist që mbulon gojën gjatë një konfrontimi me një kundërshtar duhet të përjashtohet. Kjo masë synon të pengojë fshehjen e mesazheve apo komenteve fyese që mund t’i drejtohen rivalit.

Lojtari i parë që u penalizua mbi të njëjtën bazë ishte përfaqësuesi i kombëtares së Paraguait, Miguel Almiron, i cili u përjashtua në ndeshjen e fazës së grupeve kundër Turqisë javën e kaluar, dhe duket se Hincapie nuk nxori asnjë mësim nga ai rast.

Ndonëse Ekuadori është eliminuar nga Kupa e Botës, pezullimi i Hincapiet do të vlejë edhe për ndeshjen e ardhshme ndërkombëtare të përfaqësueses së tij.

The post Hincapie bëhet lojtari i dytë që ndëshkohet me të kuq për mbulimin e gojës, pas rastit të Almiron appeared first on Albeu.com.

Menjëherë sapo u shënua goli i fitores në ndeshjen ndaj Gjermanisë (2–1), ai vrapoi drejt tribunës për ta ndarë festën me bashkëshorten e tij, Patricia Persson.

Edhe pas përfundimit të takimit, Beccacece u kthye sërish atje. Përqafime të shumta dhe skena të mbushura me dashuri pasuan momentin.

Për trajnerin, ky triumf ka një peshë të veçantë, sepse vetëm disa ditë më parë figura e tij shihej me armiqësi në Ekuador. Pas barazimit 0–0 me Kuraçaon, ai u përball me ofendime të forta nga tribuna, aq sa Patricia ndërhyri vetë: u hodhi ujë tifozëve dhe mbrojti idenë se Ekuadori nuk kishte luajtur keq.

“Më vjen shumë keq që nuk kam arritur të hyj në zemrat e tifozëve ekuadorianë. Me sa duket nuk jemi lidhur. Ka diçka tek unë që nuk u pëlqen dhe kjo është në rregull. E pranoj këtë”, deklaroi Beccacece pas asaj sfide.

Shqetësimi në Ekuador ishte i madh, sepse kombëtarja nuk kishte arritur të shënonte asnjë gol në dy ndeshje të Kupës së Botës. Edhe deklaratat e trajnerit e shtuan zemërimin, pasi pas barazimit me Bregun e Fildishtë, të humbur në minutën e 90-të, ai tha: “Duhet ta pranojmë dhimbjen e një rezultati të pamerituar. Ekipi duhet të kuptojë pikat e tij të forta pavarësisht dhimbjes”.

Përpara ndeshjes me Gjermaninë, atmosfera në kampin ekuadorian ishte e ngarkuar. Presidenti i federatës së futbollit, Francisco Egas, ishte i pranishëm në stërvitje, ndërsa mesfushori Moises Caicedo tha: “Është e trishtueshme. Tifozët paguan për biletat e tyre dhe ne duam të shohim buzëqeshjet e tyre, për të festuar golat. Ndoshta është edhe më e dhimbshme për mua sesa për tifozët”.

Tashmë klima është shumë më e qetë, ndonëse mediat vendase vijojnë të shtrojnë pikëpyetje. Gazeta ekuadoriane Expreso publikoi pas ndeshjes një artikull me titullin: “A e mundi Ekuadori Gjermaninë falë apo pavarësisht Sebastinn Beccacece?”.

Për të kuptuar më mirë heroin e ri të Ekuadorit, vlen të ndalemi te historia e tij: ai nuk luajti kurrë si profesionist, shiste produkte pastrimi dhe licencën e trajnerit e mori në internet.

Beccacece i dha fund rrugës së tij si futbollist që në moshën 17 vjeçare, pa arritur ndonjëherë në nivelin profesionist. Kjo ishte e vështirë për të, sidomos sepse vëllai i tij binjak arriti të luante në divizionin e dytë në Argjentinë, ndërsa vëllai më i vogël aktivizohej në kampionatin e qytetit në Rosario.

“Do të doja të luaja vetë, por shpejt e kuptova se nuk kisha aftësi të mjaftueshme. Dhe për mua ishte gjithashtu e qartë se vëllezërit e mi po luanin më shumë dhe po përparonin më shpejt. E shndërrova dhimbjen dhe shenjën në përparim”, ka thënë Beccacece.

Në moshën 17 vjeçare ai punonte duke shitur produkte pastrimi, në ndihmë të biznesit të të atit. Paradite punonte, ndërsa më pas nxitonte për të stërvitur djemtë. Për herë të parë nisi punën si trajner në moshën 18 vjeçare, kur merrej me fëmijë katër dhe pesë vjeç në një shkollë futbolli.

Patricia Persson, gruaja me të cilën festoi në tribunë, është njohje e hershme e jetës së tij. Ata u takuan në universitet, në fakultetin e edukimit fizik. Janë të martuar prej më shumë se 20 vjetësh dhe kanë dy vajza. Patricia e shoqëron pothuajse gjithmonë, megjithëse rrallëherë flet për mediat. Një nga ato raste ishte në vitin 2016, kur Beccacece po kalonte një periudhë të vështirë te Universidad de Chile, me tifozë të revoltuar dhe lojtarë që ziheshin. “Nuk dimë më kujt t’i lutemi”, ishte shprehur ajo e lodhur.

Licencën si trajner ai e përfundoi në internet. Studimet i kishte nisur në Rosario, por një ftesë nga Jorge Sampaoli për të shkuar në Peru e detyroi ta mbyllte kursin në distancë.

Fillimi i tij në Peru erdhi me një episod të pazakontë. Për t’iu bashkuar Sampaolit, Beccacece, atëherë 22 vjeç, udhëtoi për tre ditë me autobus. Nuk kishte para për një biletë avioni prej 500 dollarësh, ndaj atë ia bleu vetë Sampaoli. Megjithatë, pas një humbjeje të Sampaolit, rreziku i shkarkimit u bë real. Bileta e Beccacece duhej të kthehej, por ai nuk kishte ndërmend të hiqte dorë kaq lehtë: kishte pritur tre vjet për një mundësi në futbollin e madh dhe ishte gati të improvizonte.

Kështu ndërmori një rrugëtim treditor me autobus nëpër disa vende. Komunikonte vetëm me telefon dhe herë pas here nga internet-kafenetë, udhëtonte në sedilje gjysmë të shtrira dhe gjatë gjithë udhëtimit nuk pati mundësi të lahej. Kishte me vete dy çanta dhe nuk e dinte as ku do të jetonte. Kur mbërriti në stacion, Sampaoli nuk doli as ta priste dhe atij iu desh të priste 40 minuta.

Miqësia e tij me Sampaolin zgjat prej më shumë se 20 vjetësh. Të dy u njohën në universitet. Për një kohë të gjatë Beccacece punoi si ndihmësi i tij dhe së bashku kaluan nëpër gjashtë klube dhe dy përfaqësuese. Në rolin e asistentit ai fitoi Kupën e Amerikës 2015 me Kilin dhe mori pjesë në Kupën e Botës 2018 me Argjentinën.

Pikërisht te Argjentina ndodhi edhe përplasja e tij me Lionel Messin. Sipas Clarín, përpara miqësores me Spanjën në mars të vitit 2018, ndeshje që Argjentina e humbi 6-1, Messi humbi durimin gjatë stërvitjes. Beccacece kishte ndërprerë një ushtrim dhe tentoi ta korrigjonte duke i vendosur dorën mbi shpatull. Nuk ishin fjalët ato që e zemëruan Leon, por vetë prekja. Më pas, ai madje i kërkoi Sampaolit të sigurohej që kjo të mos ndodhte më.

Beccacece mban në trup një tatuazh të madh kushtuar Patricia-s dhe dy vajzave të tyre. Në shpinë ka një top gjigant futbolli, brenda të cilit janë përfshirë pjesët më të rëndësishme të jetës së tij. Aty gjenden edhe prindërit e tij, si dhe klubi i zemrës, Newell’s Old Boys, skuadra e parë e Leo Messit. “Një ndeshje e Newell’s ishte pika kulmore e çdo fundjave. Lidhjet midis njerëzve krijohen në stadium. Nuk ka rëndësi se nga je”, ka kujtuar ai.

Në jetën familjare, futbolli nuk zë shumë vend. Sebastian ka treguar se bashkëshortja dhe vajzat e tij ndjekin jetën e tyre, ndërsa ai mundohet që në shtëpi ta “zhveshë kostumin e trajnerit”.

Idhulli i madh i Beccacece-s është Marcelo Bielsa. “Ai është modeli im dhe forca ime lëvizëse. Babai im më çonte në seancat stërvitore të hapura të Neëell’s të enjteve, dhe atje mund të dëgjoje konferencat e tij për shtyp. Ndiqja çdo ndeshje të të gjitha ekipeve të tij. Nuk kishte rëndësi nëse ishte Meksika, Espanyoli apo kombëtarja e Argjentinës. E pashë se si merrte vendimet e duhura dhe përpiqesha të kuptoja se çfarë ndiente, çfarë po ndodhte në ndeshje, çfarë zgjedhjesh bënte”, ka thënë Sebastian.

Megjithatë, kur Bielsa e ftoi t’i bashkohej kombëtares së Kilit, Beccacece e refuzoi. Arsyeja ishte se në atë periudhë ai tashmë po punonte me Sampaolin dhe nuk donte ta linte mikun e tij. Si pasojë, ai nuk arriti kurrë të punonte me idhullin e vet. Sot, të dy janë trajnerë kryesorë në Kupën e Botës dhe nuk përjashtohet që Sebastian të arrijë madje një rezultat edhe më të mirë se Marcelo Bielsa.

The post Sebastian Beccacece, arkitekti i mrekullisë së Ekuadorit: nga kritikat e ashpra dhe përplasja me Messin te gëzimi i madh i kualifikimit appeared first on Albeu.com.

Pamjet televizive pas ndeshjes e treguan trajnerin e Gjermanisë duke iu afruar zyrtarëve të takimit, teksa qartësisht nuk ishte i pajtuar me atë që kishte parë. Biseda e tij me ekipin e gjyqtarëve la të kuptohej se pakënaqësia kishte arritur kulmin.

Kjo skenë pasqyroi në mënyrë të plotë një sfidë ku thuajse çdo vendim i rëndësishëm shkaktoi debate të forta.

Ekuadori kishte reaguar më herët edhe ndaj golit të parë të Gjermanisë për 1-0, duke pretenduar se Aleksandar Pavlovic e kishte ndalur topin me faull para finalizimit nga Leroy Sane.

Më vonë, Gjermania u mendua se kishte fituar një penallti, por vendimi u anulua pas rishikimit nga VAR-i, pasi gjatë aksionit u evidentua një faull nga Sane.

Edhe Joshua Kimmich u pa tejet i zemëruar gjatë lojës për një vendim pranë vijës anësore. E gjithë kjo vetëm sa e shtoi kaosin në një ndeshje që në teori duhej t’i jepte Gjermanisë qetësi taktike, por që përfundoi gjithnjë e më e çrregullt.

Fakti që Nagelsmann u përball menjëherë me gjyqtarët pas përfundimit të sfidës tregon sa shumë e tronditën zhvillimet e mbrëmjes.

Edhe pse kamerat e para e paraqitën atë çast si një bisedë të zakonshme në fushë, një gjë mbetet e qartë: paraqitja e arbitrimit ndaj Ekuadorit do të vazhdojë të diskutohet gjatë.

The post Nagelsmann shpërthen pas duelit me Ekuadorin, i del përballë gjyqtarëve sapo mbyllet sfida appeared first on Albeu.com.

Gjermanët e nisën sfidën në mënyrën më të mirë të mundshme, teksa kaluan përpara që në minutën e dytë me golin e Leroy Sane. Pas bashkëpunimit me Florian Wirtz, ai gjeti hapësirën për të finalizuar saktë në këndin e poshtëm të portës për 1-0.

Reagimi i Ekuadorit erdhi menjëherë. Në minutën e nëntë, Nilson Angulo realizoi një gol të jashtëzakonshëm nga distanca, duke barazuar shifrat me një goditje të fuqishme në cepin e djathtë të portës për 1-1.

Pjesa e parë përfundoi me shumë tension dhe mundësi në të dyja zonat, me Gjermaninë që kërkonte sërish avantazhin, ndërsa Ekuadori shfaqej vazhdimisht i rrezikshëm në kundërsulme.

Në nisje të pjesës së dytë, Gjermania fitoi një penallti, por pas ndërhyrjes së VAR-it vendimi u anulua, duke sjellë polemika në fushë.

Julian Nagelsmann provoi të ndryshonte ritmin me disa lëvizje taktike, duke futur lojtarë të freskët si Pascal Gross, Deniz Undav dhe Malick Thiaw, por këto ndërhyrje nuk ia dolën të kthenin rrjedhën e takimit.

Në minutën e 64-t, Ekuadori rimori kontrollin me zëvendësime të rëndësishme, mes tyre edhe hyrja e Kevin Rodriguez, i cili më pas u bë pjesë e aksionit vendimtar.

Epërsia përfundimtare erdhi në minutën e 77-të, kur pas një goditjeje nga këndi dhe një topi të kthyer në zonë, Gonzalo Plata shënoi golin e fitores nga afërsia, duke e çuar rezultatin në 2-1.

Në fund, Gjermania u hodh në sulm në kërkim të barazimit, me raste të rrezikshme të Sane, por pa arritur të thyejë mbrojtjen e organizuar të Ekuadorit.

The post Ekuadori mposht Gjermaninë dhe siguron kualifikim historik në fazën tjetër appeared first on Albeu.com.

Në këtë përballje, “Die Mannschaft” nuk do ta ketë në dispozicion qendërmbrojtësin Nico Schlotterbeck, i cili u dëmtua në takimin ndaj Bregut të Fildishtë dhe nuk do të paraqitet më deri në përfundim të këtij kampionati.

Ndonëse e ka siguruar tashmë kualifikimin me gjashtë pikë, trajneri i Gjermanisë, Julian Nagelsmann, ka zgjedhur të mos bëjë lëshime dhe të aktivizojë futbollistët më të mirë që ka në dispozicion.

Në formacionin gjerman, Antonio Rudiger hyn në vend të Schlotterbeckut të lënduar, ndërsa Raum e nis nga fillimi këtë herë në vend të Nathaniel Brown. Pjesa tjetër e skuadrës mbetet e njëjtë krahasuar me ndeshjen e kaluar.

Nga ana tjetër, te Ekuadori e nisin nga minuta e parë edhe dy emrat kryesorë të ekipit, Willian Pacho dhe Moises Caicedo.

Formacionet zyrtare:

Ekuador: Galindez; Franco, Ordonez, Pacho, Hincapie; Yeboah, Vite, Caicedo, Angulo; Plata, Valencia.

Gjermani: Neuer; Raum, Tah, Rudiger, Kimmich; Pavlovic, Nmecha; Wirtz, Musiala, Sane; Havertz.

The post Formacionet zyrtare të Ekuador – Gjermani, Nagelsmann hedh në fushë lojtarët kryesorë appeared first on Albeu.com.