Gola të rrallë, kthesa të pabesueshme në rezultat, fitore të vulosura në çastet e fundit dhe rezultate që pak kush mund t’i kishte parashikuar kanë shoqëruar deri tani Kupën e Botës 2026.

Tani që turneu po hyn në fazën e çerekfinaleve, po forcohet gjithnjë e më shumë diskutimi nëse ky është Botërori më i mirë i zhvilluar ndonjëherë.

Ky është edicioni i parë me 48 përfaqësuese dhe zhvillohet në Shtetet e Bashkuara të Amerikës, Kanada dhe Meksikë. Përmasat e tij kanë vendosur rekord, por edhe shifrat në fushë tregojnë se mund të kemi të bëjmë me një nga turnetë më tërheqës të historisë.

Shumë gola dhe ritëm sulmues

Në 96 nga 104 ndeshjet e planifikuara janë realizuar 280 gola, që do të thotë një mesatare prej 2.92 golash për takim.

Kjo përbën mesataren më të lartë në një Kupë Bote që prej Botërorit të vitit 1970 në Meksikë, i cili kishte 2.97 gola për ndeshje.

Krahasuar me edicionet e fundit, shifrat janë këto:

Katar 2022 – 2.69 gola për ndeshje

Rusia 2018 – 2.64

Brazili 2014 – 2.67

Afrika e Jugut 2010 – 2.27

Ndeshja që ka prodhuar më shumë gola deri tani është triumfi 7-1 i Gjermanisë ndaj Curaçaos. Përveç saj, shtatë sfida të tjera kanë nxjerrë nga gjashtë gola, ndërsa 13 përballje janë mbyllur me pesë gola.

Një tjetër element që nxjerr në pah lojën sulmuese është fakti se 74.6% e golave kanë ardhur nga aksioni i hapur. Vetëm 5% janë shënuar nga pika e bardhë, përqindja më e ulët ndonjëherë në historinë e Kupës së Botës.

Vendime në fund dhe përmbysje të mëdha

As ndeshjet me eliminim direkt nuk kanë munguar në dramë. Nga 24 duelet e kësaj faze, tetë janë zgjidhur me gol pas minutës së 85-të, ndërsa katër përballje kanë shkuar deri te penalltitë.

Goli i fitores që Enzo Fernandez shënoi ndaj Egjiptit ishte edhe goli i 10-të vendimtar i realizuar pas minutës së 90-të, një shifër rekord për një Kupë Bote.

Vetëm gjatë muajit korrik janë luajtur disa takime që tashmë po konsiderohen klasike.

Belgjika ktheu gjithçka ndaj Senegalit dhe fitoi 3-2.

Argjentina përmbysi Egjiptin dhe e mbylli ndeshjen me sukses 3-2.

Anglia mundi Meksikën 3-2, ndonëse luajti rreth 40 minuta me një lojtar më pak pas përjashtimit të Jarell Quansah.

Në veçanti, Belgjika dhe Argjentina arritën të rikuperonin një disavantazh prej dy golash, diçka që nuk kishte ndodhur më shumë se një herë në të njëjtin Botëror që nga viti 1970.

Edhe 0-0 kanë peshën e tyre

Turneu ka sjellë edhe tetë barazime pa gola, një rekord i ri në historinë e Kupës së Botës.

Megjithatë, shumë analistë nuk e lexojnë këtë si mungesë emocionesh, por si provë të balancës më të madhe mes ekipeve kombëtare.

Tribuna të mbushura dhe rivalitet i fortë mes yjeve

Edhe pse ka pasur kritika të vazhdueshme për çmimet e larta të biletave dhe shpenzimet e udhëtimit, stadiumet janë mbushur nga tifozët.

Sipas FIFA-s, janë zënë 99.7% e vendeve të disponueshme. Deri tani, turneu ka tërhequr mbi 6.2 milionë spektatorë, me një mesatare prej më shumë se 65 mijë tifozësh për ndeshje.

Në fushë, protagonistë kanë qenë edhe emrat më të mëdhenj të futbollit botëror.

Gara për Këpucën e Artë po konsiderohet një nga më të fortat që është parë ndonjëherë:

Lionel Messi – 8 gola

Kylian Mbappe – 7 gola

Erling Haaland – 7 gola

Harry Kane – 6 gola

Për herë të parë në historinë e Botërorit, tre lojtarë kanë arritur të shënojnë të paktën shtatë gola në të njëjtin turne.

Kombëtaret modeste kanë lënë gjurmë

Zgjerimi në 48 skuadra kishte ngritur dyshime se do të prodhonte shumë ndeshje të pabalancuara, por disa nga rrëfimet më të bukura të këtij edicioni kanë ardhur pikërisht nga ekipet më të vogla.

Curaçao, shteti më i vogël që është kualifikuar ndonjëherë në një Kupë Bote, reagoi pas humbjes 7-1 ndaj Gjermanisë duke marrë një barazim kundër Ekuadorit.

Katari, edhe pse u mund 6-0 nga Kanadaja, arriti të ndalte Zvicrën me një barazim 1-1.

Nga surprizat më të mëdha të turneut ka qenë edhe Kepi i Gjelbër.

Me portierin 40-vjeçar Vozinha, përfaqësuesja afrikane barazoi me Spanjën, Uruguain dhe Arabinë Saudite për të kaluar fazën e grupeve. Më pas, në 1/16 e finales, i hapi shumë punë Argjentinës dhe u eliminua vetëm pas kohës shtesë me rezultatin 3-2.

Jo pa polemika

Pavarësisht ecurisë së suksesshme në aspektin sportiv, turneu është shoqëruar edhe me debate. Tifozët kanë renditur si kritikat kryesore çmimet e larta të biletave, hoteleve dhe transportit.

Në disa stadiume janë kundërshtuar edhe ndërprerjet për hidratim, sidomos në rastet kur ndeshjet janë zhvilluar në ambiente me çati të mbyllur ose me ajër të kondicionuar.

Po ashtu, janë ngritur shqetësime për ngarkesën fizike të futbollistëve, duke pasur parasysh se sezoni i ri i Ligës Premier nis vetëm një muaj pas finales së Botërorit.

Çështja Balogun hapi debat të madh

Një nga episodet që ka shkaktuar më shumë diskutime ka qenë ai i sulmuesit amerikan Folarin Balogun.

Pasi u ndëshkua me karton të kuq ndaj Bosnje dhe Hercegovinës, Balogun mori leje të luante në takimin e radhës kundër Belgjikës, sepse FIFA pezulloi dënimin duke u mbështetur në nenin 27 të Kodit Disiplinor.

Ky vendim u sulmua ashpër nga UEFA, Belgjika dhe trajneri i Anglisë, Thomas Tuchel. Ndërkohë, mediat raportuan se presidenti amerikan Donald Trump kishte zhvilluar një bisedë telefonike me presidentin e FIFA-s, Gianni Infantino, për këtë çështje.

Pavarësisht polemikave, për FIFA-n ky mund të konsiderohet një nga Botërorët më të suksesshëm të organizuar ndonjëherë.

Spektakli në fushë, stadiumet e mbushura, atmosfera elektrizuese dhe prania e yjeve më të mëdhenj të futbollit kanë krijuar një turne që tashmë po krahasohet me edicionet më të mira në histori.

Me Argjentinën, Spanjën, Francën dhe Anglinë ende në garë dhe të vendosura në çerekfinale të ndryshme, pjesa përmbyllëse e turneut premton edhe më shumë emocione.

Nëse ndeshjet që kanë mbetur do të ruajnë të njëjtin nivel spektakli, Botërori 2026 mund të mbetet përgjithmonë në histori si edicioni më i mirë i zhvilluar ndonjëherë.

The post Botërori 2026 thyen rekorde, sjell surpriza dhe ndez debatin: a po shohim edicionin më spektakolar ndonjëherë? appeared first on Albeu.com.

Vendimtar në këtë duel ishte Nicolas Pepe, i cili realizoi të dy golat për “Elefantët” dhe i çoi afrikanët më tej në turne.

Avantazhi erdhi shumë shpejt, në minutën e 7-të, kur Yan Diomande shërbeu një asist të saktë dhe Pépé e finalizoi me qetësi brenda zonës për 1-0.

Curaçao pati disa raste për të kthyer rezultatin, por Leandro Bacuna dhe Sherel Floranus nuk arritën t’i shfrytëzonin mundësitë e krijuara.

Goli që vulosi gjithçka u shënua në minutën e 64-t. Ibrahim Sangaré e gjeti të lirë Nicolas Pépén në zonë dhe sulmuesi e dërgoi topin në këndin e sipërm të portës për 2-0.

Në çastet e fundit, Curaçao kërkoi të rikthehej në lojë, ndërsa Bregu i Fildishtë i shpëtoi edhe një penalltie të mundshme, pasi gjyqtari vendosi të vazhdonte lojën pas një dueli të debatueshëm në zonë.

Me këtë sukses, Bregu i Fildishtë e përfundon fazën e grupeve me 6 pikë në vendin e dytë dhe siguron kalimin në fazën eliminatore, ndërsa Curaçao e mbyll këtu aventurën e saj në Kupën e Botës.

The post Bregu i Fildishtë kalon Curaçaon me dopietën e Pepe dhe avancon si i dyti i grupit appeared first on Albeu.com.

Përfaqësuesja nga Karaibet, që po debuton në një Kupë Bote, u ka dhënë mundësi futbollistëve të akomodohen në të njëjtin hotel me gratë, partneret dhe fëmijët e tyre gjatë garës që zhvillohet në Shtetet e Bashkuara.

Këtë zgjedhje e sqaroi mjekja e skuadrës, Suzanne Huurman, e cila është edhe e vetmja mjeke femër mes të gjitha përfaqësueseve pjesëmarrëse në Kupën e Botës.

“Lojtarët mund të ndajnë dhomën me një bashkëlojtar ose me familjen e tyre. Kur kanë fëmijë, familja merr një dhomë shtesë. Curacao është një vend i vogël dhe shumë i orientuar drejt familjes, ndaj donim ta bënim më të lehtë për lojtarët tanë që të përballonin qëndrimin larg shtëpisë”, tha Huurman.

Sipas saj, prania e familjarëve ndikon pozitivisht në gjendjen psikologjike të lojtarëve gjatë një turneu të gjatë dhe rraskapitës.

“Besoj se intimiteti dhe koha e kaluar me familjen ndihmojnë shumë, sidomos në aspektin emocional. Prania e njerëzve të dashur zvogëlon nostalgjinë dhe stresin, duke sjellë qetësi dhe ekuilibër”, shtoi ajo.

Federata e Futbollit e Curacaos ka marrë edhe një vendim shtesë, duke përballuar shpenzimet e udhëtimit dhe akomodimit për familjet e futbollistëve.

Zyrtarët e federatës arritën në përfundimin se për shumë prej lojtarëve do të ishte e vështirë të mbulonin financiarisht një qëndrim disa-javor të familjarëve në Shtetet e Bashkuara, ndaj zgjodhën t’i mbështesin plotësisht.

Megjithëse në dy ndeshjet e para ka marrë vetëm një pikë, Curacao është shndërruar në një nga rrëfimet më tërheqëse të Kupës së Botës 2026.

Në fokus të madh ka qenë portieri Elroy Room, i cili në barazimin 0-0 kundër Ekuadorit bëri 15 pritje, duke vendosur një rekord të ri në Kupën e Botës që nga koha kur kanë nisur të mbahen statistikat e detajuara.

Paraqitja e tij u komentua gjerësisht në rrjetet sociale, ndërsa llogaria e tij në Instagram u rrit nga afro 120 mijë ndjekës në më shumë se 1 milion brenda pak ditësh.

Për vendin më të vogël që është kualifikuar ndonjëherë në Kupën e Botës, prania në mesin e elitës së futbollit botëror përbën tashmë një arritje historike.

The post Curacao zbulon formulën e veçantë në Kupën e Botës: futbollistët qëndrojnë pranë grave dhe partnereve të tyre appeared first on Albeu.com.

Sidoqoftë, për Curaçaon ky Botëror ka sjellë ngjarje që pak kush do t’i quante normale. Skuadra nga Karaibet arriti një 0-0 historik kundër Ekuadorit, rezultat që i dha pikën e parë ndonjëherë në historinë e paraqitjeve të saj në Kupën e Botës.

Ndeshja u kontrollua pothuajse tërësisht nga Ekuadori, që prodhoi 27 tentativa drejt portës, por pa mundur të gjente golin.

Njeriu vendimtar i këtij barazimi ishte portieri 37-vjeçar Eloy Room, i cili bëri plot 15 pritje dhe e mbajti të paprekur rrjetën e ekipit të tij.

Për Curaçaon, një ishull me vetëm rreth 160 mijë banorë, ky barazim u ndje si një fitore e madhe, sidomos pas disfatës së rëndë 7-1 kundër Gjermanisë në takimin e parë. Në anën tjetër, Ekuadori e vështirësoi ndjeshëm pozitën e vet përpara përballjes vendimtare me Gjermaninë.

Megjithatë, pamjet që shpërthyen në rrjetet sociale erdhën vetëm pas përfundimit të takimit. Shumëkush mbeti i surprizuar kur pa mbretin Willem-Alexander dhe mbretëreshën Maxima të Holandës duke festuar me futbollistët e Curaçaos në zhveshtore.

Shpjegimi qëndron te pozita kushtetuese e ishullit. Ndonëse Curaçao ka parlamentin dhe qeverinë e tij, ai është një shtet përbërës brenda Mbretërisë së Holandës.

Për këtë arsye, mbreti dhe mbretëresha e Holandës janë gjithashtu edhe krerët zyrtarë të shtetit të Curaçaos.

Gjatë asaj dite, familja mbretërore pati një angazhim të ngjeshur si tifoze. Fillimisht ajo ndoqi në Houston fitoren e thellë të Holandës ndaj Suedisë me rezultatin 5-1, ndërsa menjëherë më pas u nis drejt Kansas Cityt për të qenë pranë Curaçaos në duelin historik ndaj Ekuadorit.

Pas sigurimit të kësaj pike të çmuar, Willem-Alexander dhe Maxima nuk mbetën në tribunën VIP.

Ata zbritën në zhveshtore dhe iu bashkuan festës me lojtarët dhe stafin teknik, duke kërcyer e kremtuar në një skenë që shumë shpejt u bë virale në të gjithë botën.

The post Mbreti dhe mbretëresha e Holandës në festën e Curaçaos pas ndeshjes, ja pse përfunduan në zhveshtore appeared first on Albeu.com.

Ekuadori e bëri të qartë menjëherë qasjen sulmuese. Që në minutën e tretë, Enner Valencia pati një mundësi të mirë për të kaluar skuadrën e tij në avantazh, por portieri i Curaçaos ndërhyri në mënyrë vendimtare dhe ndali tentativën.

Ndeshja në pjesën e parë u karakterizua nga përplasje të shumta në mesfushë dhe lojë e fortë, çka solli edhe kartonë të verdhë për Jordy Alcivar te Ekuadori dhe Leandro Bacuna te Curaçao. Shansi më i mirë i kësaj pjese u regjistrua në minutën e 42-të, kur John Yeboah provoi rrezikshëm nga brenda zonës, por sërish Eloy Room u tregua i pakalueshëm.

Pas rifillimit, Ekuadori vazhdoi të kërkonte golin. Në minutën e 59-të, Gonzalo Plata humbi një rast shumë të mirë, duke mos arritur të mposhtte nga afërsia portierin kundërshtar me kokë.

Në aksionin pasues, konkretisht vetëm një minutë më vonë, Curaçao iu afrua realizimit me Livano Comenencia, por Hernan Galindez reagoi shkëlqyeshëm dhe mbajti të paprekur portën e tij.

Presioni i ekuadorianëve u rrit edhe më shumë në vazhdim. Në minutën e 65-të, Enner Valencia iu afrua golit, por Eloy Room bëri edhe një pritje spektakolare ndaj goditjes së tij. Një minutë më pas provoi edhe Willian Pacho me kokë pas një goditjeje nga këndi, por portieri i Curaçaos mbeti sërish i vëmendshëm.

Në pjesën e fundit të takimit, të dy trajnerët ndërhynë me zëvendësime, ndërsa Curaçao u fokusua kryesisht te mbrojtja e barazimit. Jurien Gaari u ndëshkua me karton të verdhë në minutën e 75-të, ndërkohë që Dick Advocaat bëri disa ndryshime për t’i dhënë freski skuadrës përballë trysnisë së vazhdueshme të Ekuadorit.

Edhe pse krijoi raste dhe insistoi deri në fund, Ekuadori nuk gjeti dot golin e shumëkërkuar. Nga ana tjetër, Curaçao qëndroi i fortë deri në vërshëllimën e fundit dhe mori një pikë të vlefshme.

Protagonisti kryesor i ndeshjes ishte pa diskutim Eloy Room, i cili me disa pritje vendimtare e mbajti portën e ekipit të tij të paprekur dhe u shpall njeriu i takimit.

The post Curaçao siguron pikën e parë historike pas barazimit 0-0, Ekuadori shpërdoron rastet appeared first on Albeu.com.

Këto dy kombëtare i janë bashkuar listës së humbjeve më të rënda në historinë e Kupës së Botës, pra ndeshjeve të mbyllura me diferencë prej të paktën gjashtë golash. Tashmë numri i tyre ka shkuar në 21. Në shekullin e 21-të raste të tilla nuk kanë qenë aq të shumta, por shifra po rritet.

Lista nis me dy shembujt më të rinj, ato të Kanadasë dhe Gjermanisë, për të vijuar më pas me disfatat më të thella.

Katar 0-6 Kanada, viti 2026

Kjo fitore 6-0 e Kanadasë nuk erdhi në hokej mbi akull, por në futboll. Me raport gjuajtjesh 32–2, kanadezët realizuan gjashtë herë, nga tre gola në secilën pjesë. Kur rezultati ishte 2-0, Katari mbeti me dhjetë futbollistë, më pas pësoi sërish dhe mori edhe një karton të kuq tjetër. Tre golat e fundit erdhën kur Katari luante me vetëm nëntë lojtarë. Jonathan David realizoi het-trik.

Kuraçao 1-7 Gjermania, viti 2026

Gjermanët kaluan shpejt në avantazh, por në mesin e pjesës së parë lejuan barazimin e kundërshtarit. Golin e parë në historinë e Kuraçaos në Kupën e Botës e shënoi Livano Comenencia. Megjithatë, para pushimit Gjermania kishte krijuar epërsi 3-1, ndërsa në pjesën e dytë shtoi edhe katër gola të tjerë. Gjashtë futbollistë të ndryshëm gjermanë gjetën rrugën e rrjetës, me Kai Havertz që ishte i vetmi autor i dy golave.

El Salvador 1-10 Hungaria, viti 1982

Një ndeshje me 11 gola gjithsej, por jo sfida me më shumë gola në historinë e Kupës së Botës, pasi Austria dhe Zvicra kishin përfunduar 7-5 në vitin 1954. Gjithsesi, kjo mbetet ende ndeshja e vetme ku një ekip ka shënuar 10 gola. El Salvadori u eliminua, ndërsa sulmuesi Laszlo Kiss hyri nga stoli dhe realizoi një het-trik për vetëm gjashtë minuta, duke mbetur zëvendësuesi i parë dhe i vetëm me një tregolësh në Kupën e Botës.

Koreja e Jugut 0-9 Hungaria 0–9, viti 1954

Në debutimin e saj në Kupën e Botës, Koreja e Jugut u përball me brezin e artë të Hungarisë dhe u shkatërrua. Sandor Kocsis shënoi het-trik, ndërsa Ferenc Puskas dhe Peter Palotas realizuan nga dy gola secili. Në atë kohë, kjo ishte fitorja më e thellë në historinë e turneut, rekord që zgjati 28 vjet, derisa u thye nga një brez tjetër.

Zaire (Republika Demokratike e Kongos) 0-9 ish-Jugosllavia, viti 1974

Një katastrofë e plotë në fushë, me gjashtë gola të pësuar që para pushimit. Madje qarkullon edhe një teori sipas së cilës Zaire e sabotoi ndeshjen, pasi futbollistët kishin përplasje me trajnerin dhe federatën për bonuset e papaguara.

Bolivia 0-8 Uruguai, viti 1950

Ishte Kupa e parë e Botës pas Luftës së Dytë Botërore. Dy shtete u tërhoqën nga turneu dhe kështu kundërshtari i vetëm i Uruguait në grup mbeti Bolivia, e cila ishte kualifikuar vetëm sepse Argjentina, Peruja dhe Ekuadori u tërhoqën. Rezultati ishte ky.

Kuba 0-8 Suedia, viti 1938

Kuba siguroi pjesëmarrjen automatikisht në Kupën e Botës, pasi të gjitha vendet e tjera të Amerikës së Veriut dhe Qendrore refuzuan të merrnin pjesë. Në takimin e parë barazoi 3-3 me Rumaninë, më pas fitoi ndeshjen e dytë 2-1 dhe avancoi më tej. Por historia e bukur u mbyll brutalisht me humbjen 0-8 ndaj Suedisë.

Arabia Saudite 0-8 Gjermania, viti 2002

Kjo ishte një mbrëmje historike për Miroslav Klosen, i cili shënoi golat e tij të parë në Kupën e Botës dhe menjëherë realizoi tregolësh. Në atë moment, ai ende nuk mund ta dinte se më vonë do të bëhej golashënuesi më i mirë i të gjitha kohërave në këtë turne.

Haiti 0-7 Polonia, viti 1974

Ja edhe Haiti. Për ta, kualifikimi në Kupën e Botës ishte festë më vete dhe goli i shënuar ndaj Italisë mbetet kulmi i arritjeve të tyre. Por më pas erdhën humbjet e rënda: fillimisht shtatë gola nga Polonia, e më pas katër nga Argjentina.

Koreja e Jugut 0-7 Turqia, viti 1954

Një tjetër goditje e rëndë për Korenë e Jugut në atë Botëror. Pas nëntë golave të pësuar kundër Hungarisë, erdhi edhe humbja 0-7 ndaj Turqisë në takimin pasues.

Skocia 0-7 Uruguai, viti 1954

Skocia shkoi në Kupën e Botës me pritshmëri të larta, por në ndeshjen e saj të dytë u përplas rëndë me kampionët në fuqi, duke pësuar shtatë gola. Në fund e mbylli grupin në vendin e fundit, pa shënuar asnjë gol.

Koreja e Veriut 0-7 Portugalia, viti 2010

Po, Koreja e Veriut mori pjesë në Kupën e Botës dhe kjo ndodhi jo pak vonë. Një humbje kaq e thellë nuk dukej e mundshme në fillim, sepse ekipi u mbrojt mirë dhe e mbylli pjesën e parë vetëm 0-1. Më pas, gjithçka u shemb dhe pranoi edhe gjashtë gola të tjerë. Cristiano Ronaldo shënoi vetëm një herë.

Kosta Rika 0-7 Spanja, viti 2022

Kjo është disfata më e fundit në listë. Luis Enrique shkoi në Katar si favorit, shpartalloi Kosta Rikën dhe nuk lejoi asnjë goditje drejt portës. Megjithatë, skuadra e tij nuk arriti te medaljet, sepse luajti tepër me kujdes.

Brazili 1-7 Gjermania, viti 2014

Dhimbje, turp dhe tragjedia më e madhe në historinë e futbollit brazilian. Vetëm një hap larg finales së Kupës së Botës në shtëpinë e vet, Brazili pësoi shtatë gola nga Gjermania. I gjithë stadiumi shpërtheu në lot.

SHBA 1-7 Italia, viti 1934

Italia ishte tashmë 3-0 në avantazh që në pjesën e parë dhe nuk tregoi mëshirë deri në fund. Çfarë tjetër mund të bënte, me Kupën e Botës që luhej në vendin e saj dhe përballë kishte SHBA-në? Ajo ndeshje kujtohet shpesh edhe në lidhje me epokën e diktatorit Benito Mussolini.

Suedia 1-7 Brazili, viti 1950

Evropianët krijonin përshtypjen e një skuadre të fortë, por Brazili, i udhëhequr nga sulmuesi Ademir, i nxori jashtë loje. Suedia më pas do ta mbyllte turneun në vendin e tretë.

Hungaria 0-6 ish-BRSS, viti 1986

Kjo ishte fitorja më bindëse e BRSS-së në Kupën e Botës. Skuadra e Valeriy Lobanovskyi mbërriti në Meksikë në kulmin e formës dhe e vërtetoi këtë me suksesin kundër Hungarisë. Shumë e shihnin BRSS-në si një nga “jo-favoritët”, por rrugëtimi i saj mori fund në mënyrë të dhimbshme në 1/8-tën e finales, me humbjen ndaj Belgjikës pas kohës shtesë.

Serbia dhe Mali i Zi 0-6 Argjentina, viti 2006

Atë ditë Argjentina ishte magjike. Goli i dytë i Esteban Cambiasso duket si një nga aksionet më të ndërlikuara me pasime në historinë e Kupës së Botës. Ishte një realizim i mrekullueshëm.

Meksika 0-6 Gjermania, viti 1978

Kampionët në fuqi të botës treguan autoritetin e tyre, u korrigjuan pas barazimit 0-0 me Poloninë në ndeshjen e parë dhe i shkaktuan Meksikës humbjen më të rëndë në historinë e saj në Kupën e Botës.

Peru 0-6 Argjentina, viti 1978

Një humbje që u shoqërua me shumë polemika. Argjentinës i duhej fitore me të paktën katër gola diferencë dhe në fund shënoi gjashtë. Ndeshja u luajt në Argjentinë dhe menjëherë nisën zërat për një marrëveshje të mundshme: sipas pretendimeve, junta ushtarake vendase ushtroi presion ndaj Perusë dhe kërcënoi me pasoja ekonomike mes vendeve. Megjithatë, kurrë nuk u gjet asnjë provë.

Indonezia 0-6 Hungaria, viti 1938

Inditë Lindore Holandeze, sot Indonezia, u bënë skuadra e parë aziatike në historinë e Kupës së Botës. Por debutimi ishte brutal: pesë gola të pësuar që në pjesën e parë dhe më pas hungarezët e mbyllën qetësisht ndeshjen me fitoren 6-0.

The post Kupa e Botës dhe humbjet më të thella: Kuraçao e Katari futen në listën historike appeared first on Albeu.com.