Rrugëtimi i Brazilit në Kupën e Botës u mbyll në mënyrë të dhimbshme pas humbjes 1-2 ndaj Norvegjisë, rezultat që shënoi edhe fundin e një epoke për Neymar Jr.

34-vjeçari i Santosit bëri të ditur se po i jep fund karrierës së tij në futbollin ndërkombëtar, duke vendosur të mos veshë më fanellën e Brazilit.

Menjëherë pas këtij njoftimi, Neymar Sr., babai i futbollistit, publikoi në rrjetet sociale një mesazh emocional drejtuar të birit, ku i kërkoi të mos ndalet së luajturi.

“Oh, bir… Çfarë udhëtimi. Një ëndërr që nuk është bërë realitet ende nuk do të thotë se ka vdekur”.

“E pashë djaloshin të rritej dhe të bëhej një nga lojtarët më të mëdhenj të gjeneratës së tij. Më i miri nuk varet nga mosha apo rrethanat”.

“Dua të të kërkoj diçka si baba: bir, vazhdo të luash futboll”.

“Rizbulo gëzimin e të pasurit topin në këmbët e tua. Zoti të ka dhënë një shans tjetër për të bërë atë që gjithmonë ke dashur. Shijo futbollin”.

“Mos ki frikë nga e nesërmja. Jeto për të sotmen. Stërvitu. Buzëqesh. Luaj futboll. Kënaq njerëzit edhe një herë”, ka shkruar ndër të tjera babai i Neymarit.

Mesazhi i tij u paraqit si një lutje e sinqertë e një babai, që beson qartësisht se Neymar ka ende shumë magji për të dhuruar.

The post Babai i Neymarit me mesazh prekës pas largimit nga Brazili: “Bir, vazhdo të luash futboll” appeared first on Albeu.com.

Pavarësisht disfatës 2-1 ndaj Norvegjisë dhe daljes nga Kupa e Botës në fazën e 1/8-ave, Carlo Ancelotti do të vijojë të jetë trajner i përfaqësueses së Brazilit.

Si tekniku italian, ashtu edhe Federata Braziliane e Futbollit (CBF), kanë bërë të ditur se plani afatgjatë nuk vihet në diskutim, edhe pse kombëtarja braziliane shënoi paraqitjen e saj më të dobët në një Kupë Bote që nga viti 1966.

Ndonëse presioni nga opinioni publik është shtuar pas eliminimit të hershëm, trajneri 67-vjeçar reagoi menjëherë në rrjetet sociale, duke mbyllur zërat për të ardhmen e tij dhe duke theksuar se synon të mbetet në pankinë.

“Sot dhimbja është e madhe, por besimi në atë që po ndërtojmë nuk ndryshon. Ne do të vazhdojmë të punojmë për ekipin tonë kombëtar. Gjithmonë së bashku. Gjithmonë Brazil!”, ka shkruar Ancelotti në platformën X.

Humbja ndaj Norvegjisë e thellon serinë negative të Seleçaos, që tashmë numëron shtatë disfata radhazi në fazat eliminatore të Kupës së Botës përballë ekipeve evropiane.

Tani stafi teknik ka përpara një mision të vështirë për të rikthyer frymën garuese të skuadrës, para sfidave të forta që e presin në ndeshjet kualifikuese ndërkombëtare.

Ancelotti duhet gjithashtu të përfshijë sa më shpejt talente të reja si Endrick, me synimin për t’i dhënë fund periudhës më të gjatë pa trofe në historinë moderne të futbollit brazilian.

The post Ancelotti konfirmon se do të vazhdojë në krye të Brazilit pas eliminimit appeared first on Albeu.com.

Për herë të parë në këtë turne, mes tetë përfaqësueseve më të mira të botës nuk do të jetë asnjë nga tri kombëtaret më të lavdishme në historinë e futbollit: Brazili, Gjermania dhe Italia.

Ky skenar i paprecedentë u vulos dje, kur Brazili u eliminua nga Norvegjia në raundin e 1/8 së finales.

Për brazilianët, pesë herë kampionë të botës, ky ishte një ndalim i hershëm, pasi për herë të parë që nga viti 1990 ata e mbyllën aventurën në turne përpara çerekfinaleve.

Triumfi i fundit i Brazilit në një Kupë Bote vazhdon të jetë ai i vitit 2002, i arritur në turneun e zhvilluar në Korenë e Jugut dhe Japoni.

Në edicionet e fundit të kampionateve botërore, paraqitjet e Brazilit nuk kanë qenë në nivelin e pritshmërive, ndërsa ende kujtohet humbja e rëndë 7-1 ndaj Gjermanisë.

Edhe Gjermania, fituese e katër Kupave të Botës, doli nga gara më herët. Ajo u mposht nga Paraguai me penallti në raundin e 1/32-ave, fazë e re e kompeticionit e vendosur pas shtimit të numrit të skuadrave pjesëmarrëse.

Trofeu i fundit botëror i gjermanëve mban datën 2014.

Italia, po ashtu katër herë kampione bote, nuk arriti fare të sigurojë pjesëmarrjen në turne. Italianët u ndalën në play-off-et kualifikuese pas humbjes ndaj Bosnjës dhe Hercegovinës, duke mbetur kështu jashtë një tjetër Kupe Bote.

Herën e fundit që Italia ngriti trofeun ishte në vitin 2006.

Në fakt, Azurrët kanë munguar në tri Kupat e Botës të fundit, ose më saktë, kanë dështuar të kualifikohen në to.

Së bashku, Brazili, Gjermania dhe Italia numërojnë 13 Kupa Bote të fituara.

Fakti që asnjëra prej këtyre tri superfuqive nuk arriti deri në çerekfinale përfaqëson një kthesë historike në balancën e forcave të futbollit botëror.

Ky zhvillim mund të sjellë edhe një finale që nuk është parë që nga edicioni i parë i Kupës së Botës.

The post Histori në Kupën e Botës 2026: Çerekfinalet pa Brazilin, Gjermaninë dhe Italinë appeared first on Albeu.com.

Vendimi i FIFA-s për ta pezulluar me kusht ndëshkimin e sulmuesit amerikan Folarin Balogun, pas kartonit të kuq që mori në fazën e 1/16 së finales së Kupës së Botës 2026 kundër Bosnje dhe Hercegovinës, ka ndezur polemika të forta në botën e futbollit.

Si pasojë e këtij vendimi, Balogun pritet të jetë i gatshëm për ndeshjen çerekfinale me Belgjikën, ndërsa reagimet kanë qenë të shumta dhe të ashpra.

Rudi Garcia, trajneri i Belgjikës, e cilësoi këtë zhvillim si një “shaka të 1 Prillit”, ndërsa në rrjetet sociale kanë qarkulluar edhe aludime se ndryshimi i vendimit mund të jetë ndikuar nga ndërhyrje në nivele të larta politike.

Megjithatë, historia e Kupës së Botës tregon se FIFA, në shumë raste të tjera, nuk ka bërë asnjë lëshim edhe kur në qendër kanë qenë yjet më të mëdhenj të futbollit.

Më poshtë janë 11 futbollistë të njohur që, pavarësisht përpjekjeve dhe apelimeve të federatave të tyre, u detyruan të mungonin në ndeshje vendimtare.

Leonardo (Brazili) – Botërori 1994

Braziliani u ndëshkua me karton të kuq në ndeshjen e 1/16 së finales kundër SHBA-së, pasi goditi me bërryl Tab Ramos dhe i shkaktoi frakturë në mollëz.

Federata braziliane mbrojti idenë se Leonardo thjesht po përpiqej të shkëputej nga kapja e kundërshtarit, por FIFA jo vetëm që e la në fuqi kartonin, por e dënoi edhe me katër ndeshje pezullim.

Për pasojë, ai mungoi në çerekfinale, në gjysmëfinale dhe në finalen e atij turneu.

Alessandro Costacurta (Italia) – Botërori 1994

Mbrojtësi i Italisë u ndëshkua me kartonin e dytë të verdhë në gjysmëfinalen ndaj Bullgarisë, pasi ndërhyri me faull ndaj Hristo Stoichkov.

Italianët kërkuan rishqyrtim të rastit, por FIFA nuk pranoi as ta marrë në konsideratë. Kështu, Costacurta e humbi finalen kundër Brazilit, ku Italia u mund pas penalltive.

Patrick Kluivert (Holanda) – Botërori 1998

Sulmuesi i Holandës u përjashtua me të kuq në takimin hapës përballë Belgjikës, pasi goditi me bërryl Lorenzo Staelens.

Federata holandeze argumentoi se futbollisti ishte provokuar rëndë, por FIFA vendosi ta pezullojë për tre ndeshje. Kluivert u kthye vetëm në çerekfinale, ku gjeti rrugën e rrjetës kundër Argjentinës.

Zinedine Zidane (Franca) – Botërori 1998

Francezi u ndëshkua pasi shkeli me dashje mbi Said Al-Owairan gjatë fazës së grupeve.

FIFA e la jashtë për dy ndeshje, çka bëri që Zidane të mungonte ndaj Danimarkës dhe Paraguait. Ai u rikthye në çerekfinale dhe më vonë realizoi dy herë në finalen me Brazilin.

Laurent Blanc (Franca) – Botërori 1998

Ky mbetet një nga kartonët e kuq më polemikë në historinë e Botërorëve. Blanc u përjashtua në gjysmëfinalen me Kroacinë pas një kontakti të lehtë me Slaven Bilic, i cili simuloi rëndë.

Edhe pse Franca protestoi dhe pamjet televizive ngritën dyshime të forta, FIFA nuk ndryshoi vendim dhe Blanc mbeti jashtë finales kundër Brazilit.

Ronaldinho (Brazili) – Botërori 2002

Në çerekfinalen e famshme me Anglinë, Ronaldinho dha asist, shënoi një gol spektakolar nga goditja e lirë dhe më pas mori karton të kuq pas një ndërhyrjeje ndaj Danny Mills.

Brazili kërkoi heqjen e pezullimit me argumentin se ndërhyrja nuk kishte qenë e qëllimshme, por FIFA mbajti të njëjtin qëndrim. Ronaldinho mungoi në gjysmëfinalen kundër Turqisë.

Michael Ballack (Gjermania) – Botërori 2002

Mesfushori gjerman u ndëshkua me karton të verdhë në gjysmëfinalen përballë Koresë së Jugut pas një faulli taktik, duke plotësuar limitin e kartonëve.

Ndonëse më pas shënoi golin e suksesit, Ballack nuk luajti në finalen me Brazilin.

Rasti i tij ndikoi më vonë që FIFA të ndryshonte rregulloren dhe t’i fshinte kartonët pas çerekfinaleve.

Deco (Portugalia) – Botërori 2006

Në sfidën famëkeqe Portugali-Holandë, të njohur si “Beteja e Nurembergut”, Deco u përjashtua pas kartonit të dytë të verdhë për vonesë loje.

Federata portugeze pretendoi se arbitri e kishte humbur kontrollin e ndeshjes, por FIFA e hodhi poshtë apelimin. Deco mungoi në çerekfinalen kundër Anglisë.

Luis Suarez (Uruguai) – Botërori 2010

Në çerekfinalen ndaj Ganës, Suarez ndali topin me dorë mbi vijën fatale në minutën e 120-të.

Ai u përjashtua dhe nuk luajti në gjysmëfinalen përballë Holandës. FIFA nuk e fali pezullimin dhe madje mori në shqyrtim edhe mundësinë e një dënimi më të rëndë.

Thiago Silva (Brazili) – Botërori 2014

Kapiteni i Brazilit mori kartonin e dytë të verdhë në turne pas një pengimi të panevojshëm ndaj portierit David Ospina.

Federata Braziliane kërkoi anulimin e ndëshkimit, duke theksuar se kontakti ishte minimal, por FIFA e refuzoi kërkesën. Thiago Silva mungoi në gjysmëfinalen historike me Gjermaninë, ku Brazili u mund 7-1.

Jerome Boateng (Gjermania) – Botërori 2018

Boateng u përjashtua me kartonin e dytë të verdhë në fitoren dramatike ndaj Suedisë.

Gjermania apeloi duke argumentuar se kartoni i dytë ishte i ashpër, por FIFA nuk e ndryshoi vendimin. Pa Boateng, kampionët në fuqi u eliminuan pas humbjes 2-0 ndaj Koresë së Jugut.

Rasti i Garrinchës, përjashtimi historik

Përpara Balogun, historia kishte regjistruar vetëm një precedent të ngjashëm.

Në Botërorin e vitit 1962, Garrincha u përjashtua në gjysmëfinalen kundër Kilit. Në atë kohë, kartonët e kuq nuk përdoreshin fizikisht dhe pezullimet përcaktoheshin nga komisioni disiplinor.

Brazili ndërmori një fushatë të madhe për ta shpëtuar yllin e vet. Politikanë, tifozë kilianë dhe figura të tjera kërkuan faljen e tij, ndërsa raporti vendimtar i gjyqtarit anësor nuk mbërriti asnjëherë në komision.

Për shkak të mungesës së provave të plota, FIFA vendosi ta lejonte Garrinchën të luante në finale.

Për më shumë se gjashtë dekada, ky mbeti i vetmi rast kur një karton i kuq u fal para një finaleje të Kupës së Botës.

Vendimi më i fundit për Folarin Balogun e ka rikthyer sërish në qendër të vëmendjes këtë precedent historik dhe ka hapur debat të gjerë mbi mënyrën se si FIFA i zbaton rregullat disiplinore në turneun më të madh të futbollit.

The post Nga Zidane te Suarez, 11 emra të mëdhenj që munguan në duele vendimtare, në të kundërt të Balogun appeared first on Albeu.com.

Norvegjia vijon të përjetojë ëndrrën e saj në Kupën e Botës, pasi mposhti Brazilin 2-1 dhe arriti për herë të parë në histori të sigurojë një vend në çerekfinalet e kompeticionit.

Ky kualifikim përfaqëson arritjen më të madhe të kombëtares skandinave në historinë e pjesëmarrjeve të saj në Kupën e Botës, ndaj edhe festimet pas ndeshjes ishin të jashtëzakonshme.

Pas sfidës, në dhomën e zhveshjes së ekipit të drejtuar nga Stale Solbakken, lojtarët krijuan një atmosferë elektrizuese me këngë, valle dhe gëzim të madh kolektiv.

Momenti mori edhe më shumë ngjyra kur futbollistët nisën të këndonin “Nuk do të kthehemi kurrë në shtëpi”, duke dhënë një sinjal të qartë se besojnë se rrugëtimi i tyre në Kupën e Botës nuk ka përfunduar ende.

Tashmë, pas nxjerrjes jashtë të Brazilit, Norvegjia do të ndeshet me Anglinë në çerekfinale, me objektivin për ta çuar më tej këtë ecuri historike në turne.

The post Norvegjia shpërthen në festë pas triumfit historik, në dhomën e zhveshjes ushton: “Nuk do të kthehemi kurrë në shtëpi” appeared first on Albeu.com.

Vinicius Junior ka shpjeguar publikisht përse nuk ishte ai që gjuajti penalltinë e Brazilit në humbjen 2-1 kundër Norvegjisë, në fazën e 1/16 së finales të Kupës së Botës.

Skuadra braziliane i dha fund rrugëtimit në turne pas dopietës së Erling Haaland. Një prej episodeve që ngjalli më shumë debat në takim ishte penalltia e shpërdoruar nga Bruno Guimaraes, në momentin kur shifrat ishin ende 0-0.

Pas përfundimit të ndeshjes, shumë tifozë pyetën pse ekzekutimi nuk iu besua Vinicius Juniorit. Sulmuesi i Real Madridit bëri të qartë se kjo nuk ishte një zgjedhje personale, por një vendim i marrë nga pankina.

“Pse nuk e ekzekutova penalltinë? Sepse ishte vendim i trajnerit.”

“Unë kurrë nuk fshihem dhe nuk i shmangem përgjegjësive.”

“Marr gjithmonë përgjegjësi kur duhet, por këtë herë ishte një vendim i trajnerit dhe unë e respektova atë”, deklaroi Vinicius.

Më parë, përzgjedhësi Carlo Ancelotti kishte sqaruar se përzgjedhja ishte bërë mbi bazën e analizave statistikore dhe jo të emrit apo reputacionit të futbollistëve, duke caktuar Bruno Guimaraes për gjuajtjen e penalltisë.

Sidoqoftë, mesfushori brazilian nuk ia doli të mposhtte portierin Orjan Nyland, në një moment që pati peshë të madhe në eliminimin e Brazilit nga Kupa e Botës./

The post Vinicius Jr tregon pse nuk mori penalltinë ndaj Norvegjisë: Ishte zgjedhje e Ancelottit appeared first on Albeu.com.

Edhe pse Brazili e mbylli me zhgënjim aventurën e tij në Kupën e Botës, Erling Haaland dhe Vinicius Junior sollën një çast që u prit shumë mirë nga tifozët.

Norvegjia arriti të kalojë në çerekfinale pasi mposhti Brazilin me rezultatin 2-1, ndërsa figura kryesore e ndeshjes ishte Haaland, autor i dy golave.

Menjëherë pas sfidës, sulmuesi norvegjez ishte duke folur në një intervistë kur Vinicius Junior iu afrua në mënyrë të papritur, duke e ndërprerë për disa sekonda.

Haaland nuk e shpërfilli brazilianin, por e priti me buzëqeshje, i dha dorën dhe më pas e përqafoi ngrohtësisht, përpara se Vinicius të vijonte rrugën e tij.

Kjo skenë u përhap shumë shpejt në rrjetet sociale, ku tifozët e cilësuan si një shembull shumë të mirë të respektit dhe frymës sportive mes dy yjeve të futbollit.

Pavarësisht rivalitetit në fushë, Haaland dhe Vinicius Junior treguan se vlerësimi mes futbollistëve mbetet i fortë edhe pasi ndeshja përfundon me fishkëllimën e fundit./

The post Vinicius i afrohet Haalandit gjatë intervistës, gjesti i norvegjezit merr vëmendje të madhe appeared first on Albeu.com.

Megjithëse brazilianët patën mundësitë më të mira gjatë takimit, ishin norvegjezët ata që siguruan kualifikimin më tej me fitoren 2-1.

Vetëm pas tre minutash lojë, Patrick Berg dërgoi topin në rrjetë për Norvegjinë, por goli nuk u pranua për shkak të pozitës jashtë loje.

Në minutën e 10-të, Brazili pati shansin ideal për të marrë avantazhin, por Bruno Guimaeres nuk arriti të shënojë nga pika e bardhë.

Skuadra braziliane ndërtoi edhe disa aksione të mira sulmuese, por si Endrick, ashtu edhe Rayan, nuk ia dolën të konkretizonin nga afërsia.

Në minutën e 79-të, kur pak kush e priste, Norvegjia goditi me një aksion të rrjedhshëm, ku Erling Haaland realizoi me kokë pas një krosimi të Schjelderup për 1-0.

Brazili iu afrua sërish golit në minutën e 86-të, por Casemiro nuk arriti ta dërgojë topin në rrjetë.

Më pas, sulmuesi i Man Cityt vulosi gjithçka me një gol të shkëlqyer nga distanca në minutën e 90-të.

Gjithçka që arriti Brazili ishte ngushtimi i rezultatit, teksa Neymar shënoi nga penalltia në minutën e 90+10’, pas një ndërhyrje të rëndë ndaj Casemiro.

Me këtë sukses, Norvegjia siguron vendin në çerekfinale, ku do të ndeshet me fituesin e sfidës Meksikë – Angli.

90+10′ GOLI I NEJMARIT ME PENALLTI: VIDEO 

90′ GOLI I DYTË I HALAND: VIDEO 

79′ GOLI I HALAND: VIDEO 

The post VIDEO/ Haaland dërgon në shtëpi Brazilin e Ançelotit, skandinavët në çerekfinale të Kupës së Botës appeared first on Albeu.com.

Brazili pritet të paraqitet me disa ndryshime në formacion për përballjen e 1/8 së finales ndaj Norvegjisë, në krahasim me ekipin që triumfoi ndaj Japonisë në 1/16 e finales.

Një nga arsyet kryesore për këto lëvizje është mungesa e mesfushorit Lucas Paqueta, i cili nuk do të jetë i disponueshëm për shkak të një dëmtimi.

Paqueta dëmtoi muskujt e pasmë të kofshës gjatë fitores 2-1 kundër Japonisë, çka e lë Brazilin pa një prej elementëve të rëndësishëm në mesin e fushës.

Ancelotti pranoi se zëvendësimi i tij nuk është i thjeshtë, pasi sipas tij nuk ka një tjetër lojtar me të njëjtat tipare si Lucas Paqueta.

“Nuk kemi një lojtar me cilësitë e Lucas Paquetas, ndaj duhet ta zëvendësojmë me një profil tjetër. Në këtë aspekt kemi karakteristika të ndryshme te lojtarët si Danilo, Gabriel, Matheus Cunha apo Ederson”, shtoi Ancelotti.

Në anën tjetër, lajmi i mirë për brazilianët lidhet me Raphinhan, i cili të premten u kthye në stërvitje pas një ndërprerjeje prej dy javësh.

Sulmuesi kishte mbetur jashtë për shkak të një dëmtimi në tendinën e gjurit, të pësuar në pjesën e parë të sfidës së fazës së grupeve kundër Haitit.

Carlo Ancelotti bëri të ditur se lojtari është i gatshëm për ekipin, megjithëse ende nuk ndodhet në formën e tij maksimale.

“Raphinha po rikuperohet shumë mirë. Nuk është ende plotësisht i gatshëm, por është në dispozicion për të qenë në stol dhe për të marrë disa minuta ose për të ndihmuar në momente të caktuara”, u shpreh Ancelotti.

Rikthimi i Raphinhas, i kombinuar me faktin që edhe Neymari është i gatshëm, i jep Brazilit më shumë alternativa në fazën sulmuese përpara ndeshjes së fazës nokaut.

Lidhur me kërcënimin që paraqet Erling Haaland, tekniku italian u shpreh se prapavija e tij e njeh shumë mirë sulmuesin norvegjez dhe është e përgatitur për ta përballuar.

“Nuk kam nevojë t’ua shpjegoj mbrojtësve të mi si luan Haaland. Ata e njohin shumë mirë, pasi janë përballur shpesh me të”, tha ai.

Takimi mes Brazilit dhe Norvegjisë në 1/8 e finales së Kupës së Botës luhet sonte duke nisur nga ora 22:00.

The post Ancelotti jep sinjale pozitive dhe negative për Brazilin para duel it me Norvegjinë appeared first on Albeu.com.

Erling Haaland ka folur me tone shumë pozitive për Brazilin në prag të ndeshjes që do të vendosë fatin e dy përfaqësueseve në 1/16 e finales së Kupës së Botës 2026.

Ylli i Norvegjisë dhe i Manchester Cityt vlerësoi pa kursim pesë herë kampionët e botës, duke vënë në pah traditën e jashtëzakonshme të futbollit brazilian dhe emrat e mëdhenj që ky shtet i ka dhënë sportit ndër vite.

Të dielën, Norvegjia dhe Brazili do të zbresin në fushë në “New York New Jersey Stadium”, në atë që konsiderohet një nga përballjet më tërheqëse të fazës me eliminim direkt të Botërorit, ndërsa vetë Haaland e cilësoi këtë si një takim të veçantë për të.

“Brazili është një skuadër që e admiron që nga fëmijëria. Për aq kohë sa më kujtohet, me të gjithë lojtarët fantastikë që kanë pasur, të luash kundër Brazilit do të jetë diçka e veçantë dhe e pabesueshme”.

“Është një vend i bukur dhe i mrekullueshëm. Do të jetë fantastike. Nëse je Brazili, mund të kesh lojtarët më të mirë në botë, sepse ky është Brazili”.

Gjatë deklaratave të tij, sulmuesi norvegjez u ngacmua edhe për një mesazh të mundshëm drejt tifozëve brazilianë, sidomos duke pasur parasysh se di disa fjalë në portugalisht.

“Unë e dua Brazilin!”, u përgjigj Haaland me entuziazëm.

Tani mbetet për t’u parë nëse kjo simpati e madhe e sulmuesit të Norvegjisë për Brazilin do të mbetet e njëjtë edhe pas sfidës së së dielës, kur të dyja skuadrat do të përballen për një biletë në çerekfinalet e Kupës së Botës 2026./

The post “Unë e dua Brazilin”, Haaland pret me padurim duelin e radhës appeared first on Albeu.com.