Pas rrugëtimit të “Dragonjve” në Kupën e Botës, Kerim Alajbegovic është kthyer në Gjermani, pasi arriti të lërë gjurmë në historinë e këtij kompeticioni me fanellën e Bosnjës dhe Hercegovinës.

Në moshën 18-vjeçare, ai mbërriti në Koln, ku e prisnin qindra mbështetës boshnjakë të mbledhur për ta përshëndetur. Pritja u shoqërua me emocione të forta, ndërsa në nder të talentit të ri tifozët interpretuan këngën e njohur “Ljiljane” të Halid Besliqit.

Futbollisti foli edhe për eksperiencën e tij të parë në një Kupë Bote, të cilën e përshkroi si një ngjarje që do ta mbajë mend gjatë në karrierën e tij.

“Hera e parë ishte absolutisht fenomenale. Nuk mund t’u besoja lojtarëve me të cilët po luaja dhe me të cilët ndaja dhomën e zhveshjes. Ishte një ndjenjë e mrekullueshme të luaja për vendin tim”, deklaroi ai.

Alajbegovic u ndal gjithashtu te goli i realizuar kundër Katarit, të cilin e cilësoi si një çast historik si për veten, ashtu edhe për kombëtaren.

“Të shënosh një gol në Kupën e Botës është diçka e veçantë për çdo lojtar. Ajo ishte ndeshja më e rëndësishme për ne në grup dhe është një ndjenjë e jashtëzakonshme kur mund të shënosh për atdheun tënd”, u shpreh Alajbegović.

Edhe pse ende shumë i ri, sulmuesi anësor u shndërrua në një nga figurat kryesore të Bosnjës në Botëror. Ai realizoi në fitoren 3-1 ndaj Katarit dhe u rendit si golashënuesi i tetë më i ri në historinë e Kupës së Botës.

Jo vetëm kaq, por Alajbegovic regjistroi edhe një arritje tjetër të veçantë, duke u bërë lojtari më i ri që ka shënuar nga jashtë zonës së penalltisë në historinë e Kupës së Botës.

Falë talentit dhe paraqitjeve të tij, 18-vjeçari po konsiderohet tashmë si një nga shpresat më të mëdha të futbollit boshnjak për të ardhmen.

The post Kerim Alajbegovic pritet me ovacione në Koln, tifozët boshnjakë i rezervojnë festë pas paraqitjes historike në Kupën e Botës appeared first on Albeu.com.

Me fitoren 2:0 ndaj Bosnjës dhe Hercegovinës në ndeshjen e raundit të 16-të, të luajtur në Santa Clara, SHBA-ja ka prerë biletën për në 1/8 e finales të Kupës së Botës.

Ekipi amerikan vulosi suksesin falë golave të Folarin Balogun në minutën e 45-të dhe Malik Tillman në minutën e 82-të, duke siguruar kështu përballjen e radhës me Belgjikën më 7 korrik në orën 14:00.

Ndeshja nisi më mirë për Bosnjën dhe Hercegovinën, që fitoi një goditje nga këndi që në minutën e parë. Rasti më i mirë i pjesës së parë për boshnjakët erdhi në minutën e 11-të, kur Kerim Alajbegović provoi, por Matt Freese ndërhyri në mënyrë vendimtare.

SHBA-ja u shfaq e rrezikshme fillimisht me Christian Pulisic, ndërsa Balogun gjeti rrjetën në minutën e 31-të, por goli nuk u pranua për shkak të pozicionit jashtë loje. Sulmuesi amerikan nuk gaboi në fundin e pjesës së parë, kur realizoi pas një devijimi të pafavorshëm në mbrojtjen e Bosnjës dhe Hercegovinës.

Vështirësitë për Bosnjën dhe Hercegovinën u shtuan në pjesën e dytë, kur kapiteni Edin Dzeko u detyrua të largohej i dëmtuar në minutën e 51-të. Më pas, në minutën e 63-të, Balogun u ndëshkua me karton të kuq pas një ndërhyrjeje që u verifikua nga VAR-i, duke ndryshuar rrjedhën e takimit.

Edhe pse kishte epërsi numerike, Bosnja dhe Hercegovina nuk arriti të ndërtonte raste të pastra shënimi. Nga ana tjetër, SHBA-ja ruajti organizimin në mbrojtje dhe në minutën e 82-të goditi sërish, me Tillman që realizoi nga gjuajtja e lirë për 2-0.

Deri në fund, përpjekjet e Bosnjës dhe Hercegovinës për të ndryshuar fatin e ndeshjes mbetën të pasuksesshme, ndërsa SHBA-ja e mbylli takimin me një kualifikim të merituar në fazën tjetër të turneut.

The post SHBA mposht edhe Bosnjën dhe Hercegovinën, siguron kalimin në 1/8 e finales të Kupës së Botës appeared first on Albeu.com.

Sonte, Shtetet e Bashkuara të Amerikës dhe Bosnje e Hercegovina do të ndeshen në kuadër të 1/16 së finales së Kupës së Botës, në një përballje ku të dyja përfaqësueset synojnë të mbeten në garë në turneun më prestigjioz të futbollit.

Të dy kombëtaret janë në kërkim të një vendi në 1/8 e finales, fazë në të cilën fituesen e kësaj sfide e pret Kombëtarja e Belgjikës. Belgët e siguruan kualifikimin pas suksesit dramatik 3:2 ndaj Senegalit, të arritur pas vazhdimeve.

Një zhvillim shumë i rëndësishëm për amerikanët është rikthimi i Christian Pulisic. Futbollisti i Milanit është përfshirë në formacionin startues, pasi ka kaluar dëmtimin në pulpën e këmbës së majtë. Ai nuk kishte qenë titullar për SHBA-në që prej ndeshjes së parë të Botërorit ndaj Paraguait më 12 qershor, takim në të cilin u detyrua ta linte fushën në pauzën mes dy pjesëve.

Formacionet zyrtare:

SHBA: Freese, Dest, Richards, Robinson, Ream, Freeman, Adams, McKennie, Tillman, Pulisic, Balogun.

Bosnje dhe Hercegovina: Vasilj, Muharemovic, Kolasinac, Dedic, Katic, Radeljic, Gigovic, Sunjic, Demirovic, Dzeko, Alajbegovic.

Takimi mes SHBA-së dhe Bosnje e Hercegovinës nis në ora 02:00 pas mesnate, sipas kohës lokale në Kosovë.

The post SHBA-Bosnje e Hercegovinë në Kaliforni, publikohen formacionet zyrtare appeared first on Albeu.com.

Kupa e Botës 2026 nuk po dominohet vetëm nga emra me eksperiencë si Lionel Messi dhe Cristiano Ronaldo. Turneu që po zhvillohet në Shtetet e Bashkuara, Meksikë dhe Kanada është kthyer edhe në një vitrinë të rëndësishme për futbollistët e rinj, të cilët po luajnë me vetëbesim dhe po marrin vëmendjen globale.

Nga 85 lojtarë të moshës 21 vjeç e poshtë të grumbulluar për këtë kompeticion, një pjesë e mirë kanë ditur ta shfrytëzojnë rastin, duke treguar në fushë një pjekuri mbresëlënëse.

Turneu po forcon idenë se futbolli po hyn dalëngadalë në një epokë të re, ku brezi i ri po merr gjithnjë e më shumë protagonizëm.

Me energji, talent të pastër dhe guxim, këta futbollistë po dëshmojnë se e ardhmja e këtij sporti tashmë ka nisur.

Rekorde të hershme dhe yje në ngritje

Ibrahim Mbaye i Senegalit, vetëm 18 vjeç, u rendit si golashënuesi i katërt më i ri në historinë e Kupës së Botës pasi realizoi në humbjen 3-1 përballë Francës.

Pesë ditë më pas, 18-vjeçari spanjoll Lamine Yamal gjeti rrugën e rrjetës në suksesin 4-0 kundër Arabisë Saudite, duke përforcuar edhe më tej vlerësimin si një prej talenteve më të mëdhenj të këtij turneu.

Ndërkohë, Gilberto Mora i Meksikës hyri në histori si futbollisti më i ri që përfaqëson një vend organizator në Kupën e Botës, në moshën 17 vjeç e 240 ditë.

Talente që po shpërthejnë në skenën botërore

Ayyoub Bouaddi (Marok, 18 vjeç)

Mesfushori i Lille la përshtypje me qetësinë dhe kontrollin e tij në ndeshjen e parë ndaj Brazilit, ku kompletoi 66 pasime dhe udhëhoqi ritmin e lojës.

Ai është vlerësuar si një futbollist me një pjekuri të pazakontë për moshën që ka.

Yan Diomande (Bregu i Fildishtë, 19 vjeç)

Anësori i RB Leipzig ka ngjallur interesimin e skuadrave si PSG dhe Liverpool. Aftësia e tij në driblime dhe kreativiteti kanë luajtur rol kyç në kualifikimin historik të Bregut të Fildishtë në fazën e 1/8-ave.

Johan Manzambi (Zvicër, 20 vjeç)

Mesfushori ofensiv është shfaqur si një nga surprizat më të mëdha të kompeticionit, me tri gola dhe një asistim.

Madje, ai u fut në histori si një nga lojtarët e paktë nën 21 vjeç që kanë regjistruar më shumë se tre kontribute goli në një Botëror modern.

Kerim Alajbegovic (Bosnje dhe Hercegovinë, 18 vjeç)

Me një gol spektakolar nga distanca, ai hyri në histori si lojtari më i ri që shënon nga jashtë zone në Kupën e Botës që nga viti 1966.

Nestory Irankunda (Australi, 20 vjeç)

Sulmuesi realizoi në ndeshjen e tij të parë në Botëror dhe u bë futbollisti më i ri që shënon për Australinë në këtë garë.

Rrugëtimi i tij bëhet edhe më i veçantë nga historia personale, pasi ai ka lindur në një kamp refugjatësh në Tanzani.

The post Kupën e Botës 2026 po e ndriçon edhe gjenerata e re, përtej Messit dhe Ronaldos appeared first on Albeu.com.

Me triumfin 3-1 ndaj Katarit, Bosnja siguroi kalimin më tej dhe shkroi arritjen më të madhe në historinë e saj në një Kampionat Botëror. Pas sfidës, Ibrahimović foli me krenari për paraqitjen e “Dragojve” dhe për atmosferën që krijuan tifozët boshnjakë.

Në studion e FOX, ish-sulmuesi suedez u ndal te ideja se futbolli ka forcën t’i afrojë njerëzit, sidomos një popull që ka kaluar shumë vështirësi gjatë historisë.

“Kjo është arsyeja pse luhet futbolli – për të bashkuar njerëzit. Sidomos për Bosnjën dhe Hercegovinën, një vend që ka vuajtur shumë. Më pushtojnë emocionet kur shoh gjithë këtë lumturi”, tha Ibrahimović.

Ai pranoi se ky kualifikim kishte një peshë të veçantë edhe për të, për shkak të lidhjeve familjare me këtë vend.

“U rrëmqetha, sepse aty janë rrënjët e babait tim. Kur sheh 70 mijë tifozë duke kënduar, është diçka e jashtëzakonshme”, u shpreh ai.

Sipas tij, mbështetësit boshnjakë kanë qenë një nga tregimet më të bukura të këtij Botërori.

“Jam i lumtur dhe krenar për ta. Momenti më i veçantë ishte kur dëgjova tifozët duke kënduar. E gjithë kjo është shumë emocionuese dhe e vështirë për t’u përshkruar me fjalë”, shtoi ish-futbollisti.

Pas këtij kualifikimi historik, Bosnja dhe Hercegovina do të zbresë në fushë në raundin e 16-tave të Kupës së Botës më 2 korrik në San Francisko, ku do të përballet me përfaqësuesen vendase të Shteteve të Bashkuara.

The post Ibrahimović i prekur nga suksesi historik i Bosnjës appeared first on Albeu.com.

Zlatan Ibrahimovic e cilësoi Alajbegovicin si një talent të veçantë me perspektivë të madhe përpara. Ish-sulmuesi u shpreh i mahnitur nga paraqitja e djaloshit boshnjak në skenën më të madhe të futbollit botëror.

“Të gjithë flasin për golin, por për mua goli nuk është gjëja më e rëndësishme. Ajo që ka më shumë peshë është guximi. Një 18-vjeçar në Kupën e Botës, nën presion, para miliona shikuesve, luan sikur stadiumi të jetë i tij. Kjo është diçka e rrallë. Shumë të rinj kanë talent, dhe talenti është kudo, por pa personalitet ai nuk vlen asgjë”, tha fillimisht Ibrahimovic.

“Kur e pashë Kerimin, nuk pashë një lojtar të ri që shpresonte të kishte një ndeshje të mirë. Pashë një futbollist që besonte se ishte më i miri në fushë. Finalizimi ishte i bukur, po. Edhe teknika ishte perfekte, po”.

“Por ajo që më la mbresa ishte vetëbesimi para golit. Mënyra si kërkonte topin, mënyra si e shfrytëzonte çastin. Lojtarët e mëdhenj nuk presin rastet, ata i krijojnë vetë”.

“Njerëzit do të thonë se ky është vetëm fillimi i rrugëtimit të tij. Ndoshta. Por nëse e ruan këtë mendësi, ky gol do të mbahet mend si momenti kur futbolli kuptoi kush është Kerim Alajbegovic. Kupa e Botës është vendi ku lindin yjet. Sot u prezantua një i ri”, përfundoi ish-kapiteni i Suedisë.

Me 18 vjeç e 276 ditë, Alajbegovic u bë lojtari më i ri në historinë e Kupës së Botës që shënon gol nga jashtë zonës së penalltisë. Ai kaloi francezin Kylian Mbappe, i cili kishte shënuar në moshën 19 vjeç e 207 ditë, dhe kështu kryeson këtë listë. Kjo mbetet një statistikë zyrtare e mbajtur që nga Kupa e Botës 1966 në Angli.

Në anën tjetër, anësori realizoi 13 gola në 44 ndeshje për RB Salzburgun sezonin e kaluar. Ai debutoi me kombëtaren e Bosnjës dhe Hercegovinës në shtator të vitit të kaluar dhe deri tani ka regjistruar dy gola dhe katër asistime në 13 ndeshje.

The post Ibrahimovic i impresionuar nga Alajbegovic: “Luan sikur stadiumi është i tij” appeared first on Albeu.com.

Ekipi i udhëhequr nga Sergej Barbarez e përfundoi fazën e grupeve me katër pikë, pas një paraqitjeje të qëndrueshme, dhe tashmë pret rezultatet nga grupet e tjera për të kuptuar nëse do të sigurojë avancimin si një nga përfaqësueset më të mira të vendeve të treta.

Avantazhi për boshnjakët erdhi në minutën e 29-të, kur Kerim Alajbegoviq realizoi një gol shumë të bukur, duke depërtuar mirë dhe duke e dërguar topin në këndin e sipërm të portës për 1-0.

Pesë minuta më pas, Bosnja e çoi rezultatin në 2-0, kur fati ishte në anën e saj dhe portieri Mahmoud Abunada e devijoi topin në portën e vet, duke shkaktuar autogol.

Para mbylljes së pjesës së parë, Katari arriti të rikthehej në takim. Në minutën e 42-të, Hasan Al Haydos përfitoi nga pasimi i Edmilson Junior dhe shënoi për 2-1, duke i dhënë skuadrës së Julen Lopeteguit besim për vazhdimin e ndeshjes.

Sidoqoftë, Bosnja e mbajti ndeshjen nën kontroll dhe e vulosi suksesin në minutën e 80-të. Pas pritjes së portierit katarian ndaj tentativës së Esmir Bajraktareviqit, topi shkoi te Ermin Mahmiq, i cili shënoi nga afër për rezultatin përfundimtar 3-1.

Boshnjakët patën edhe mundësi të tjera për ta thelluar epërsinë, teksa Edin Dzeko goditi shtyllën, ndërsa Bajraktareviq vuri në provë portierin rival me disa goditje që sollën pritje të rëndësishme.

Me këtë fitore, Bosnja dhe Hercegovina e mbyll Grupin B me katër pikë dhe tani ndjek me vëmendje ndeshjet e grupeve të tjera, me shpresën se kjo pikëmbledhje do t’i mjaftojë për t’u renditur mes skuadrave më të mira në vendin e tretë.

The post Bosnja fiton ndaj Katarit 3-1 dhe vijon të besojë te kualifikimi appeared first on Albeu.com.

Të enjten, më 18 qershor 2026, ai tërhoqi vëmendje të madhe pasi ishte i pranishëm në dy ndeshje brenda ditës. Fillimisht ndoqi suksesin bindës 5-1 të Zvicrës, skuadrës së tij vendase, ndaj Bosnjës dhe Hercegovinës, e më pas u shfaq edhe në përballjen Kanada-Katar.

Prania e tij në të dyja sfidat u konsiderua befasuese, pasi mes tyre kishte vetëm një orë diferencë dhe atij iu desh të lëvizte nga një vend në tjetrin në një interval shumë të shkurtër.

Shpjegimi lidhet me faktin se kreu i FIFA-s përdor avionin e tij privat, i cili udhëton në vende të ndryshme për t’i dhënë mundësi të ndjekë disa ndeshje gjatë së njëjtës ditë.

Infantino e kishte marrë si dhuratë një avion privat për Kupën e Botës nga Qatar Airëays, ndërsa gëzon edhe leje të posaçme sigurie që ia lehtësojnë udhëtimin e shpejtë.

Po ashtu, presidenti i FIFA-s nuk qëndron për gjithë kohëzgjatjen e ndeshjeve, por merr pjesë vetëm në një pjesë të tyre, gjë që i krijon mundësinë të shfaqet në disa takime brenda ditës.

The post Si arrin Gianni Infantino të jetë në dy ndeshje të Kupës së Botës FIFA brenda së njëjtës ditë? appeared first on Albeu.com.

Mesfushori e udhëhoqi sërish repartin e mesit të Zvicrës në fitoren 4-1 ndaj Bosnjës dhe Hercegovinës, ndërsa në fund të takimit vulosi rezultatin përfundimtar me golin e fundit të ndeshjes.

Pasi shënoi nga pika e bardhë, futbollisti zviceran me prejardhje shqiptare bëri një gjest që imitonte të folurin dhe bisedën, duke dërguar kështu një mesazh të qartë.

Sipas mediave në Zvicër dhe Gjermani, ky reagim ishte i drejtuar ndaj mediave zvicerane, të cilat e kishin akuzuar për krijimin e një klime toksike dhe të pashëndetshme në dhomën e zhveshjes dhe brenda ekipit.

Gjithçka lidhet me reagimin e tij pas barazimit me Katarin, kur Xhaka kritikoi ashpër paraqitjen e Zvicrës, sidomos pas golit të pësuar në çastet e fundit të ndeshjes. Në rolin e kapitenit, ai foli hapur për ekipin e tij, por më pas u përball me akuza nga mediat e atjeshme se po nxiste trazira.

Me festën e golit ndaj Bosnjës dhe Hercegovinës, Xhaka duket se zgjodhi t’u përgjigjej pikërisht këtyre kritikave, pasi realizoi penalltinë që vendosi rezultatin 4-1.

“Nuk është gjithmonë e lehtë. Do të gënjeja nëse do të thosha se hyri nga një vesh dhe doli nga tjetri. Më dhemb. Ka gjëra që thjesht nuk i kuptoj. Janë shkruar shumë, pardje pati një artikull të madh që nuk mund ta injorosh”, tha Xhaka pas fitores.

Në ndryshim nga reagimi pas ndeshjes së parë, kësaj here ai i përgëzoi bashkëlojtarët për paraqitjen si grup, disiplinën dhe luftën e treguar gjatë të 90 minutave. Xhaka nënvizoi gjithashtu se Zvicra u paraqit e fortë dhe e bashkuar në fushë.

The post Mesazhi i Xhakës pas golit ndaj Bosnjës dhe Hercegovinës, zbulohet kujt iu drejtua appeared first on Albeu.com.

Në ‘SoFi Stadium’, dy përfaqësueset do të zbresin në fushë me synimin për të marrë fitoren e parë në këtë Botëror, rezultat që do t’i afronte ndjeshëm me kualifikimin në fazën tjetër.

Të dyja skuadrat vijnë pas barazimeve 1-1 në ndeshjet hapëse: Zvicra mori një pikë ndaj Katarit, ndërsa Bosnja e Hercegovina e mbylli me të njëjtin rezultat sfidën kundër Kanadasë.

Nga minuta e parë për zviceranët aktivizohet mesfushori shqiptar Granit Xhaka, ndërsa Ardon Jashari, ashtu si edhe në duelin e kaluar, e nis ndeshjen nga stoli.

Në krahun tjetër, përzgjedhësi i Bosnjës, Sergej Barbarez, i ka besuar sërish lojtarëve si Kerim Alajbegovic, Edin Dzeko dhe Ermedin Demirovic.

Formacionet zyrtare:

Zvicra: Kobel, Elvedi, Akanji, Rodriguez; Widmer, Aebischer, Rieder, Ndoye; Xhaka, Freuler; Embolo.

Bosnja: Vasilj; Kolasinac, Muharemovic, Katic, Dedic; Alajbegovic, Tahirovic, Sunjic, Memic; Dzeko, Demirovic.

The post Zyrtarizohen formacionet për Zvicër – Bosnje, të dyja ekipet synojnë suksesin e parë në Botëror appeared first on Albeu.com.