Seanca gjyqësore pritet të nisë në orën 12:00, siç bëhet me dije në shkresën e gjykatës drejtuar Drejtorisë Vendore të Policisë së Tiranës, përmes së cilës kërkohet shoqërimi i 7 të arrestuarve në gjykatë.

Bëhet fjalë për 7 nga të arrestuarit: Rei Bogdani, Sindrit Peka, Joel Korbi, Kreshnik Kastrati, Zeni Guraj, Daniel Zeka dhe Oresti Halilaj.

Ata akuzohen për veprat penale “Goditja për shkak të detyrës”, “Plagosja e rëndë me dashje”, “Prishja e rendit dhe qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr” dhe “Kundërshtimi i punonjësit të rendit publik”.

Po ashtu, nën hetim në gjendje të lirë u vu edhe sekretari organizativ i PD-së Ervin Minarolli, për veprat penale “Organizimi dhe pjesëmarrja në grumbullime dhe manifestime të paligjshme” dhe “Shtytja e të miturit në krim”.

Po ashtu materialet u referuan edhe për deputetët Belind Këlliçi, Flamur Noka, Klevis Balliu dhe Luan Baçi, për veprat penale “Kundërshtimi i punonjësit të Policisë së rendit publik” dhe “Shtytja e të miturit në krim”.

Sipas policisë, nga molotovët mbetën të lënduar 16 efektivë, të cilët pësuan djegie dhe dëmtime fizike dhe u mjekuan në spital.

Në spital përfundoi gjithashtu edhe deputeti Bledjon Nallbati, i cili pësoi hematomë në kokë dhe pati shqetësime nga gazi lotsjellës që hodhi policia.

The post Hodhën molotovë drejt Kryeministrisë dhe Parlamentit gjatë protestës së PD, dalin të premten para gjykatës 7 nga të arrestuarit appeared first on Albeu.com.