Eventi, i organizuar nga një partneritet privat-publik me mbështetjen e Shtëpisë së Bardhë, do të përfshijë fluturime ajrore nga qindra avionë ushtarakë dhe civilë, si edhe një shfaqje gjigante fishekzjarrësh, që organizatorët shpresojnë të jetë më e madhja e organizuar ndonjëherë.

Sipas organizatorëve, fluturimet mbi Uashington do të zhvillohen çdo orë nga ora 13:15 sipas kohës lokale deri në perëndimin e diellit. Në një nga formacionet ajrore do të përfshihet edhe avioni i ri presidencial, Air Force One.

Megjithatë, aktiviteti është shoqëruar me polemika. Kundërshtarët e Trump e kanë akuzuar atë se po e politizon festën kombëtare, ndërsa disa grupe muzikore u tërhoqën nga pjesëmarrja menjëherë pas shpalljes së programit.

Organizatorët përballen edhe me sfida të tjera, pasi temperaturat pritet të arrijnë rreth 38°C, të shoqëruara me lagështi të lartë, çka mund të ndikojë në numrin e pjesëmarrësve.

Gjithashtu, meteorologët paralajmërojnë mundësinë e stuhive në mbrëmje, të cilat mund të prishin zhvillimin e ceremonive.

Gjatë një aktiviteti në Dakotën e Veriut në fillim të kësaj jave, Trump premtoi se do të mbante një “fjalim vërtet të gjatë” gjatë festimeve të 4 Korrikut, duke deklaruar me humor se dëshironte “të tregonte se mund të bëjë gjithçka”.

Festimet zyrtare do të nisin në orën 19:00 sipas kohës lokale.

Shfaqja e fishekzjarrëve për 4 korrik është një traditë vjetore në Uashington DC, dhe Trump ka premtuar se versioni i këtij viti, i cili është planifikuar të fillojë pas fjalimit të tij do të jetë “shfaqja më e madhe e fishekzjarrëve në histori”.

Sipas organizatorëve të eventit, afërsisht 850,000 fishekzjarre do të hidhen nga 10 vende në të gjithë qytetin, duke përfshirë tetë barka në lumin Potomac. Pritet që eventi të zgjasë 40 minuta, dy herë më shumë se shfaqja e zakonshme që përmban rreth 20,000 fishekzjarre.

The post 250-vjetori i Pavarësisë së Amerikës / Pritet fjalimi i Trump në Uashington dhe spektakli i fishekzjarreve appeared first on Albeu.com.