Ish-kryeministri i Kosovës, Ramush Haradinaj, ka kujtuar sot 22 korrikun, datën kur Gjykata Ndërkombëtare e Drejtësisë vlerësoi se shpallja e pavarësisë së Kosovës përputhej me normat e së drejtës ndërkombëtare.

Në një mesazh në Facebook, ai e përshkroi këtë vendim si një prej momenteve kyçe në rrugëtimin e shtetformimit dhe konsolidimit të shtetësisë kosovare.

Haradinaj theksoi se Gjykata Ndërkombëtare e Drejtësisë, më 22 korrik 2010, vërtetoi se pavarësia e shpallur më 17 shkurt 2008 ishte në pajtim me ligjin ndërkombëtar, duke i dhënë kështu vulën përfundimtare shtetësisë sonë, të drejtë kjo e fituar nëpërmjet luftës çlirimtare dhe që shënoi një hap të rëndësishëm drejt afirmimit të shtetit tonë sovran.

Ai theksoi se Kosova duhet të ecë përpara në rrugën e saj euroatlantike, duke forcuar partneritetin me aleatët ndërkombëtarë, veçanërisht me Shtetet e Bashkuara të Amerikës.

Sipas Haradinajt, vetëm nëpërmjet përqafimit të vlerave perëndimore dhe thellimit të marrëdhënieve me SHBA-në, Kosova mund të arrijë objektivat e saj strategjike si shtet sovran.

The post Haradinaj: Vendimi i Gjykatës Ndërkombëtare të Drejtësisë i dha vulën shtetësisë së Kosovës, partneriteti me SHBA-në mbetet rruga e vetme appeared first on Albeu.com.

Ish-presidentja Vjosa Osmani ka përcjellë urimin e saj për Shtetet e Bashkuara të Amerikës me rastin e Ditës së Pavarësisë.

Për këtë përvjetor, ajo ka rikthyer një pjesë nga fjalimi që kishte mbajtur vitin e kaluar në nder të kësaj feste.

“Amerika nuk na shpëtoi jetën nëpërmjet frazave boshe, ligjëratave historike apo debateve të kota, por me veprim e vendosmëri”, tha Osmani.

“Kur disa hezitonin e fshiheshin prapa fjalimeve, Amerika veproi. Kur disa fshiheshin prapa interpretimeve të ligjeve, Amerika veproi. Kur disa thirreshin në miqësi historike me Serbinë, Amerika veproi”.

Osmani u shpreh se liria e Kosovës mban gjurmë amerikane në çdo hap, nga jetët e shpëtuara deri te ngritja e institucioneve.

“Kur disa i frikësoheshin kostos politike, Amerika veproi mbi parime, mbi vlera njerëzore dhe u shndërrua, për të satën herë me radhë, në kompasin moral të të gjithë njerëzimit”.

“Për të qenë pranë nesh, Amerika veproi me avionë, me helikopterë, me bomba ndaj armiqve tanë, e me djemtë e vajzat amerikane që rrezikuan jetën e tyre në mënyrë që të shpëtohej jeta jonë. Amerika veproi me fonde, me resurse humane, me ekspertizë, me gjithçka, që ne sot të jemi ky shtet që jemi: i lirë, i pavarur, sovran, demokratik”.

“Liria jonë ka gjurmë amerikane kudo. Në jetët e shpëtuara, në institucionet e ndërtuara, në çdo rresht të Deklaratës së Pavarësisë, në çdo njohje të kësaj pavarësie, në çdo sukses e në çdo të arritur”.

Sipas Osmanit, 17 Shkurti i Kosovës dhe 4 Korriku i ShBA-së bartin të njëjtin kuptim, pasi të dyja përfaqësojnë lirinë e ndërtuar mbi sakrificë dhe aleanca.

“Prandaj, kur Amerika kërkon veprim nga Kosova, ne duhet të përgjigjemi njësoj siç na u përgjigj ajo kur na duhej më së shumti: me veprim, me vendosmëri, me përkrahje, me miqësi. Sepse miku i mirë dihet në ditë të vështira”.

“Si 17 Shkurti, ashtu edhe 4 Korriku simbolizojnë të njëjtën gjë: lirinë”.

“Një liri e ndërtuar mbi sakrificë e aleanca. Një aleancë që do të rrojë po aq sa shteti i Kosovës: përgjithmonë!”

The post Osmani në urimin për 4 Korrikun: Amerika na doli në krah me veprime, edhe Kosova duhet të përgjigjet me vendosmëri appeared first on Albeu.com.

Në njoftimin e publikuar më pas, ambasada vuri në pah praninë e pjesëmarrësve dhe theksoi se atmosfera e krijuar e shndërroi festën në një ngjarje të veçantë.

“Faleminderit të gjithëve që na u bashkuan dje në Ambasadën Amerikane në Prishtinë, për të festuar 250-vjetorin e Pavarësisë së Amerikës! Prania juaj e bëri këtë festë historike vërtet të veçantë”, thuhet në njoftimin e Ambasadës.

Po ashtu, ambasada ndau edhe disa nga çastet kryesore të mbrëmjes dhe i ftoi pjesëmarrësit të shpërndajnë kujtimet dhe fotografitë e tyre nga festa.

“Shijoni disa nga momentet kryesore të mbrëmjes dhe ndani momentet tuaja të preferuara duke përdorur #Liria250. #250Dita e Pavarësisë”, thuhet më tej në njoftim.

The post Ambasada amerikane në Prishtinë falënderon të pranishmit për festën e 250-vjetorit të Pavarësisë appeared first on Albeu.com.

Ai theksoi se qytetarët e Kosovës për një periudhë të gjatë janë privuar nga liria dhe nga të drejtat themelore, ndërsa ndihma e SHBA-së, sipas tij, ka qenë përcaktuese në rrugëtimin drejt lirisë dhe pavarësisë.

Kurti shprehu falënderimin e vazhdueshëm të Kosovës ndaj Shteteve të Bashkuara për përkrahjen, partneritetin dhe aleancën e pazëvendësueshme.

Në postimin e tij, Kurti shkroi: “250 vjet!”.

Ai përmendi se Jeta, Liria dhe Kërkimi i Lumturisë janë të veçuara në preambulën e Deklaratës së Pavarësisë së Shteteve të Bashkuara të Amerikës, mes të drejtave të patjetërsueshme, si bazë e qeverisjes që krijohet me miratimin e popullit.

Sipas tij, ndërsa bota e civilizuar është frymëzuar nga këto vlera, populli i Kosovës për një kohë shumë të gjatë ka mbetur i privuar prej tyre. Ai nënvizoi se përvoja e Kosovës është unike, pasi për vendin tonë jetësimi i këtyre vlerave dhe të drejtave lidhet ngushtë me SHBA-të.

Kurti shtoi se këmbënguljes dhe sakrificës së popullit të Kosovës për liri dhe pavarësi, natyrshëm iu bashkua ndihma amerikane.

Ai bëri të ditur gjithashtu se mbrëmë ishte i nderuar që mori pjesë në shënimin e Ditës së Pavarësisë së SHBA-ve në ambasadën amerikane në kryeqytetin e Republikës së Kosovës, duke përsëritur se Kosova është përherë falënderuese dhe mirënjohëse ndaj SHBA-ve për ndihmën, partneritetin dhe aleancën e pazëvendësueshme.

The post Kurti: Kosova mbetet gjithmonë mirënjohëse ndaj SHBA-së për mbështetjen, partneritetin dhe aleancën appeared first on Albeu.com.

Në Prishtinë, Ambasada e SHBA-së ka vendosur një flamur të madh amerikan në ambientet e saj, si pjesë e shenjave simbolike që i paraprijnë kremtimit të këtij përvjetori.

Me rastin e këtij jubileu të rëndësishëm për shtetin amerikan, E Ngarkuara me Punë e Ambasadës së SHBA-së në Kosovë, Anu Prattipati, pritet të mbajë një pritje solemne.

Aktivitete për këtë përvjetor janë paralajmëruar edhe në nivel lokal në Kryeqytet.

Kryetari i Komunës së Prishtinës, Përparim Rama, ka njoftuar se më 2 korrik, nën patronatin e Kryeqytetit, do të mbahet ngjarja “America and Kosova – A Freedom Story for the Next 250 Years”.

Sipas njoftimit, ky aktivitet do të fillojë në orën 10:00 dhe do t’i kushtohet historisë së lirisë, partneritetit dhe miqësisë mes Shteteve të Bashkuara të Amerikës dhe Kosovës, si edhe bashkëpunimit ndërinstitucional ndërmjet dy vendeve.

The post Kosova shënon 250-vjetorin e Pavarësisë së SHBA-së me aktivitete të veçanta appeared first on Albeu.com.

Ai rikujton se fjalimi i Millosheviqit në atë ditë hapi kapitullin e luftërave në ish-Jugosllavi, ndërsa përgjigjja e Ibrahim Rugovës, e botuar në revistën gjermane Der Spiegel, sinjalizoi dështimin e politikave serbe.

Sipas Buxhovit, përmbyllja historike e kësaj përballjeje ishte çlirimi i Kosovës dhe shpallja e pavarësisë më 17 shkurt 2008, edhe pse, siç thekson ai, klerofashizmi serb vazhdon të përpiqet ta mbajë gjallë mitin e Kosovës përmes shënimit të Vidovdanit.

Shkrimi i plotë:

MITI I SAJUAR I KOSOVËS, KLEROFASHIZMI SERB DHE SHTETI I KOSOVËS…

Para 37 vitesh, në Gazimestan, përballë një turme serbe prej një milion vetash, Millosheviqi me deklaratën se “pas gjashtë shekujsh, prapë gjendemi para betejave dhe në beteja, të cilat nuk janë të armatosura, por sado që të tilla nuk përjashtohen”, hapi kapitullin e përgjakshëm të shkatërrimit të Jugosllavisë, me pasoja tragjike për popujt e saj.

Atë ditë, në tribunën e Gazimestanit, përpara kryesisë së shpërbërë jugosllave dhe syve të një bote të hutuar nga ajo që po ndodhte me trashëgiminë e Titos, u promovua “vozhdi” serb, i reinkarnuar nga Lazari i Kosovës për të rikthyer “lavdinë historike serbe” dhe, siç u tha, “misionarizmin e serbëve për ta mbrojtur qytetërimin europian” (kuptohet nga shqiptarët pushtues të tokave të shenjta serbe)!

Në të njëjtën kohë, diku pranë Gazimestanit, dr. Ibrahim Rugova, atëherë kryetar i Shoqatës së Shkrimtarëve të Kosovës, në një intervistë historike për magazinin gjerman “Der Spiegel”, ndër të rrallët, në emër të ndërgjegjes intelektuale, historike, kulturore dhe politike, ndonëse pa mandat të saj, iu përgjigj kërcënimeve të Millosheviqit ndaj shqiptarëve dhe të tjerëve në festën klerofashiste të Vidovdanit serb.

Shkurtimisht, kundërpërgjigjja e Dr Rugovës ndaj Millosheviqit, në të përjavshmen më të fuqishme gjermane dhe europiane të kohës, ishte se më 23 mars të atij viti, Millosheviqi, me tanke dhe në kushtet e gjendjes së jashtëzakonshme, e rrënoi autonominë e Kosovës si njësi federative. Me këtë, ai kreu puç ndaj kushtetutës jugosllave. Ky veprim nga shqiptarët shihet si ripushtim i Kosovës, pas atij të vitit 1945. Me këtë rast, Rugova u tërhiqte vërejtjen serbëve se “sa herë ndonjë popull i vogël, e të tillë janë edhe serbët, kanë provuar të vejnë hegjemoni në Ballkan, kanë përfunduar tragjikisht”.

Kështu, orgjia klerofashiste serbe e qershorit të vitit 1989 përfundoi pikërisht siç kishte parashikuar dr Rugova në magazinin gjerman. Por, nga këndvështrimi i sotëm historik, Gazimestani nxori në pah dy prej akterëve më të rëndësishëm të saj, të cilët shënuan epoka me kahe të kundërta.

Në njërën anë ishte Millosheviqi, humbësi i saj, i cili në vitin 2003, si president i mbetjes jugosllave, përfundoi në Trtibunalin Ndërkombëtar të Hagës për krime lufte kundër njerëzimit, ku edhe vdiq gjatë procesit në vitin 2006.

Në anën tjetër ishte dr Ibrahim Rugova, lideri historik i shqiptarëve, i cili, me themelimin e LDKs-ë më 23 dhjetor të vitit 1989, me mandatin e votës së lirë nga zgjedhjet presidenciale dhe parlamentare të viteve 1992 dhe 1998, mori përgjegjësinë historike të rezistencës institucionale-aktive paqësore, me shtetin paralel, deri te ajo e armatosur, që solli ndërhyrjen ushtarake të NATO-s nga 24 marsi deri më 10 qershor 1999.

Mund të thuhet se historia mes demistifikimit të mitit të sajuar serb të Kosovës për synime hegjemoniste dhe çlirimit të Kosovës prej tij, me epilog shtetin e pavarur të Kosovës të shpallur më 17 shkurt 2008, fillimin e fundit e pati më 28 qershor 1989 në Gazimestan.

Megjithatë, ky kapërcim i jashtëzakonshëm historik ka lënë pas frymën e klerofashizmit serb, i cili në çdo Vidovdan përpiqet që në Kosovë ta mbajë të gjallë mitin mesjetar të “Kosovës djep historik serb”, ndonëse realiteti, shteti i Kosovës dhe përkatësia perëndimore e shqiptarëve, e ka zhvlerësuar atë deri në anakronizëm!

The post Buxhovi: Rugova iu kundërvu Millosheviqit qysh në vitin 1989 appeared first on Albeu.com.

“Kryeministri i Shqipërisë, Edi Rama, do të zhvillojë një vizitë pune në Kosovë.

Gjatë qëndrimit në Prishtinë, Kryeministri Rama do të takohet me Presidenten e Republikës së Kosovës, Vjosa Osmani, si dhe më pas me Kryeministrin e Kosovës, Albin Kurti. Kryeministri Rama do të marrë pjesë në promovimin e librit “Kur heshtja flet” të autorit Ahmet Shala, si edhe do të mbajë një leksion të hapur me të rinjtë e Universitetit “Hasan Prishtina” dhe nxënësit e gjimnazit “Sami Frashëri”.”, thuhet në njoftimin e Kryeministrisë.

Po ashtu Policia e Kosovës ka njoftuar se do të ndërmarrë masa për ruajtjen e rendit dhe qetësisë publike, si dhe për rregullimin e trafikut gjatë kohës së lëvizjes së eskortës dhe qëndrimit të delegacionit në vend.

Sipas njoftimit, për të mundësuar qarkullimin e lirë të eskortës, nga pika kufitare në Aeroport dhe përgjatë itinerarit të paraparë sipas agjendës zyrtare, do të ketë ndërprerje të përkohshme të qarkullimit në disa segmente rrugore, në intervale të shkurtra kohore.

“Më datën 16 shkurt 2026, në Republikën e Kosovës, do të qëndrojë për vizitë zyrtare, Kryeministri i Republikës së Shqipërisë z. Edi Rama. Me këtë rast Policia e Kosovës, gjatë kësaj vizite do të kujdeset për ruajtjen e rendit dhe qetësisë publike si dhe rregullimin e trafikut, gjatë kohës së lëvizjes së eskortës dhe kohës së qëndrimit të delegacionit në Kosovë. Për të mundësuar qarkullim të lirë të eskortës sipas itinerarit të lëvizjes nga pika kufitare Aeroporti si dhe zhvillimin e aktiviteteve sipas agjendës zyrtare së vizitës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore (ku pritet të kalojë eskorta), ku edhe mund të ketë riorientim të trafikut në rrugë alternative. Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”, thuhet në njoftimin zyrtar të Policisë së Kosovës.

The post Festa e Pavarësisë së Kosovës/ Nga takimi me krerët e shtetit, te leksioni me studentët, Rama vizitë zyrtare sot në Prishtinë appeared first on Albeu.com.

Në letër e nisur nga Trumpi, Kosova është përgëzuar për pjesëmarrjen në themelimin e Bordit të Paqes, si dhe për mbështetjen e këtij vendi në përpjekjet e SHBA-së për t’i zgjidhur problemet globale në Ukrainë, Gazë dhe vende tjera.

“Teksa marrëdhënia mes dy vendeve vazhdon të rritet, ne mirëpresim zgjerimin e partneritetit përmes bashkëpunimit tregtar dhe investimeve. Shtetet e Bashkuara janë të gatshme të punojnë së bashku me Kosovën për të avancuar paqen dhe stabilitetin për të mirën e përbashkët”, është thënë mes tjerash në letër.

Shtetet e Bashkuara i kanë ndarë mbi 2 miliardë dollarë për Kosovën prej vitit 1998.

Udhëheqës shtetërorë kosovarë e kanë përsëritur ndër vite që Amerika është partnerja më e rëndësishme e Kosovës dhe se mbështetja e saj është jetike.

Në këtë linjë, Kosova së fundmi i është bashkuar nismës së Trumpit, Bordi i Paqes, përmes së cilës SHBA-ja synon dhënien fund të konflikteve në botë.

Megjithatë, marrëdhëniet mes Kosovës dhe SHBA-së me raste janë tensionuar, për shkak të disa veprimeve të Qeverisë paraprake të kryeministrit Albin Kurti që kishin të bënin me minoritetin serb dhe në sytë e zyrtarëve amerikanë ishin të njëanshme dhe të pakoordinuara.

Për pasojë, SHBA-ja vitin e kaluar e ka pezulluar Dialogun Strategjik me Kosovën, pa nisur ende.

Por nga Ambasada amerikane në Prishtinë i kanë thënë Radios Evropa e Lirë në javët e fundit se SHBA-ja është e gatshme të rinisë këtë proces me Kosovën dhe të punojë me Kurtin, i cili javën e kaluar e ka nisur mandatin e tretë si kryeministër.

SHBA-ja ka qenë ndër vendet e para që e ka njohur pavarësinë e Kosovës, të shpallur më 17 shkurt 2008. Shtetësia e saj njihet nga 121 shtete, por sfidë mbetet ende mosnjohja nga katër shtete të NATO-s dhe pesë të Bashkimit Evropian, dy trupa në të cilët Kosova synon të anëtarësohet./ REL

The post Trump uron Kosovën për 18-vjetorin e shtetësisë: Mirëpresim zgjerimin e partneritetit përmes bashkëpunimit tregtar dhe investimeve appeared first on Albeu.com.

Edhe pse më 28 Nëntor ishte festuar Pavarësia, Zaka përsëriti urimin për këtë ditë, në vend që të përshëndeste qytetarët për Ditën e Çlirimit.

“Urime Dita e Pavarësisë për të gjithë banorët e Lushnjës dhe mbarë Shqipërisë. Ne ndodhemi këtu për të nderuar dëshmorët dhe sakrificën që na solli një Shqipëri të lirë e të pavarur,” u shpreh ajo.

The post Gafa e deputetes së PS, ngatërron ditën e Çlirimit me atë të Pavarësisë (VIDEO) appeared first on Albeu.com.

Në emër të Shteteve të Bashkuara të Amerikës, DASH uron popullin e Shqipërisë ndërsa feston sot Ditën e Pavarësisë.

“Shtetet e Bashkuara dhe Shqipëria gëzojnë një partneritet të fortë, të ndërtuar mbi një angazhim të përbashkët për një të ardhme më të sigurt dhe më të begatë.

Aleanca jonë në NATO është themeli i mbrojtjes sonë të ndërsjellë dhe ne mirëpresim investimet në rritje të Shqipërisë në sigurinë tonë kolektive.

Përveç kësaj, partneriteti ynë me zbatimin e ligjit në Shqipëri i bën qytetarët tanë më të sigurt, ndërsa përballemi me kërcënimet e paraqitura nga grupet kriminale transnacionale, kartelet e trafikut të drogës dhe ata që bashkëpunojnë me to.

Ne gjithashtu vlerësojmë bashkëpunimin tonë të ngushtë në adresimin e kërcënimeve kibernetike dhe përgëzojmë Shqipërinë për hapat e saj të rëndësishëm në sigurinë kibernetike.

Ndërsa shënojmë këtë ditë të veçantë, ne mezi presim të zgjerojmë bashkëpunimin tonë të sigurisë, lidhjet ekonomike dhe miqësinë e qëndrueshme me Shqipërinë”, thuhet në mesazhin e DASH-it.

The post Dita e Pavarësisë, DASH uron popullin shqiptar: Mezi presim të zgjerojmë bashkëpunimin tonë appeared first on Albeu.com.