Një deklaratë e fundit e Snezhana Paunoviq, ministre e Administratës Publike dhe Vetëqeverisjes Lokale në Serbi, ka shkaktuar një reagim të ashpër nga deputetja britanike Alicia Kearns. Paunoviq kishte thënë se po të ishte në pozitën e Sllobodan Millosheviqit, do ta kishte çuar deri në fund spastrimin etnik të Kosovës gjatë vitit 1998.

Përmes një postimi në platformën X, Kearns e quajti këtë qëndrim “një njollë për Qeverinë e Serbisë”, duke e cilësuar si mbështetje të turpshme për spastrimin etnik në Kosovë.

Deputetja britanike solli në vëmendje se brezi që sot është në të tridhjetat ruan ende të freskëta kujtimet e mizorive që forcat e regjimit të Millosheviqit ushtruan mbi ta dhe familjarët e tyre. Sipas saj, asnjë lloj justifikimi nuk mund t’i zbehë këto krime dhe aq më pak t’i lartësojë ato.

“Asnjë përpjekje për të justifikuar — e lëre më për të lavdëruar — këto krime nuk mund ta shtyjë botën të harrojë çfarë ndodhi në Kosovë,” theksoi ajo.

Në mbyllje të reagimit të saj, Kearns bëri thirrje që krimet e kryera në Kosovë të mbeten përgjithmonë në kujtesë, duke e përmbyllur mesazhin me fjalët: “Mos harroni kurrë”.

The post Reagimi i deputetes britanike Kearns pas deklaratës së Paunoviqit: Krimet e Millosheviqit në Kosovë s’do të fshihen nga kujtesa e botës appeared first on Albeu.com.

Ministri i Punëve të Brendshme në detyrë i Kosovës, Xhelal Sveçla, njoftoi se Snezhana Paunoviq, ministre e Administratës Publike dhe Vetëqeverisjes Lokale të Serbisë, është shpallur person i padëshiruar dhe i është ndaluar përgjithmonë kalimi dhe qëndrimi në territorin e Kosovës.

Masa erdhi pasi Paunoviq deklaroi ditë më parë se gjatë vitit 1998 do të kishte kryer një spastrim etnik në Kosovë.

Sveçla theksoi se këto shprehje tregojnë që Serbia vazhdon të jetë e lidhur me ideologjinë e pastrimit etnik ndaj shqiptarëve, duke iu referuar edhe periudhës së ish-presidentit Sllobodan Millosheviq. Ai shtoi se institucionet e Kosovës do të reagojnë me vendosmëri ndaj çdo kërcënimi që cenon sigurinë, sovranitetin dhe rregullin kushtetues të vendit.

Analisti politik Artan Nimani e cilësoi vendimin si të drejtë dhe të nevojshëm. Në një prononcim për “Bota sot”, ai u shpreh se deklaratat që justifikojnë spastrimin etnik nuk janë thjesht provokime politike, por përbëjnë një kërcënim për paqen dhe bashkëjetesën.

Nimani shtoi se Kosova, si shtet sovran, ka jo vetëm të drejtë por edhe detyrim të mbrojë dinjitetin e vet dhe qytetarët e saj, duke kërkuar që e gjithë shoqëria të ngrejë zërin kundër narrativave që përpiqen të relativizojnë krimet e së kaluarës.

“Kjo masë është e merituar dhe e domosdoshme. Tashmë duhet t’i jepet fund përfundimisht retorikës dhe mentalitetit politik që e trajton Kosovën me sytë e viteve ’90 dhe kërkon të arsyetojë krimet e pastrimit etnik. Fjalë të tilla nuk përbëjnë vetëm provokime të natyrës politike, por godasin themelet mbi të cilat janë ngritur paqja dhe bashkëjetesa. Si shtet sovran, Kosova ka jo vetëm të drejtë, por edhe detyrim të ruajë dinjitetin e vet shtetëror dhe qytetarët e saj. Në këtë kontekst, heshtja nuk duhet të jetë qëndrimi i politikës. Mbarë shoqëria, përfshirë akademinë, mediat dhe institucionet, duhet të flasë kundër këtij diskursi të rrezikshëm, i cili orvatet të zbehë dhimbjet e të shkuarës dhe të rrezikojë të ardhmen tonë. Përballë urrejtjes dhe mohimit, përgjigjja jonë duhet të jetë e prerë: mbrojtje e palëkundur e shtetit, e së vërtetës historike dhe e parimeve demokratike,” – deklaroi ai për “Bota sot”.

The post Kosova shpall “non grata” ministren serbe: Mjaft me gjuhën e spastrimit etnik appeared first on Albeu.com.

Sekretari i Përgjithshëm i Partisë Demokratët Evropianë (EDP), Sandro Gozi, i kërkoi presidentit serb Aleksandar Vuçiq që të distancohet në mënyrë kategorike nga deklaratat e një ministreje të qeverisë së tij dhe të sigurojë shkarkimin e saj të menjëhershëm.

Reagimi vjen pasi ministrja Snezhana Paunoviq shpërtheu në një deklaratë provokuese, duke pohuar se po të kishte qenë në vend të Sllobodan Millosheviqit në vitin 1998, do ta kishte “spastruar etnikisht” Kosovën.

Nga selia e EDP-së, kjo deklaratë u cilësua si skandaloze dhe krejtësisht e patolerueshme. “Ajo përbën një mbështetje të hapur për shpërnguljen e dhunshme, përndjekjet dhe krimet kundër njerëzimit, ndërsa legjitimon vetë agjendën për të cilën u vu në akuzë Sllobodan Millosheviqi,” theksohej në njoftimin e partisë.

Gozi u shpreh prerazi: “Presidenti Aleksandar Vuçiq duhet t’i dënojë pa mëdyshje këto shprehje dhe të sigurojë largimin e menjëhershëm të saj nga pozita”.

Reagimi i Demokratëve Evropianë vijonte më tej duke argumentuar se Serbia nuk mund të shfaqë bindshëm përkushtim për anëtarësim në Bashkimin Evropian, kur zyrtarë të lartë të ekzekutivit të saj ringjallin frazeologjinë dhe botëkuptimin e epokës së Millosheviqit. “Respekti për vlerat evropiane nis me refuzimin e qartë të gjuhës së spastrimit etnik – pa asnjë lloj hamendësie apo justifikimi,” përfundonte deklarata.

The post Reagim i Ashpër nga Demokratët Evropianë ndaj Thirrjes së Ministres Serbe për Spastrim Etnik në Kosovë appeared first on Albeu.com.