Treguesi ka shënuar një përmirësim të lehtë, por mbetet dukshëm më i lartë krahasuar me Europën dhe vendet e tjera të Ballkanit Perëndimor, referon Organizata e Kombeve të Bashkuara për Ushqimin dhe Bujqësinë.

Brenda një viti, pasiguria ushqimore është reduktuar me 1.2 pikë përqindjeje. Megjithatë, niveli shqiptar është rreth 4.3 herë më i lartë se mesatarja europiane prej 7.4% dhe rreth 5.5 herë mbi mesataren e Europës Jugore, e cila është 5.8%.

Edhe në raport me vendet e tjera të Ballkanit Perëndimor, Shqipëria ka një situatë shumë më të rënduar. Për vitet 2023–2025, pasiguria ushqimore e moderuar ose e rëndë llogaritet në 9.2% në Maqedoninë e Veriut, 9% në Malin e Zi, 8.7% në Bosnjë-Hercegovinë dhe 6.7% në Serbi.

Nga e gjithë popullsia, 8.3% e shqiptarëve përfshihen në kategorinë e pasigurisë së rëndë ushqimore.

Kjo kategori nënkupton raste kur familjet nuk kanë ushqim, detyrohen të konsumojnë më pak nga sa u nevojitet, përballen me uri ose kalojnë një ditë të tërë pa ngrënë për shkak të mungesës së parave apo burimeve të tjera.

Ndërkohë, të dhënat për fëmijët tregojnë një prirje pozitive. Shkalla e fëmijëve nën pesë vjeç me zhvillim të vonuar fizik zbriti nga 16.5% në vitin 2012 në 7.4% në vitin 2024. Në të njëjtën periudhë, mbipesha te fëmijët ra nga 20.9% në 16.7%.

E kundërta është vërejtur te obeziteti i të rriturve. Në vitin 2024, 24.1% e personave mbi 18 vjeç ishin obezë, krahasuar me 17.8% në vitin 2012. Numri i të rriturve obezë vlerësohej në rreth 500 mijë.

Përkeqësim ka pasur edhe te anemia te gratë e moshës 15–49 vjeç, ku treguesi u rrit nga 20.1% në vitin 2012 në 24.7% në vitin 2023.

Dieta e përditshme e shqiptarëve kushton 70% më shumë se në vitin 2017 dhe 30% më shumë se mesatarja europiane.

Sipas të dhënave për vitin 2025, një person në Shqipëri duhet të shpenzojë minimalisht 5.16 dollarë ndërkombëtarë në ditë, sipas barazisë së fuqisë blerëse, për të siguruar një dietë të shëndetshme.

Kjo kosto ishte 3.04 dollarë në vitin 2017, çka do të thotë se deri në vitin e kaluar çmimi i një diete të tillë u rrit me rreth 70%, sipas raportit më të fundit “Gjendja e Sigurisë Ushqimore dhe Ushqyerjes në Botë 2026”.

Vlera në Shqipëri është rreth 30% më e lartë se mesatarja europiane prej 3.97 dollarësh dhe 12% mbi mesataren e Europës Jugore, e cila arrin në 4.62 dollarë.

Sipas metodologjisë së FAO-s, 5.16 dollarë përfaqësojnë koston minimale ditore për ushqyerjen e shëndetshme të një personi në Shqipëri.

Kjo shumë përcaktohet duke përzgjedhur ushqimet me çmimin më të ulët që ofrojnë energjinë dhe larminë e nevojshme ushqimore, duke shërbyer si pragu minimal ekonomik për një dietë të ekuilibruar.

Megjithëse, dieta është shtrenjtuar, pjesa e popullsisë që nuk ka mundësi ta përballojë financiarisht atë është ulur ndjeshëm. Në vitin 2025, kjo përqindje ishte 11.9%.

The post Raporti i FAO: Rreth 32% e shqiptarëve përballem me pasiguri ushqimore, katër herë mbi mesataren europiane appeared first on Albeu.com.

Rusia është eksportuesi më i madh në botë i grurit, dhe Ukraina është e pesta më e madhe. Së bashku, ato sigurojnë 19% të furnizimeve të elbit në botë, 14% të grurit dhe 4% të misrit.

Qu Dongyu, drejtori i përgjithshëm i Organizatës së Ushqimit dhe Bujqësisë në OKB, thotë se ndërprerjet dhe sanksionet mund të kenë një ndikim veçanërisht të madh në 50 vende që varen nga Rusia dhe Ukraina për të paktën 30% të furnizimit të tyre me grurë.

Këto janë kryesisht vende me të ardhura të ulëta dhe me mungesë ushqimi në Afrikën Veriore, Azi dhe Lindjen e Afërt.

Ndërkohë, shumë vende evropiane dhe të Azisë Qendrore mbështeten te Rusia për gjysmën e furnizimit të tyre me plehra dhe OKB paralajmëron se mungesat mund të vazhdojnë deri në vitin 2023.

Kjo vjen në një kohë kur çmimet e ushqimeve janë tashmë në rritje, pasi kanë arritur një maksimum historik në shkurt 2022.

Me ndërprerjen shtesë në Ukrainë dhe Rusi vjen paralajmërimi i mëposhtëm nga z. Dongyu: “Ndërprerjet e mundshme në aktivitetet bujqësore të këtyre dy eksportuesve kryesorë të mallrave bazë mund të përshkallëzojnë seriozisht pasigurinë ushqimore globalisht, kur çmimet ndërkombëtare të ushqimit dhe inputeve janë tashmë të larta dhe të paqëndrueshme.

“Konflikti gjithashtu mund të kufizojë prodhimin bujqësor dhe fuqinë blerëse në Ukrainë, duke çuar në rritjen e pasigurisë ushqimore”.

Kombet e Bashkuara u kanë kërkuar atyre që varen nga Rusia dhe Ukraina që tani të kërkojnë furnizues alternativë për të “thithur tronditjen” e ndërprerjes./albeu.com

The post OKB ngre alarmin: Lufta Rusi – Ukrainë mund të përshkallëzojë pasigurinë ushqimore në të gjithë botën appeared first on Albeu.com.