Marrëveshja mes Lëvizjes Vetëvendosje dhe Lidhjes Demokratike të Kosovës për kandidimin e Bekim Sejdiut në postin e presidentit nuk është mirëpritur në mënyrë unanime brenda LDK-së.

Burime të medias bëjnë të ditur se brenda partisë ka shqetësime për mënyrën e arritjes së këtij dakordimi. Sipas tyre, kryetari i LDK-së, Lumir Abdixhiku, nuk i ka konsultuar paraprakisht strukturat partiake për kandidaturën e Sejdiut.

Pas takimit të Abdixhikut me kryeministrin në detyrë, Albin Kurti, u bë publike marrëveshja për kandidaturën e Sejdiut.

Sejdiu e ka konfirmuar pranimin e kandidaturës, duke deklaruar se është vënë në shërbim të Republikës së Kosovës dhe qytetarëve të saj.

Ndërkohë, Abdixhiku ka thënë se LDK-ja do ta mbështesë marrëveshjen, duke nënvizuar se interesi shtetëror duhet të prevalojë mbi atë partiak.

Kryesia e LDK-së pritet të mblidhet të martën, ndërsa pas këtij takimi parashihet edhe një takim me Grupin Parlamentar.

Media ka kërkuar një qëndrim nga deputetë dhe zyrtarë të LDK-së, mes tyre Hykmete Bajrami, Avdullah Hoti, Armend Zemaj dhe Imri Ahmeti, por deri në momentin e publikimit të lajmit nuk ka marrë përgjigje.

Përveç dakordimit politik mes dy partive, mbetet e hapur çështja e sigurimit të numrit të nevojshëm të votave në Kuvend për zgjedhjen e presidentit.

The post Pakënaqësi brenda LDK-së pas marrëveshjes me LVV-në për kandidaturën e Bekim Sejdiut appeared first on Albeu.com.