Greva e punëtorëve teknikë në Prishtinë do të vijojë deri në ekzekutimin e pagave të mbetura, ka deklaruar kryetari i Sindikatës së Punëtorëve Teknikë, Jusuf Azemi.

Gjatë një deklarimi në emisionin “Ora 7”, ai bëri të ditur se punëtorëve po u ushtrohet presion që të rikthehen në shkolla.

“Pa i paguar komplet muajin gusht dhe ditët e muajit korrik, ne nuk do t’i kthehemi punës”, u shpreh Azemi.

Sipas tij, sindikata është tërhequr nga marrëveshja e arritur më parë me DKA-në, pasi e akuzon këtë institucion se nuk i ka përmbushur zotimet e marra.

Azemi kërkoi gjithashtu që punëtorëve t’u sigurohet paga në vlerë prej 500 eurosh.

Ai theksoi se dialogu me institucionet nuk do të vazhdojë pa u paguar pagat e korrikut dhe gushtit, si dhe pa u zbatuar paga prej 500 eurosh.

The post Azemi: Pa u shlyer pagat e korrikut dhe gushtit, punëtorët teknikë nuk rikthehen në punë appeared first on Albeu.com.

Avokati i Popullit ka nxjerrë një opinion për kriteret e përcaktuara me vendimin e Qeverisë së Republikës së Kosovës për ndarjen e pagës së 13-të për të gjithë punonjësit që paguhen nga buxheti i Republikës së Kosovës.

Nëpërmjet këtij dokumenti, institucioni synon të paraqesë një vlerësim të përgjithshëm të vendimit dhe pasojave të zbatimit të tij. Analiza është bërë në raport me standardet juridike që lidhen me barazinë, proporcionalitetin, pritshmërinë legjitime, sigurinë juridike dhe mbrojtjen e të drejtave me karakter pasuror të punonjësve që marrin pagë nga buxheti i Republikës së Kosovës.

Sipas Avokatit të Popullit, përcaktimi me ligj i pagës së 13-të, siç është bërë në nenin 32, paragrafin 1, të Ligjit Nr. 10/L-001 mbi Ndarjet Buxhetore për Buxhetin e Republikës së Kosovës për vitin 2026, krijon pritshmëri legjitime që kjo pagesë të realizohet si e drejtë subjektive me karakter pasuror. Kjo e drejtë lidhet drejtpërdrejt me përcaktimet e nenit 1 të protokollit 1 të Konventës Evropiane të të Drejtave të Njeriut (KEDNj).

Institucioni nënvizon se kriteret dhe vendimet administrative të miratuara për zbatimin e një norme juridike nuk mund të kufizojnë të drejtat e garantuara shprehimisht me ligj. Për rrjedhojë, ato nuk mund të shkojnë përtej përcaktimeve ligjore dhe as të vendosin kushte shtesë që cenojnë të drejtat e njohura ligjërisht për subjektet.

Avokati i Popullit vlerëson se një qasje e tillë, si ajo e zbatuar përmes vendimit 02/07 të Qeverisë së Republikës së Kosovës, prek pritshmërinë legjitime dhe sigurinë juridike të punonjësve që paguhen nga buxheti i Republikës së Kosovës. Të dyja këto konsiderohen elemente të rëndësishme të sundimit të ligjit.

Në opinion theksohet gjithashtu se rregullimi ligjor i pagës së 13-të duhet të garantojë trajtim të barabartë ndërmjet përfituesve, duke u mbështetur në kritere ligjore të qarta dhe të arsyeshme, të cilat nuk e cenojnë qëllimin për të cilin ndahet kjo pagë.

Sipas Avokatit të Popullit, ky opinion mund t’i shërbejë si këshillë Qeverisë së Republikës së Kosovës dhe Kuvendit të Republikës së Kosovës. Gjatë miratimit të akteve që kanë të bëjnë me pagën e 13-të, këto institucione duhet të kenë parasysh gjithëpërfshirjen dhe trajtimin e barabartë të të gjithë punonjësve që i kanë përmbushur kushtet ligjore për përfitimin e saj.

The post Avokati i Popullit: Kushtet e Qeverisë për pagën e 13-të dëmtojnë barazinë dhe pritshmërinë legjitime appeared first on Albeu.com.

Raportohet se fillimisht ka pasur një sherr mes kamerierit dhe njërit prej grupit të personave, që ushtruan dhunë ndaj tij. Më pas, grupi vazhdojnë të ushtrojnë dhunë ndaj të riut.

Në lidhje me këtë ngjarje, u arrestuan disa prej dhunuesve të 18-vjeçarit, teksa njëri u shpall në kërkim.

Policia arrestoi edhe xhaxhanë e të riut, pasi dyshohet se, pasi ka marrë vesh atë që ka ndodhur, ka shkuar me kallash në vendngjarje.

Dyshohet se çdo gjë ka nisur, pasi pronarët e hotelit ku pononte i riu nuk kanë pranuar t’i japin atij rrogën.

The post VIDEO/ Grushta dhe të bërtitura, publikohen pamjet e dhunës ndaj 18-vjeçarit! I riu u rrah pasi kërkoi pagën appeared first on Albeu.com.

Të dhënat zyrtare të INSTAT, tregojnë se hendeku mes pagës nominale dhe asaj reale është zgjeruar ndjeshëm nga viti në vit, duke reflektuar presionin e vazhdueshëm të çmimeve mbi të ardhurat.

Në tremujorin e parë të vitit 2026, paga mesatare mujore bruto arriti në 90,119 lekë, me rritje vjetore 9.6%. Në pesë vite paga nominale u rrit me 60%.

Por e njëjta pagë, e matur me fuqinë reale blerëse, rezultoi në tre-mujorin e parë të këtij viti 73,822 lekë me rritje vjetore 7 për qind.

Hendeku ndërmjet pagës reale dhe asaj nominale arriti në 16,297 lekë më shumë se 170 euro në tremujorin e parë 2026, me një zgjerim rreth 23 % nga e njëjta periudhë e 2025.

Paga reale mesatare mujore bruto është indeksuar me inflacionin (2020=100) nga INSTAT. Kjo do të thotë se me rreth 90 mijë lekë, një shqiptar blen sot të njëjtat mallra që në vitin 2020 i blinte me rreth 73,822 lekë.

Diferenca mes pagës nominale dhe asaj reale ka ndjekur një trajektore rritëse. Në fillim të vitit 2021, hendeku ishte vetëm 1,224 lekë.

Kjo diferencë u zgjerua ndjeshëm gjatë vitit 2022, duke kaluar mbi 6,600 lekë në fund të vitit, në një periudhë kur ekonomia u përball me rritje të fortë të çmimeve.

Në vitin 2023 dhe 2024, ndonëse pagat vijuan të rriten, edhe inflacioni mbeti një faktor i rëndësishëm, duke bërë që diferenca të thellohet më tej.

Kulmi i këtij hendeku arriti këtë vit, pasi në tremujorin e parë të 2026, diferenca mes pagës nominale dhe reale arriti në 16,297 lekë, niveli më i lartë i regjistruar.

Ky zhvillim sugjeron se pagat po rriten, por fuqia për të blerë mallra dhe shërbime nuk po ndjek të njëjtin ritëm.

Duket se rritja e pagave në vetvete është bërë shkak për rritjen e çmimeve. Politika e pagave si në sektorin publik dhe atë privat nuk është mbështetur nga faktorët e produktivitetit por nga presionet në tregun e punës dhe nga emigrimi i fortë i punonjësve.

Rritja e pagave ka ushtruar presion për rritjen e konsumit në kohë që prodhimi vendas nuk ka ndjekur të njëjtin trend, duke u bërë shkak për inflacion.

Në këto zhvillime po goditen rëndë pensionistët ndaj të cilëve nuk ushtrohen politika të tjera përveç indeksimeve me inflacionin mesatar./ Monitor

The post Me pagën blen gjithmonë e më pak, fuqia blerëse bie me 170 euro nga 2020 në 2026 appeared first on Albeu.com.

Ministrja serbe Snezhana Paunoviq ka provokuar reagime të forta pas një deklarate tronditëse, ku u shpreh se po të ndodhej në pozitën e Sllobodan Millosheviqit, do të ndërmerrte spastrim etnik në territorin e Kosovës.

Përpara se të merrte postin ministror në qeverinë serbe gjatë vitit 2025, Paunoviq përfitonte të ardhura si pjesëtare e parlamentit, por njëkohësisht edhe si udhëheqëse e Institucionit Farmaceutik të Pejës me bazë në Kosovë.

Zyrtarisht, ky entitet me qendër në Gorazhdec nuk funksionon prej vitit 2021. Radio Evropa e Lirë ka verifikuar se mbyllja e tij u krye më 7 tetor 2021, përmes një vendimi të ekzekutivit serb.

Specialisti i çështjeve të sigurisë, Drizan Shala, deklaroi për “Bota sot” se rasti i Snezhana Paunoviqit sjell dyshime të thella mbi vijimësinë e mbështetjes financiare të rrjeteve ilegale serbe brenda Kosovës.

Në analizën e tij, fakti që një institucion i shpërbërë vijoi të paguante personelin drejtues, dëshmon se Beogradi mund të jetë ende duke i dhënë jetë mekanizmave paralelë për të ushtruar influencë në Kosovë.

Ai vuri në dukje gjithashtu se autoritetet në Prishtinë kanë dokumentuar lidhjen e disa prej këtyre grupimeve me veprimtari që minojnë rendin ligjor dhe sigurinë kombëtare.

“Rasti i Snezhana Paunoviqit nuk është thjesht një parregullsi burokratike. Ai përbën një tregues që shton shqetësimet për mënyrën se si Serbia vazhdon të furnizojë me para strukturat e saj paralele në Kosovë, edhe pasi ato janë shuar në letër.

Nëse një njësi e mbyllur formalisht në 2021 ka gjeneruar ende rroga për shefat e saj, atëherë shtrohet pyetja se sa entitete të tjera marrin fonde nga buxheti serb pa pasur ndonjë arsyetim të qartë operacional. Kjo nuk ka të bëjë vetëm me administrimin e financave shtetërore; ka të bëjë me një strategji të Beogradit për të ruajtur pushtet paralel në hapësirën e Kosovës.

Për më shumë se njëzet vjet, Serbia ka krijuar dhe ushqyer me para një rrjet institucionesh, zyrash dhe instrumentesh paralele në Kosovë. Një segment i këtyre formacioneve është cilësuar nga institucionet kosovare si bazë për ushtrimin e presionit politik, mbështetjes logjistike dhe operacioneve në sektorin verior të vendit.

Zhvillimet e viteve të fundit, sidomos sulmet me armë kundër objekteve shtetërore dhe forcave të rendit në Kosovë, kanë provuar se rrjetet e ndërtuara dhe të përkrahura nga Beogradi nuk kishin vetëm funksione civile. Zyrtarët kosovarë kanë pohuar se persona të implikuar në strukturat paralele janë përfshirë në veprime që dëmtojnë bazën kushtetuese dhe sigurinë e publikut. Këto akuza janë ndjekur me procese hetimore dhe masa ndëshkimore ndaj të dyshuarve”, theksoi Shala.

Më tej, Shala nënvizoi se çështja nuk duhet trajtuar si një ngjarje e shkëputur, por si një sinjal potencial që rrjetet paralele janë ende aktive dhe funksionale.

Ai kërkoi një kontroll të plotë financiar dhe një proces hetimor pa errësira për fondet që akordon Serbia për entitetet e saj në Kosovë, duke shtuar se ndershmëria është kyçe nëse Beogradi synon të tregojë vullnet për normalizimin e marrëdhënieve.

“Në këtë prizëm, rasti i një organizmi të shuar që megjithatë financohet nuk mund të lexohet si i veçuar. Ai lë vend për të dyshuar se paratë publike serbe mbulojnë koston e një rrjeti paralel, i cili shkon përtej dhënies së shërbimeve dhe shndërrohet në mjet ndikimi politik e sigurie në Kosovë.

Ja pse është i domosdoshëm një auditim gjithëpërfshirës dhe një hetim i ndershëm për të gjitha shumat që Serbia derdh për strukturat e veta në Kosovë. Qytetarët kanë të drejtë të mësojnë se cilat institucione ende marrin fonde, kush i menaxhon këto burime dhe nëse ato shërbejnë për qëllime komunitare apo për të ushqyer aparate që cenojnë sistemin kushtetues të Republikës së Kosovës.

Nëse Serbia do të dëshmojë se është e angazhuar për ‘normalizimin e marrëdhënieve’ dhe standardet e Bashkimit Evropian, atëherë transparenca mbi financimin e mekanizmave paralelë duhet të jetë hapi fillestar. Çdo euro e shpërndarë jashtë kanaleve të ligjshme dhe pa përgjegjshmëri, vetëm sa thellon mosbesimin, tensionet dhe destabilitetin në rajon”, përfundoi Shala.

The post Institucioni nuk ekziston më, por pagat vazhdojnë: Rasti Paunoviq ngre pikëpyetje për financimet serbe në Kosovë appeared first on Albeu.com.

Deklarata e ministres serbe Snezhana Paunoviq, se në vend të Sllobodan Millosheviqit do të kishte kryer spastrim etnik në Kosovë, ka nxitur reagime të shumta dhe është cilësuar skandaloze.

Paunoviq u emërua ministre në Qeverinë e Serbisë gjatë vitit 2025. Përpara marrjes së kësaj detyre, ajo paguhej si deputete dhe njëkohësisht si drejtoreshë e Institucionit Farmaceutik të Pejës në Kosovë.

Megjithatë, ky institucion me seli në Gorazhdec nuk figuron zyrtarisht si aktiv që prej vitit 2021. Radio Evropa e Lirë ka konstatuar se mbyllja e tij është bërë më 7 tetor 2021, në bazë të një vendimi të Qeverisë së Serbisë.

Duke komentuar këtë rast për “Bota sot”, eksperti i sigurisë Drizan Shala tha se pagesa e Snezhana Paunoviq ngre pikëpyetje serioze rreth vazhdimit të financimit nga Serbia të strukturave paralele në Kosovë.

Sipas Shalës, vazhdimi i pagave për drejtuesit e një institucioni të mbyllur mund të jetë tregues se Beogradi ende financon mekanizma paralelë, me synimin për të ruajtur ndikimin e tij në territorin e Kosovës.

“Rasti i Snezhana Paunoviq nuk mund të trajtohet vetëm si një parregullsi administrative. Ai përbën një sinjal që shton dyshimet për mënyrën se si Serbia vijon t’i financojë strukturat e veta paralele në Kosovë, pavarësisht se ato formalisht mund të mos ekzistojnë më”, deklaroi Shala.

Ai ngriti pyetjen se sa struktura të tjera mund të vazhdojnë të marrin mjete nga buxheti serb pa pasur një funksion të përcaktuar qartë, nëse një institucion i mbyllur zyrtarisht më 2021 ka vijuar të gjenerojë paga për drejtuesit e tij.

Sipas ekspertit, kjo çështje nuk lidhet vetëm me administrimin e parave publike. Ai e konsideron atë pjesë të strategjisë shtetërore të Beogradit për mbajtjen e një ndikimi paralel brenda Kosovës.

Shala kujtoi se, përgjatë më shumë se dy dekadave, Serbia ka ngritur dhe financuar në Kosovë një rrjet të përbërë nga institucione, zyra dhe mekanizma paralelë. Autoritetet kosovare, sipas tij, kanë identifikuar një pjesë të tyre si platforma për ndikim politik, logjistik dhe operativ në veri të vendit.

“Zhvillimet e viteve të fundit, mes tyre edhe sulmet e armatosura kundër institucioneve dhe Policisë së Kosovës, kanë dëshmuar se rrjetet e krijuara dhe të përkrahura nga Beogradi nuk kanë ushtruar vetëm rol administrativ. Autoritetet e Kosovës kanë deklaruar se persona të lidhur me strukturat paralele janë përfshirë në veprimtari që rrezikojnë rendin kushtetues dhe sigurinë publike. Këto pretendime janë pasuar nga hetime dhe masa ligjore kundër të dyshuarve”, tha ai.

Për këtë arsye, Shala vlerësoi se çështja e Paunoviqit nuk duhet trajtuar si një rast më vete, por si një shenjë e mundshme se rrjetet paralele vazhdojnë të funksionojnë.

“Në këto rrethana, financimi i vazhdueshëm i një institucioni të mbyllur nuk mund të shihet si rast i izoluar. Ai krijon dyshime se fondet publike të Serbisë mund të vazhdojnë të mbajnë aktiv një rrjet paralel, i cili nuk kufizohet te ofrimi i shërbimeve, por përdoret si mjet ndikimi politik dhe i sigurisë në Kosovë”, u shpreh eksperti.

Shala kërkoi zhvillimin e një auditimi të plotë dhe të një hetimi transparent për të gjitha fondet që Serbia vazhdon t’u ndajë strukturave të saj në Kosovë.

“Publiku ka të drejtë të informohet se cilat institucione marrin ende financim, cilët persona i menaxhojnë këto mjete dhe nëse paratë shërbejnë për nevoja civile apo për mbështetjen e mekanizmave që sfidojnë rendin kushtetues të Republikës së Kosovës”, theksoi ai.

Në përfundim, Shala deklaroi se transparenca për financimin e strukturave paralele duhet të jetë veprimi i parë i Serbisë, nëse ajo dëshiron të tregojë përkushtim ndaj “normalizimit të marrëdhënieve” dhe standardeve evropiane.

“Çdo euro që ndahet jashtë mekanizmave të ligjshëm dhe pa llogaridhënie vetëm sa shton mosbesimin, tensionet dhe paqëndrueshmërinë në rajon”, përfundoi ai.

The post Paunoviq u pagua nga një institucion i mbyllur, shtohen dyshimet për fondet e Serbisë në Kosovë appeared first on Albeu.com.

Në Kongresin e 9-të Zgjedhor të Bashkimit të Sindikatave të Pavarura të Kosovës (BSPK), kryeministri në detyrë Albin Kurti deklaroi se punëtorët janë shtylla themelore e zhvillimit të vendit, ndërsa theksoi se politikat e Qeverisë janë të përqendruara në krijimin e një tregu pune më të drejtë.

Gjatë fjalës së tij para të pranishmëve, ai u ndal te çështja e pagës minimale, duke kujtuar se ajo kishte mbetur pa ndryshim për më shumë se një dekadë.

“Që nga viti 2011, paga minimale ka qëndruar në nivelet 130 euro dhe 170 euro, varësisht nga mosha e punëtorit, përkatësisht a je më shumë apo më pak sesa 35 vjeç. Kjo periudhë e gjatë stagnimi ka krijuar vështirësi të rënda për punëtorët e sektorit privat”, tha Kurti.

Sipas tij, gjatë qeverisjes që ai drejton, paga minimale është rritur në disa etapa.

“Ndërkaq, tash paga minimale është ngritur, sepse ajo është rritur gradualisht dhe vazhdimisht: nga 130 euro dhe 170 euro, fillimisht gjatë qeverisjes tonë 250 euro, më pas në 350 euro, pastaj në 425 euro, e nga 1 korriku sivjet, paga minimale është 500 euro bruto. Nga kjo rritje përfitojnë rreth 150 mijë punëtorë të sektorit privat”, u shpreh ai.

Kurti vlerësoi se ky zhvillim tregon qartë se, pas një periudhe dhjetëvjeçare ngecjeje, paga minimale është trefishuar brenda një kohe dukshëm më të shkurtër.

“Kjo tregon qartë se, pas një dekade stagnimi, brenda një periudhe shumë më të shkurtër është bërë trefishimi i pagës minimale. Është një dëshmi e qartë se rritja ekonomike duhet të shoqërohet gjithmonë me rritje të mirëqenies së qytetarëve dhe me ngritje të gjendjes së punëtorëve”, deklaroi ai.

Një tjetër prioritet i Qeverisë, sipas Kurtit, mbetet forcimi i mekanizmave institucionalë që sigurojnë zbatimin e ligjit të punës, teksa përmendi se Inspektorati Qendror i Punës po fuqizohet.

“Në këtë drejtim, Inspektorati Qendror i Punës është duke u fuqizuar. Vetëm pak javë më parë, në qershor 2026, është hapur konkursi për 39 inspektorë të rinj, prej të cilëve 24 për siguri dhe shëndet në punë dhe 15 për marrëdhënie pune”, tha ai.

Ai bëri të ditur gjithashtu se po ecet paralelisht edhe me ndryshime në aspektin ligjor në fushën e punës.

“Jemi duke punuar në përmirësimin e kornizës ligjore në fushën e punës, me synimin që ajo të garantojë përfaqësim më të drejtë të punëtorëve, zgjerim të dialogut social dhe një balancë më të qëndrueshme midis punëmarrësve dhe punëdhënësve”, deklaroi Kurti.

Në adresimin e tij, kryeministri në detyrë tha po ashtu se përmes Agjencisë së Punësimit të Republikës së Kosovës janë ngritur skema aktive të punësimit, duke përfshirë programin “Superpuna” dhe forma të tjera mbështetjeje për bizneset, me qëllim hapjen e vendeve të reja të punës dhe nxitjen e punësimit për të rinjtë, gratë dhe kategoritë e tjera që hasin vështirësi në tregun e punës.

The post Kurti: Nga 1 korriku paga minimale është 500 euro bruto, përfitojnë rreth 150 mijë punëtorë appeared first on Albeu.com.

Federata Sindikale e Radio Televizionit të Kosovës i ka dërguar një letër u.d. presidentes Albulena Haxhiu dhe kryeministrit në detyrë Albin Kurti, me kërkesën që institucionet të ndërhyjnë urgjentisht për shkak të mosrealizimit të pagave për punëtorët e Radio Televizionit të Kosovës.

Sipas FSRTK-së, situata e krijuar me pagat është tejet shqetësuese, pasi vonesa e tyre përtej afatit të përcaktuar me ligj nuk është thjesht çështje administrative apo financiare, por përbën shkelje të drejtpërdrejtë të një të drejte themelore në punë dhe të dinjitetit të secilit punëtor.

Në letrën e saj, Federata thekson se kjo nuk është një ngjarje e vetme. Ajo rikujton se vetëm një muaj më parë, më 7 qershor, ishte detyruar të organizonte protesta për të njëjtën arsye, me bindjen se ai reagim do të shërbente si sinjal serioz për institucionet përgjegjëse dhe do të sillte masa konkrete për të mos lejuar përsëritjen e situatës. Megjithatë, sipas saj, e njëjta shkelje është përsëritur, çka dëshmon mungesë përgjegjësie institucionale dhe dështim në përmbushjen e një prej obligimeve më bazike ndaj punëtorëve.

Federata Sindikale e Radio Televizionit të Kosovës (RTK), si përfaqësuese legjitime e punëtorëve të transmetuesit publik, ju drejtohet me shqetësim të thellë lidhur me situatën e krijuar nga mosrealizimi i pagave të punëtorëve të RTK-së, të cilat, edhe më 9 korrik 2026, ende nuk janë ekzekutuar.

Mosdhënia e pagës në afatin e paraparë ligjor nuk përbën vetëm një problem administrativ apo financiar, por është cenim i drejtpërdrejtë i një të drejte themelore të punës dhe i dinjitetit të çdo punëtori. Paga është kompensim i fituar me punë, e garantuar me legjislacionin në fuqi të Republikës së Kosovës dhe me standardet ndërkombëtare për mbrojtjen e të drejtave të punëtorëve.

Kjo situatë është bërë edhe më shqetësuese për faktin se nuk kemi të bëjmë me një rast të izoluar. Vetëm një muaj më parë, më 7 qershor, Federata Sindikale ishte e detyruar të organizonte protesta për të njëjtën arsye. Në atë kohë besuam se reagimi ynë do të shërbente si alarm serioz për institucionet përgjegjëse dhe se do të ndërmerreshin masa konkrete për të parandaluar përsëritjen e kësaj situate. Fatkeqësisht, sot po përballemi me të njëjtën shkelje, gjë që dëshmon mungesë përgjegjësie institucionale dhe dështim në menaxhimin e një prej obligimeve më elementare ndaj punëtorëve.

Federata Sindikale konsideron se është e papranueshme që transmetuesi publik i Republikës së Kosovës të funksionojë në kushte ku punëtorët detyrohen të presin pagat e tyre pa asnjë afat të qartë, pa transparencë dhe pa asnjë komunikim zyrtar nga organet drejtuese. Kjo gjendje cenon jo vetëm mirëqenien e punëtorëve dhe familjeve të tyre, por dëmton edhe besimin në institucionet publike dhe rrezikon funksionimin normal të RTK-së.

Sipas letrës, edhe Bordi dhe Menaxhmenti i RTK-së kanë dështuar të ushtrojnë përgjegjësitë e tyre me transparencë, profesionalizëm dhe llogaridhënie. Federata vlerëson se mungesa e informimit publik, heshtja përballë kësaj situate dhe mosdhënia e një zgjidhjeje konkrete janë të papranueshme dhe bien ndesh me standardet e qeverisjes së mirë që duhet të karakterizojnë një institucion publik.

Për këtë arsye, ju bëjmë thirrje që, brenda kompetencave tuaja kushtetuese dhe institucionale, të ndërmerrni veprimet e nevojshme për të siguruar zgjidhjen urgjente të kësaj situate dhe për të garantuar që punëtorët e RTK-së të marrin menjëherë pagat e tyre.

Njëkohësisht, kërkojmë që të sigurohet llogaridhënie institucionale për shkaqet që kanë çuar në këtë gjendje, si dhe të ndërmerren masa që raste të tilla të mos përsëriten në të ardhmen. Askush nuk duhet të mbetet pa përgjegjësi kur cenohen të drejtat themelore të punëtorëve dhe vihet në rrezik funksionimi i transmetuesit publik.

Federata ka paralajmëruar se, nëse nuk gjendet menjëherë zgjidhje, do të vazhdojë pa hezitim me përshkallëzimin e veprimeve sindikale dhe me nisjen e procedurave ligjore pranë institucioneve kompetente. Sipas saj, do të përdoren të gjitha mjetet juridike dhe sindikale të garantuara me ligj për mbrojtjen e të drejtave të punëtorëve, ndërsa çdo pasojë që mund të reflektohet në funksionimin e RTK-së do të jetë përgjegjësi e plotë e Bordit dhe Menaxhmentit.

Në fund, Federata thekson se punëtorët e RTK-së nuk do të pranojnë që vonesat e pagave të kthehen në praktikë të zakonshme. Sipas saj, ata nuk do të paguajnë çmimin e paaftësisë, neglizhencës apo keqmenaxhimit institucional, pasi dinjiteti i tyre nuk është i negociueshëm dhe respektimi i të drejtave të tyre nuk mund të varet nga rrethana financiare apo administrative.

Federata Sindikale shton se mbetet e përkushtuar ndaj dialogut dhe bashkëpunimit institucional, por njëkohësisht shprehet e vendosur të mbrojë me çdo mjet ligjor interesat e punëtorëve që përfaqëson. Ajo pret reagim dhe veprim të menjëhershëm nga institucionet e Republikës së Kosovës, në përputhje me përgjegjësinë për mbrojtjen e rendit kushtetues, të ligjshmërisë dhe të drejtave të qytetarëve.

The post Sindikata e RTK-së i shkruan Kurtit dhe Haxhiut: Pagat nuk janë ekzekutuar, kërkohet reagim i menjëhershëm institucional appeared first on Albeu.com.

Ai ka theksuar se paga minimale kishte mbetur pa ndryshim për më shumë se 10 vjet, në nivelin 130 dhe 170 euro, varësisht nga mosha. Sipas tij, gjatë qeverisjes aktuale ajo është rritur disa herë, fillimisht në 250 euro, më pas në 350 euro, pastaj në 425 euro dhe tashmë në 500 euro.

Kurti ka deklaruar se kjo rritje prek drejtpërdrejt rreth 150 mijë punëtorë të sektorit privat, duke e përshkruar si një hap që lidhet me rritjen e mirëqenies dhe zhvillimin ekonomik të vendit.

Postimi i Kurtit:

Paga minimale në vendin tonë ngeli e pandryshuar për më shumë se 10 vjet. 2011 ishte viti i fundit kur ajo u ndryshua. Që prej atëherë ajo mbeti 130 përkatësisht 170 euro (varësisht se a je nën apo mbi 35 vjeç).

Ndërkaq, gjatë qeverisjes sonë u ngrit katër herë: nga 130 e 170 euro në 250 euro, mandej në 350 dhe së fundi në 425 euro. E sot paga minimale u bë 500 euro. Prej kësaj rritjeje do të përfitojnë rreth 150 mijë punëtorë të sektorit privat.

Pra, për më shumë se një dekadë para qeverisjes tonë paga minimale ishte e ultë dhe e pandryshueshme. Ndërkaq për më pak se gjysëm dekade me ne, kemi trefishim të pagës minimale.

Rritjen dhe zhvillimin ekonomik të Republikës sonë do ta përcjellim gjithnjë me shtim të mirëqenies për të gjithë.

Urime të gjithëve!

The post Kurti njofton rritjen e pagës minimale në Kosovë në 500 euro appeared first on Albeu.com.

Sipas saj, Tirana që paraqitet nga Kryeministri si një histori europiane suksesi, në të vërtetë rezulton të jetë qyteti i dytë më i shtrenjtë në Europë, ku paga mesatare mujore nuk mjafton për të përballuar muajin.

Ajo thekson se shifrat janë tronditëse.

Sipas deklaratës, një familje me katër anëtarë, ku dy të rritur paguhen me pagë mesatare, detyrohet të përdorë 89% të të ardhurave vetëm për një jetesë normale, duke përfshirë ushqimin, qeranë dhe shpenzimet bazike. Kjo, sipas saj, do të thotë se familjeve shqiptare u mbetet vetëm 11% e të ardhurave për kursime, investime, përballimin e emergjencave apo edhe pushime.

Xhixho shprehet se krahasimi me rajonin e bën edhe më të dukshëm dështimin e kësaj qeverisjeje. Ajo thotë se në Shkup një familje shpenzon 67% të të ardhurave mujore për jetesën, ndërsa në Beograd 68.2%. Po sipas saj, familjet shqiptare me pagë mesatare neto mujore zyrtare prej 760 euro, nëse jetojnë vetëm, duhet të shpenzojnë të paktën 853 euro në muaj, çka do të thotë se harxhojnë më shumë sesa paga që marrin.

Ajo e cilëson po aq dramatike edhe gjendjen e strehimit, duke theksuar se Tirana renditet si qyteti i dytë më pak i përballueshëm në Europë sipas raportit qira-pagë. Sipas saj, qiratë konsumojnë mbi 93% të pagave lokale dhe kjo tregon qartë se për të rinjtë, çiftet e reja dhe familjet e zakonshme, strehimi është kthyer në një luks të paarritshëm.

Në deklaratë thuhet se qeveria dhe bashkia vazhdojnë të ndërtojnë një qytet për një grusht njerëzish, të cilët, sipas saj, e kanë kthyer sektorin e ndërtimit në sektorin kryesor për pastrimin e parave të drogës dhe korrupsionit.

Ajo shton se transporti publik mbetet primitiv dhe nuk mbulon zona të tëra të Tiranës. Për këtë arsye, sipas saj, për mijëra familje makina nuk është luks, por një domosdoshmëri për të dërguar fëmijët në shkollë, në kopsht apo për të shkuar në punë.

Sipas Xhixhos, sapo qytetarët blejnë një makinë, përballen menjëherë me një tjetër problem të krijuar nga kjo qeverisje, mungesën e parkimit.

Ajo deklaron se në një qytet ku ndërtohet pa kriter në çdo metër katror, 84% e banorëve të Tiranës përballen vazhdimisht me vështirësi për të gjetur një vend parkimi. Vetëm në parkimet e Bashkisë së Tiranës, sipas saj, qytetarët paguajnë rreth 7 milionë euro në vit. Ndërsa në total, në të gjitha parkimet me pagesë të kryeqytetit, qytetarët paguajnë rreth 15 milionë euro në vit, pa përfshirë pagesat informale dhe kostot e parkimit nëpër lagje.

Sipas saj, qytetarët jo vetëm jetojnë në një nga qytetet më të shtrenjta të Europës, por detyrohen të paguajnë çdo vit miliona euro edhe për parkimin, i cili është kthyer në një kosto të jashtëzakonshme dhe në një shqetësim të përditshëm në kaosin total të një qyteti që, sipas saj, është bërë i pajetueshëm.

Ajo e përshkruan këtë si Tiranën reale.

Sipas deklaratës, kjo është Tirana që ende nuk ka ujë 24 orë në ditë.

Po ashtu, ajo thotë se kjo është Tirana ku ende ka shkolla ku nxënësit zhvillojnë mësimin me 2 turne.

Ajo shton se kjo është Tirana ku transporti publik është larg standardeve europiane dhe ku parkimi është luks.

Sipas saj, kjo është edhe Tirana ku familjet nuk arrijnë të blejnë një banesë, ndërsa çdo ditë ngrihen kulla të reja ku një metër katror kushton të paktën 5 mijë euro.

Xhixho deklaron se, ndërsa qytetarët luftojnë për të përballuar jetesën, qeveria vijon të favorizojë një model zhvillimi që, sipas saj, i shërben pastrimit të parave, korrupsionit dhe një grushti njerëzish të lidhur me pushtetin.

Ajo thotë se këto janë vetëm disa nga arsyet pse qindra mijëra qytetarë protestojnë sot çdo ditë. Sipas saj, Tirana është bërë e pajetueshme për shumicën dhe e privilegjuar për pakicën, sepse qytetarët refuzojnë të pranojnë një kryeqytet ku 89% e të ardhurave shkojnë për mbijetesë, ku qiratë marrin mbi 93% të pagës, ku 84% e banorëve nuk gjejnë parkim dhe ku paguhen 15 milionë euro në vit për një shërbim që mungon.

Sipas deklaratës, çdo qytetar ka një hall të madh familjar që e ka çuar në atë shesh.

Ajo rendit se dikujt i është grabitur prona, dikush është i papunë, dikujt i janë larguar fëmijët jashtë vendit, dikush paguhet aq pak sa nuk i dalin as për ilaçe dhe shpenzime të tjera, dikush nuk arrin të çojë fëmijët në shkollë për shkak të rritjes së kostove, ndërsa dikush tjetër ka një biznes, por sipas saj e mbyt qeveria me korrupsion dhe taksa.

Në fund, Xhixho shprehet se ka vetëm një zgjidhje, vetëm një perspektivë dhe vetëm një rrugë: largimin e EDI RAMES dhe të qeverisë më plaçkitëse që, sipas saj, ka parë historia e Shqipërisë.

The post Xhixho: Në Tiranë, kostoja e jetesës është ndër më të lartat në Europë dhe paga mesatare nuk del deri në fund të muajit appeared first on Albeu.com.