Ministri i Ekonomisë dhe Punës, Besar Durmishi, deklaroi se Qeveria dhe dikasteri që ai drejton janë të gatshëm të zhvillojnë dialog me partnerët socialë për rishikimin e formulës së pagës minimale, mënyrën e llogaritjes së saj në raport me pagën mesatare dhe marrëveshjet e reja kolektive.

Sipas tij, çdo vendim duhet të mbështetet në tregues realë ekonomikë. Durmishi bëri të ditur se niveli i pagës minimale dhe formula aktuale e përllogaritjes së saj së shpejti do të diskutohen me partnerët socialë në kuadër të Këshillit Ekonomik-Social.

“Në njërin prej Këshillave Ekonomikë-Socialë këtë vit, me siguri do të vendoset edhe kjo çështje në tryezë për t’u diskutuar. Le të biem dakord për marrëveshjen kolektive. Sepse ka institucione të caktuara ku një drejtues sektori merr pagë më të lartë se ministri ose më të lartë se dikush tjetër që punon shumë më tepër. Kur i shqyrtojmë këto kërkesa, ato përplasen me njëra-tjetrën. Le të ulemi dhe ta ndryshojmë formulën për përllogaritjen e pagës minimale”, tha Durmishi.

Ministri iu përgjigj kështu paralajmërimeve për presion sindikal lidhur me pagën minimale, përpara harmonizimit të rregullt ligjor që pritet të bëhet në mars të vitit të ardhshëm.

Gjatë deklaratës, Durmishi foli edhe për zbatimin e masave të parashikuara në agjendën e reformave. Ai tha se Ministria e Ekonomisë dhe Punës ka realizuar deri tani pesë hapa kyç, për të cilët shteti pritet të përfitojë rreth 20 milionë euro nga Bashkimi Evropian, pasi të merret konfirmimi zyrtar.

Lidhja e Sindikatave të Maqedonisë kërkon që paga minimale të arrijë në 600 euro. Të njëjtën kërkesë e ka ngritur edhe partia opozitare LSDM, e cila ka bërë të ditur se do të paraqesë një propozim të ri ligjor për pagën minimale.

Formula në fuqi e përcakton pagën minimale mbi bazën e 50 për qind të shpenzimeve të jetesës dhe 50 për qind të rritjes së pagës mesatare. Nga rreth 750 mijë të punësuar në vend, pagë minimale marrin afërsisht 30 mijë persona.

The post Durmishi: Kërkesa për pagë minimale 600 euro të diskutohet në Këshillin Ekonomik-Social appeared first on Albeu.com.

Venko Filipçe, kryetar i LSDM-së, njoftoi në një konferencë për shtyp se partia e tij do ta paraqesë përsëri në Kuvend projektligjin që synon rritjen e pagës minimale në 600 euro.

Sipas Filipçes, nisma do të dorëzohet në fillim të shtatorit, menjëherë pas rifillimit të punës së Kuvendit. Ai tha se paga minimale aktuale nuk mjafton për të përballuar shpenzimet themelore të qytetarëve.

“Qytetarët nuk mund të mashtrohen. Shifrat që i thotë kryeministri, dukshëm nga një botë në të cilën jeton vetëm ai dhe grupi i tij i vogël, qytetarët nuk i ndjejnë. Ata shohin portofolat bosh dhe frigoriferët bosh”, deklaroi Filipçe.

Kreu i LSDM-së theksoi se, nëse treguesit ekonomikë janë vërtet aq të favorshëm sa pretendon Qeveria, atëherë një nga hapat e parë duhet të jetë përcaktimi i pagës minimale në 600 euro.

“Jo 26.000 denarë siç është tani, por aq sa u nevojitet njerëzve për të mbuluar nevojat bazë, shpenzimet bazë, veçanërisht kur fillon viti shkollor dhe kur shpenzimet e jetesës rriten shumë”, tha Filipçe.

Ai bëri të ditur gjithashtu se do të kërkohet rritja e pagave në disa sektorë, me theks të veçantë te shëndetësia dhe arsimi. Filipçe përmendi masat e zbatuara, sipas tij, gjatë qeverisjes së mëparshme të udhëhequr nga LSDM-ja, kur pagat bazë të specialistëve dhe mjekëve u rritën për 40 për qind, ndërsa u rritën edhe pagat e të punësuarve në arsim.

Filipçe tha se rritja e pagave është e domosdoshme përballë shtrenjtimit të jetesës dhe se përmes këtyre kërkesave partia po paraqet qëndrimin e saj ndaj politikave ekonomike të Qeverisë aktuale.

“Qeveria e udhëhequr nga Hristijan Mickoski tashmë ka filluar vitin e tretë të punës së saj dhe në asnjë fushë ne nuk shohim rezultate. Nuk shohim rezultate në fushën e ekonomisë, në shëndetësi, në arsim, në bujqësi”, tha kryetari i LSDM-së.

The post Filipçe: LSDM-ja do ta rikthejë në Kuvend propozimin për pagë minimale prej 600 eurosh appeared first on Albeu.com.