Në takimin ndodhet kreu i PDK-së, Memli Krasniqi, ai i LDK-së Lumir Abdixhiku dhe i AAK-së, Ramush Haradinaj.

Escobar takimin me ta po e zhvillon në rezidencën e ambasadorit amerikan në Kosovë, Jeffrey Hovenier.

Gabriel Escobar ndodhet në Kosovë dhe i njëjti sot ka zhvilluar takim me presidenten e vendit Vjosa Osmani.

Escobar e quajti Osmanin garantuesen kryesore të raporteve SHBA-Kosovë.

The post Del fotografia nga takimi i Escobar me liderët e opozitës kosovare në rezidencën e ambasadorit amerikan appeared first on Albeu.com.

Ligji për pagën minimale parasheh rritjen e saj në 264 euro, nga 130 deri në 170 sa është aktualisht ndërsa nuk përfshinë kategoritë e dala nga lufta e ish Ushtrisë Çlirimtare të Kosovës.

Shefi i grupit parlamentar i Aleancës për Ardhmërinë e Kosovës, Besnik Tahiri tha se nga Gjykata Kushtetuese kërkohet vlerësimi i kushtetutshmërisë së ligjit në tri çështje kryesore.

“E para Këshilli ekonomik social i cili përcaktohet edhe në ligjin e punës dhe i cili asnjëherë nuk është konsultuar asnjëherë për pagën minimale, tregon për një shkelje flagrante që qeveria e Kosovës e ka bërë. E dyta është diskriminimi i palëve të cenueshme, pra të verbërve, paraplegjikëve dhe tetraplegjikëve, e të cilët nuk janë përfshirë dhe janë larguar. Ky është një diskriminim dhe shkelje e drejtpërdrejtë e vlerave dhe të drejtave të njeriut që përcakton Kushtetuta e Kosovës dhe e treta lidhet me veteranët e Ushtrisë Çlirimtare të Kosovës, rast ky që është eklatant dhe i cili jo vetëm që është shkelje mirëpo lidhet drejtpërdrejt edhe me vlerat që kjo kategori i përfaqëson”, tha zoti Tahiri.

Edhe partia tjetër opozitare, Partia Demokratike tha se i ka doërzuar një kërkesë Gjykatën Kushtetuese për vlerësimin e kushtetutshmërisë së vendimit për caktimin e seancës plenare të datës 13 korrik 2023 nga ana e kryetarit të parlamentit të Kosovës.

Ky subjekt tha se seanca e fundit ku janë miratuar disa ligje të rëndësishme përfshirë edhe Ligjin për pagën minimale është caktuar në kundërshtim me kushtetutën dhe rregulloren e punës së parlamentit.

Shoqatat e dala nga lufta e ish Ushtrisë çlirimtare të Kosovës, protestuan javën e kaluar në Prishtinë në kundërshtim të ligjit për pagën minimale. Nëse ky ligj hyn në fuqi, për çka kërkohet nënshkrimi i presidentes së vendit veteranët do të vazhdojnë të marrin 170 euro sa është pensioni aktual i tyre.

Në fillim të kësaj jave udhëheqësit e shoqatave të UÇK-së u takuan me presidenten e Kosovës Vjosa Osmani, dhe kërkuan mosdekretimin e ligjit ndërsa paralajmëruan pengimin e funksionimit të parlamentit të Kosovës.

“Veprimet tona nuk lidhen me presidenten, presidentja e ka për obligim ta kryej si duhet punë e saj sepse paraqet unitetin e popullit dhe nuk duhet të krijojë përçarje por kundërshtimet tona vazhdojnë. Ne kemi veçse të paralajmëruar me datën 26 atë që mbahet seanca”, tha Faton Klinaku nga shoqata e Veteranëve të luftës së ish Ushtrisë Çlirimtare të Kosovës.

Presidentja e Kosovës Vjosa Osmani ka thënë se “Ligji për pagën minimale do të analizohet nga zyra e saj dhe më pas do të veprohet në përputhje me përgjegjësitë kushtetuese e ligjore të presidentes dhe duke pasur parasysh rëndësinë e trajtimit të dinjitetshëm të këtyre kategorive”.

Sipas qeverisë Ligji i ri për pagën minimale parasheh ndryshimin e Ligjit për veteranët, asisoj që, siç thuhet, “deri në kategorizimin përfundimtar të listës së veteranëve qeveria e Kosovës, vendos për lartësinë e shumës së pensioneve të përcaktuara me këtë ligj”.

Ligji për pagën minimale u miratua pa praninë e opozitës në fund të një dite përleshjesh fizike në parlament që nxitën shqetësime për thellimin e përçarjeve politike dhe polarizimin e shoqërisë në Kosovë.

The post Opozita e Kosovës dërgon në kushtetuese ligjin për pagën minimale appeared first on Albeu.com.

Deputeti i Partisë Demokratike të Kosovës (PDK) Hajdar Beqa në një intervistë për Ekonomia Online ka thënë se qytetarët po ballafaqohen çdo ditë me çmime të larta dhe mungesë të energjisë.Madje ai e ka akuzuar Qeverinë se ende nuk ka një kontratë për të siguruar çmim më të lirë për energjinë siç e kanë siguruar shtet e tjera.

“Kemi informata që përveçse ballafaqohemi çdo ditë si qytetarë të këtij vendi me çmime të larta, me inflacion me mungesë të energjisë dhe pretendimet që do ta kemi një dimër të vështirë për shkak të mungesës së energjisë elektrike e kemi parë që disa herë kanë shpallur gjendje të jashtëzakonshme dhe ende nuk kanë arritur ta kenë një kontratë për të siguruar me një çmim të lirë siç e kanë siguruar shtet tjera furnizimin me energji për qytetarë”, tha Beqa.

Përderisa deputetja e Lidhjes Demokratike të Kosovës (LDK), Valentina Bunjaku-Rexhepi në një intervistë për Ekonomia Online ka thënë se në Qeverinë Kurti nuk ka fare menaxhim.

Sipas saj, kryeministrin Albin Kurti Kosovën e kanë marr të gatshme mirëpo nuk po di ta udhëheqin, prandaj thotë se i duhet bashkëpunim me opozitën.

Bunjaku-Rexhepi tha se propozimet që kanë dhënë për të dalë nga kriza ekonomike janë refuzuar nga Qeveria Kurti.

“Çmimet janë alarmante. Edhe çmimi i bukës ka filluar të rritet dhe nuk ka të bëjë me menaxhim sepse Kosova është duke funksionuar e vetmuar. Këta po thirren që qe 20 vjet është shkatërruar Kosova. Kosovën e kanë marrë të gatshme dhe nuk po dinë ta udhëheqin”.

“Zotëri Kurti është paranoik dhe e ka njëfarë uni të tepruar. Një kryeministri i kërkohet punë angazhim e korrektësi dhe bashkëpunim me opozitën e qytetarët dhe tani është në të kundërtën e qytetarëve. Ne e kemi të pamundur në numra që të bëjmë rrëzimin e kësaj qeverie përkundër asaj ne nuk jemi për ta rrëzuar qeverinë por të bashkëpunojë me opozitën. Ne kemi dhënë propozime sikurse për krizë ekonomike, energjetike e arsim. Mirëpo asnjë propozim i LDK nuk është marrë parasysh”.

Deputeti i Aleancës për Ardhmërinë e Kosovës (AAK), Pal Lekaj  theksoi se Kosova gjendet në një krizë të thellë ekonomike, madje thotë se nuk ka as investime nga jashtë.

Ai tha se Qeveria duhet të veprojë menjëherë në mënyrë që të mos shkohet deri te një bllokadë ekonomike.

“Sa i përket krizës ekonomike dihet që jemi në një krizë të thellë ekonomike kur nuk ka ndonjë zhvillim nuk ka investime qoftë të faktorit të jashtëm, qoftë të brendshëm dhe gjendja është alarmante”.

“Nëse i shohim hapat që i ka ndërmarrë për pako sociale ajo është vetëm për të blerë kohë, por jo për të bërë zhvillim ekonomik. Prandaj Qeveria duhet të veprojë dhe të mos vijmë deri te një bllokadë ekonomike. Dhe kur e shohim ngritjen enorme të çmimeve mendoj që na pret një dimër të vështirë”. /EO/

The post Opozita e shqetësuar me mosmenaxhimin e krizës: Mund të ketë bllokadë ekonomike appeared first on Albeu.com.

Të ftuar me rend në ambasadën e Shteteve të Bashkuara në Prishtinë, Krasniqi, Abdixhiku e Haradinaj njoftuan pas takimeve me dy diplomatët se aty i kanë shprehur të njëjtat kërkesa. Liderët e tri partive opozitare shprehën mbështetjen e tyre për arritjen e marrëveshjes përfundmitare me Serbinë.

Përveç kësaj, tre opozitarët e shohin njësoj edhe kornizën e marrëveshjes që thonë se duhet të arrihet. Ata duan që marrëveshja të përmbajë njohjen reciproke, të mos e cenojë sovranitetin dhe integritetin territorial të vendit, si dhe ta respektojë rendin kushtetues, shkruan Express.

“PDK mbështetë dialogun si mekanizëm për arritjen e marrëveshjes finale gjithëpërfshirëse ndërmjet Kosovës dhe Serbisë, e cila siguron njohjen e ndërsjellë, pa cenuar sovranitetin shtetëror, intergritetin territorial dhe rendin kushtetues”, shkroi kryetari i PDK-së, Memli Krasniqi, pas takimit. Ai tha në Facebook se u diskutua edhe për rolin e kësaj partie.

I shoqëruar nga nënkryetarët Lutfi Haziri dhe Kujtim Shala, kryetari i LDK-së, Lumir Abdixhiku njoftoi se në takim ka shprehur qëndrime të njëjta me të Krasniqit.

“Në këtë takim i njoftuam përfaqësuesit në fjalë mbi qëndrimet e LDK-së karshi situatës politike në vend, me theks të veçantë për procesin e dialogut. Bëmë të ditur edhe njëherë qëndrimin tonë politik mbi këtë proces, rëndësinë e tij për vendin tonë dhe nevojën që i njëjti të përfundojë me njohje të ndërsjellë e normalizim të plotë të marrëdhënieve ndërmjet dy shteteve – duke respektuar integritetin territorial, sovranitetin dhe rendin kushtetues te Kosovës”, shkroi ai.

Abdixhiku tha se dy dilpmatët e kanë vlerësuar rolin e LDK-së në proceset e rëndësishme të vendit, siç është dialogu me Serbinë.

Duke kërkuar rol më aktiv të SHBA-së, kryetari i AAK-së, Ramush Haradinaj e mendon me epilog të njëjtë marrëveshjen përfundimtare me Serbinë.

“Kam ripërsëritur përkushtimin tonë për një Marrëveshje Gjithëpërfshirëse Ligjërisht të obligueshme, e cila ka epilog njohjen reciproke në kufijtë ekzistues dhe respekton rendin kushtetues të Republikës së Kosovës, gjë që mund të arrihet vetëm me rolin aktiv të Shteteve të Bashkuara të Amerikës”, shkroi Haradinaj në Facebook pas takimit.

Kjo është dita e dytë e vizitës së dy emisarëve në Prishtinë, pas së cilës ata do të shkojnë edhe në Beograd.

Pas takimeve me presidenten Vjosa Osmani dhe kryeministrin Albin Kurti dje, diplomati evropian Miroslav Lajçak tha se do t’i vazhdojnë diskutimet me ta lidhur me planet për javët dhe muajt e ardhshëm.

“Kjo ishte një mundësi e mirë për të diskutuar për planet tona në javët dhe muajt e ardhshëm”, tha ai.

Emisari evropian tha se do të qëndrojnë në Kosovë deri të mërkurën. Deri të nesërmen, ai theksoi se shpreson që “ta kemi një fotografi më të qartë të asaj se çfarë duhet të presim nga e ardhmja dhe se si të ndërtohet procesi”.

Ndërsa Escobar siguroi se Kosova e ka një partner dhe mik të mirë përkrah. “Ju duhet të jeni miq me Shtetet e Bashkuara”, tha ai, ndërsa foli se si Kosova duhet ta ndjek edhe rrugën e saj të integrimit në BE.

“Nga perspektiva amerikane dua vetëm të theksoj se Shtetet e Bashkuara mbështesin pavarësinë dhe sovranitetin e Kosovës”, tha paraprakisht diplomati amerikan. /Express

The post Dita e dytë e emisarëve në Kosovë, opozitarët me qëndrime 100% të njëjta në ambasadë appeared first on Albeu.com.

Deputetët e partive opozitare kanë akuzuar Qeverinë e Kosovës për keqmenaxhim të situatës me energji elektrike dhe i kanë kundërshtuar propozimet për rritje të çmimit të energjisë.

Ata ia kanë ndërprerë fjalën zëvendëskryeministrit Besnik Bislimi, pasi ky i fundit u ka thënë deputetëve se po manipulojnë me shifrat për rritje të çmimit.

Shefi i Grupit Parlamentar të Partisë Demokratike të Kosovës, Abelard Tahiri, ka thënë se në proces do të kenë një mocion procedural që lidhet me këtë çështje dhe ka ftuar partitë tjera në Kuvend që ta mbështesin.

Arben Gashi, shef i Grupit Parlamentar të Lidhjes Demokratike të Kosovës, e ka akuzuar kryeministrin Kurti se është i paftë ta menaxhojë situatën.

“Qytetarët e Kosovës po përballen me një krizë të jashtëzakonshme dhe me një kërcënim nga Qeveria për rritje të çmimit të energjisë përreth 300 për qind”.

Deputeti i Aleancës për Ardhmërinë e Kosovës, Besnik Tahiri, tha se janë mbi 200 mijë familje që shpenzojnë mbi 800 kilovat.

Sipas tij, Kosova po bëhet një nga shtetet me çmimin më të lartë të energjisë.

Shefja e Grupit Parlamentar të Lëvizjes Vetëvendosje, Mimoza Kusari- Lila, ka thënë se për situatën e krijuar edhe me çështjen e energjisë elektrike fajtore janë qeveritë e kaluara.

“Nuk është Lëvizja Vetëvendosje që solli këtë gjendje, janë veprimet apo mosveprimet e partive që ishin në pushtet, të cilat e sollën faturën që sot po ballafaqohemi të gjithë”, ka thënë Kusari Lila.

Kurti: Kemi paguar 2.5 milionë euro për import të energjisë

Kryeministri i Kosovës, Albin Kurti, ka bërë të ditur se totali i gjenerimit të energjisë elektrike, me kapacitet vendor më 19 janar ka qenë 727 megavat, ndërkaq konsumi ka arritur deri në 1,317 megavat.

Sipas Kurtit, importi ka qenë mbi 10 gigavat orë.

Kurti ka thënë se çmimi bazë për megavat në orë ka qenë 227 euro, ndërkaq çmimi maksimal 245 euro.

“Nëse marrim përafërsisht 240 euro një megavat orë që e kemi blerë, në mënyrë që të ketë furnizim të qëndrueshëm, në kushtet kur konsumojmë shumë më tepër se gjenerojmë, kur e shumëzojmë, del se dje, më 19 janar, kemi paguar për import të energjisë, 2.5 milionë euro”, ka deklaruar Kurti.

“Ku t’i marrim 2.5 milionë euro? Asnjëri nuk dëshiron që energjia të jetë e shtrenjtë”, ka thënë Kurti.

Propozimi i Zyrës së Rregullatorit për Energji në Kosovë, për ngritje të tarifave të energjisë së shpenzuar elektrike i ka ndarë konsumatorët në pesë kategori: A, B, C, D, E.

Siç shpjegohet në Raportin Konsultativ të ZRRE-së, rritja e çmimit të energjisë prek vetëm dy kategori të amvisërive, D dhe E, përkatësisht ata qytetarë që shpenzojnë mbi 800, përkatësisht mbi 1000 kilovatë.

Për kategorinë D, që shpenzon 800 kilovatë orë energji elektrike në muaj, fatura pritet të rritet për 12 euro e 31 centë.

Për qytetarët në kategorinë E, që shpenzojnë 1000 kilovatë orë energji elektrike në muaj, fatura pritet të rritet për 24 euro e 62 centë.

Që rritja e faturave të energjisë elektrike të mos jetë aq e lartë dhe të mos bëhet e papërballueshme për një kategori të qytetarëve, Qeveria e Kosovës ka ndarë një shumë prej 75 milionë eurosh në formë subvencionimi.

Këto subvencione vlejnë edhe për bizneset, për të cilat – edhe pas propozimit të ZRRE-së nëse miratohet – nuk do të ketë rritje të tarifave të energjisë elektrike.

ZRRE-ja ka dalë me propozimin për rritje të faturave më 17 janar, pasi çmimet e energjisë elektrike janë rritur edhe në tregjet evropiane, duke i ndikuar kështu edhe çmimet e importeve të Kosovës.

Faturat me rritje, në rast se propozimi i ZRRE-së kalon, do të fillojnë nga data 1 shkurt 2022 dhe shqyrtimi i rregullt i tyre pritet të bëhet në muajin mars të vitit 2023./REL

The post Opozita e Kosovës kërkon anulimin e propozimit për rritjen e çmimit të rrymës appeared first on Albeu.com.

Përkundër presionit ndërkombëtar ndaj Qeverisë së Kosovës për mbajtjen e referendumit të Serbisë në Kosovë, liderët e tri partive opozitare janë në një vijë me kryeministrin Kurti, kundër mbajtjes së referendumit të Serbisë në Kosovës.

Lideri i LDK-së, Lumir Abdixhiku, ka shkruar në Facebook se partia e tij pret respektim të Kushtetutës dhe ligjeve të Kosovës.

“Lidhja Demokratike e Kosovës e sheh të papranueshëm mbajtjen e çfarëdo referendumi të një shteti tjetër në territorin e Republikës së Kosovës. Kushtetuta e Kosovës, ligjet e Kosovës dhe praktikat ndërkombëtare, janë të qarta në këtë drejtim. Prandaj ne presim dhe mbështesim respektimin e këtyre normave në plotni.”, ka shkruar Abdixhiku.

Edhe për kreun e PDK-së, Memli Krasniqin, është antikushtetuese mbajtja e referendumit të Serbisë në Kosovë.

Ai ka deklaruar për Express se kjo do të përbënte shkelje flagrante të sovranitetit të Republikës së Kosovës.

“Partia Demokratike e Kosovës konsideron se mbajtja e referendumit të Serbisë në Kosovë është antikushtetuese dhe kjo do të përbënte shkelje flagrante të sovranitetit të Republikës së Kosovës. Ka dallim esencial ndërmjet zgjedhjeve dhe referendumit, andaj është i papranueshëm lejimi i votimit në Kosovë për referendumin e një shteti fqinj”, ka deklaruar Krasniqi.

Ai tutje ka shtuar se “Qeveria duhet të bashkërendojë veprimet me partnerët ndërkombëtarë për të ofruar zgjidhje të përshtatshme, në pajtim me obligimet tona si shtet i pavarur dhe sovran”.

Ndërkaq zëdhënësi i AAK-së, Lulëzim Blaka, ka deklaruar për Express se ky referendum është përpjekje për ta ushtruar sovranitetin e Serbisë mbi Kosovën.

“Në territorin e Republikës së Kosovës, nuk mund të organizohen kurrfarë referendumesh të shteteve të tjera, e as referendum i Serbisë, i cili pastër është përpjekje për ushtrimin e sovranitetit të Serbisë mbi Kosovën”, ka deklaruar Blaka.

Blaka tha se AKK-ja i mbështet të gjithë ata që e kundërshtojnë organizimin e këtij referendumi.

“Inkurajojmë dhe mbështesim të gjithë ata që e kundërshtojnë organizimin e këtij referendumi. Presim që zyrtarët e BE-së të jenë, së paku të paanshëm në raport me këtë çështje kaq të ndjeshme juridike e politike”, ka deklaruar Blaka.

BE-ja dhe shtetet e QUINT-it po kërkojnë nga kryeministri Kurti që të lejojë votimin e serbëve të Kosovës për referendumin që do të mbahet në Serbi të dielën bazuar në praktikat e më hershme të votimit, ku OSBE-ja ka mbledhur votat.

Këtë gjë po e kundërshton shefi i qeverisë së Kosovës me arsyetimin se “mbajtja e një referendumi në një shtet sovran i një shtetit tjetër s’është praktikë që pranohet nga asnjë shtet demokratik”.

Qeveria e Kosovës ka bërë të ditur se serbët e Kosovës që kanë shtetësi të dyfishtë mund të votojnë në referendumin e Serbisë përmes dy formave, asaj me postë dhe përmes Zyrës Ndërlidhëse të Serbisë në Kosovë.

Ambasadorët e ShBA-së, Britanisë, Gjermanisë, Francës e Italisë sot i kanë shkuar në zyrë edhe presidentes Vjosa Osmani. Pas këtij takimi të përbashkët ka folur kryeministri Albin Kurti, i cili ka treguar se do të thërrasë seancë të jashtëzakonshme për nesër, derisa do të dal sot me një komunikatë të përbashkët me Kuvendin dhe Presidencën.

Qytetarët e Serbisë, më 16 janar, do të deklarohen me “po” apo “jo” për një pyetje: “A jeni për konfirmimin e aktit për ndryshimin e Kushtetutës së Republikës së Serbisë?”.

Ndryshimet kanë të bëjnë me gjyqësorin dhe Serbia është obliguar për to në procesin e anëtarësimit në Bashkimin Evropian. Siç kanë shpjeguar vazhdimisht përfaqësuesit e BE-së, qëllimi i ndryshimit të kushtetutës së Serbisë është që të arrihet një gjyqësor i pavarur, pa ndikim politik dhe për sundim të ligjit./Express

The post Presioni ndërkombëtar për referendumin, opozita e unifikuar në përkrahje të Kurtit appeared first on Albeu.com.