Zyra Kombëtare e Auditimit ka bërë publike rezultatet e auditimit me titull “Siguria e nxënësve në shkollat publike në Kosovë”, i cili përfshin klasat VI-XII dhe periudhën 2022-2025.

Gjatë tryezës së diskutimit, drejtoresha e Auditimit, Ariana Gjonbalaj, deklaroi se 33% e 771 nxënësve të anketuar në Gjakovë, Ferizaj dhe Prishtinë kanë pohuar se janë përballur me dhunë ose bullizim.

Të dhënat e auditimit tregojnë gjithashtu se 15% e nxënësve të përfshirë në anketë nuk ndihen të lirë t’i raportojnë raste të tilla.

Në këtë tryezë u trajtuan edhe kërkesat që paraqiten më shpesh, mes tyre kontrolli i nxënësve, shtimi i kamerave dhe rojeve, ndërmarrja e masave disiplinore, organizimi i aktiviteteve kundër bullizimit, si dhe rritja e mbështetjes nga mësimdhënësit dhe psikologët.

The post ZKA për sigurinë në shkolla: 33% e 771 nxënësve të anketuar raportuan dhunë ose bullizim appeared first on Albeu.com.

Mjete të bazuara në inteligjencën artificiale, të krijuara nga të rinj, mësues dhe mentorë të teknologjisë në Kosovë, synojnë ta bëjnë procesin mësimor më të qasshëm dhe gjithëpërfshirës. Lajmi është bërë i ditur nga UNICEF-i në Kosovë.

Zhvillimi i këtyre zgjidhjeve u realizua gjatë një hakatoni treditor në Ferizaj, ku morën pjesë rreth 35 persona. Në aktivitet u angazhuan katër ekipe studentësh nga Universiteti i Prishtinës, të cilat bashkëpunuan me mësues, asistentë mësues dhe fëmijë me aftësi të kufizuara.

Fokusi kryesor i punës ishte gjetja e mënyrave se si inteligjenca artificiale mund t’u shërbejë mësuesve dhe asistentëve në klasat gjithëpërfshirëse, njoftoi UNICEF-i.

Problemet e trajtuara u përcaktuan nga vetë mësuesit. Ato përfshinin mungesën e qasjes në materiale mësimore, njohuritë e kufizuara mbi teknologjitë asistive, vështirësitë në matjen e progresit të nxënësve me aftësi të kufizuara, stigmatizimin, numrin e madh të nxënësve në klasa dhe mundësitë e kufizuara për trajnim.

Gjatë programit, studentët i analizuan këto vështirësi dhe më pas punuan në hartimin, testimin dhe përmirësimin e mjeteve konkrete.

“Kjo përvojë unike më dha mundësinë të mësoj shumë gjëra të reja, duke dëshmuar njëkohësisht se edhe me aftësi fillestare mund të ndërtoj zgjidhje domethënëse që ndikojnë pozitivisht në jetën e fëmijëve”, ka deklaruar studentja Jona Dika.

Çmimin e zgjidhjes më të mirë e fitoi “MësoLehtë AI”. Përmes këtij mjeti, mësuesit mund të ngarkojnë një tekst të ndërlikuar dhe ta përshtatin atë sipas nevojave të ndryshme të nxënësve. Platforma ofron thjeshtimin e përmbajtjes në nivele të ndryshme, shpjegimin e fjalorit, krijimin e kuizeve dhe funksionin tekst-në-zë në shqip dhe anglisht.

Tri ekipet e tjera prezantuan zgjidhje për planifikimin individual të arsimit, shndërrimin e materialeve në formate më të qasshme dhe ndjekjen e përparimit të nxënësve.

UNICEF-i ka njoftuar se shkollat që morën pjesë në program do të kenë edhe më tej mbështetje teknike dhe mentorim, me qëllim përmirësimin dhe përdorimin e zgjidhjeve që kanë potencial.

Programi synon gjithashtu të rrisë aftësitë digjitale dhe njohuritë e të rinjve për inteligjencën artificiale, duke i përfshirë ata në krijimin e mjeteve që mund të largojnë pengesat dhe të ndihmojnë në zhvillimin e arsimit gjithëpërfshirës, sipas UNICEF-it.

The post Të rinjtë në Kosovë zhvillojnë zgjidhje me AI për nxënësit me aftësi të kufizuara appeared first on Albeu.com.

Për vitin shkollor 2026/2027, Ministria e Arsimit dhe Shkencës (MASh) ka bërë të ditur se do të ofrojë 100 bursa për nxënësit e Arsimit dhe Aftësimit Profesional (AAP), me synim që të inkurajojë regjistrimin në drejtimet deficitare dhe të shtojë përfshirjen e vajzave në drejtimet teknike.

Sipas njoftimit, këto bursa u dedikohen nxënësve të klasës së dhjetë në Institucionet e Arsimit dhe Aftësimit Profesional (IAAP). Vlera e secilës bursë është 50 euro në muaj, ose 500 euro për një vit shkollor, pa përfshirë muajt korrik dhe gusht.

“Ministria e Arsimit dhe Shkencës, edhe për vitin shkollor 2026/2027, do të mbështesë nxënësit e Arsimit dhe Aftësimit Profesional (AAP) përmes ndarjes së 100 bursave, me synim nxitjen e regjistrimit në drejtimet deficitare dhe rritjen e pjesëmarrjes së vajzave në drejtimet teknike. Bursat janë të dedikuara për nxënësit e klasës së dhjetë në IAAP dhe kanë vlerën 50 euro në muaj, përkatësisht 500 euro për vitin shkollor, ndërsa mbështetja do të vazhdojë për tri vite të shkollimit, sipas kritereve të përcaktuara”, thuhet në njoftim.

Nga numri i përgjithshëm prej 100 bursash, 70 janë paraparë për nxënësit që regjistrohen në drejtimet deficitare, ndërsa 30 të tjera janë rezervuar për vajzat që përzgjedhin drejtimet teknike.

“Nga numri i përgjithshëm i bursave, 70 janë të destinuara për nxënësit që regjistrohen në drejtimet deficitare, ndërsa 30 për vajzat që zgjedhin drejtimet teknike, me qëllim zhvillimin e aftësive profesionale në fushat ku tregu i punës ka nevojë për kuadro të reja”, thuhet më tej.

Ministria ka sqaruar se periudha e aplikimit nis më 9 korrik dhe përfundon më 1 tetor 2026. Dokumentacioni dhe aplikimi dorëzohen në IAAP, ndërsa drejtorët e këtyre institucioneve kanë obligim që aplikacionet t’i përcjellin në MASh, përkatësisht në Departamentin e Arsimit dhe Aftësimit Profesional, deri më 5 tetor 2026.

The post MASh shpall 100 bursa për nxënësit e Arsimit Profesional për vitin 2026/2027, afati i aplikimit deri më 1 tetor appeared first on Albeu.com.

Tawjihi — provimi zyrtar i shkollës së mesme që zhvillohet në të gjitha territoret palestineze dhe Jordaninë — është planifikuar të zhvillohet nga 20 qershori deri më 8 korrik.

Raportohet se rreth 658,000 fëmijë në moshë shkollore nuk kanë ndjekur mësimin fizikisht për më shumë se dy vjet rresht.

UNICEF vlerëson se 91.8% e objekteve arsimore në Gaza tani kërkojnë rindërtim të plotë.

Më shumë se 740 shkolla janë tërësisht jashtë funksionit, ndërsa qindra të tjera janë shndërruar në strehimore për personat e zhvendosur.

Mohammed Hamdan, drejtor i arsimit në Gazën qendrore, tha se përgatitjet po bëheshin në kushte që nuk i kishte hasur kurrë më parë.

“Po punojmë shumë për të siguruar minimumin e nevojshëm të mobiljeve shkollore në mënyrë që nxënësit të mund të ulen të paktën në një karrige gjatë provimeve, përveç sigurimit të disa materialeve thelbësore shkrimi dhe përgatitjes së sallave të provimeve në nivelin minimal të nevojshëm për të përmbushur nevojat e nxënësve”, tha ai.

“Ka njerëz që nuk mund ta imagjinojnë një student që studion pa pasur shënime ose një libër shkollor për të ndjekur,” tha Hamdan.

“Kjo është një nga sfidat më të mëdha me të cilat përballemi”, shtoi ai.

Ndryshe, Ministria Palestineze e Arsimit ka hapur regjistrimin jo vetëm për nxënësit që përfunduan klasën e 11-të në vitin aktual akademik, por edhe për ata që nuk ishin në gjendje të përmbushnin kërkesat e diplomimit në sesionet e provimeve 2023, 2024 dhe 2025 – një përpjekje për të absorbuar dy vjet ndërprerje të akumuluara.

The post Nxënësit në Gaza do t’i japin provimet në tenda dhe ndërtesa të shkatërruara appeared first on Albeu.com.

Të dhënat më të fundit zyrtare nga INSTAT, tregojnë se brenda vetëm një viti akademik 2024-2025, numri i përgjithshëm i nxënësve që ndjekin arsimin 9 vjeçar dhe te mesëm ka pësuar një rënie me 10,020 personash ose 3%.

Numri total i të regjistruarve në të gjitha nivelet arsimore, ka zbritur nga 349,827 nxënës që ishin në vitin akademik 2023-24, në 339,807 nxënës në vitin vijues 2024-25.

Duke marrë në konsideratë se numri mesatar i nxënësve për kasë është 25, i bie që gjatë vitit shkollor 2024-2025 të jenë mbyllur 400 klasa.

Kjo rënie reflektohet në mënyrë të ngjashme në të gjitha ciklet e shkollimit, por goditjen më të rëndë e ka marrë arsimi fillor, i cili ka humbur numrin më të madh të nxënësve.

Ky cikël ka pësuar një tkurrje prej 4,710 fëmijësh më pak, duke u tkurrur me 3% dhe duke zbritur në 136,379 nxënës të regjistruar.

I njëjti trend negativ vërehet edhe në ciklin e lartë të arsimit bazë, ku numri i nxënësve ra me 2,745 persona, duke shkuar në 114,238 nga rreth 117 mijë që ishin një vit më parë.

Në të njëjtin trend ishte ecuria edhe ne arsimin e mesëm, ku gjimnazet dhe shkollat profesionale numërojnë 2,565 nxënës më pak për vitin akademik 2024-25, ç`ka përkon me një rënie prej 3% të këtij grupi.

Ekspertët e fushës e shohin këtë dinamikë si një kambanë alarmi, pasi zbrazja e klasave në arsimin fillor parashikon një tkurrje afatgjatë që do të zhvendoset gradualisht edhe në universitetet e vendit dhe në tregun e punës në vitet në vijim.

Emigracioni i familjeve të reja mbetet një nga shkaqet kryesore dhe më të dukshme. Ndryshe nga vitet e kaluara ku emigronin kryesisht individë të vetëm, vitet e fundit vihet re emigrim me familje.

Rënia e lindshmërisë është një tjetër faktor me ndikim afatgjatë. Ndryshimi i stilit të jetesës, kostot e rritura të jetesës dhe shtyrja në kohë e moshës për të krijuar familje kanë sjellë një rënie të ndjeshme të numrit të lindjeve të reja çdo vit.

Vitin e kaluar linden rreth 21400 foshnja në të gjithë vendin nga 32,715 të tilla në vitin 2015.

Krahas largimit jashtë vendit, ekziston edhe një braktisje e zonave rurale dhe qyteteve të vogla drejt qendrave të mëdha urbane si Tirana apo Durrësi.

Ndërsa në kryeqytet disa shkolla mund të përballen ende me mbingarkesë, në rrethe dhe në fshatra situata është kritike, duke çuar shpesh në mbylljen e shkollave apo krijimin e klasave kolektive për shkak të mungesës së nxënësve.

Tkurrja me mbi 10 mijë nxënës brenda një viti në arsimin para-universitar do të reflektohet në goditje zinxhir në të gjithë ekonominë, tregun e punës.

Në planin afatshkurtër, rënia e numrit të nxënësve sjell një çekuilibër të menjëhershëm në menaxhimin e burimeve njerëzore në arsim. Mbyllja e klasave apo e tërë shkollave, veçanërisht në zonat rurale dhe qytetet e vogla, krijon një tepricë të stafit mësimor.

Kjo do të thotë se qeverisë do t’i duhet të rishikojë formulën e financimit të shkollave, ndërsa mësuesit rrezikojnë të mbeten pa normë të plotë orësh ose pa punë.

Nga ana tjetër, rënia e numrit të nxënësve në shkollat e mesme përkthehet automatikisht në më pak aplikime në universitete pas pak vitesh, duke vënë në rrezik ekzistencën e shumë degëve të studimit, sidomos në universitetet rajonale./monitor/

The post Plakja e popullsisë dhe emigracioni i të rinjve shqetësuese, 10 mijë nxënës më pak në arsimin parauniversitar në 2024-2025 appeared first on Albeu.com.

Video-denoncimi është bërë publik nga deputeti Saimir Korreshi. Në pamjet e publikuara shihen se tualetet janë jashtë çdo standardi; pa dyer dhe pa dritare, të degraduara dhe thuasje të papërdorshme.

Situata bëhet edhe më alarmante nga fakti se në këto ambiente është konstatuar edhe prania e gjarpërinjve, duke e kthyer shkollën në një vatër rreziku për nxënësit.

Gjendja e oborrit të shkollës po ashtu është e mbushur me mbeturina. Në reagimin e tij, Korreshi ironizon me “reformat në arsim”, duke theksuar kontrastin mes deklaratave zyrtare dhe realitetit në terren.

Video-denoncimi i plotë:

Situata e banjove. Pa derë, pa penxhere. Kur thosha që kemi të bëjmë me qenefe, ju thonit, urdhëro se i keni. Kjo është sekuencë: qenef, banjo, ambient, gjarpërinj. Kjo është situata me të cilën përballen kalamajtë nëpër fshatra. Reforma e këtyre në arsim që na hoqën mendjen dhe që na i tregojnë. Urdhëro! Është ulëritëse, s’është ulëritëse?! Kur them që janë banjo pa… pa dyer, i heqin njerëzit, detyrohen, janë qenefe, hale. Hale, hale, e patë vet, hale. Urdhëro oborri i shkollës, na si e kemi, shiko. Shiko si ke plehrat me oborrin e shkollës. Ja dhe unë te kalamajtë. Shiko këtu mbrapa çfarë ke, domethënë çfarë tmerri. Faqe e zezë!

The post Saimir Korreshi publikon pamjet: Na hoqën mendjen me reformat në arsim, nxënësit në Thanë të Lushnjes mësojnë në kushte çnjerëzore (VIDEO) appeared first on Albeu.com.

Sipas qytetarit denoncues, ngjarja ka ndodhur në “Maarif Elbasan Campus”, ku drejtori Fatih Konuksever, siç pretendohet edhe në pamjet filmike, u merr ushqimin nga duart nxënësve dhe e hedh në mënyrë të papërshtatshme.

Por jo vetëm kaq, në denoncim thuhet se drejtori shfaq edhe sjellje agresive ndaj fëmijëve, duke i shtyrë fizikisht, veprime që konsiderohen të rënda dhe të papranueshme në një ambient arsimor.

Fatih Konuksever

“Kjo sjellje agresive dhe mungesë respekti ndaj fëmijëve është e patolerueshme dhe kërkon vëmendje urgjente”, thuhet në mesazhin e mbërritur në redaksi, ku kërkohet gjithashtu verifikimi dhe trajtimi sa më i shpejtë i rastit.

Ngjarja ngre pikëpyetje serioze mbi sigurinë dhe trajtimin e nxënësve në shkolla, ndërsa pritet një reagim nga institucionet përgjegjëse për të sqaruar situatën dhe për të marrë masat e nevojshme.

Mesazhi i denoncuesit:

“Përshëndetje “Piranjat”, Dua të denoncoj një rast shumë shqetësues që ka ndodhur në Maarif Elbasan Campus. Drejtori, Fatih Konuksever, siç shihet edhe në video, ka marrë bukën e fëmijëve dhe e ka hedhur ne menyre te papranueshme. Gjithashtu, ai i shtyn fëmijët, çka përbën dhunë fizike dhe është krejtësisht e papranueshme.

Kjo sjellje agresive dhe mungesë respekti ndaj fëmijëve është e patolerueshme dhe kërkon vëmendje urgjente. Ju lutem ta verifikoni dhe ta trajtoni këtë rast sa më shpejt. Faleminderit!”. /Piranjat

The post SKANDAL/ Çmendet drejtori i shkollës në Elbasan, u merr ushqimin nga dora nxënësve dhe ushtron dhunë ndaj tyre (EMRI+VIDEO) appeared first on Albeu.com.

Zëdhënësi i presidentit, Sunday Dare, shkroi në rrjetin social X se “130 nxënësit e rrëmbyer janë liruar, asnjë nuk ka mbetur në robëri”, duke e shoqëruar njoftimin me një foto të fëmijëve të buzëqeshur.
Rrëmbimi ndodhi në fund të nëntorit, kur persona të armatosur sulmuan shkollën e konviktit St Mary, në zonën rurale Papiri, në Nigerin qendror, duke marrë me vete qindra nxënës dhe anëtarë të stafit. Më herët, rreth 100 nxënës ishin liruar në fillim të dhjetorit, ndërsa disa të tjerë kishin arritur të shpëtonin menjëherë pas sulmit.

Numri i saktë i personave të rrëmbyer ka qenë i paqartë që nga fillimi. Shoqata e Krishterë e Nigerisë (CAN) deklaroi se gjithsej 315 nxënës dhe punonjës ishin marrë peng. Sipas qeverisë, pas lirimit të mëparshëm, rreth 115 persona mbeteshin ende në robëri, një shifër që ka shkaktuar konfuzion mbi bilancin real.
Deri tani, autoritetet nuk kanë bërë publik se kush qëndron pas rrëmbimit, as mënyrën se si u sigurua lirimi i fëmijëve. Rrëmbimet për shpërblim janë një fenomen i shpeshtë në Nigeri dhe përdoren si burim fitimi nga banda kriminale dhe grupe të armatosura.
Ngjarja vjen në një kohë kur Nigeria po përballet me një valë të re rrëmbimesh masive, që kujton rrëmbimin famëkeq të vajzave nga Chibok nga Boko Haram në vitin 2014. Vetëm në nëntor janë raportuar rrëmbime të nxënëseve myslimane, besimtarëve në një kishë, si edhe të një nuseje me shoqërueset e saj.
Situata e sigurisë ka hyrë gjithashtu në qendër të vëmendjes ndërkombëtare, pasi ish-presidenti amerikan Donald Trump ka akuzuar se vrasjet masive të të krishterëve në Nigeri përbëjnë “gjenocid”, një pretendim që qeveria nigeriane dhe analistë të pavarur e hedhin poshtë.
Nigeria, një vend me rreth 230 milionë banorë dhe me përkatësi të ndryshme fetare, përballet me kërcënime të shumta sigurie – nga xhihadistët në verilindje, te bandat e armatosura në veriperëndim – ndërsa dhuna ka prekur si të krishterë, ashtu edhe myslimanë.

The post Rrëmbimi masiv në shkollën katolike, lirohen 130 nxënës të tjerë në Nigeri appeared first on Albeu.com.

Siç shfaqet edhe në pamje, në sherrin masiv janë përfshirë një grup i madh adoleshentësh, të cilët sulmojnë njëri-tjetrin me grushte dhe shkelma, ndërsa një prej të rinjve ka nxjerrë një thikë.

Ai ka qëlluar disa herë disa prej të rinjve të përfshirë në sherr.

The post Grushte dhe shkelma, publikohen pamjet nga sherri i dhunshëm mes nxënësve në Shkodër (VIDEO) appeared first on Albeu.com.

Sipas raportimeve, disa nxënës janë konfliktuar mes tyre për arsye ende të paqarta, ndërsa si pasojë e sherrit kanë mbetur të plagosur me thikë dy prej tyre.

Këta të fundit janë transportuar në spitalin rajonal të Shkodrës ku po marrin mjekim.

Nuk dihen ende shkaqet dhe rrethanat e sherrit, policia ndodhet në vendngjarje.

The post Sherr mes nxënësve të shkollës në Shkodër, plagosen dy të rinjtë appeared first on Albeu.com.